೨. ಸೀಲವಗ್ಗೋ

೧೧. ಹೋತಿ ಸೀಲವತಂ ಅತ್ಥೋ, ಪಟಿಸನ್ಥಾರ [ಪಟಿಸನ್ಧಾರ (ಕ.)] ವುತ್ತಿನಂ;

ಲಕ್ಖಣಂ ಪಸ್ಸ ಆಯನ್ತಂ, ಞಾತಿಸಙ್ಘಪುರಕ್ಖತಂ [ಪುರಕ್ಖಿತಂ (ಸ್ಯಾ.), ಪುರೇಕ್ಖಿತಂ (ಕ.)];

ಅಥ ಪಸ್ಸಸಿಮಂ ಕಾಳಂ, ಸುವಿಹೀನಂವ ಞಾತಿಭೀತಿ.

ಲಕ್ಖಣಮಿಗಜಾತಕಂ ಪಠಮಂ.

೧೨. ನಿಗ್ರೋಧಮೇವ ಸೇವೇಯ್ಯ, ನ ಸಾಖಮುಪಸಂವಸೇ;

ನಿಗ್ರೋಧಸ್ಮಿಂ ಮತಂ ಸೇಯ್ಯೋ, ಯಞ್ಚೇ ಸಾಖಸ್ಮಿ [ಸಾಖಸ್ಮಿಂ (ಸೀ. ಪೀ.)] ಜೀವಿತನ್ತಿ.

ನಿಗ್ರೋಧಮಿಗಜಾತಕಂ ದುತಿಯಂ.

೧೩. ಧಿರತ್ಥು ಕಣ್ಡಿನಂ ಸಲ್ಲಂ, ಪುರಿಸಂ ಗಾಳ್ಹವೇಧಿನಂ;

ಧಿರತ್ಥು ತಂ ಜನಪದಂ, ಯತ್ಥಿತ್ಥೀ ಪರಿಣಾಯಿಕಾ;

ತೇ ಚಾಪಿ ಧಿಕ್ಕಿತಾ [ಧಿಕ್ಕತಾ (?)] ಸತ್ತಾ, ಯೇ ಇತ್ಥೀನಂ ವಸಂಗತಾತಿ.

ಕಣ್ಡಿಜಾತಕಂ ತತಿಯಂ.

೧೪. ನ ಕಿರತ್ಥಿ ರಸೇಹಿ ಪಾಪಿಯೋ, ಆವಾಸೇಹಿ ವ [ವಾ (ಸಬ್ಬತ್ಥ)] ಸನ್ಥವೇಹಿ ವಾ;

ವಾತಮಿಗಂ ಗಹನನಿಸ್ಸಿತಂ [ಗೇಹನಿಸ್ಸಿತಂ (ಸೀ. ಪೀ.)], ವಸಮಾನೇಸಿ ರಸೇಹಿ ಸಞ್ಜಯೋತಿ.

ವಾತಮಿಗಜಾತಕಂ ಚತುತ್ಥಂ.

೧೫. ಅಟ್ಠಕ್ಖುರಂ ಖರಾದಿಯೇ, ಮಿಗಂ ವಙ್ಕಾತಿವಙ್ಕಿನಂ;

ಸತ್ತಹಿ ಕಾಲಾತಿಕ್ಕನ್ತಂ [ಸತ್ತಹಿ ಕಲಾಹ’ತಿಕ್ಕನ್ತಂ (ಸೀ.), ಸತ್ತಕಾಲೇಹ’ತಿಕ್ಕನ್ತಂ (ಸ್ಯಾ.), ಸತ್ತಹಿ ಕಾಲಾಹ’ತಿಕ್ಕನ್ತಂ (ಪೀ.)], ನ ನಂ ಓವದಿತುಸ್ಸಹೇತಿ.

ಖರಾದಿಯಜಾತಕಂ ಪಞ್ಚಮಂ.

