೧. ಅಕಿತ್ತಿವಗ್ಗೋ

೧. ಅಕಿತ್ತಿಚರಿಯಾ

೧. ‘‘ಕಪ್ಪೇ ಚ ಸತಸಹಸ್ಸೇ, ಚತುರೋ ಚ ಅಸಙ್ಖಿಯೇ;

ಏತ್ಥನ್ತರೇ ಯಂ ಚರಿತಂ, ಸಬ್ಬಂ ತಂ ಬೋಧಿಪಾಚನಂ.

೨. ‘‘ಅತೀತಕಪ್ಪೇ ಚರಿತಂ, ಠಪಯಿತ್ವಾ ಭವಾಭವೇ;

ಇಮಮ್ಹಿ ಕಪ್ಪೇ ಚರಿತಂ, ಪವಕ್ಖಿಸ್ಸಂ ಸುಣೋಹಿ ಮೇ.

೩. ‘‘ಯದಾ ಅಹಂ ಬ್ರಹಾರಞ್ಞೇ, ಸುಞ್ಞೇ ವಿಪಿನಕಾನನೇ;

ಅಜ್ಝೋಗಾಹೇತ್ವಾ [ಅಜ್ಝೋಗಹೇತ್ವಾ (ಸೀ. ಸ್ಯಾ.)] ವಿಹರಾಮಿ, ಅಕಿತ್ತಿ ನಾಮ ತಾಪಸೋ.

೪. ‘‘ತದಾ ಮಂ ತಪತೇಜೇನ, ಸನ್ತತ್ತೋ ತಿದಿವಾಭಿಭೂ;

ಧಾರೇನ್ತೋ ಬ್ರಾಹ್ಮಣವಣ್ಣಂ, ಭಿಕ್ಖಾಯ ಮಂ ಉಪಾಗಮಿ.

೫. ‘‘ಪವನಾ ಆಭತಂ ಪಣ್ಣಂ, ಅತೇಲಞ್ಚ ಅಲೋಣಿಕಂ;

ಮಮ ದ್ವಾರೇ ಠಿತಂ ದಿಸ್ವಾ, ಸಕಟಾಹೇನ ಆಕಿರಿಂ.

೬. ‘‘ತಸ್ಸ ದತ್ವಾನಹಂ ಪಣ್ಣಂ, ನಿಕ್ಕುಜ್ಜಿತ್ವಾನ ಭಾಜನಂ;

ಪುನೇಸನಂ ಜಹಿತ್ವಾನ, ಪಾವಿಸಿಂ ಪಣ್ಣಸಾಲಕಂ.

೭. ‘‘ದುತಿಯಮ್ಪಿ ತತಿಯಮ್ಪಿ, ಉಪಗಞ್ಛಿ ಮಮನ್ತಿಕಂ;

ಅಕಮ್ಪಿತೋ ಅನೋಲಗ್ಗೋ, ಏವಮೇವಮದಾಸಹಂ.

೮. ‘‘ನ ಮೇ ತಪ್ಪಚ್ಚಯಾ ಅತ್ಥಿ, ಸರೀರಸ್ಮಿಂ ವಿವಣ್ಣಿಯಂ;

ಪೀತಿಸುಖೇನ ರತಿಯಾ, ವೀತಿನಾಮೇಮಿ ತಂ ದಿವಂ.

೯. ‘‘ಯದಿ ಮಾಸಮ್ಪಿ ದ್ವೇಮಾಸಂ, ದಕ್ಖಿಣೇಯ್ಯಂ ವರಂ ಲಭೇ;

ಅಕಮ್ಪಿತೋ ಅನೋಲೀನೋ, ದದೇಯ್ಯಂ ದಾನಮುತ್ತಮಂ.

೧೦. ‘‘ನ ತಸ್ಸ ದಾನಂ ದದಮಾನೋ, ಯಸಂ ಲಾಭಞ್ಚ ಪತ್ಥಯಿಂ;

ಸಬ್ಬಞ್ಞುತಂ ಪತ್ಥಯಾನೋ, ತಾನಿ ಕಮ್ಮಾನಿ ಆಚರಿ’’ನ್ತಿ.

ಅಕಿತ್ತಿಚರಿಯಂ ಪಠಮಂ.

