೯. ವೇಸ್ಸನ್ತರಚರಿಯಾ

೬೭. ‘‘ಯಾ ಮೇ ಅಹೋಸಿ ಜನಿಕಾ, ಫುಸ್ಸತೀ [ಫುಸತೀ (ಸೀ.)] ನಾಮ ಖತ್ತಿಯಾ;

ಸಾ ಅತೀತಾಸು ಜಾತೀಸು, ಸಕ್ಕಸ್ಸ ಮಹೇಸೀ ಪಿಯಾ.

೬೮. ‘‘ತಸ್ಸಾ ಆಯುಕ್ಖಯಂ ಞತ್ವಾ, ದೇವಿನ್ದೋ ಏತದಬ್ರವಿ;

‘ದದಾಮಿ ತೇ ದಸ ವರೇ, ವರಭದ್ದೇ ಯದಿಚ್ಛಸಿ’.

೬೯. ‘‘ಏವಂ ವುತ್ತಾ ಚ ಸಾ ದೇವೀ, ಸಕ್ಕಂ ಪುನಿದಮಬ್ರವಿ;

‘ಕಿಂ ನು ಮೇ ಅಪರಾಧತ್ಥಿ, ಕಿಂ ನು ದೇಸ್ಸಾ ಅಹಂ ತವ;

ರಮ್ಮಾ ಚಾವೇಸಿ ಮಂ ಠಾನಾ, ವಾತೋವ ಧರಣೀರುಹಂ’.

೭೦. ‘‘ಏವಂ ವುತ್ತೋ ಚ ಸೋ ಸಕ್ಕೋ, ಪುನ ತಸ್ಸಿದಮಬ್ರವಿ;

‘ನ ಚೇವ ತೇ ಕತಂ ಪಾಪಂ, ನ ಚ ಮೇ ತ್ವಂಸಿ ಅಪ್ಪಿಯಾ.

೭೧. ‘‘‘ಏತ್ತಕಂಯೇವ ತೇ ಆಯು, ಚವನಕಾಲೋ ಭವಿಸ್ಸತಿ;

ಪಟಿಗ್ಗಣ್ಹ ಮಯಾ ದಿನ್ನೇ, ವರೇ ದಸ ವರುತ್ತಮೇ’.

೭೨. ‘‘ಸಕ್ಕೇನ ಸಾ ದಿನ್ನವರಾ, ತುಟ್ಠಹಟ್ಠಾ ಪಮೋದಿತಾ;

ಮಮಂ ಅಬ್ಭನ್ತರಂ ಕತ್ವಾ, ಫುಸ್ಸತೀ ದಸ ವರೇ ವರೀ.

೭೩. ‘‘ತತೋ ಚುತಾ ಸಾ ಫುಸ್ಸತೀ, ಖತ್ತಿಯೇ ಉಪಪಜ್ಜಥ;

ಜೇತುತ್ತರಮ್ಹಿ ನಗರೇ, ಸಞ್ಜಯೇನ ಸಮಾಗಮಿ.

೭೪. ‘‘ಯದಾಹಂ ಫುಸ್ಸತಿಯಾ ಕುಚ್ಛಿಂ, ಓಕ್ಕನ್ತೋ ಪಿಯಮಾತುಯಾ;

ಮಮ ತೇಜೇನ ಮೇ ಮಾತಾ, ಸದಾ ದಾನರತಾ ಅಹು.

೭೫. ‘‘ಅಧನೇ ಆತುರೇ ಜಿಣ್ಣೇ, ಯಾಚಕೇ ಅದ್ಧಿಕೇ [ಪಥಿಕೇ (ಕ.)] ಜನೇ;

ಸಮಣೇ ಬ್ರಾಹ್ಮಣೇ ಖೀಣೇ, ದೇತಿ ದಾನಂ ಅಕಿಞ್ಚನೇ.

೭೬. ‘‘ದಸ ಮಾಸೇ ಧಾರಯಿತ್ವಾನ, ಕರೋನ್ತೇ ಪುರಂ ಪದಕ್ಖಿಣಂ;

ವೇಸ್ಸಾನಂ ವೀಥಿಯಾ ಮಜ್ಝೇ, ಜನೇಸಿ ಫುಸ್ಸತೀ ಮಮಂ.

೭೭. ‘‘ನ ಮಯ್ಹಂ ಮತ್ತಿಕಂ ನಾಮಂ, ನಪಿ ಪೇತ್ತಿಕಸಮ್ಭವಂ;

ಜಾತೇತ್ಥ ವೇಸ್ಸವೀಥಿಯಾ, ತಸ್ಮಾ ವೇಸ್ಸನ್ತರೋ ಅಹು.

