೧೫. ಕಕಣ್ಟಕವಗ್ಗೋ

೧೪೧. ಗೋಧಜಾತಕಂ

೧೪೧. ನ ಪಾಪಜನಸಂಸೇವೀ, ಅಚ್ಚನ್ತಸುಖಮೇಧತಿ;

ಗೋಧಾಕುಲಂ [ಗೋಧಕ್ಕುಲಂ (ಕ.)] ಕಕಣ್ಟಾವ [ಕಕಣ್ಟಕಾ (ಕ.)], ಕಲಿಂ ಪಾಪೇತಿ ಅತ್ತನನ್ತಿ.

ಗೋಧಜಾತಕಂ ಪಠಮಂ.

೧೪೨. ಸಿಙ್ಗಾಲಜಾತಕಂ

೧೪೨. ಏತಞ್ಹಿ ತೇ ದುರಾಜಾನಂ, ಯಂ ಸೇಸಿ ಮತಸಾಯಿಕಂ;

ಯಸ್ಸ ತೇ ಕಡ್ಢಮಾನಸ್ಸ, ಹತ್ಥಾ ದಣ್ಡೋ ನ ಮುಚ್ಚತೀತಿ.

ಸಿಙ್ಗಾಲಜಾತಕಂ ದುತಿಯಂ.

೧೪೩. ವಿರೋಚಜಾತಕಂ

೧೪೩. ಲಸೀ ಚ ತೇ ನಿಪ್ಫಲಿತಾ, ಮತ್ಥಕೋ ಚ ಪದಾಲಿತೋ [ವಿದಾಲಿತೋ (ಸೀ. ಪೀ.)];

ಸಬ್ಬಾ ತೇ ಫಾಸುಕಾ ಭಗ್ಗಾ, ಅಜ್ಜ ಖೋ ತ್ವಂ ವಿರೋಚಸೀತಿ.

ವಿರೋಚಜಾತಕಂ ತತಿಯಂ.

೧೪೪. ನಙ್ಗುಟ್ಠಜಾತಕಂ

೧೪೪. ಬಹುಮ್ಪೇತಂ ಅಸಬ್ಭಿ [ಬಹುಪೇತಮಸಬ್ಭಿ (ಕ.)] ಜಾತವೇದ, ಯಂ ತಂ ವಾಲಧಿನಾಭಿಪೂಜಯಾಮ;

ಮಂಸಾರಹಸ್ಸ ನತ್ಥಜ್ಜ ಮಂಸಂ, ನಙ್ಗುಟ್ಠಮ್ಪಿ ಭವಂ ಪಟಿಗ್ಗಹಾತೂತಿ.

ನಙ್ಗುಟ್ಠಜಾತಕಂ ಚತುತ್ಥಂ.

೧೪೫. ರಾಧಜಾತಕಂ

೧೪೫. ನ ತ್ವಂ ರಾಧ ವಿಜಾನಾಸಿ, ಅಡ್ಢರತ್ತೇ ಅನಾಗತೇ;

ಅಬ್ಯಯತಂ [ಅಬ್ಯಾಯತಂ (ಸೀ. ಸ್ಯಾ. ಪೀ.), ಅಬ್ಯತ್ತತಂ (?)] ವಿಲಪಸಿ, ವಿರತ್ತಾ ಕೋಸಿಯಾಯನೇತಿ.

ರಾಧಜಾತಕಂ ಪಞ್ಚಮಂ.

೧೪೬. ಸಮುದ್ದಕಾಕಜಾತಕಂ

೧೪೬. ಅಪಿ ನು ಹನುಕಾ ಸನ್ತಾ, ಮುಖಞ್ಚ ಪರಿಸುಸ್ಸತಿ;

ಓರಮಾಮ ನ ಪಾರೇಮ, ಪೂರತೇವ ಮಹೋದಧೀತಿ.

ಸಮುದ್ದಕಾಕಜಾತಕಂ ಛಟ್ಠಂ.