೨. ಸಙ್ಖಚರಿಯಾ

೧೧. ‘‘ಪುನಾಪರಂ ಯದಾ ಹೋಮಿ, ಬ್ರಾಹ್ಮಣೋ ಸಙ್ಖಸವ್ಹಯೋ;

ಮಹಾಸಮುದ್ದಂ ತರಿತುಕಾಮೋ, ಉಪಗಚ್ಛಾಮಿ ಪಟ್ಟನಂ.

೧೨. ‘‘ತತ್ಥದ್ದಸಂ ಪಟಿಪಥೇ, ಸಯಮ್ಭುಂ ಅಪರಾಜಿತಂ;

ಕನ್ತಾರದ್ಧಾನಂ ಪಟಿಪನ್ನಂ [ಕನ್ತಾರದ್ಧಾನಪಟಿಪನ್ನಂ (ಸೀ. ಸ್ಯಾ.)], ತತ್ತಾಯ ಕಠಿನಭೂಮಿಯಾ.

೧೩. ‘‘ತಮಹಂ ಪಟಿಪಥೇ ದಿಸ್ವಾ, ಇಮಮತ್ಥಂ ವಿಚಿನ್ತಯಿಂ;

‘ಇದಂ ಖೇತ್ತಂ ಅನುಪ್ಪತ್ತಂ, ಪುಞ್ಞಕಾಮಸ್ಸ ಜನ್ತುನೋ.

೧೪. ‘‘‘ಯಥಾ ಕಸ್ಸಕೋ ಪುರಿಸೋ, ಖೇತ್ತಂ ದಿಸ್ವಾ ಮಹಾಗಮಂ;

ತತ್ಥ ಬೀಜಂ ನ ರೋಪೇತಿ, ನ ಸೋ ಧಞ್ಞೇನ ಅತ್ಥಿಕೋ.

೧೫. ‘‘‘ಏವಮೇವಾಹಂ ಪುಞ್ಞಕಾಮೋ, ದಿಸ್ವಾ ಖೇತ್ತವರುತ್ತಮಂ;

ಯದಿ ತತ್ಥ ಕಾರಂ ನ ಕರೋಮಿ, ನಾಹಂ ಪುಞ್ಞೇನ ಅತ್ಥಿಕೋ.

೧೬. ‘‘‘ಯಥಾ ಅಮಚ್ಚೋ ಮುದ್ದಿಕಾಮೋ, ರಞ್ಞೋ ಅನ್ತೇಪುರೇ ಜನೇ;

ನ ದೇತಿ ತೇಸಂ ಧನಧಞ್ಞಂ, ಮುದ್ದಿತೋ ಪರಿಹಾಯತಿ.

೧೭. ‘‘‘ಏವಮೇವಾಹಂ ಪುಞ್ಞಕಾಮೋ, ವಿಪುಲಂ ದಿಸ್ವಾನ ದಕ್ಖಿಣಂ;

ಯದಿ ತಸ್ಸ ದಾನಂ ನ ದದಾಮಿ, ಪರಿಹಾಯಿಸ್ಸಾಮಿ ಪುಞ್ಞತೋ’.

೧೮. ‘‘ಏವಾಹಂ ಚಿನ್ತಯಿತ್ವಾನ, ಓರೋಹಿತ್ವಾ ಉಪಾಹನಾ;

ತಸ್ಸ ಪಾದಾನಿ ವನ್ದಿತ್ವಾ, ಅದಾಸಿಂ ಛತ್ತುಪಾಹನಂ.

೧೯. ‘‘ತೇನೇವಾಹಂ ಸತಗುಣತೋ, ಸುಖುಮಾಲೋ ಸುಖೇಧಿತೋ;

ಅಪಿ ಚ ದಾನಂ ಪರಿಪೂರೇನ್ತೋ, ಏವಂ ತಸ್ಸ ಅದಾಸಹ’’ನ್ತಿ.

ಸಙ್ಖಚರಿಯಂ ದುತಿಯಂ.

೩. ಕುರುರಾಜಚರಿಯಾ

೨೦. ‘‘ಪುನಾಪರಂ ಯದಾ ಹೋಮಿ, ಇನ್ದಪತ್ಥೇ [ಇನ್ದಪತ್ತೇ (ಸೀ. ಕ.)] ಪುರುತ್ತಮೇ;

ರಾಜಾ ಧನಞ್ಚಯೋ ನಾಮ, ಕುಸಲೇ ದಸಹುಪಾಗತೋ.

