೬. ಆಸೀಸವಗ್ಗೋ

೫೧. ಆಸೀಸೇಥೇವ [ಆಸಿಂಸೇಥೇವ (ಸೀ. ಸ್ಯಾ. ಪೀ.)] ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಪಸ್ಸಾಮಿ ವೋಹಂ ಅತ್ತಾನಂ, ಯಥಾ ಇಚ್ಛಿಂ ತಥಾ ಅಹೂತಿ.

ಮಹಾಸೀಲವಜಾತಕಂ ಪಠಮಂ.

೫೨. ವಾಯಮೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಪಸ್ಸಾಮಿ ವೋಹಂ ಅತ್ತಾನಂ, ಉದಕಾ ಥಲಮುಬ್ಭತನ್ತಿ.

ಚೂಳಜನಕಜಾತಕಂ ದುತಿಯಂ.

೫೩. ತಥೇವ ಪುಣ್ಣಾ ಪಾತಿಯೋ, ಅಞ್ಞಾಯಂ ವತ್ತತೇ ಕಥಾ;

ಆಕಾರಣೇನ [ಆಕಾರಕೇನ (ಸೀ. ಸ್ಯಾ. ಪೀ.)] ಜಾನಾಮಿ, ನ ಚಾಯಂ ಭದ್ದಿಕಾ ಸುರಾತಿ.

ಪುಣ್ಣಪಾತಿಜಾತಕಂ ತತಿಯಂ.

೫೪. ನಾಯಂ ರುಕ್ಖೋ ದುರಾರುಹೋ, ನಪಿ ಗಾಮತೋ ಆರಕಾ;

ಆಕಾರಣೇನ ಜಾನಾಮಿ, ನಾಯಂ ಸಾದುಫಲೋ ದುಮೋತಿ.

ಕಿಂಫಲಜಾತಕಂ ಚತುತ್ಥಂ.

೫೫. ಯೋ ಅಲೀನೇನ ಚಿತ್ತೇನ, ಅಲೀನಮನಸೋ ನರೋ;

ಭಾವೇತಿ ಕುಸಲಂ ಧಮ್ಮಂ, ಯೋಗಕ್ಖೇಮಸ್ಸ ಪತ್ತಿಯಾ;

ಪಾಪುಣೇ ಅನುಪುಬ್ಬೇನ, ಸಬ್ಬಸಂಯೋಜನಕ್ಖಯನ್ತಿ.

ಪಞ್ಚಾವುಧಜಾತಕಂ ಪಞ್ಚಮಂ.

೫೬. ಯೋ ಪಹಟ್ಠೇನ ಚಿತ್ತೇನ, ಪಹಟ್ಠಮನಸೋ ನರೋ;

ಭಾವೇತಿ ಕುಸಲಂ ಧಮ್ಮಂ, ಯೋಗಕ್ಖೇಮಸ್ಸ ಪತ್ತಿಯಾ;

ಪಾಪುಣೇ ಅನುಪುಬ್ಬೇನ, ಸಬ್ಬಸಂಯೋಜನಕ್ಖಯನ್ತಿ.

ಕಞ್ಚನಕ್ಖನ್ಧಜಾತಕಂ ಛಟ್ಠಂ.

೫೭. ಯಸ್ಸೇತೇ ಚತುರೋ ಧಮ್ಮಾ, ವಾನರಿನ್ದ ಯಥಾ ತವ;

ಸಚ್ಚಂ ಧಮ್ಮೋ ಧಿತಿ [ಧಿತೀ (ಸೀ. ಪೀ.)] ಚಾಗೋ, ದಿಟ್ಠಂ ಸೋ ಅತಿವತ್ತತೀತಿ.

ವಾನರಿನ್ದಜಾತಕಂ ಸತ್ತಮಂ.

೫೮. ಯಸ್ಸೇತೇ ಚ [ಯಸ್ಸ ಏತೇ (ಸೀ. ಪೀ.)] ತಯೋ ಧಮ್ಮಾ, ವಾನರಿನ್ದ ಯಥಾ ತವ;

ದಕ್ಖಿಯಂ ಸೂರಿಯಂ ಪಞ್ಞಾ, ದಿಟ್ಠಂ ಸೋ ಅತಿವತ್ತತೀತಿ.

ತಯೋಧಮ್ಮಜಾತಕಂ ಅಟ್ಠಮಂ.

೫೯. ಧಮೇ ಧಮೇ ನಾತಿಧಮೇ, ಅತಿಧನ್ತಞ್ಹಿ ಪಾಪಕಂ;

ಧನ್ತೇನ ಹಿ ಸತಂ ಲದ್ಧಂ, ಅತಿಧನ್ತೇನ ನಾಸಿತನ್ತಿ.

ಭೇರಿವಾದಕಜಾತಕಂ ನವಮಂ.

೬೦. ಧಮೇ ಧಮೇ ನಾತಿಧಮೇ, ಅತಿಧನ್ತಞ್ಹಿ ಪಾಪಕಂ;

ಧನ್ತೇನಾಧಿಗತಾ ಭೋಗಾ, ತೇ ತಾತೋ ವಿಧಮೀ ಧಮನ್ತಿ.

ಸಙ್ಖಧಮಜಾತಕಂ ದಸಮಂ.

ಆಸೀಸವಗ್ಗೋ ಛಟ್ಠೋ.

ತಸ್ಸುದ್ದಾನಂ –

ಯಥಾ ಇಚ್ಛಿಂ ತಥಾಹುದಕಾ ಥಲಾ, ಸುರ ಸಾದುಫಲೋ ಚ ಅಲೀನಮನೋ;

ಸಮ್ಪಹಟ್ಠಮನೋ ಚತುರೋ ಚ ತಯೋ, ಸತಲದ್ಧಕ ಭೋಗಧನೇನ ದಸಾತಿ.