೧೪೭. ಪುಪ್ಫರತ್ತಜಾತಕಂ

೧೪೭. ನಯಿದಂ ದುಕ್ಖಂ ಅದುಂ ದುಕ್ಖಂ, ಯಂ ಮಂ ತುದತಿ ವಾಯಸೋ;

ಯಂ ಸಾಮಾ ಪುಪ್ಫರತ್ತೇನ, ಕತ್ತಿಕಂ ನಾನುಭೋಸ್ಸತೀತಿ.

ಪುಪ್ಫರತ್ತಜಾತಕಂ ಸತ್ತಮಂ.

೧೪೮. ಸಿಙ್ಗಾಲಜಾತಕಂ

೧೪೮. ನಾಹಂ ಪುನಂ ನ ಚ ಪುನಂ, ನ ಚಾಪಿ ಅಪುನಪ್ಪುನಂ;

ಹತ್ಥಿಬೋನ್ದಿಂ ಪವೇಕ್ಖಾಮಿ, ತಥಾ ಹಿ ಭಯತಜ್ಜಿತೋತಿ.

ಸಿಙ್ಗಾಲಜಾತಕಂ ಅಟ್ಠಮಂ.

೧೪೯. ಏಕಪಣ್ಣಜಾತಕಂ

೧೪೯. ಏಕಪಣ್ಣೋ ಅಯಂ ರುಕ್ಖೋ, ನ ಭೂಮ್ಯಾ ಚತುರಙ್ಗುಲೋ;

ಫಲೇನ ವಿಸಕಪ್ಪೇನ, ಮಹಾಯಂ ಕಿಂ ಭವಿಸ್ಸತೀತಿ.

ಏಕಪಣ್ಣಜಾತಕಂ ನವಮಂ.

೧೫೦. ಸಞ್ಜೀವಜಾತಕಂ

೧೫೦. ಅಸನ್ತಂ ಯೋ ಪಗ್ಗಣ್ಹಾತಿ, ಅಸನ್ತಂ ಚೂಪಸೇವತಿ;

ತಮೇವ ಘಾಸಂ ಕುರುತೇ, ಬ್ಯಗ್ಘೋ ಸಞ್ಜೀವಕೋ ಯಥಾತಿ.

ಸಞ್ಜೀವಜಾತಕಂ ದಸಮಂ.

ಕಕಣ್ಟಕ [ಪಾಪಸೇವನ (ಕ.)] ವಗ್ಗೋ ಪನ್ನರಸಮೋ.

ತಸ್ಸುದ್ದಾನಂ –

ಸುಖಮೇಧತಿ ದಣ್ಡವರೋ ಚ ಪುನ, ಲಸಿ ವಾಲಧಿ ಪಞ್ಚಮರಾಧವರೋ;

ಸಮಹೋದಧಿ ಕತ್ತಿಕ ಬೋನ್ದಿ ಪುನ, ಚತುರಙ್ಗುಲಬ್ಯಗ್ಘವರೇನ ದಸಾತಿ.

(ಉಪರಿಮೋ ಪಣ್ಣಾಸಕೋ.) [( ) ಸೀಹಳಪೋತ್ಥಕೇಯೇವ ದಿಸ್ಸತಿ]

ಅಥ ವಗ್ಗುದ್ದಾನಂ –

ಅಪಣ್ಣಕಂ ಸೀಲವಗ್ಗಕುರುಙ್ಗ, ಕುಲಾವಕಂ ಅತ್ಥಕಾಮೇನ ಪಞ್ಚಮಂ;

ಆಸೀಸೋ ಇತ್ಥಿವರುಣಂ ಅಪಾಯಿ, ಲಿತ್ತವಗ್ಗೇನ ತೇ ದಸ;

ಪರೋಸತಂ ಹಂಚಿ ಕುಸನಾಳಿ [ಹಂಸಿ ಸರಿಕ್ಖಂ (ಸಬ್ಬತ್ಥ)], ಅಸಮ್ಪದಂ ಕಕಣ್ಟಕವಗ್ಗೋ.

ಏಕನಿಪಾತಮ್ಹಿಲಙ್ಕತನ್ತಿ.

ಏಕಕನಿಪಾತಂ ನಿಟ್ಠಿತಂ.