೨೧. ‘‘ಕಲಿಙ್ಗರಟ್ಠವಿಸಯಾ, ಬ್ರಾಹ್ಮಣಾ ಉಪಗಞ್ಛು ಮಂ;

ಆಯಾಚುಂ ಮಂ ಹತ್ಥಿನಾಗಂ, ಧಞ್ಞಂ ಮಙ್ಗಲಸಮ್ಮತಂ.

೨೨. ‘‘‘ಅವುಟ್ಠಿಕೋ ಜನಪದೋ, ದುಬ್ಭಿಕ್ಖೋ ಛಾತಕೋ ಮಹಾ;

ದದಾಹಿ ಪವರಂ ನಾಗಂ, ನೀಲಂ ಅಞ್ಜನಸವ್ಹಯಂ.

೨೩. ‘‘‘ನ ಮೇ ಯಾಚಕಮನುಪ್ಪತ್ತೇ, ಪಟಿಕ್ಖೇಪೋ ಅನುಚ್ಛವೋ;

ಮಾ ಮೇ ಭಿಜ್ಜಿ ಸಮಾದಾನಂ, ದಸ್ಸಾಮಿ ವಿಪುಲಂ ಗಜಂ’.

೨೪. ‘‘ನಾಗಂ ಗಹೇತ್ವಾ ಸೋಣ್ಡಾಯ, ಭಿಙ್ಗಾರೇ [ಭಿಙ್ಕಾರೇ (ಸೀ.)] ರತನಾಮಯೇ;

ಜಲಂ ಹತ್ಥೇ ಆಕಿರಿತ್ವಾ, ಬ್ರಾಹ್ಮಣಾನಂ ಅದಂ ಗಜಂ.

೨೫. ‘‘ತಸ್ಸ ನಾಗೇ ಪದಿನ್ನಮ್ಹಿ, ಅಮಚ್ಚಾ ಏತದಬ್ರವುಂ;

‘ಕಿಂ ನು ತುಯ್ಹಂ ವರಂ ನಾಗಂ, ಯಾಚಕಾನಂ ಪದಸ್ಸಸಿ.

೨೬. ‘‘‘ಧಞ್ಞಂ ಮಙ್ಗಲಸಮ್ಪನ್ನಂ, ಸಙ್ಗಾಮವಿಜಯುತ್ತಮಂ;

ತಸ್ಮಿಂ ನಾಗೇ ಪದಿನ್ನಮ್ಹಿ, ಕಿಂ ತೇ ರಜ್ಜಂ ಕರಿಸ್ಸತಿ.

೨೭. ‘‘‘ರಜ್ಜಮ್ಪಿ ಮೇ ದದೇ ಸಬ್ಬಂ, ಸರೀರಂ ದಜ್ಜಮತ್ತನೋ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ನಾಗಂ ಅದಾಸಹ’’’ನ್ತಿ.

ಕುರುರಾಜಚರಿಯಂ ತತಿಯಂ.

೪. ಮಹಾಸುದಸ್ಸನಚರಿಯಾ

೨೮. ‘‘ಕುಸಾವತಿಮ್ಹಿ ನಗರೇ, ಯದಾ ಆಸಿಂ ಮಹೀಪತಿ;

ಮಹಾಸುದಸ್ಸನೋ ನಾಮ, ಚಕ್ಕವತ್ತೀ ಮಹಬ್ಬಲೋ.

೨೯. ‘‘ತತ್ಥಾಹಂ ದಿವಸೇ ತಿಕ್ಖತ್ತುಂ, ಘೋಸಾಪೇಮಿ ತಹಿಂ ತಹಿಂ;

‘ಕೋ ಕಿಂ ಇಚ್ಛತಿ ಪತ್ಥೇತಿ, ಕಸ್ಸ ಕಿಂ ದೀಯತೂ ಧನಂ.

