೮. ವರುಣವಗ್ಗೋ

೭೧. ಯೋ ಪುಬ್ಬೇ ಕರಣೀಯಾನಿ, ಪಚ್ಛಾ ಸೋ ಕಾತುಮಿಚ್ಛತಿ;

ವರುಣಕಟ್ಠ [ವರಣಕಟ್ಠ (ಸೀ. ಪೀ.)] ಭಞ್ಜೋವ, ಸ ಪಚ್ಛಾ ಮನುತಪ್ಪತೀತಿ.

ವರುಣಜಾತಕಂ ಪಠಮಂ.

೭೨. ಅಕತಞ್ಞುಸ್ಸ ಪೋಸಸ್ಸ, ನಿಚ್ಚಂ ವಿವರದಸ್ಸಿನೋ;

ಸಬ್ಬಂ ಚೇ ಪಥವಿಂ [ಪಠವಿಂ (ಸೀ. ಸ್ಯಾ. ಪೀ.)] ದಜ್ಜಾ, ನೇವ ನಂ ಅಭಿರಾಧಯೇತಿ.

ಸೀಲವಹತ್ಥಿಜಾತಕಂ ದುತಿಯಂ.

೭೩. ಸಚ್ಚಂ ಕಿರೇವಮಾಹಂಸು, ನರಾ ಏಕಚ್ಚಿಯಾ ಇಧ;

ಕಟ್ಠಂ ನಿಪ್ಲವಿತಂ [ವಿಪ್ಲಾವಿತಂ (ಸೀ. ಪೀ.)] ಸೇಯ್ಯೋ, ನ ತ್ವೇವೇಕಚ್ಚಿಯೋ ನರೋತಿ.

ಸಚ್ಚಂಕಿರಜಾತಕಂ ತತಿಯಂ.

೭೪. ಸಾಧೂ ಸಮ್ಬಹುಲಾ ಞಾತೀ, ಅಪಿ ರುಕ್ಖಾ ಅರಞ್ಞಜಾ;

ವಾತೋ ವಹತಿ ಏಕಟ್ಠಂ, ಬ್ರಹನ್ತಮ್ಪಿ ವನಪ್ಪತಿನ್ತಿ.

ರುಕ್ಖಧಮ್ಮಜಾತಕಂ ಚತುತ್ಥಂ.

೭೫. ಅಭಿತ್ಥನಯ ಪಜ್ಜುನ್ನ, ನಿಧಿಂ ಕಾಕಸ್ಸ ನಾಸಯ;

ಕಾಕಂ ಸೋಕಾಯ ರನ್ಧೇಹಿ, ಮಞ್ಚ ಸೋಕಾ ಪಮೋಚಯಾತಿ.

ಮಚ್ಛಜಾತಕಂ ಪಞ್ಚಮಂ.

೭೬. ಅಸಙ್ಕಿಯೋಮ್ಹಿ ಗಾಮಮ್ಹಿ, ಅರಞ್ಞೇ ನತ್ಥಿ ಮೇ ಭಯಂ;

ಉಜುಂ ಮಗ್ಗಂ ಸಮಾರೂಳ್ಹೋ, ಮೇತ್ತಾಯ ಕರುಣಾಯ ಚಾತಿ.

ಅಸಙ್ಕಿಯಜಾತಕಂ ಛಟ್ಠಂ.

೭೭. ಉಸಭಾ ರುಕ್ಖಾ ಗಾವಿಯೋ ಗವಾ ಚ, ಅಸ್ಸೋ ಕಂಸೋ ಸಿಙ್ಗಾಲೀ [ಸಿಗಾಸೀ (ಸೀ. ಸ್ಯಾ. ಪೀ.)] ಚ ಕುಮ್ಭೋ;

ಪೋಕ್ಖರಣೀ ಚ ಅಪಾಕಚನ್ದನಂ, ಲಾಬೂನಿ ಸೀದನ್ತಿ ಸಿಲಾ ಪ್ಲವನ್ತಿ.

ಮಣ್ಡೂಕಿಯೋ ಕಣ್ಹಸಪ್ಪೇ ಗಿಲನ್ತಿ, ಕಾಕಂ ಸುಪಣ್ಣಾ ಪರಿವಾರಯನ್ತಿ;

ತಸಾ ವಕಾ ಏಳಕಾನಂ ಭಯಾಹಿ, ವಿಪರಿಯಾಸೋ [ವಿಪರಿಯಾಯೋ (ಸ್ಯಾ. ಕ.)] ವತ್ತತಿ ನಯಿಧ ಮತ್ಥೀತಿ.

ಮಹಾಸುಪಿನಜಾತಕಂ ಸತ್ತಮಂ.

೭೮. ಉಭೋ ಖಞ್ಜಾ ಉಭೋ ಕುಣೀ, ಉಭೋ ವಿಸಮಚಕ್ಖುಕಾ [ಚಕ್ಖುಲಾ (ಸೀ. ಪೀ.)];

ಉಭಿನ್ನಂ ಪಿಳಕಾ [ಪೀಳಕಾ (ಸ್ಯಾ.)] ಜಾತಾ, ನಾಹಂ ಪಸ್ಸಾಮಿ ಇಲ್ಲಿಸನ್ತಿ.

ಇಲ್ಲಿಸಜಾತಕಂ ಅಟ್ಠಮಂ.

೭೯. ಯತೋ ವಿಲುತ್ತಾ ಚ ಹತಾ ಚ ಗಾವೋ, ದಡ್ಢಾನಿ ಗೇಹಾನಿ ಜನೋ ಚ ನೀತೋ;

ಅಥಾಗಮಾ ಪುತ್ತಹತಾಯ ಪುತ್ತೋ, ಖರಸ್ಸರಂ ಡಿಣ್ಡಿಮಂ [ದೇಣ್ಡಿಮಂ (ಸೀ. ಸ್ಯಾ. ಪೀ.), ಡಿನ್ದಿಮಂ (ಕ.)] ವಾದಯನ್ತೋತಿ.

ಖರಸ್ಸರಜಾತಕಂ ನವಮಂ.

೮೦. ಯಂ ತೇ ಪವಿಕತ್ಥಿತಂ ಪುರೇ, ಅಥ ತೇ ಪೂತಿಸರಾ ಸಜನ್ತಿ ಪಚ್ಛಾ;

ಉಭಯಂ ನ ಸಮೇತಿ ಭೀಮಸೇನ, ಯುದ್ಧಕಥಾ ಚ ಇದಞ್ಚ ತೇ ವಿಹಞ್ಞನ್ತಿ.

ಭೀಮಸೇನಜಾತಕಂ ದಸಮಂ.

ವರುಣವಗ್ಗೋ [ವರಣವಗ್ಗೋ (ಸೀ. ಪೀ.)] ಅಟ್ಠಮೋ.

ತಸ್ಸುದ್ದಾನಂ –

ವರುಣಾ ಅಕತಞ್ಞೂವರೇ ತು ಸಚ್ಚವರಂ, ಸವನಪ್ಪತಿನಾ ಚ ಅಭಿತ್ಥನಯ;

ಕರುಣಾಯ ಸಿಲಾಪ್ಲವ ಇಲ್ಲಿಸತೋ, ಪುನ ಡಿಣ್ಡಿಮಪೂತಿಸರೇನ ದಸಾತಿ.