೧೦. ಸಸಪಣ್ಡಿತಚರಿಯಾ

೧೨೫. ‘‘ಪುನಾಪರಂ ಯದಾ ಹೋಮಿ, ಸಸಕೋ ಪವನಚಾರಕೋ;

ತಿಣಪಣ್ಣಸಾಕಫಲಭಕ್ಖೋ, ಪರಹೇಠನವಿವಜ್ಜಿತೋ.

೧೨೬. ‘‘ಮಕ್ಕಟೋ ಚ ಸಿಙ್ಗಾಲೋ ಚ, ಸುತ್ತಪೋತೋ ಚಹಂ ತದಾ;

ವಸಾಮ ಏಕಸಾಮನ್ತಾ, ಸಾಯಂ ಪಾತೋ ಚ ದಿಸ್ಸರೇ [ಸಾಯಂ ಪಾತೋ ಪದಿಸ್ಸರೇ (ಕ.)].

೧೨೭. ‘‘ಅಹಂ ತೇ ಅನುಸಾಸಾಮಿ, ಕಿರಿಯೇ ಕಲ್ಯಾಣಪಾಪಕೇ;

‘ಪಾಪಾನಿ ಪರಿವಜ್ಜೇಥ, ಕಲ್ಯಾಣೇ ಅಭಿನಿವಿಸ್ಸಥ’.

೧೨೮. ‘‘ಉಪೋಸಥಮ್ಹಿ ದಿವಸೇ, ಚನ್ದಂ ದಿಸ್ವಾನ ಪೂರಿತಂ;

ಏತೇಸಂ ತತ್ಥ ಆಚಿಕ್ಖಿಂ, ದಿವಸೋ ಅಜ್ಜುಪೋಸಥೋ.

೧೨೯. ‘‘ದಾನಾನಿ ಪಟಿಯಾದೇಥ, ದಕ್ಖಿಣೇಯ್ಯಸ್ಸ ದಾತವೇ;

ದತ್ವಾ ದಾನಂ ದಕ್ಖಿಣೇಯ್ಯೇ, ಉಪವಸ್ಸಥುಪೋಸಥಂ.

೧೩೦. ‘‘ತೇ ಮೇ ಸಾಧೂತಿ ವತ್ವಾನ, ಯಥಾಸತ್ತಿ ಯಥಾಬಲಂ;

ದಾನಾನಿ ಪಟಿಯಾದೇತ್ವಾ, ದಕ್ಖಿಣೇಯ್ಯಂ ಗವೇಸಿಸುಂ [ಗವೇಸಯ್ಯುಂ (ಕ.)].

೧೩೧. ‘‘ಅಹಂ ನಿಸಜ್ಜ ಚಿನ್ತೇಸಿಂ, ದಾನಂ ದಕ್ಖಿಣನುಚ್ಛವಂ;

‘ಯದಿಹಂ ಲಭೇ ದಕ್ಖಿಣೇಯ್ಯಂ, ಕಿಂ ಮೇ ದಾನಂ ಭವಿಸ್ಸತಿ.

೧೩೨. ‘‘‘ನ ಮೇ ಅತ್ಥಿ ತಿಲಾ ಮುಗ್ಗಾ, ಮಾಸಾ ವಾ ತಣ್ಡುಲಾ ಘತಂ;

ಅಹಂ ತಿಣೇನ ಯಾಪೇಮಿ, ನ ಸಕ್ಕಾ ತಿಣ ದಾತವೇ.

೧೩೩. ‘‘‘ಯದಿ ಕೋಚಿ ಏತಿ ದಕ್ಖಿಣೇಯ್ಯೋ, ಭಿಕ್ಖಾಯ ಮಮ ಸನ್ತಿಕೇ;

ದಜ್ಜಾಹಂ ಸಕಮತ್ತಾನಂ, ನ ಸೋ ತುಚ್ಛೋ ಗಮಿಸ್ಸತಿ’.

೧೩೪. ‘‘ಮಮ ಸಙ್ಕಪ್ಪಮಞ್ಞಾಯ, ಸಕ್ಕೋ ಬ್ರಾಹ್ಮಣವಣ್ಣಿನಾ;

ಆಸಯಂ ಮೇ ಉಪಾಗಚ್ಛಿ, ದಾನವೀಮಂಸನಾಯ ಮೇ.

೧೩೫. ‘‘ತಮಹಂ ದಿಸ್ವಾನ ಸನ್ತುಟ್ಠೋ, ಇದಂ ವಚನಮಬ್ರವಿಂ;

‘ಸಾಧು ಖೋಸಿ ಅನುಪ್ಪತ್ತೋ, ಘಾಸಹೇತು ಮಮನ್ತಿಕೇ.

೧೩೬. ‘‘‘ಅದಿನ್ನಪುಬ್ಬಂ ದಾನವರಂ, ಅಜ್ಜ ದಸ್ಸಾಮಿ ತೇ ಅಹಂ;

ತುವಂ ಸೀಲಗುಣೂಪೇತೋ, ಅಯುತ್ತಂ ತೇ ಪರಹೇಠನಂ.

