೫. ಅತ್ಥಕಾಮವಗ್ಗೋ

೪೧. ಯೋ ಅತ್ಥಕಾಮಸ್ಸ ಹಿತಾನುಕಮ್ಪಿನೋ, ಓವಜ್ಜಮಾನೋ ನ ಕರೋತಿ ಸಾಸನಂ;

ಅಜಿಯಾ ಪಾದಮೋಲಮ್ಬ [ಪಾದಮೋಲುಮ್ಬ (ಸೀ. ಸ್ಯಾ. ಪೀ.)], ಮಿತ್ತಕೋ ವಿಯ ಸೋಚತೀತಿ.

ಲೋಸಕಜಾತಕಂ ಪಠಮಂ.

೪೨. ಯೋ ಅತ್ಥಕಾಮಸ್ಸ ಹಿತಾನುಕಮ್ಪಿನೋ, ಓವಜ್ಜಮಾನೋ ನ ಕರೋತಿ ಸಾಸನಂ;

ಕಪೋತಕಸ್ಸ ವಚನಂ ಅಕತ್ವಾ, ಅಮಿತ್ತಹತ್ಥತ್ಥಗತೋವ ಸೇತೀತಿ.

ಕಪೋತಜಾತಕಂ ದುತಿಯಂ.

೪೩. ಯೋ ಅತ್ಥಕಾಮಸ್ಸ ಹಿತಾನುಕಮ್ಪಿನೋ, ಓವಜ್ಜಮಾನೋ ನ ಕರೋತಿ ಸಾಸನಂ;

ಏವಂ ಸೋ ನಿಹತೋ ಸೇತಿ, ವೇಳುಕಸ್ಸ ಯಥಾ ಪಿತಾತಿ.

ವೇಳುಕಜಾತಕಂ ತತಿಯಂ.

೪೪. ಸೇಯ್ಯೋ ಅಮಿತ್ತೋ ಮತಿಯಾ ಉಪೇತೋ, ನ ತ್ವೇವ ಮಿತ್ತೋ ಮತಿವಿಪ್ಪಹೀನೋ;

ಮಕಸಂ ವಧಿಸ್ಸನ್ತಿ ಹಿ ಏಳಮೂಗೋ, ಪುತ್ತೋ ಪಿತು ಅಬ್ಭಿದಾ ಉತ್ತಮಙ್ಗನ್ತಿ.

ಮಕಸಜಾತಕಂ ಚತುತ್ಥಂ.

೪೫. ಸೇಯ್ಯೋ ಅಮಿತ್ತೋ ಮೇಧಾವೀ, ಯಞ್ಚೇ ಬಾಲಾನುಕಮ್ಪಕೋ;

ಪಸ್ಸ ರೋಹಿಣಿಕಂ ಜಮ್ಮಿಂ, ಮಾತರಂ ಹನ್ತ್ವಾನ ಸೋಚತೀತಿ.

ರೋಹಿಣಿಜಾತಕಂ ಪಞ್ಚಮಂ.

೪೬. ನ ವೇ ಅನತ್ಥಕುಸಲೇನ, ಅತ್ಥಚರಿಯಾ ಸುಖಾವಹಾ;

ಹಾಪೇತಿ ಅತ್ಥಂ ದುಮ್ಮೇಧೋ, ಕಪಿ ಆರಾಮಿಕೋ ಯಥಾತಿ.

ಆರಾಮದೂಸಕಜಾತಕಂ ಛಟ್ಠಂ.

೪೭. ನ ವೇ ಅನತ್ಥಕುಸಲೇನ, ಅತ್ಥಚರಿಯಾ ಸುಖಾವಹಾ;

ಹಾಪೇತಿ ಅತ್ಥಂ ದುಮ್ಮೇಧೋ, ಕೋಣ್ಡಞ್ಞೋ ವಾರುಣಿಂ ಯಥಾತಿ.

ವಾರುಣಿದೂಸಕಜಾತಕಂ ಸತ್ತಮಂ.

೪೮. ಅನುಪಾಯೇನ ಯೋ ಅತ್ಥಂ, ಇಚ್ಛತಿ ಸೋ ವಿಹಞ್ಞತಿ;

ಚೇತಾ ಹನಿಂಸು ವೇದಬ್ಬಂ [ವೇದಬ್ಭಂ (ಸೀ. ಪೀ.)], ಸಬ್ಬೇ ತೇ ಬ್ಯಸನಮಜ್ಝಗೂತಿ.

ವೇದಬ್ಬ [ವೇದಬ್ಭ (ಸೀ. ಪೀ.)] ಜಾತಕಂ ಅಟ್ಠಮಂ.

೪೯. ನಕ್ಖತ್ತಂ ಪಟಿಮಾನೇನ್ತಂ, ಅತ್ಥೋ ಬಾಲಂ ಉಪಚ್ಚಗಾ;

ಅತ್ಥೋ ಅತ್ಥಸ್ಸ ನಕ್ಖತ್ತಂ, ಕಿಂ ಕರಿಸ್ಸನ್ತಿ ತಾರಕಾತಿ.

ನಕ್ಖತ್ತಜಾತಕಂ ನವಮಂ.

೫೦. ದುಮ್ಮೇಧಾನಂ ಸಹಸ್ಸೇನ, ಯಞ್ಞೋ ಮೇ ಉಪಯಾಚಿತೋ;

ಇದಾನಿ ಖೋಹಂ ಯಜಿಸ್ಸಾಮಿ, ಬಹು [ಬಹೂ (ಸೀ. ಪೀ.), ಬಹುಂ (ಕ.)] ಅಧಮ್ಮಿಕೋ ಜನೋತಿ.

ದುಮ್ಮೇಧಜಾತಕಂ ದಸಮಂ.

ಅತ್ಥಕಾಮವಗ್ಗೋ ಪಞ್ಚಮೋ.

ತಸ್ಸುದ್ದಾನಂ –

ಅಥ ಮಿತ್ತಕ ಮಾತು ಕಪೋತವರೋ, ತಥಾ ವೇಳೂಕ ಏಳಮೂಗೋ ರೋಹಿಣೀ;

ಕಪಿ ವಾರುಣಿ ಚೇತಚರಾ ಚ ಪುನ, ತಥಾ ತಾರಕ ಯಞ್ಞವರೇನ ದಸಾತಿ.

ಪಠಮೋ ಪಣ್ಣಾಸಕೋ.