೩೦. ‘‘‘ಕೋ ಛಾತಕೋ ಕೋ ತಸಿತೋ, ಕೋ ಮಾಲಂ ಕೋ ವಿಲೇಪನಂ;

ನಾನಾರತ್ತಾನಿ ವತ್ಥಾನಿ, ಕೋ ನಗ್ಗೋ ಪರಿದಹಿಸ್ಸತಿ.

೩೧. ‘‘‘ಕೋ ಪಥೇ ಛತ್ತಮಾದೇತಿ, ಕೋಪಾಹನಾ ಮುದೂ ಸುಭಾ’;

ಇತಿ ಸಾಯಞ್ಚ ಪಾತೋ ಚ, ಘೋಸಾಪೇಮಿ ತಹಿಂ ತಹಿಂ.

೩೨. ‘‘ನ ತಂ ದಸಸು ಠಾನೇಸು, ನಪಿ ಠಾನಸತೇಸು ವಾ;

ಅನೇಕಸತಠಾನೇಸು, ಪಟಿಯತ್ತಂ ಯಾಚಕೇ ಧನಂ.

೩೩. ‘‘ದಿವಾ ವಾ ಯದಿ ವಾ ರತ್ತಿಂ, ಯದಿ ಏತಿ ವನಿಬ್ಬಕೋ;

ಲದ್ಧಾ ಯದಿಚ್ಛಕಂ ಭೋಗಂ, ಪೂರಹತ್ಥೋವ ಗಚ್ಛತಿ.

೩೪. ‘‘ಏವರೂಪಂ ಮಹಾದಾನಂ, ಅದಾಸಿಂ ಯಾವಜೀವಿಕಂ;

ನಪಾಹಂ ದೇಸ್ಸಂ ಧನಂ ದಮ್ಮಿ, ನಪಿ ನತ್ಥಿ ನಿಚಯೋ ಮಯಿ.

೩೫. ‘‘ಯಥಾಪಿ ಆತುರೋ ನಾಮ, ರೋಗತೋ ಪರಿಮುತ್ತಿಯಾ;

ಧನೇನ ವೇಜ್ಜಂ ತಪ್ಪೇತ್ವಾ, ರೋಗತೋ ಪರಿಮುಚ್ಚತಿ.

೩೬. ‘‘ತಥೇವಾಹಂ ಜಾನಮಾನೋ, ಪರಿಪೂರೇತುಮಸೇಸತೋ;

ಊನಮನಂ ಪೂರಯಿತುಂ, ದೇಮಿ ದಾನಂ ವನಿಬ್ಬಕೇ;

ನಿರಾಲಯೋ ಅಪಚ್ಚಾಸೋ, ಸಮ್ಬೋಧಿಮನುಪತ್ತಿಯಾ’’ತಿ.

ಮಹಾಸುದಸ್ಸನಚರಿಯಂ ಚತುತ್ಥಂ.

೫. ಮಹಾಗೋವಿನ್ದಚರಿಯಾ

೩೭. ‘‘ಪುನಾಪರಂ ಯದಾ ಹೋಮಿ, ಸತ್ತರಾಜಪುರೋಹಿತೋ;

ಪೂಜಿತೋ ನರದೇವೇಹಿ, ಮಹಾಗೋವಿನ್ದಬ್ರಾಹ್ಮಣೋ.

೩೮. ‘‘ತದಾಹಂ ಸತ್ತರಜ್ಜೇಸು, ಯಂ ಮೇ ಆಸಿ ಉಪಾಯನಂ;

ತೇನ ದೇಮಿ ಮಹಾದಾನಂ, ಅಕ್ಖೋಬ್ಭಂ [ಅಕ್ಖೋಭಂ (ಸ್ಯಾ. ಕಂ.)] ಸಾಗರೂಪಮಂ.

೩೯. ‘‘ನ ಮೇ ದೇಸ್ಸಂ ಧನಂ ಧಞ್ಞಂ, ನಪಿ ನತ್ಥಿ ನಿಚಯೋ ಮಯಿ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ದೇಮಿ ವರಂ ಧನ’’ನ್ತಿ.

ಮಹಾಗೋವಿನ್ದಚರಿಯಂ ಪಞ್ಚಮಂ.

