೭. ಇತ್ಥಿವಗ್ಗೋ

೬೧. ಅಸಾ ಲೋಕಿತ್ಥಿಯೋ ನಾಮ, ವೇಲಾ ತಾಸಂ ನ ವಿಜ್ಜತಿ;

ಸಾರತ್ತಾ ಚ ಪಗಬ್ಭಾ ಚ, ಸಿಖೀ ಸಬ್ಬಘಸೋ ಯಥಾ;

ತಾ ಹಿತ್ವಾ ಪಬ್ಬಜಿಸ್ಸಾಮಿ, ವಿವೇಕಮನುಬ್ರೂಹಯನ್ತಿ.

ಅಸಾತಮನ್ತಜಾತಕಂ ಪಠಮಂ.

೬೨. ಯಂ ಬ್ರಾಹ್ಮಣೋ ಅವಾದೇಸಿ, ವೀಣಂ ಸಮುಖವೇಠಿತೋ;

ಅಣ್ಡಭೂತಾ ಭತಾ ಭರಿಯಾ, ತಾಸು ಕೋ ಜಾತು ವಿಸ್ಸಸೇತಿ.

ಅಣ್ಡಭೂತಜಾತಕಂ ದುತಿಯಂ.

೬೩. ಕೋಧನಾ ಅಕತಞ್ಞೂ ಚ, ಪಿಸುಣಾ ಮಿತ್ತಭೇದಿಕಾ [ಪಿಸುಣಾ ಚ ವಿಭೇದಿಕಾ (ಸೀ. ಸ್ಯಾ. ಪೀ.)];

ಬ್ರಹ್ಮಚರಿಯಂ ಚರ ಭಿಕ್ಖು, ಸೋ ಸುಖಂ ನ ವಿಹಾಹಸೀತಿ [ಪಿಹಾಹಿಸೀತಿ (ಸೀ. ಸ್ಯಾ. ಪೀ.), ವಿಹಾಯಸಿ (ಕ.)].

ತಕ್ಕಪಣ್ಡಿತಜಾತಕಂ [ತಕ್ಕಜಾತಕಂ (ಸೀ. ಸ್ಯಾ. ಪೀ. ಅಟ್ಠ.)] ತತಿಯಂ.

೬೪. ಮಾ ಸು ನನ್ದಿ ಇಚ್ಛತಿ ಮಂ, ಮಾ ಸು ಸೋಚಿ ನ ಮಿಚ್ಛತಿ [ನ ಇಚ್ಛತಿ (ಸೀ. ಸ್ಯಾ. ಪೀ.)];

ಥೀನಂ ಭಾವೋ ದುರಾಜಾನೋ, ಮಚ್ಛಸ್ಸೇವೋದಕೇ ಗತನ್ತಿ.

ದುರಾಜಾನಜಾತಕಂ ಚತುತ್ಥಂ.

೬೫. ಯಥಾ ನದೀ ಚ ಪನ್ಥೋ ಚ, ಪಾನಾಗಾರಂ ಸಭಾ ಪಪಾ;

ಏವಂ ಲೋಕಿತ್ಥಿಯೋ ನಾಮ, ನಾಸಂ ಕುಜ್ಝನ್ತಿ ಪಣ್ಡಿತಾತಿ.

ಅನಭಿರತಿಜಾತಕಂ ಪಞ್ಚಮಂ.

೬೬. ಏಕಾ ಇಚ್ಛಾ ಪುರೇ ಆಸಿ, ಅಲದ್ಧಾ ಮುದುಲಕ್ಖಣಂ;

ಯತೋ ಲದ್ಧಾ ಅಳಾರಕ್ಖೀ, ಇಚ್ಛಾ ಇಚ್ಛಂ ವಿಜಾಯಥಾತಿ.

ಮುದುಲಕ್ಖಣಜಾತಕಂ ಛಟ್ಠಂ.

೬೭. ಉಚ್ಛಙ್ಗೇ ದೇವ ಮೇ ಪುತ್ತೋ, ಪಥೇ ಧಾವನ್ತಿಯಾ ಪತಿ;

ತಞ್ಚ ದೇಸಂ ನ ಪಸ್ಸಾಮಿ, ಯತೋ ಸೋದರಿಯಮಾನಯೇತಿ [ಸೋದರಿಯಂ ನಯೇ (ಕ.)].

ಉಚ್ಛಙ್ಗಜಾತಕಂ ಸತ್ತಮಂ.

೬೮. ಯಸ್ಮಿಂ ಮನೋ ನಿವಿಸತಿ, ಚಿತ್ತಞ್ಚಾಪಿ [ಚಿತ್ತಂ ವಾಪಿ (ಕತ್ಥಚಿ)] ಪಸೀದತಿ;

ಅದಿಟ್ಠಪುಬ್ಬಕೇ ಪೋಸೇ, ಕಾಮಂ ತಸ್ಮಿಮ್ಪಿ ವಿಸ್ಸಸೇತಿ.

ಸಾಕೇತಜಾತಕಂ ಅಟ್ಠಮಂ.

೬೯. ಧಿರತ್ಥು ತಂ ವಿಸಂ ವನ್ತಂ, ಯಮಹಂ ಜೀವಿತಕಾರಣಾ;

ವನ್ತಂ ಪಚ್ಚಾವಮಿಸ್ಸಾಮಿ [ಪಚ್ಚಾಹರಿಸ್ಸಾಮಿ (ಕ.)], ಮತಂ ಮೇ ಜೀವಿತಾ ವರನ್ತಿ.

ವಿಸವನ್ತಜಾತಕಂ ನವಮಂ.

೭೦. ನ ತಂ ಜಿತಂ ಸಾಧು ಜಿತಂ, ಯಂ ಜಿತಂ ಅವಜೀಯತಿ;

ತಂ ಖೋ ಜಿತಂ ಸಾಧು ಜಿತಂ, ಯಂ ಜಿತಂ ನಾವಜೀಯತೀತಿ.

ಕುದ್ದಾಲಜಾತಕಂ ದಸಮಂ.

ಇತ್ಥಿವಗ್ಗೋ ಸತ್ತಮೋ.

ತಸ್ಸುದ್ದಾನಂ –

ಸಿಖೀಸಬ್ಬಘಸೋಪಿ ಚ ವೀಣವರೋ, ಪಿಸುಣಾ ಮಿತ್ತಭೇದಿಕಾ ನನ್ದೀ ನದೀ;

ಮುದುಲಕ್ಖಣ ಸೋದರಿಯಾ ಚ ಮನೋ, ವಿಸ ಸಾಧುಜಿತೇನ ಭವನ್ತಿ ದಸಾತಿ.