೧೩೭. ‘‘‘ಏಹಿ ಅಗ್ಗಿಂ ಪದೀಪೇಹಿ, ನಾನಾಕಟ್ಠೇ ಸಮಾನಯ;

ಅಹಂ ಪಚಿಸ್ಸಮತ್ತಾನಂ, ಪಕ್ಕಂ ತ್ವಂ ಭಕ್ಖಯಿಸ್ಸಸಿ’.

೧೩೮. ‘‘‘ಸಾಧೂ’ತಿ ಸೋ ಹಟ್ಠಮನೋ, ನಾನಾಕಟ್ಠೇ ಸಮಾನಯಿ;

ಮಹನ್ತಂ ಅಕಾಸಿ ಚಿತಕಂ, ಕತ್ವಾ ಅಙ್ಗಾರಗಬ್ಭಕಂ.

೧೩೯. ‘‘ಅಗ್ಗಿಂ ತತ್ಥ ಪದೀಪೇಸಿ, ಯಥಾ ಸೋ ಖಿಪ್ಪಂ ಮಹಾ ಭವೇ;

ಫೋಟೇತ್ವಾ ರಜಗತೇ ಗತ್ತೇ, ಏಕಮನ್ತಂ ಉಪಾವಿಸಿಂ.

೧೪೦. ‘‘ಯದಾ ಮಹಾಕಟ್ಠಪುಞ್ಜೋ, ಆದಿತ್ತೋ ಧಮಧಮಾಯತಿ [ಧುಮಧುಮಾಯತಿ (ಸೀ.), ಧಮಮಾಯತಿ (ಕ.)];

ತದುಪ್ಪತಿತ್ವಾ ಪಪತಿಂ, ಮಜ್ಝೇ ಜಾಲಸಿಖನ್ತರೇ.

೧೪೧. ‘‘ಯಥಾ ಸೀತೋದಕಂ ನಾಮ, ಪವಿಟ್ಠಂ ಯಸ್ಸ ಕಸ್ಸಚಿ;

ಸಮೇತಿ ದರಥಪರಿಳಾಹಂ, ಅಸ್ಸಾದಂ ದೇತಿ ಪೀತಿ ಚ.

೧೪೨. ‘‘ತಥೇವ ಜಲಿತಂ ಅಗ್ಗಿಂ, ಪವಿಟ್ಠಸ್ಸ ಮಮಂ ತದಾ;

ಸಬ್ಬಂ ಸಮೇತಿ ದರಥಂ, ಯಥಾ ಸೀತೋದಕಂ ವಿಯ.

೧೪೩. ‘‘ಛವಿಂ ಚಮ್ಮಂ ಮಂಸಂ ನ್ಹಾರುಂ, ಅಟ್ಠಿಂ ಹದಯಬನ್ಧನಂ;

ಕೇವಲಂ ಸಕಲಂ ಕಾಯಂ, ಬ್ರಾಹ್ಮಣಸ್ಸ ಅದಾಸಹ’’ನ್ತಿ.

ಸಸಪಣ್ಡಿತಚರಿಯಂ ದಸಮಂ.

ಅಕಿತ್ತಿವಗ್ಗೋ ಪಠಮೋ.

ತಸ್ಸುದ್ದಾನಂ –

ಅಕಿತ್ತಿಬ್ರಾಹ್ಮಣೋ ಸಙ್ಖೋ, ಕುರುರಾಜಾ ಧನಞ್ಚಯೋ;

ಮಹಾಸುದಸ್ಸನೋ ರಾಜಾ, ಮಹಾಗೋವಿನ್ದಬ್ರಾಹ್ಮಣೋ.

ನಿಮಿ ಚನ್ದಕುಮಾರೋ ಚ, ಸಿವಿ ವೇಸ್ಸನ್ತರೋ ಸಸೋ;

ಅಹಮೇವ ತದಾ ಆಸಿಂ, ಯೋ ತೇ ದಾನವರೇ ಅದಾ.

ಏತೇ ದಾನಪರಿಕ್ಖಾರಾ, ಏತೇ ದಾನಸ್ಸ ಪಾರಮೀ;

ಜೀವಿತಂ ಯಾಚಕೇ ದತ್ವಾ, ಇಮಂ ಪಾರಮಿ ಪೂರಯಿಂ.

ಭಿಕ್ಖಾಯ ಉಪಗತಂ ದಿಸ್ವಾ, ಸಕತ್ತಾನಂ ಪರಿಚ್ಚಜಿಂ;

ದಾನೇನ ಮೇ ಸಮೋ ನತ್ಥಿ, ಏಸಾ ಮೇ ದಾನಪಾರಮೀತಿ.

ದಾನಪಾರಮಿನಿದ್ದೇಸೋ ನಿಟ್ಠಿತೋ.