೭೮. ‘‘ಯದಾಹಂ ದಾರಕೋ ಹೋಮಿ, ಜಾತಿಯಾ ಅಟ್ಠವಸ್ಸಿಕೋ;

ತದಾ ನಿಸಜ್ಜ ಪಾಸಾದೇ, ದಾನಂ ದಾತುಂ ವಿಚಿನ್ತಯಿಂ.

೭೯. ‘‘‘ಹದಯಂ ದದೇಯ್ಯಂ ಚಕ್ಖುಂ, ಮಂಸಮ್ಪಿ ರುಧಿರಮ್ಪಿ ಚ;

ದದೇಯ್ಯಂ ಕಾಯಂ ಸಾವೇತ್ವಾ, ಯದಿ ಕೋಚಿ ಯಾಚಯೇ ಮಮಂ’.

೮೦. ‘‘ಸಭಾವಂ ಚಿನ್ತಯನ್ತಸ್ಸ, ಅಕಮ್ಪಿತಮಸಣ್ಠಿತಂ;

ಅಕಮ್ಪಿ ತತ್ಥ ಪಥವೀ, ಸಿನೇರುವನವಟಂಸಕಾ.

೮೧. ‘‘ಅನ್ವದ್ಧಮಾಸೇ ಪನ್ನರಸೇ, ಪುಣ್ಣಮಾಸೇ ಉಪೋಸಥೇ;

ಪಚ್ಚಯಂ ನಾಗಮಾರುಯ್ಹ, ದಾನಂ ದಾತುಂ ಉಪಾಗಮಿಂ.

೮೨. ‘‘ಕಲಿಙ್ಗರಟ್ಠವಿಸಯಾ, ಬ್ರಾಹ್ಮಣಾ ಉಪಗಞ್ಛು ಮಂ;

ಅಯಾಚುಂ ಮಂ ಹತ್ಥಿನಾಗಂ, ಧಞ್ಞಂ ಮಙ್ಗಲಸಮ್ಮತಂ.

೮೩. ‘‘ಅವುಟ್ಠಿಕೋ ಜನಪದೋ, ದುಬ್ಭಿಕ್ಖೋ ಛಾತಕೋ ಮಹಾ;

ದದಾಹಿ ಪವರಂ ನಾಗಂ, ಸಬ್ಬಸೇತಂ ಗಜುತ್ತಮಂ.

೮೪. ‘‘ದದಾಮಿ ನ ವಿಕಮ್ಪಾಮಿ, ಯಂ ಮಂ ಯಾಚನ್ತಿ ಬ್ರಾಹ್ಮಣಾ;

ಸನ್ತಂ ನಪ್ಪತಿಗೂಹಾಮಿ [ನಪ್ಪತಿಗುಯ್ಹಾಮಿ (ಸೀ. ಕ.)], ದಾನೇ ಮೇ ರಮತೇ ಮನೋ.

೮೫. ‘‘ನ ಮೇ ಯಾಚಕಮನುಪ್ಪತ್ತೇ, ಪಟಿಕ್ಖೇಪೋ ಅನುಚ್ಛವೋ;

‘ಮಾ ಮೇ ಭಿಜ್ಜಿ ಸಮಾದಾನಂ, ದಸ್ಸಾಮಿ ವಿಪುಲಂ ಗಜಂ’.

೮೬. ‘‘ನಾಗಂ ಗಹೇತ್ವಾ ಸೋಣ್ಡಾಯ, ಭಿಙ್ಗಾರೇ ರತನಾಮಯೇ;

ಜಲಂ ಹತ್ಥೇ ಆಕಿರಿತ್ವಾ, ಬ್ರಾಹ್ಮಣಾನಂ ಅದಂ ಗಜಂ.

೮೭. ‘‘ಪುನಾಪರಂ ದದನ್ತಸ್ಸ, ಸಬ್ಬಸೇತಂ ಗಜುತ್ತಮಂ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

೮೮. ‘‘ತಸ್ಸ ನಾಗಸ್ಸ ದಾನೇನ, ಸಿವಯೋ ಕುದ್ಧಾ ಸಮಾಗತಾ;

ಪಬ್ಬಾಜೇಸುಂ ಸಕಾ ರಟ್ಠಾ, ‘ವಙ್ಕಂ ಗಚ್ಛತು ಪಬ್ಬತಂ’.

