೧೩. ಕುಸನಾಳಿವಗ್ಗೋ

೧೨೧. ಕರೇ ಸರಿಕ್ಖೋ ಅಥ ವಾಪಿ ಸೇಟ್ಠೋ, ನಿಹೀನಕೋ ವಾಪಿ ಕರೇಯ್ಯ ಏಕೋ;

ಕರೇಯ್ಯುಮೇತೇ [ಕರೇಯ್ಯುಂ ತೇ (ಸೀ. ಪೀ.)] ಬ್ಯಸನೇ ಉತ್ತಮತ್ಥಂ, ಯಥಾ ಅಹಂ ಕುಸನಾಳಿ ರುಚಾಯನ್ತಿ.

ಕುಸನಾಳಿಜಾತಕಂ ಪಠಮಂ.

೧೨೨. ಯಸಂ ಲದ್ಧಾನ ದುಮ್ಮೇಧೋ, ಅನತ್ಥಂ ಚರತಿ ಅತ್ತನೋ;

ಅತ್ತನೋ ಚ ಪರೇಸಞ್ಚ, ಹಿಂಸಾಯ ಪಟಿಪಜ್ಜತೀತಿ.

ದುಮ್ಮೇಧಜಾತಕಂ ದುತಿಯಂ.

೧೨೩. ಅಸಬ್ಬತ್ಥಗಾಮಿಂ ವಾಚಂ, ಬಾಲೋ ಸಬ್ಬತ್ಥ ಭಾಸತಿ;

ನಾಯಂ ದಧಿಂ ವೇದಿ ನ [ನ ವೇದಿ (ಕ.)] ನಙ್ಗಲೀಸಂ, ದಧಿಪ್ಪಯಂ [ದಧಿಮ್ಪಯಂ (ಸೀ. ಪೀ.)] ಮಞ್ಞತಿ ನಙ್ಗಲೀಸನ್ತಿ.

ನಙ್ಗಲೀಸಜಾತಕಂ ತತಿಯಂ.

೧೨೪. ವಾಯಮೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ವಾಯಾಮಸ್ಸ ಫಲಂ ಪಸ್ಸ, ಭುತ್ತಾ ಅಮ್ಬಾ ಅನೀತಿಹನ್ತಿ.

ಅಮ್ಬಜಾತಕಂ ಚತುತ್ಥಂ.

೧೨೫. ಬಹುಮ್ಪಿ ಸೋ ವಿಕತ್ಥೇಯ್ಯ, ಅಞ್ಞಂ ಜನಪದಂ ಗತೋ;

ಅನ್ವಾಗನ್ತ್ವಾನ ದೂಸೇಯ್ಯ, ಭುಞ್ಜ ಭೋಗೇ ಕಟಾಹಕಾತಿ.

ಕಟಾಹಕಜಾತಕಂ ಪಞ್ಚಮಂ.

೧೨೬. ತದೇವೇಕಸ್ಸ [ತಥೇವೇಕಸ್ಸ (ಸೀ. ಸ್ಯಾ. ಪೀ. ಅಟ್ಠ. ಮೂಲಪಾಠೋ)] ಕಲ್ಯಾಣಂ, ತದೇವೇಕಸ್ಸ ಪಾಪಕಂ;

ತಸ್ಮಾ ಸಬ್ಬಂ ನ ಕಲ್ಯಾಣಂ, ಸಬ್ಬಂ ವಾಪಿ ನ ಪಾಪಕನ್ತಿ.

ಅಸಿಲಕ್ಖಣಜಾತಕಂ ಛಟ್ಠಂ.

೧೨೭. ತೇ ದೇಸಾ ತಾನಿ ವತ್ಥೂನಿ, ಅಹಞ್ಚ ವನಗೋಚರೋ;

ಅನುವಿಚ್ಚ ಖೋ ತಂ ಗಣ್ಹೇಯ್ಯುಂ, ಪಿವ [ಪಿಪ (ಸೀ. ಪೀ.)] ಖೀರಂ ಕಲಣ್ಡುಕಾತಿ.

ಕಲಣ್ಡುಕಜಾತಕಂ ಸತ್ತಮಂ.

೧೨೮. ಯೋ ವೇ ಧಮ್ಮಂ ಧಜಂ [ಧಮ್ಮಧಜಂ (ಸ್ಯಾ. ಪೀ. ಕ.)] ಕತ್ವಾ, ನಿಗೂಳ್ಹೋ ಪಾಪಮಾಚರೇ;

ವಿಸ್ಸಾಸಯಿತ್ವಾ ಭೂತಾನಿ, ಬಿಳಾರಂ ನಾಮ ತಂ ವತನ್ತಿ.

ಬಿಳಾರವತಜಾತಕಂ ಅಟ್ಠಮಂ.

೧೨೯. ನಾಯಂ ಸಿಖಾ ಪುಞ್ಞಹೇತು, ಘಾಸಹೇತು ಅಯಂ ಸಿಖಾ;

ನಾಙ್ಗುಟ್ಠಗಣನಂ ಯಾತಿ, ಅಲಂ ತೇ ಹೋತು ಅಗ್ಗಿಕಾತಿ.

ಅಗ್ಗಿಕಭಾರದ್ವಾಜಜಾತಕಂ ನವಮಂ.

೧೩೦. ಯಥಾ ವಾಚಾ ಚ ಭುಞ್ಜಸ್ಸು, ಯಥಾ ಭುತ್ತಞ್ಚ ಬ್ಯಾಹರ;

ಉಭಯಂ ತೇ ನ ಸಮೇತಿ, ವಾಚಾ ಭುತ್ತಞ್ಚ ಕೋಸಿಯೇತಿ.

ಕೋಸಿಯಜಾತಕಂ ದಸಮಂ.

ಕುಸನಾಳಿವಗ್ಗೋ [ಸರಿಕ್ಖವಗ್ಗೋ (ಕ.)] ತೇರಸಮೋ.

ತಸ್ಸುದ್ದಾನಂ –

ಕುಸನಾಳಿಸಿರಿವ್ಹಯನೋ ಚ ಯಸಂ, ದಧಿ ಮಮ್ಬ ಕಟಾಹಕಪಞ್ಚಮಕೋ;

ಅಥ ಪಾಪಕ ಖೀರ ಬಿಳಾರವತಂ, ಸಿಖಿ ಕೋಸಿಯಸವ್ಹಯನೇನ ದಸಾತಿ.