೩. ಕುರುಙ್ಗವಗ್ಗೋ

೨೧. ಞಾತಮೇತಂ ಕುರುಙ್ಗಸ್ಸ, ಯಂ ತ್ವಂ ಸೇಪಣ್ಣಿ ಸಿಯ್ಯಸಿ [ಸೇಯ್ಯಸಿ (ಸೀ. ಸ್ಯಾ. ಪೀ.)];

ಅಞ್ಞಂ ಸೇಪಣ್ಣಿ ಗಚ್ಛಾಮಿ, ನ ಮೇ ತೇ ರುಚ್ಚತೇ ಫಲನ್ತಿ.

ಕುರುಙ್ಗಮಿಗಜಾತಕಂ ಪಠಮಂ.

೨೨. ಯೇ ಕುಕ್ಕುರಾ ರಾಜಕುಲಮ್ಹಿ ವದ್ಧಾ, ಕೋಲೇಯ್ಯಕಾ ವಣ್ಣಬಲೂಪಪನ್ನಾ;

ತೇಮೇ ನ ವಜ್ಝಾ ಮಯಮಸ್ಮ ವಜ್ಝಾ, ನಾಯಂ ಸಘಚ್ಚಾ ದುಬ್ಬಲಘಾತಿಕಾಯನ್ತಿ.

ಕುಕ್ಕುರಜಾತಕಂ ದುತಿಯಂ.

೨೩. ಅಪಿ ಪಸ್ಸೇನ ಸೇಮಾನೋ, ಸಲ್ಲೇಭಿ ಸಲ್ಲಲೀಕತೋ;

ಸೇಯ್ಯೋವ ವಳವಾ ಗೋಜೋ [ಭೋಜ್ಜೋ (ಸೀ.), ಭೋಜ್ಝೋ (ಸ್ಯಾ. ಪೀ.)], ಯುಞ್ಜ ಮಞ್ಞೇವ ಸಾರಥೀತಿ.

ಗೋಜಾನೀಯ [ಭೋಜಾಜಾನೀಯ (ಸೀ. ಸ್ಯಾ. ಪೀ.)] ಜಾತಕಂ ತತಿಯಂ.

೨೪. ಯದಾ ಯದಾ ಯತ್ಥ ಯದಾ, ಯತ್ಥ ಯತ್ಥ ಯದಾ ಯದಾ;

ಆಜಞ್ಞೋ ಕುರುತೇ ವೇಗಂ, ಹಾಯನ್ತಿ ತತ್ಥ ವಾಳವಾತಿ.

ಆಜಞ್ಞಜಾತಕಂ ಚತುತ್ಥಂ.

೨೫. ಅಞ್ಞಮಞ್ಞೇಹಿ ತಿತ್ಥೇಹಿ, ಅಸ್ಸಂ ಪಾಯೇಹಿ ಸಾರಥಿ;

ಅಚ್ಚಾಸನಸ್ಸ ಪುರಿಸೋ, ಪಾಯಾಸಸ್ಸಪಿ ತಪ್ಪತೀತಿ.

ತಿತ್ಥಜಾತಕಂ ಪಞ್ಚಮಂ.

೨೬. ಪುರಾಣಚೋರಾನ ವಚೋ ನಿಸಮ್ಮ, ಮಹಿಳಾಮುಖೋ ಪೋಥಯಮನ್ವಚಾರೀ;

ಸುಸಞ್ಞತಾನಞ್ಹಿ ವಚೋ ನಿಸಮ್ಮ, ಗಜುತ್ತಮೋ ಸಬ್ಬಗುಣೇಸು ಅಟ್ಠಾತಿ.

ಮಹಿಳಾಮುಖಜಾತಕಂ ಛಟ್ಠಂ.

೨೭. ನಾಲಂ ಕಬಳಂ ಪದಾತವೇ, ನ ಚ ಪಿಣ್ಡಂ ನ ಕುಸೇ ನ ಘಂಸಿತುಂ;

ಮಞ್ಞಾಮಿ ಅಭಿಣ್ಹದಸ್ಸನಾ, ನಾಗೋ ಸ್ನೇಹಮಕಾಸಿ [ಸಿನೇಹಮಕಾಸಿ (ಸೀ. ಸ್ಯಾ. ಪೀ.)] ಕುಕ್ಕುರೇತಿ.

ಅಭಿಣ್ಹಜಾತಕಂ ಸತ್ತಮಂ.

೨೮. ಮನುಞ್ಞಮೇವ ಭಾಸೇಯ್ಯ, ನಾಮನುಞ್ಞಂ ಕುದಾಚನಂ;

ಮನುಞ್ಞಂ ಭಾಸಮಾನಸ್ಸ, ಗರುಂ ಭಾರಂ ಉದದ್ಧರಿ;

ಧನಞ್ಚ ನಂ ಅಲಾಭೇಸಿ, ತೇನ ಚತ್ತಮನೋ ಅಹೂತಿ.

ನನ್ದಿವಿಸಾಲಜಾತಕಂ ಅಟ್ಠಮಂ.

೨೯. ಯತೋ ಯತೋ ಗರು ಧುರಂ, ಯತೋ ಗಮ್ಭೀರವತ್ತನೀ;

ತದಾಸ್ಸು ಕಣ್ಹಂ ಯುಞ್ಜನ್ತಿ, ಸ್ವಾಸ್ಸು ತಂ ವಹತೇ ಧುರನ್ತಿ.

ಕಣ್ಹಜಾತಕಂ ನವಮಂ.

೩೦. ಮಾ ಮುನಿಕಸ್ಸ ಪಿಹಯಿ, ಆತುರನ್ನಾನಿ ಭುಞ್ಜತಿ;

ಅಪ್ಪೋಸ್ಸುಕ್ಕೋ ಭುಸಂ ಖಾದ, ಏತಂ ದೀಘಾಯುಲಕ್ಖಣನ್ತಿ.

ಮುನಿಕಜಾತಕಂ ದಸಮಂ.

ಕುರುಙ್ಗವಗ್ಗೋ ತತಿಯೋ.

ತಸ್ಸುದ್ದಾನಂ –

ಕುರುಙ್ಗಸ್ಸ ಕುಕ್ಕುರಗೋಜವರೋ, ಪುನ ವಾಳವಸ್ಸಸಿರಿವ್ಹಯನೋ [ಸಿರಿವಯನೋ (ಸಬ್ಬತ್ಥ)];

ಮಹಿಳಾಮುಖನಾಮನುಞ್ಞವರೋ, ವಹತೇ ಧುರ ಮುನಿಕೇನ ದಸಾತಿ.