೧೪. ಅಸಮ್ಪದಾನವಗ್ಗೋ

೧೩೧. ಅಸಮ್ಪದಾನೇನಿತರೀತರಸ್ಸ, ಬಾಲಸ್ಸ ಮಿತ್ತಾನಿ ಕಲೀ ಭವನ್ತಿ;

ತಸ್ಮಾ ಹರಾಮಿ ಭುಸಂ ಅಡ್ಢಮಾನಂ, ಮಾ ಮೇ ಮಿತ್ತಿ ಜೀಯಿತ್ಥ ಸಸ್ಸತಾಯನ್ತಿ.

ಅಸಮ್ಪದಾನಜಾತಕಂ ಪಠಮಂ.

೧೩೨. ಕುಸಲೂಪದೇಸೇ ಧಿತಿಯಾ ದಳ್ಹಾಯ ಚ, ಅನಿವತ್ತಿತತ್ತಾಭಯಭೀರುತಾಯ [ಅವತ್ಥಿತತ್ತಾಭಯಭೀರುತಾಯ (ಸೀ. ಸ್ಯಾ. ಪೀ.)] ಚ;

ನ ರಕ್ಖಸೀನಂ ವಸಮಾಗಮಿಮ್ಹಸೇ, ಸ ಸೋತ್ಥಿಭಾವೋ ಮಹತಾ ಭಯೇನ ಮೇತಿ.

ಭೀರುಕ [ಪಞ್ಚಗರುಕ (ಸೀ. ಪೀ.), ಪಞ್ಚಭೀರುಕ (ಸ್ಯಾ.), ಅಭಯಭೀರುತ§(?)] ಜಾತಕಂ ದುತಿಯಂ.

೧೩೩. ಖೇಮಂ ಯಹಿಂ ತತ್ಥ ಅರೀ ಉದೀರಿತೋ [ಅರಿ ಉದ್ಧರಿತೋ (ಕ.)], ದಕಸ್ಸ ಮಜ್ಝೇ ಜಲತೇ ಘತಾಸನೋ;

ನ ಅಜ್ಜ ವಾಸೋ ಮಹಿಯಾ ಮಹೀರುಹೇ, ದಿಸಾ ಭಜವ್ಹೋ ಸರಣಾಜ್ಜ ನೋ ಭಯನ್ತಿ.

ಘತಾಸನಜಾತಕಂ ತತಿಯಂ.

೧೩೪. ಯೇ ಸಞ್ಞಿನೋ ತೇಪಿ ದುಗ್ಗತಾ, ಯೇಪಿ ಅಸಞ್ಞಿನೋ ತೇಪಿ ದುಗ್ಗತಾ;

ಏತಂ ಉಭಯಂ ವಿವಜ್ಜಯ, ತಂ ಸಮಾಪತ್ತಿಸುಖಂ ಅನಙ್ಗಣನ್ತಿ.

ಝಾನಸೋಧನಜಾತಕಂ ಚತುತ್ಥಂ.

೧೩೫. ಚನ್ದಾಭಂ ಸೂರಿಯಾಭಞ್ಚ, ಯೋಧ ಪಞ್ಞಾಯ ಗಾಧತಿ.

ಅವಿತಕ್ಕೇನ ಝಾನೇನ, ಹೋತಿ ಆಭಸ್ಸರೂಪಗೋತಿ.

ಚನ್ದಾಭಜಾತಕಂ ಪಞ್ಚಮಂ.

೧೩೬. ಯಂ ಲದ್ಧಂ ತೇನ ತುಟ್ಠಬ್ಬಂ, ಅತಿಲೋಭೋ ಹಿ ಪಾಪಕೋ;

ಹಂಸರಾಜಂ ಗಹೇತ್ವಾನ, ಸುವಣ್ಣಾ ಪರಿಹಾಯಥಾತಿ.

ಸುವಣ್ಣಹಂಸಜಾತಕಂ ಛಟ್ಠಂ.

೧೩೭. ಯತ್ಥೇಕೋ ಲಭತೇ ಬಬ್ಬು, ದುತಿಯೋ ತತ್ಥ ಜಾಯತಿ;

ತತಿಯೋ ಚ ಚತುತ್ಥೋ ಚ, ಇದಂ ತೇ ಬಬ್ಬುಕಾ ಬಿಲನ್ತಿ.

ಬಬ್ಬುಜಾತಕಂ ಸತ್ತಮಂ.

೧೩೮. ಕಿಂ ತೇ ಜಟಾಹಿ ದುಮ್ಮೇಧ, ಕಿಂ ತೇ ಅಜಿನಸಾಟಿಯಾ;

ಅಬ್ಭನ್ತರಂ ತೇ ಗಹನಂ, ಬಾಹಿರಂ ಪರಿಮಜ್ಜಸೀತಿ.

ಗೋಧಜಾತಕಂ ಅಟ್ಠಮಂ.

೧೩೯. ಅಕ್ಖೀ ಭಿನ್ನಾ ಪಟೋ ನಟ್ಠೋ, ಸಖಿಗೇಹೇ ಚ ಭಣ್ಡನಂ;

ಉಭತೋ ಪದುಟ್ಠಾ ಕಮ್ಮನ್ತಾ [ಪದುಟ್ಠಕಮ್ಮನ್ತೋ (ಸೀ.), ಪದುಟ್ಠೋ ಕಮ್ಮನ್ತೋ (ಪೀ.)], ಉದಕಮ್ಹಿ ಥಲಮ್ಹಿ ಚಾತಿ.

ಉಭತೋಭಟ್ಠಜಾತಕಂ ನವಮಂ.

೧೪೦. ನಿಚ್ಚಂ ಉಬ್ಬಿಗ್ಗಹದಯಾ, ಸಬ್ಬಲೋಕವಿಹೇಸಕಾ;

ತಸ್ಮಾ ನೇಸಂ ವಸಾ ನತ್ಥಿ, ಕಾಕಾನಮ್ಹಾಕ [ಕಾಕಾನಸ್ಮಾಕ (ಸೀ. ಸ್ಯಾ. ಪೀ.)] ಞಾತಿನನ್ತಿ.

ಕಾಕಜಾತಕಂ ದಸಮಂ.

ಅಸಮ್ಪದಾನವಗ್ಗೋ ಚುದ್ದಸಮೋ.

ತಸ್ಸುದ್ದಾನಂ –

ಇತರೀತರ ರಕ್ಖಸಿ ಖೇಮಿಯೋ ಚ, ಪರೋಸತಪಞ್ಹೇನ ಆಭಸ್ಸರೋ ಪುನ;

ಅಥ ಹಂಸವರುತ್ತಮಬಬ್ಬುಜಟಂ, ಪಟನಟ್ಠಕ ಕಾಕವರೇನ ದಸಾತಿ.