೬. ನಿಮಿರಾಜಚರಿಯಾ

೪೦. ‘‘ಪುನಾಪರಂ ಯದಾ ಹೋಮಿ, ಮಿಥಿಲಾಯಂ ಪುರುತ್ತಮೇ;

ನಿಮಿ ನಾಮ ಮಹಾರಾಜಾ, ಪಣ್ಡಿತೋ ಕುಸಲತ್ಥಿಕೋ.

೪೧. ‘‘ತದಾಹಂ ಮಾಪಯಿತ್ವಾನ, ಚತುಸ್ಸಾಲಂ ಚತುಮ್ಮುಖಂ;

ತತ್ಥ ದಾನಂ ಪವತ್ತೇಸಿಂ, ಮಿಗಪಕ್ಖಿನರಾದಿನಂ.

೪೨. ‘‘ಅಚ್ಛಾದನಞ್ಚ ಸಯನಂ, ಅನ್ನಂ ಪಾನಞ್ಚ ಭೋಜನಂ;

ಅಬ್ಬೋಚ್ಛಿನ್ನಂ ಕರಿತ್ವಾನ, ಮಹಾದಾನಂ ಪವತ್ತಯಿಂ.

೪೩. ‘‘ಯಥಾಪಿ ಸೇವಕೋ ಸಾಮಿಂ, ಧನಹೇತುಮುಪಾಗತೋ;

ಕಾಯೇನ ವಾಚಾ ಮನಸಾ, ಆರಾಧನೀಯಮೇಸತಿ.

೪೪. ‘‘ತಥೇವಾಹಂ ಸಬ್ಬಭವೇ, ಪರಿಯೇಸಿಸ್ಸಾಮಿ ಬೋಧಿಜಂ;

ದಾನೇನ ಸತ್ತೇ ತಪ್ಪೇತ್ವಾ, ಇಚ್ಛಾಮಿ ಬೋಧಿಮುತ್ತಮ’’ನ್ತಿ.

ನಿಮಿರಾಜಚರಿಯಂ ಛಟ್ಠಂ.

೭. ಚನ್ದಕುಮಾರಚರಿಯಾ

೪೫. ‘‘ಪುನಾಪರಂ ಯದಾ ಹೋಮಿ, ಏಕರಾಜಸ್ಸ ಅತ್ರಜೋ;

ನಗರೇ ಪುಪ್ಫವತಿಯಾ, ಕುಮಾರೋ ಚನ್ದಸವ್ಹಯೋ.

೪೬. ‘‘ತದಾಹಂ ಯಜನಾ ಮುತ್ತೋ, ನಿಕ್ಖನ್ತೋ ಯಞ್ಞವಾಟತೋ;

ಸಂವೇಗಂ ಜನಯಿತ್ವಾನ, ಮಹಾದಾನಂ ಪವತ್ತಯಿಂ.

೪೭. ‘‘ನಾಹಂ ಪಿವಾಮಿ ಖಾದಾಮಿ, ನಪಿ ಭುಞ್ಜಾಮಿ ಭೋಜನಂ;

ದಕ್ಖಿಣೇಯ್ಯೇ ಅದತ್ವಾನ, ಅಪಿ ಛಪ್ಪಞ್ಚರತ್ತಿಯೋ.

೪೮. ‘‘ಯಥಾಪಿ ವಾಣಿಜೋ ನಾಮ, ಕತ್ವಾನ ಭಣ್ಡಸಞ್ಚಯಂ;

ಯತ್ಥ ಲಾಭೋ ಮಹಾ ಹೋತಿ, ತತ್ಥ ತಂ [ತತ್ಥ ನಂ (ಸೀ.), ತತ್ಥ (ಕ.)] ಹರತಿ ಭಣ್ಡಕಂ.

೪೯. ‘‘ತಥೇವ ಸಕಭುತ್ತಾಪಿ, ಪರೇ ದಿನ್ನಂ ಮಹಪ್ಫಲಂ;

ತಸ್ಮಾ ಪರಸ್ಸ ದಾತಬ್ಬಂ, ಸತಭಾಗೋ ಭವಿಸ್ಸತಿ.

೫೦. ‘‘ಏತಮತ್ಥವಸಂ ಞತ್ವಾ, ದೇಮಿ ದಾನಂ ಭವಾಭವೇ;

ನ ಪಟಿಕ್ಕಮಾಮಿ ದಾನತೋ, ಸಮ್ಬೋಧಿಮನುಪತ್ತಿಯಾ’’ತಿ.