೮೯. ‘‘ತೇಸಂ ನಿಚ್ಛುಭಮಾನಾನಂ, ಅಕಮ್ಪಿತ್ಥಮಸಣ್ಠಿತಂ;

ಮಹಾದಾನಂ ಪವತ್ತೇತುಂ, ಏಕಂ ವರಮಯಾಚಿಸಂ.

೯೦. ‘‘ಯಾಚಿತಾ ಸಿವಯೋ ಸಬ್ಬೇ, ಏಕಂ ವರಮದಂಸು ಮೇ;

ಸಾವಯಿತ್ವಾ ಕಣ್ಣಭೇರಿಂ, ಮಹಾದಾನಂ ದದಾಮಹಂ.

೯೧. ‘‘ಅಥೇತ್ಥ ವತ್ತತೀ ಸದ್ದೋ, ತುಮುಲೋ ಭೇರವೋ ಮಹಾ;

ದಾನೇನಿಮಂ ನೀಹರನ್ತಿ, ಪುನ ದಾನಂ ದದಾತಯಂ.

೯೨. ‘‘ಹತ್ಥಿಂ ಅಸ್ಸೇ ರಥೇ ದತ್ವಾ, ದಾಸಿಂ ದಾಸಂ ಗವಂ ಧನಂ;

ಮಹಾದಾನಂ ದದಿತ್ವಾನ, ನಗರಾ ನಿಕ್ಖಮಿಂ ತದಾ.

೯೩. ‘‘ನಿಕ್ಖಮಿತ್ವಾನ ನಗರಾ, ನಿವತ್ತಿತ್ವಾ ವಿಲೋಕಿತೇ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

೯೪. ‘‘ಚತುವಾಹಿಂ ರಥಂ ದತ್ವಾ, ಠತ್ವಾ ಚಾತುಮ್ಮಹಾಪಥೇ;

ಏಕಾಕಿಯೋ ಅದುತಿಯೋ, ಮದ್ದಿದೇವಿಂ ಇದಮಬ್ರವಿಂ.

೯೫. ‘‘‘ತ್ವಂ ಮದ್ದಿ ಕಣ್ಹಂ ಗಣ್ಹಾಹಿ, ಲಹುಕಾ ಏಸಾ ಕನಿಟ್ಠಿಕಾ;

ಅಹಂ ಜಾಲಿಂ ಗಹೇಸ್ಸಾಮಿ, ಗರುಕೋ ಭಾತಿಕೋ ಹಿ ಸೋ’.

೯೬. ‘‘ಪದುಮಂ ಪುಣ್ಡರೀಕಂವ, ಮದ್ದೀ ಕಣ್ಹಾಜಿನಗ್ಗಹೀ;

ಅಹಂ ಸುವಣ್ಣಬಿಮ್ಬಂವ, ಜಾಲಿಂ ಖತ್ತಿಯಮಗ್ಗಹಿಂ.

೯೭. ‘‘ಅಭಿಜಾತಾ ಸುಖುಮಾಲಾ, ಖತ್ತಿಯಾ ಚತುರೋ ಜನಾ;

ವಿಸಮಂ ಸಮಂ ಅಕ್ಕಮನ್ತಾ, ವಙ್ಕಂ ಗಚ್ಛಾಮ ಪಬ್ಬತಂ.

೯೮. ‘‘ಯೇ ಕೇಚಿ ಮನುಜಾ ಏನ್ತಿ, ಅನುಮಗ್ಗೇ ಪಟಿಪ್ಪಥೇ;

ಮಗ್ಗನ್ತೇ ಪಟಿಪುಚ್ಛಾಮ, ‘ಕುಹಿಂ ವಙ್ಕನ್ತ [ವಙ್ಕತ (ಸೀ.)] ಪಬ್ಬತೋ’.

೯೯. ‘‘ತೇ ತತ್ಥ ಅಮ್ಹೇ ಪಸ್ಸಿತ್ವಾ, ಕರುಣಂ ಗಿರಮುದೀರಯುಂ;

ದುಕ್ಖಂ ತೇ ಪಟಿವೇದೇನ್ತಿ, ದೂರೇ ವಙ್ಕನ್ತಪಬ್ಬತೋ.

೧೦೦. ‘‘ಯದಿ ಪಸ್ಸನ್ತಿ ಪವನೇ, ದಾರಕಾ ಫಲಿನೇ ದುಮೇ;

ತೇಸಂ ಫಲಾನಂ ಹೇತುಮ್ಹಿ, ಉಪರೋದನ್ತಿ ದಾರಕಾ.

