೪. ಕುಲಾವಕವಗ್ಗೋ

೩೧. ಕುಲಾವಕಾ ಮಾತಲಿ ಸಿಮ್ಬಲಿಸ್ಮಿಂ, ಈಸಾಮುಖೇನ ಪರಿವಜ್ಜಯಸ್ಸು;

ಕಾಮಂ ಚಜಾಮ ಅಸುರೇಸು ಪಾಣಂ, ಮಾ ಮೇ ದಿಜಾ ವಿಕ್ಕುಲವಾ [ಮಾಯಿಮೇ ದಿಜಾ ವಿಕುಲಾವಾ (ಸೀ. ಸ್ಯಾ. ಪೀ.)] ಅಹೇಸುನ್ತಿ.

ಕುಲಾವಕಜಾತಕಂ ಪಠಮಂ.

೩೨. ರುದಂ ಮನುಞ್ಞಂ ರುಚಿರಾ ಚ ಪಿಟ್ಠಿ, ವೇಳುರಿಯವಣ್ಣೂಪನಿಭಾ [ವಣ್ಣೂಪಟಿಭಾ (ಸ್ಯಾ.), ವಣ್ಣಸನ್ನಿಭಾ (ಕ.)] ಚ ಗೀವಾ;

ಬ್ಯಾಮಮತ್ತಾನಿ ಚ ಪೇಖುಣಾನಿ, ನಚ್ಚೇನ ತೇ ಧೀತರಂ ನೋ ದದಾಮೀತಿ.

ನಚ್ಚಜಾತಕಂ ದುತಿಯಂ.

೩೩. ಸಮ್ಮೋದಮಾನಾ ಗಚ್ಛನ್ತಿ, ಜಾಲಮಾದಾಯ ಪಕ್ಖಿನೋ;

ಯದಾ ತೇ ವಿವದಿಸ್ಸನ್ತಿ, ತದಾ ಏಹಿನ್ತಿ ಮೇ ವಸನ್ತಿ.

ಸಮ್ಮೋದಮಾನಜಾತಕಂ ತತಿಯಂ.

೩೪. ನ ಮಂ ಸೀತಂ ನ ಮಂ ಉಣ್ಹಂ, ನ ಮಂ ಜಾಲಸ್ಮಿ ಬಾಧನಂ;

ಯಞ್ಚ ಮಂ ಮಞ್ಞತೇ ಮಚ್ಛೀ, ಅಞ್ಞಂ ಸೋ ರತಿಯಾ ಗತೋತಿ.

ಮಚ್ಛಜಾತಕಂ ಚತುತ್ಥಂ.

೩೫. ಸನ್ತಿ ಪಕ್ಖಾ ಅಪತನಾ, ಸನ್ತಿ ಪಾದಾ ಅವಞ್ಚನಾ;

ಮಾತಾಪಿತಾ ಚ ನಿಕ್ಖನ್ತಾ, ಜಾತವೇದ ಪಟಿಕ್ಕಮಾತಿ.

ವಟ್ಟಕಜಾತಕಂ ಪಞ್ಚಮಂ.

೩೬. ಯಂ ನಿಸ್ಸಿತಾ ಜಗತಿರುಹಂ ವಿಹಙ್ಗಮಾ, ಸ್ವಾಯಂ ಅಗ್ಗಿಂ ಪಮುಞ್ಚತಿ;

ದಿಸಾ ಭಜಥ ವಕ್ಕಙ್ಗಾ [ವಙ್ಕಙ್ಗಾ (ಸ್ಯಾ.)], ಜಾತಂ ಸರಣತೋ ಭಯನ್ತಿ.

ಸಕುಣಜಾತಕಂ ಛಟ್ಠಂ.

೩೭. ಯೇ ವುಡ್ಢ [ವದ್ಧ (ಸೀ. ಪೀ.)] ಮಪಚಾಯನ್ತಿ, ನರಾ ಧಮ್ಮಸ್ಸ ಕೋವಿದಾ;

ದಿಟ್ಠೇವ ಧಮ್ಮೇ ಪಾಸಂಸಾ, ಸಮ್ಪರಾಯೇ ಚ ಸುಗ್ಗತೀತಿ.

ತಿತ್ತಿರಜಾತಕಂ ಸತ್ತಮಂ.

೩೮. ನಾಚ್ಚನ್ತಂ ನಿಕತಿಪ್ಪಞ್ಞೋ, ನಿಕತ್ಯಾ ಸುಖಮೇಧತಿ;

ಆರಾಧೇತಿ ನಿಕತಿಪ್ಪಞ್ಞೋ [ಆರಾಧೇ ನಿಕತಿಪ್ಪಞ್ಞೋ (ಪೀ.)], ಬಕೋ ಕಕ್ಕಟಕಾಮಿವಾತಿ.

ಬಕಜಾತಕಂ ಅಟ್ಠಮಂ.

೩೯. ಮಞ್ಞೇ ಸೋವಣ್ಣಯೋ ರಾಸಿ, ಸೋಣ್ಣಮಾಲಾ ಚ ನನ್ದಕೋ;

ಯತ್ಥ ದಾಸೋ ಆಮಜಾತೋ, ಠಿತೋ ಥುಲ್ಲಾನಿ [ಥೂಲಾನಿ (ಕ.)] ಗಜ್ಜತೀತಿ.

ನನ್ದಜಾತಕಂ ನವಮಂ.

೪೦. ಕಾಮಂ ಪತಾಮಿ ನಿರಯಂ, ಉದ್ಧಂಪಾದೋ ಅವಂಸಿರೋ;

ನಾನರಿಯಂ ಕರಿಸ್ಸಾಮಿ, ಹನ್ದ ಪಿಣ್ಡಂ ಪಟಿಗ್ಗಹಾತಿ.

ಖದಿರಙ್ಗಾರಜಾತಕಂ ದಸಮಂ.

ಕುಲಾವಕವಗ್ಗೋ ಚತುತ್ಥೋ.

ತಸ್ಸುದ್ದಾನಂ –

ಸಿರಿಮಾತಲಿ ಧೀತರ ಪಕ್ಖಿವರೋ, ರತಿಯಾಗತೋ ಮಾತಾಪಿತಾ ಚ ಪುನ;

ಜಗತೀರುಹ ವುಡ್ಢ ಸುಕಕ್ಕಟಕೋ, ತಥಾ ನನ್ದಕಪಿಣ್ಡವರೇನ ದಸಾತಿ.