೧೧. ಪರೋಸತವಗ್ಗೋ

೧೦೧. ಪರೋಸತಂ ಚೇಪಿ ಸಮಾಗತಾನಂ, ಝಾಯೇಯ್ಯುಂ ತೇ ವಸ್ಸಸತಂ ಅಪಞ್ಞಾ;

ಏಕೋವ ಸೇಯ್ಯೋ ಪುರಿಸೋ ಸಪಞ್ಞೋ, ಯೋ ಭಾಸಿತಸ್ಸ ವಿಜಾನಾತಿ ಅತ್ಥನ್ತಿ.

ಪರೋಸತಜಾತಕಂ ಪಠಮಂ.

೧೦೨. ಯೋ ದುಕ್ಖಫುಟ್ಠಾಯ ಭವೇಯ್ಯ ತಾಣಂ, ಸೋ ಮೇ ಪಿತಾ ದುಬ್ಭಿ [ದೂಭಿ (ಸೀ. ಪೀ.)] ವನೇ ಕರೋತಿ;

ಸಾ ಕಸ್ಸ ಕನ್ದಾಮಿ ವನಸ್ಸ ಮಜ್ಝೇ, ಯೋ ತಾಯಿತಾ ಸೋ ಸಹಸಂ [ಸಹಸಾ (ಸೀ. ಸ್ಯಾ. ಪೀ.)] ಕರೋತೀತಿ.

ಪಣ್ಣಿಕಜಾತಕಂ ದುತಿಯಂ.

೧೦೩. ಯತ್ಥ ವೇರೀ ನಿವಿಸತಿ [ನಿವಸತಿ (ಸೀ. ಕ.)], ನ ವಸೇ ತತ್ಥ ಪಣ್ಡಿತೋ;

ಏಕರತ್ತಂ ದಿರತ್ತಂ ವಾ, ದುಕ್ಖಂ ವಸತಿ ವೇರಿಸೂತಿ.

ವೇರಿಜಾತಕಂ ತತಿಯಂ.

೧೦೪. ಚತುಬ್ಭಿ ಅಟ್ಠಜ್ಝಗಮಾ, ಅಟ್ಠಾಹಿಪಿ ಚ ಸೋಳಸ;

ಸೋಳಸಾಹಿ ಚ ಬಾತ್ತಿಂಸ [ಬತ್ತಿಂಸ (ಸೀ. ಸ್ಯಾ. ಪೀ.)], ಅತ್ರಿಚ್ಛಂ ಚಕ್ಕಮಾಸದೋ;

ಇಚ್ಛಾಹತಸ್ಸ ಪೋಸಸ್ಸ, ಚಕ್ಕಂ ಭಮತಿ ಮತ್ಥಕೇತಿ.

ಮಿತ್ತವಿನ್ದಕಜಾತಕಂ ಚತುತ್ಥಂ.

೧೦೫. ಬಹುಮ್ಪೇತಂ ವನೇ ಕಟ್ಠಂ, ವಾತೋ ಭಞ್ಜತಿ ದುಬ್ಬಲಂ;

ತಸ್ಸ ಚೇ ಭಾಯಸೀ ನಾಗ, ಕಿಸೋ ನೂನ ಭವಿಸ್ಸಸೀತಿ.

ದುಬ್ಬಲಕಟ್ಠಜಾತಕಂ ಪಞ್ಚಮಂ.

೧೦೬. ಸುಖಂ ವತ ಮಂ ಜೀವನ್ತಂ [ಸುಖಕಂ ವತ ಜೀವಂ (ಕ.)], ಪಚಮಾನಾ ಉದಞ್ಚನೀ;

ಚೋರೀ ಜಾಯಪ್ಪವಾದೇನ, ತೇಲಂ ಲೋಣಞ್ಚ ಯಾಚತೀತಿ.

ಉದಞ್ಚನೀಜಾತಕಂ ಛಟ್ಠಂ.

೧೦೭. ಸಾಧು ಖೋ ಸಿಪ್ಪಕಂ ನಾಮ, ಅಪಿ ಯಾದಿಸ ಕೀದಿಸಂ;

ಪಸ್ಸ ಖಞ್ಜಪ್ಪಹಾರೇನ, ಲದ್ಧಾ ಗಾಮಾ ಚತುದ್ದಿಸಾತಿ.

ಸಾಲಿತ್ತಕಜಾತಕಂ ಸತ್ತಮಂ.

೧೦೮. ಸಿಕ್ಖೇಯ್ಯ ಸಿಕ್ಖಿತಬ್ಬಾನಿ, ಸನ್ತಿ ತಚ್ಛನ್ದಿನೋ [ಸಚ್ಛನ್ದಿನೋ (ಸೀ. ಪೀ.)] ಜನಾ;

ಬಾಹಿಯಾ ಹಿ [ಪಿ (ಸೀ. ಸ್ಯಾ. ಪೀ.)] ಸುಹನ್ನೇನ, ರಾಜಾನಮಭಿರಾಧಯೀತಿ.

ಬಾಹಿಯಜಾತಕಂ ಅಟ್ಠಮಂ.

೧೦೯. ಯಥನ್ನೋ ಪುರಿಸೋ ಹೋತಿ, ತಥನ್ನಾ ತಸ್ಸ ದೇವತಾ;

ಆಹರೇತಂ ಕುಣ್ಡಪೂವಂ [ಕಣಂ ಪೂವಂ (ಸೀ. ಪೀ.)], ಮಾ ಮೇ ಭಾಗಂ ವಿನಾಸಯಾತಿ.

ಕುಣ್ಡಪೂವಜಾತಕಂ ನವಮಂ.

೧೧೦. ಸಬ್ಬಸಂಹಾರಕೋ [ಸಬ್ಬಸಾಹಾರಕೋ (ಕ.)] ನತ್ಥಿ, ಸುದ್ಧಂ ಕಙ್ಗು ಪವಾಯತಿ;

ಅಲಿಕಂ ಭಾಯತಿಯಂ ಧುತ್ತೀ, ಸಚ್ಚಮಾಹ ಮಹಲ್ಲಿಕಾತಿ.

ಸಬ್ಬಸಂಹಾರಕಪಞ್ಹಜಾತಕಂ ದಸಮಂ.

ಪರೋಸತವಗ್ಗೋ ಏಕಾದಸಮೋ.

ತಸ್ಸುದ್ದಾನಂ –

ಸಪರೋಸತ ತಾಯಿತ ವೇರೀ ಪುನ, ಭಮಚಕ್ಕಥ ನಾಗಸಿರಿವ್ಹಯನೋ;

ಸುಖಕಞ್ಚ ವತ ಸಿಪ್ಪಕ ಬಾಹಿಯಾ, ಕುಣ್ಡಪೂವ ಮಹಲ್ಲಿಕಕಾ ಚ ದಸಾತಿ.