೭. ಆತಾಪೀಸುತ್ತಂ

೩೪. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –

‘‘ಅನಾತಾಪೀ, ಭಿಕ್ಖವೇ, ಭಿಕ್ಖು ಅನೋತ್ತಾಪೀ [ಅನೋತ್ತಪ್ಪೀ (ಬಹೂಸು) ಅಟ್ಠಕಥಾ ಪಸ್ಸಿತಬ್ಬಾ] ಅಭಬ್ಬೋ ಸಮ್ಬೋಧಾಯ, ಅಭಬ್ಬೋ ನಿಬ್ಬಾನಾಯ, ಅಭಬ್ಬೋ ಅನುತ್ತರಸ್ಸ ಯೋಗಕ್ಖೇಮಸ್ಸ ಅಧಿಗಮಾಯ. ಆತಾಪೀ ಚ ಖೋ, ಭಿಕ್ಖವೇ, ಭಿಕ್ಖು ಓತ್ತಾಪೀ [ಓತ್ತಪ್ಪೀ (ಬಹೂಸು)] ಭಬ್ಬೋ ಸಮ್ಬೋಧಾಯ, ಭಬ್ಬೋ ನಿಬ್ಬಾನಾಯ, ಭಬ್ಬೋ ಅನುತ್ತರಸ್ಸ ಯೋಗಕ್ಖೇಮಸ್ಸ ಅಧಿಗಮಾಯಾ’’ತಿ. ಏತಮತ್ಥಂ ಭಗವಾ ಅವೋಚ. ತತ್ಥೇತಂ ಇತಿ ವುಚ್ಚತಿ –

‘‘ಅನಾತಾಪೀ ಅನೋತ್ತಾಪೀ, ಕುಸೀತೋ ಹೀನವೀರಿಯೋ;

ಯೋ ಥೀನಮಿದ್ಧಬಹುಲೋ, ಅಹಿರೀಕೋ ಅನಾದರೋ;

ಅಭಬ್ಬೋ ತಾದಿಸೋ ಭಿಕ್ಖು, ಫುಟ್ಠುಂ ಸಮ್ಬೋಧಿಮುತ್ತಮಂ.

‘‘ಯೋ ಚ ಸತಿಮಾ ನಿಪಕೋ ಝಾಯೀ, ಆತಾಪೀ ಓತ್ತಾಪೀ ಚ ಅಪ್ಪಮತ್ತೋ;

ಸಂಯೋಜನಂ ಜಾತಿಜರಾಯ ಛೇತ್ವಾ, ಇಧೇವ ಸಮ್ಬೋಧಿಮನುತ್ತರಂ ಫುಸೇ’’ತಿ.

ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ. ಸತ್ತಮಂ.