೧೨. ಹಂಚಿವಗ್ಗೋ

೧೧೧. ಹಂಚಿ [ಹಂಸಿ (ಸೀ. ಸ್ಯಾ.), ಹಞ್ಚಿ (?)] ತುವಂ ಏವಮಞ್ಞಸಿ ಸೇಯ್ಯೋ, ಪುತ್ತೇನ ಪಿತಾತಿ ರಾಜಸೇಟ್ಠ;

ಹನ್ದಸ್ಸತರಸ್ಸ ತೇ ಅಯಂ, ಅಸ್ಸತರಸ್ಸ ಹಿ ಗದ್ರಭೋ ಪಿತಾತಿ.

ಗದ್ರಭಪಞ್ಹಜಾತಕಂ ಪಠಮಂ.

೧೧೨. ಯೇನ ಸತ್ತುಬಿಲಙ್ಗಾ ಚ, ದಿಗುಣಪಲಾಸೋ ಚ ಪುಪ್ಫಿತೋ;

ಯೇನ ದದಾಮಿ [ಯೇನಾ’ದಾಮಿ (ಸೀ. ಸ್ಯಾ.)] ತೇನ ವದಾಮಿ, ಯೇನ ನ ದದಾಮಿ [ಯೇನ ನಾ’ದಾಮಿ (ಸೀ. ಸ್ಯಾ.)] ನ ತೇನ ವದಾಮಿ;

ಏಸ ಮಗ್ಗೋ ಯವಮಜ್ಝಕಸ್ಸ, ಏತಂ ಛನ್ನಪಥಂ ವಿಜಾನಾಹೀತಿ.

ಅಮರಾದೇವೀಪಞ್ಹಜಾತಕಂ ದುತಿಯಂ.

೧೧೩. ಸದ್ದಹಾಸಿ ಸಿಙ್ಗಾಲಸ್ಸ [ಸಿಗಾಲಸ್ಸ (ಸೀ. ಸ್ಯಾ. ಪೀ.)], ಸುರಾಪೀತಸ್ಸ ಬ್ರಾಹ್ಮಣ;

ಸಿಪ್ಪಿಕಾನಂ ಸತಂ ನತ್ಥಿ, ಕುತೋ ಕಂಸಸತಾ ದುವೇತಿ.

ಸಿಙ್ಗಾಲಜಾತಕಂ ತತಿಯಂ.

೧೧೪. ಬಹುಚಿನ್ತೀ ಅಪ್ಪಚಿನ್ತೀ, ಉಭೋ ಜಾಲೇ ಅಬಜ್ಝರೇ;

ಮಿತಚಿನ್ತೀ ಪಮೋಚೇಸೀ, ಉಭೋ ತತ್ಥ ಸಮಾಗತಾತಿ.

ಮಿತಚಿನ್ತಿಜಾತಕಂ ಚತುತ್ಥಂ.

೧೧೫. ಯಾಯಞ್ಞ [ಯಾಯಞ್ಞೇ (ಕ.)] ಮನುಸಾಸತಿ, ಸಯಂ ಲೋಲುಪ್ಪಚಾರಿನೀ;

ಸಾಯಂ ವಿಪಕ್ಖಿಕಾ ಸೇತಿ, ಹತಾ ಚಕ್ಕೇನ ಸಾಸಿಕಾತಿ [ಸಾಲಿಕಾತಿ (ಸೀ. ಸ್ಯಾ. ಪೀ.)].

ಅನುಸಾಸಿಕಜಾತಕಂ ಪಞ್ಚಮಂ.

೧೧೬. ಅತಿಕರಮಕರಾಚರಿಯ, ಮಯ್ಹಮ್ಪೇತಂ ನ ರುಚ್ಚತಿ;

ಚತುತ್ಥೇ ಲಙ್ಘಯಿತ್ವಾನ, ಪಞ್ಚಮಾಯಸಿ ಆವುತೋತಿ.

ದುಬ್ಬಚಜಾತಕಂ ಛಟ್ಠಂ.

೧೧೭. ಅಚ್ಚುಗ್ಗತಾತಿಲಪತಾ [ಅತಿಬಲತಾ (ಸೀ. ಸ್ಯಾ. ಪೀ.), ಅತಿಲಪಕಾ (ಕತ್ಥಚಿ)], ಅತಿವೇಲಂ ಪಭಾಸಿತಾ;

ವಾಚಾ ಹನತಿ ದುಮ್ಮೇಧಂ, ತಿತ್ತಿರಂವಾತಿವಸ್ಸಿತನ್ತಿ.

ತಿತ್ತಿರಜಾತಕಂ ಸತ್ತಮಂ.

೧೧೮. ನಾಚಿನ್ತಯನ್ತೋ ಪುರಿಸೋ, ವಿಸೇಸಮಧಿಗಚ್ಛತಿ;

ಚಿನ್ತಿತಸ್ಸ ಫಲಂ ಪಸ್ಸ, ಮುತ್ತೋಸ್ಮಿ ವಧಬನ್ಧನಾತಿ.

ವಟ್ಟಕಜಾತಕಂ ಅಟ್ಠಮಂ.

೧೧೯. ಅಮಾತಾಪಿತರಸಂವದ್ಧೋ [ಪಿತರಿ (ಸೀ. ಪೀ.), ಪಿತು (ಸ್ಯಾ.)], ಅನಾಚೇರಕುಲೇ ವಸಂ;

ನಾಯಂ ಕಾಲಂ ಅಕಾಲಂ ವಾ, ಅಭಿಜಾನಾತಿ ಕುಕ್ಕುಟೋತಿ.

ಅಕಾಲರಾವಿಜಾತಕಂ ನವಮಂ.

೧೨೦. ಅಬದ್ಧಾ ತತ್ಥ ಬಜ್ಝನ್ತಿ, ಯತ್ಥ ಬಾಲಾ ಪಭಾಸರೇ;

ಬದ್ಧಾಪಿ ತತ್ಥ ಮುಚ್ಚನ್ತಿ, ಯತ್ಥ ಧೀರಾ ಪಭಾಸರೇತಿ.

ಬನ್ಧನಮೋಕ್ಖಜಾತಕಂ ದಸಮಂ.

ಹಂಚಿವಗ್ಗೋ [ಹಂಸಿವಗ್ಗೋ (ಸೀ. ಸ್ಯಾ.)] ದ್ವಾದಸಮೋ.

ತಸ್ಸುದ್ದಾನಂ –

ಅಥ ಗದ್ರಭ ಸತ್ತುವ ಕಂಸಸತಂ, ಬಹುಚಿನ್ತಿ ಸಾಸಿಕಾಯಾತಿಕರ;

ಅತಿವೇಲ ವಿಸೇಸಮನಾಚರಿಯೋವ, ಧೀರಾಪಭಾಸರತೇನ ದಸಾತಿ.