೧೦೧. ‘‘ರೋದನ್ತೇ ದಾರಕೇ ದಿಸ್ವಾ, ಉಬ್ಬಿದ್ಧಾ [ಉಬ್ಬಿಗ್ಗಾ (ಸ್ಯಾ. ಕಂ.)] ವಿಪುಲಾ ದುಮಾ;

ಸಯಮೇವೋಣಮಿತ್ವಾನ, ಉಪಗಚ್ಛನ್ತಿ ದಾರಕೇ.

೧೦೨. ‘‘ಇದಂ ಅಚ್ಛರಿಯಂ ದಿಸ್ವಾ, ಅಬ್ಭುತಂ ಲೋಮಹಂಸನಂ;

ಸಾಹುಕಾರಂ [ಸಾಧುಕಾರಂ (ಸಬ್ಬತ್ಥ)] ಪವತ್ತೇಸಿ, ಮದ್ದೀ ಸಬ್ಬಙ್ಗಸೋಭನಾ.

೧೦೩. ‘‘ಅಚ್ಛೇರಂ ವತ ಲೋಕಸ್ಮಿಂ, ಅಬ್ಭುತಂ ಲೋಮಹಂಸನಂ;

ವೇಸ್ಸನ್ತರಸ್ಸ ತೇಜೇನ, ಸಯಮೇವೋಣತಾ ದುಮಾ.

೧೦೪. ‘‘ಸಙ್ಖಿಪಿಂಸು ಪಥಂ ಯಕ್ಖಾ, ಅನುಕಮ್ಪಾಯ ದಾರಕೇ;

ನಿಕ್ಖನ್ತದಿವಸೇನೇವ [ನಿಕ್ಖನ್ತದಿವಸೇಯೇವ (ಸೀ.)], ಚೇತರಟ್ಠಮುಪಾಗಮುಂ.

೧೦೫. ‘‘ಸಟ್ಠಿರಾಜಸಹಸ್ಸಾನಿ, ತದಾ ವಸನ್ತಿ ಮಾತುಲೇ;

ಸಬ್ಬೇ ಪಞ್ಜಲಿಕಾ ಹುತ್ವಾ, ರೋದಮಾನಾ ಉಪಾಗಮುಂ.

೧೦೬. ‘‘ತತ್ಥ ವತ್ತೇತ್ವಾ ಸಲ್ಲಾಪಂ, ಚೇತೇಹಿ ಚೇತಪುತ್ತೇಹಿ;

ತೇ ತತೋ ನಿಕ್ಖಮಿತ್ವಾನ, ವಙ್ಕಂ ಅಗಮು ಪಬ್ಬತಂ.

೧೦೭. ‘‘ಆಮನ್ತಯಿತ್ವಾ ದೇವಿನ್ದೋ, ವಿಸ್ಸಕಮ್ಮಂ [ವಿಸುಕಮ್ಮಂ (ಕ.)] ಮಹಿದ್ಧಿಕಂ;

ಅಸ್ಸಮಂ ಸುಕತಂ ರಮ್ಮಂ, ಪಣ್ಣಸಾಲಂ ಸುಮಾಪಯ.

೧೦೮. ‘‘ಸಕ್ಕಸ್ಸ ವಚನಂ ಸುತ್ವಾ, ವಿಸ್ಸಕಮ್ಮೋ ಮಹಿದ್ಧಿಕೋ;

ಅಸ್ಸಮಂ ಸುಕತಂ ರಮ್ಮಂ, ಪಣ್ಣಸಾಲಂ ಸುಮಾಪಯಿ.

೧೦೯. ‘‘ಅಜ್ಝೋಗಾಹೇತ್ವಾ ಪವನಂ, ಅಪ್ಪಸದ್ದಂ ನಿರಾಕುಲಂ;

ಚತುರೋ ಜನಾ ಮಯಂ ತತ್ಥ, ವಸಾಮ ಪಬ್ಬತನ್ತರೇ.

೧೧೦. ‘‘ಅಹಞ್ಚ ಮದ್ದಿದೇವೀ ಚ, ಜಾಲೀ ಕಣ್ಹಾಜಿನಾ ಚುಭೋ;

ಅಞ್ಞಮಞ್ಞಂ ಸೋಕನುದಾ, ವಸಾಮ ಅಸ್ಸಮೇ ತದಾ.

೧೧೧. ‘‘ದಾರಕೇ ಅನುರಕ್ಖನ್ತೋ, ಅಸುಞ್ಞೋ ಹೋಮಿ ಅಸ್ಸಮೇ;

ಮದ್ದೀ ಫಲಂ ಆಹರಿತ್ವಾ, ಪೋಸೇತಿ ಸಾ ತಯೋ ಜನೇ.