೧೬. ಮಿಗಂ ತಿಪಲ್ಲತ್ಥ [ತಿಪಲ್ಲತ್ತ (ಕ.)] ಮನೇಕಮಾಯಂ, ಅಟ್ಠಕ್ಖುರಂ ಅಡ್ಢರತ್ತಾಪಪಾಯಿಂ [ಅಡ್ಢರತ್ತಾವಪಾಯಿಂ (ಸೀ. ಪೀ.)];

ಏಕೇನ ಸೋತೇನ ಛಮಾಸ್ಸಸನ್ತೋ, ಛಹಿ ಕಲಾಹಿತಿಭೋತಿ [ಕಲಾಹತಿಭೋತಿ (ಸೀ. ಸ್ಯಾ. ಪೀ.)] ಭಾಗಿನೇಯ್ಯೋತಿ.

ತಿಪಲ್ಲತ್ಥಮಿಗಜಾತಕಂ ಛಟ್ಠಂ.

೧೭. ಕಾಳೇ ವಾ ಯದಿ ವಾ ಜುಣ್ಹೇ, ಯದಾ ವಾಯತಿ ಮಾಲುತೋ;

ವಾತಜಾನಿ ಹಿ ಸೀತಾನಿ, ಉಭೋತ್ಥಮಪರಾಜಿತಾತಿ.

ಮಾಲುತಜಾತಕಂ ಸತ್ತಮಂ.

೧೮. ಏವಂ ಚೇ ಸತ್ತಾ ಜಾನೇಯ್ಯುಂ, ದುಕ್ಖಾಯಂ ಜಾತಿಸಮ್ಭವೋ;

ನ ಪಾಣೋ ಪಾಣಿನಂ ಹಞ್ಞೇ, ಪಾಣಘಾತೀ ಹಿ ಸೋಚತೀತಿ.

ಮತಕಭತ್ತಜಾತಕಂ ಅಟ್ಠಮಂ.

೧೯. ಸಚೇ ಮುಚ್ಚೇ [ಮುಞ್ಚೇ (ಸೀ. ಸ್ಯಾ. ಪೀ.)] ಪೇಚ್ಚ ಮುಚ್ಚೇ [ಮುಞ್ಚೇ (ಸೀ. ಸ್ಯಾ. ಪೀ.)], ಮುಚ್ಚಮಾನೋ ಹಿ ಬಜ್ಝತಿ;

ನ ಹೇವಂ ಧೀರಾ ಮುಚ್ಚನ್ತಿ, ಮುತ್ತಿ ಬಾಲಸ್ಸ ಬನ್ಧನನ್ತಿ.

ಆಯಾಚಿತಭತ್ತಜಾತಕಂ ನವಮಂ.

೨೦. ದಿಸ್ವಾ ಪದಮನುತ್ತಿಣ್ಣಂ, ದಿಸ್ವಾನೋತರಿತಂ ಪದಂ;

ನಳೇನ ವಾರಿಂ ಪಿಸ್ಸಾಮ [ಪಿವಿಸ್ಸಾಮ (ಸೀ. ಸ್ಯಾ. ಪೀ.)], ನೇವ [ನ ಚ (ಕ.)] ಮಂ ತ್ವಂ ವಧಿಸ್ಸಸೀತಿ.

ನಳಪಾನಜಾತಕಂ ದಸಮಂ.

ಸೀಲವಗ್ಗೋ ದುತಿಯೋ.

ತಸ್ಸುದ್ದಾನಂ –

ಅಥ ಲಕ್ಖಣ ಸಾಖ ಧಿರತ್ಥು ಪುನ, ನ ಕಿರತ್ಥಿ ರಸೇಹಿ ಖರಾದಿಯಾ;

ಅತಿಭೋತಿ ವರ [ರಸ (ಸಬ್ಬತ್ಥ)] ಮಾಲುತ ಪಾಣ, ಮುಚ್ಚೇನ ನಳಅವ್ಹಯನೇನ ಭವನ್ತಿ ದಸಾತಿ.