೧೦. ಲಿತ್ತವಗ್ಗೋ

೯೧. ಲಿತ್ತಂ ಪರಮೇನ ತೇಜಸಾ, ಗಿಲಮಕ್ಖಂ ಪುರಿಸೋ ನ ಬುಜ್ಝತಿ;

ಗಿಲ ರೇ ಗಿಲ ಪಾಪಧುತ್ತಕ, ಪಚ್ಛಾ ತೇ ಕಟುಕಂ ಭವಿಸ್ಸತೀತಿ.

ಲಿತ್ತಜಾತಕಂ ಪಠಮಂ.

೯೨. ಉಕ್ಕಟ್ಠೇ ಸೂರಮಿಚ್ಛನ್ತಿ, ಮನ್ತೀಸು ಅಕುತೂಹಲಂ;

ಪಿಯಞ್ಚ ಅನ್ನಪಾನಮ್ಹಿ, ಅತ್ಥೇ ಜಾತೇ ಚ ಪಣ್ಡಿತನ್ತಿ.

ಮಹಾಸಾರಜಾತಕಂ ದುತಿಯಂ.

೯೩. ನ ವಿಸ್ಸಸೇ ಅವಿಸ್ಸತ್ಥೇ, ವಿಸ್ಸತ್ಥೇಪಿ ನ ವಿಸ್ಸಸೇ;

ವಿಸ್ಸಾಸಾ ಭಯಮನ್ವೇತಿ, ಸೀಹಂವ ಮಿಗಮಾತುಕಾತಿ [ಮಿಗಮಾತುಯಾ (ಕ.)].

ವಿಸಾಸಭೋಜನಜಾತಕಂ ತತಿಯಂ.

೯೪. ಸೋತತ್ತೋ ಸೋಸಿನ್ದೋ [ಸೋಸೀತೋ (ಸೀ. ಸ್ಯಾ. ಪೀ.), ಸೋಸಿನೋ (ಕ.)] ಚೇವ, ಏಕೋ ಭಿಂಸನಕೇ ವನೇ;

ನಗ್ಗೋ ನ ಚಗ್ಗಿಮಾಸೀನೋ, ಏಸನಾಪಸುತೋ ಮುನೀತಿ.

ಲೋಮಹಂಸಜಾತಕಂ ಚತುತ್ಥಂ.

೯೫. ಅನಿಚ್ಚಾ ವತ ಸಙ್ಖಾರಾ, ಉಪ್ಪಾದವಯಧಮ್ಮಿನೋ;

ಉಪ್ಪಜ್ಜಿತ್ವಾ ನಿರುಜ್ಝನ್ತಿ, ತೇಸಂ ವೂಪಸಮೋ ಸುಖೋತಿ.

ಮಹಾಸುದಸ್ಸನಜಾತಕಂ ಪಞ್ಚಮಂ.

೯೬. ಸಮತಿತ್ತಿಕಂ ಅನವಸೇಕಂ, ತೇಲಪತ್ತಂ ಯಥಾ ಪರಿಹರೇಯ್ಯ;

ಏವಂ ಸಚಿತ್ತಮನುರಕ್ಖೇ, ಪತ್ಥಯಾನೋ ದಿಸಂ ಅಗತಪುಬ್ಬನ್ತಿ.

ತೇಲಪತ್ತಜಾತಕಂ ಛಟ್ಠಂ.

೯೭. ಜೀವಕಞ್ಚ ಮತಂ ದಿಸ್ವಾ, ಧನಪಾಲಿಞ್ಚ ದುಗ್ಗತಂ;

ಪನ್ಥಕಞ್ಚ ವನೇ ಮೂಳ್ಹಂ, ಪಾಪಕೋ ಪುನರಾಗತೋತಿ.

ನಾಮಸಿದ್ಧಿಜಾತಕಂ ಸತ್ತಮಂ.

೯೮. ಸಾಧು ಖೋ ಪಣ್ಡಿತೋ ನಾಮ, ನ ತ್ವೇವ ಅತಿಪಣ್ಡಿತೋ;

ಅತಿಪಣ್ಡಿತೇನ ಪುತ್ತೇನ, ಮನಮ್ಹಿ ಉಪಕೂಳಿತೋತಿ [ಉಪಕೂಲಿತೋತಿ (ಸೀ.), ಉಪಕುಟ್ಠಿತೋತಿ (ಸ್ಯಾ.), ಉಪಕುಟಿತೋ (ಕ.)].

ಕೂಟವಾಣಿಜಜಾತಕಂ ಅಟ್ಠಮಂ.

೯೯. ಪರೋಸಹಸ್ಸಮ್ಪಿ ಸಮಾಗತಾನಂ, ಕನ್ದೇಯ್ಯುಂ ತೇ ವಸ್ಸಸತಂ ಅಪಞ್ಞಾ;

ಏಕೋವ ಸೇಯ್ಯೋ ಪುರಿಸೋ ಸಪಞ್ಞೋ, ಯೋ ಭಾಸಿತಸ್ಸ ವಿಜಾನಾತಿ ಅತ್ಥನ್ತಿ.

ಪರೋಸಹಸ್ಸಜಾತಕಂ ನವಮಂ.

೧೦೦. ಅಸಾತಂ ಸಾತರೂಪೇನ, ಪಿಯರೂಪೇನ ಅಪ್ಪಿಯಂ;

ದುಕ್ಖಂ ಸುಖಸ್ಸ ರೂಪೇನ, ಪಮತ್ತಮತಿವತ್ತತೀತಿ.

ಅಸಾತರೂಪಜಾತಕಂ ದಸಮಂ.

ಲಿತ್ತವಗ್ಗೋ ದಸಮೋ.

ತಸ್ಸುದ್ದಾನಂ –

ಗಿಲಮಕ್ಖಕುತೂಹಲ ಮಾತುಕಸ್ಸಾ, ಮುನಿನಾ ಚ ಅನಿಚ್ಚತ ಪತ್ತವರಂ;

ಧನಪಾಲಿವರೋ ಅತಿಪಣ್ಡಿತಕೋ, ಸಪರೋಸಹಸ್ಸಅಸಾತದಸಾತಿ.

ಮಜ್ಝಿಮೋ ಪಣ್ಣಾಸಕೋ.