೧೧೨. ‘‘ಪವನೇ ವಸಮಾನಸ್ಸ, ಅದ್ಧಿಕೋ ಮಂ ಉಪಾಗಮಿ;

ಆಯಾಚಿ ಪುತ್ತಕೇ ಮಯ್ಹಂ, ಜಾಲಿಂ ಕಣ್ಹಾಜಿನಂ ಚುಭೋ.

೧೧೩. ‘‘ಯಾಚಕಂ ಉಪಗತಂ ದಿಸ್ವಾ, ಹಾಸೋ ಮೇ ಉಪಪಜ್ಜಥ;

ಉಭೋ ಪುತ್ತೇ ಗಹೇತ್ವಾನ, ಅದಾಸಿಂ ಬ್ರಾಹ್ಮಣೇ ತದಾ.

೧೧೪. ‘‘ಸಕೇ ಪುತ್ತೇ ಚಜನ್ತಸ್ಸ, ಜೂಜಕೇ ಬ್ರಾಹ್ಮಣೇ ಯದಾ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

೧೧೫. ‘‘ಪುನದೇವ ಸಕ್ಕೋ ಓರುಯ್ಹ, ಹುತ್ವಾ ಬ್ರಾಹ್ಮಣಸನ್ನಿಭೋ;

ಆಯಾಚಿ ಮಂ ಮದ್ದಿದೇವಿಂ, ಸೀಲವನ್ತಿಂ ಪತಿಬ್ಬತಂ.

೧೧೬. ‘‘ಮದ್ದಿಂ ಹತ್ಥೇ ಗಹೇತ್ವಾನ, ಉದಕಞ್ಜಲಿ ಪೂರಿಯ;

ಪಸನ್ನಮನಸಙ್ಕಪ್ಪೋ, ತಸ್ಸ ಮದ್ದಿಂ ಅದಾಸಹಂ.

೧೧೭. ‘‘ಮದ್ದಿಯಾ ದೀಯಮಾನಾಯ, ಗಗನೇ ದೇವಾ ಪಮೋದಿತಾ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

೧೧೮. ‘‘ಜಾಲಿಂ ಕಣ್ಹಾಜಿನಂ ಧೀತಂ, ಮದ್ದಿದೇವಿಂ ಪತಿಬ್ಬತಂ;

ಚಜಮಾನೋ ನ ಚಿನ್ತೇಸಿಂ, ಬೋಧಿಯಾಯೇವ ಕಾರಣಾ.

೧೧೯. ‘‘ನ ಮೇ ದೇಸ್ಸಾ ಉಭೋ ಪುತ್ತಾ, ಮದ್ದಿದೇವೀ ನ ದೇಸ್ಸಿಯಾ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ಪಿಯೇ ಅದಾಸಹಂ.

೧೨೦. ‘‘ಪುನಾಪರಂ ಬ್ರಹಾರಞ್ಞೇ, ಮಾತಾಪಿತುಸಮಾಗಮೇ;

ಕರುಣಂ ಪರಿದೇವನ್ತೇ, ಸಲ್ಲಪನ್ತೇ ಸುಖಂ ದುಖಂ.

೧೨೧. ‘‘ಹಿರೋತ್ತಪ್ಪೇನ ಗರುನಾ [ಗರುನಂ (ಸ್ಯಾ. ಕ.)], ಉಭಿನ್ನಂ ಉಪಸಙ್ಕಮಿ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

೧೨೨. ‘‘ಪುನಾಪರಂ ಬ್ರಹಾರಞ್ಞಾ, ನಿಕ್ಖಮಿತ್ವಾ ಸಞಾತಿಭಿ;

ಪವಿಸಾಮಿ ಪುರಂ ರಮ್ಮಂ, ಜೇತುತ್ತರಂ ಪುರುತ್ತಮಂ.

೧೨೩. ‘‘ರತನಾನಿ ಸತ್ತ ವಸ್ಸಿಂಸು, ಮಹಾಮೇಘೋ ಪವಸ್ಸಥ;

ತದಾಪಿ ಪಥವೀ ಕಮ್ಪಿ, ಸಿನೇರುವನವಟಂಸಕಾ.

೧೨೪. ‘‘ಅಚೇತನಾಯಂ ಪಥವೀ, ಅವಿಞ್ಞಾಯ ಸುಖಂ ದುಖಂ;

ಸಾಪಿ ದಾನಬಲಾ ಮಯ್ಹಂ, ಸತ್ತಕ್ಖತ್ತುಂ ಪಕಮ್ಪಥಾ’’ತಿ.

ವೇಸ್ಸನ್ತರಚರಿಯಂ ನವಮಂ.