೯. ಅಪಾಯಿಮ್ಹವಗ್ಗೋ

೮೧. ಅಪಾಯಿಮ್ಹ ಅನಚ್ಚಿಮ್ಹ, ಅಗಾಯಿಮ್ಹ ರುದಿಮ್ಹ ಚ;

ವಿಸಞ್ಞಿಕರಣಿಂ ಪಿತ್ವಾ [ಪೀತ್ವಾ (ಸೀ. ಸ್ಯಾ. ಪೀ.)], ದಿಟ್ಠಾ ನಾಹುಮ್ಹ ವಾನರಾತಿ.

ಸುರಾಪಾನಜಾತಕಂ ಪಠಮಂ.

೮೨. ಅತಿಕ್ಕಮ್ಮ ರಮಣಕಂ, ಸದಾಮತ್ತಞ್ಚ ದೂಭಕಂ;

ಸ್ವಾಸಿ ಪಾಸಾಣಮಾಸೀನೋ, ಯಸ್ಮಾ ಜೀವಂ ನ ಮೋಕ್ಖಸೀತಿ.

ಮಿತ್ತವಿನ್ದಕಜಾತಕಂ ದುತಿಯಂ.

೮೩. ಮಿತ್ತೋ ಹವೇ ಸತ್ತಪದೇನ ಹೋತಿ, ಸಹಾಯೋ ಪನ ದ್ವಾದಸಕೇನ ಹೋತಿ;

ಮಾಸಡ್ಢಮಾಸೇನ ಚ ಞಾತಿ ಹೋತಿ, ತತುತ್ತರಿಂ ಅತ್ತಸಮೋಪಿ ಹೋತಿ;

ಸೋಹಂ ಕಥಂ ಅತ್ತಸುಖಸ್ಸ ಹೇತು, ಚಿರಸನ್ಥುತಂ [ಚಿರಸನ್ಧವಂ (ಕ.), ಚಿರಸತ್ಥುನಂ (ಪೀ.)] ಕಾಳಕಣ್ಣಿಂ ಜಹೇಯ್ಯನ್ತಿ.

ಕಾಲಕಣ್ಣಿಜಾತಕಂ ತತಿಯಂ.

೮೪. ಆರೋಗ್ಯಮಿಚ್ಛೇ ಪರಮಞ್ಚ ಲಾಭಂ, ಸೀಲಞ್ಚ ವುದ್ಧಾನುಮತಂ ಸುತಞ್ಚ;

ಧಮ್ಮಾನುವತ್ತೀ ಚ ಅಲೀನತಾ ಚ, ಅತ್ಥಸ್ಸ ದ್ವಾರಾ ಪಮುಖಾ ಛಳೇತೇತಿ.

ಅತ್ಥಸ್ಸದ್ವಾರಜಾತಕಂ ಚತುತ್ಥಂ.

೮೫. ಆಯತಿಂ ದೋಸಂ ನಾಞ್ಞಾಯ, ಯೋ ಕಾಮೇ ಪಟಿಸೇವತಿ;

ವಿಪಾಕನ್ತೇ ಹನನ್ತಿ ನಂ, ಕಿಂಪಕ್ಕಮಿವ ಭಕ್ಖಿತನ್ತಿ.

ಕಿಂಪಕ್ಕಜಾತಕಂ ಪಞ್ಚಮಂ.

೮೬. ಸೀಲಂ ಕಿರೇವ ಕಲ್ಯಾಣಂ, ಸೀಲಂ ಲೋಕೇ ಅನುತ್ತರಂ;

ಪಸ್ಸ ಘೋರವಿಸೋ ನಾಗೋ, ಸೀಲವಾತಿ ನ ಹಞ್ಞತೀತಿ.

ಸೀಲವೀಮಂಸಕಜಾತಕಂ ಛಟ್ಠಂ.

೮೭. ಯಸ್ಸ ಮಙ್ಗಲಾ ಸಮೂಹತಾಸೇ [ಸಮೂಹತಾ (ಸೀ. ಸ್ಯಾ. ಪೀ. ಸು. ನಿ. ೩೬೨], ಉಪ್ಪಾತಾ [ಉಪ್ಪಾದಾ (ಪೀ.)] ಸುಪಿನಾ ಚ ಲಕ್ಖಣಾ ಚ;

ಸೋ [ಸ (ಸೀ. ಪೀ. ಕ.)] ಮಙ್ಗಲದೋಸವೀತಿವತ್ತೋ, ಯುಗಯೋಗಾಧಿಗತೋ ನ ಜಾತುಮೇತೀತಿ.

ಮಙ್ಗಲಜಾತಕಂ ಸತ್ತಮಂ.

೮೮. ಕಲ್ಯಾಣಿಮೇವ ಮುಞ್ಚೇಯ್ಯ, ನ ಹಿ ಮುಞ್ಚೇಯ್ಯ ಪಾಪಿಕಂ;

ಮೋಕ್ಖೋ ಕಲ್ಯಾಣಿಯಾ ಸಾಧು, ಮುತ್ವಾ ತಪ್ಪತಿ ಪಾಪಿಕನ್ತಿ.

ಸಾರಮ್ಭಜಾತಕಂ ಅಟ್ಠಮಂ.

೮೯. ವಾಚಾವ ಕಿರ ತೇ ಆಸಿ, ಸಣ್ಹಾ ಸಖಿಲಭಾಣಿನೋ;

ತಿಣಮತ್ತೇ ಅಸಜ್ಜಿತ್ಥೋ, ನೋ ಚ ನಿಕ್ಖಸತಂ ಹರನ್ತಿ.

ಕುಹಕಜಾತಕಂ ನವಮಂ.

೯೦. ಯೋ ಪುಬ್ಬೇ ಕತಕಲ್ಯಾಣೋ, ಕತತ್ಥೋ ನಾವಬುಜ್ಝತಿ;

ಪಚ್ಛಾ ಕಿಚ್ಚೇ ಸಮುಪ್ಪನ್ನೇ, ಕತ್ತಾರಂ ನಾಧಿಗಚ್ಛತೀತಿ.

ಅಕತಞ್ಞುಜಾತಕಂ ದಸಮಂ.

ಅಪಾಯಿಮ್ಹವಗ್ಗೋ ನವಮೋ.

ತಸ್ಸುದ್ದಾನಂ –

ಅಪಾಯಿಮ್ಹ ಚ ದೂಭಕಂ ಸತ್ತಪದಂ, ಛಳದ್ವರ ಚ ಆಯತಿನಾ ಚ ಪುನ;

ಅಹಿಸೀಲವ ಮಙ್ಗಲಿ ಪಾಪಿಕಸ್ಸಾ, ಸತಂನಿಕ್ಖ ಕತತ್ಥವರೇನ ದಸಾತಿ.