ಚನ್ದಕುಮಾರಚರಿಯಂ ಸತ್ತಮಂ.

೮. ಸಿವಿರಾಜಚರಿಯಾ

೫೧. ‘‘ಅರಿಟ್ಠಸವ್ಹಯೇ ನಗರೇ, ಸಿವಿನಾಮಾಸಿ ಖತ್ತಿಯೋ;

ನಿಸಜ್ಜ ಪಾಸಾದವರೇ, ಏವಂ ಚಿನ್ತೇಸಹಂ ತದಾ.

೫೨. ‘‘‘ಯಂ ಕಿಞ್ಚಿ ಮಾನುಸಂ ದಾನಂ, ಅದಿನ್ನಂ ಮೇ ನ ವಿಜ್ಜತಿ;

ಯೋಪಿ ಯಾಚೇಯ್ಯ ಮಂ ಚಕ್ಖುಂ, ದದೇಯ್ಯಂ ಅವಿಕಮ್ಪಿತೋ’.

೫೩. ‘‘ಮಮ ಸಙ್ಕಪ್ಪಮಞ್ಞಾಯ, ಸಕ್ಕೋ ದೇವಾನಮಿಸ್ಸರೋ;

ನಿಸಿನ್ನೋ ದೇವಪರಿಸಾಯ, ಇದಂ ವಚನಮಬ್ರವಿ.

೫೪. ‘‘‘ನಿಸಜ್ಜ ಪಾಸಾದವರೇ, ಸಿವಿರಾಜಾ ಮಹಿದ್ಧಿಕೋ;

ಚಿನ್ತೇನ್ತೋ ವಿವಿಧಂ ದಾನಂ, ಅದೇಯ್ಯಂ ಸೋ ನ ಪಸ್ಸತಿ.

೫೫. ‘‘‘ತಥಂ ನು ವಿತಥಂ ನೇತಂ, ಹನ್ದ ವೀಮಂಸಯಾಮಿ ತಂ;

ಮುಹುತ್ತಂ ಆಗಮೇಯ್ಯಾಥ, ಯಾವ ಜಾನಾಮಿ ತಂ ಮನಂ’.

೫೬. ‘‘ಪವೇಧಮಾನೋ ಪಲಿತಸಿರೋ, ವಲಿಗತ್ತೋ [ವಲಿತಗತ್ತೋ (ಸೀ.)] ಜರಾತುರೋ;

ಅನ್ಧವಣ್ಣೋವ ಹುತ್ವಾನ, ರಾಜಾನಂ ಉಪಸಙ್ಕಮಿ.

೫೭. ‘‘ಸೋ ತದಾ ಪಗ್ಗಹೇತ್ವಾನ, ವಾಮಂ ದಕ್ಖಿಣಬಾಹು ಚ;

ಸಿರಸ್ಮಿಂ ಅಞ್ಜಲಿಂ ಕತ್ವಾ, ಇದಂ ವಚನಮಬ್ರವಿ.

೫೮. ‘‘‘ಯಾಚಾಮಿ ತಂ ಮಹಾರಾಜ, ಧಮ್ಮಿಕ ರಟ್ಠವಡ್ಢನ;

ತವ ದಾನರತಾ ಕಿತ್ತಿ, ಉಗ್ಗತಾ ದೇವಮಾನುಸೇ.

೫೯. ‘‘‘ಉಭೋಪಿ ನೇತ್ತಾ ನಯನಾ, ಅನ್ಧಾ ಉಪಹತಾ ಮಮ;

ಏಕಂ ಮೇ ನಯನಂ ದೇಹಿ, ತ್ವಮ್ಪಿ ಏಕೇನ ಯಾಪಯ’.

೬೦. ‘‘ತಸ್ಸಾಹಂ ವಚನಂ ಸುತ್ವಾ, ಹಟ್ಠೋ ಸಂವಿಗ್ಗಮಾನಸೋ;

ಕತಞ್ಜಲೀ ವೇದಜಾತೋ, ಇದಂ ವಚನಮಬ್ರವಿಂ.

೬೧. ‘‘‘ಇದಾನಾಹಂ ಚಿನ್ತಯಿತ್ವಾನ, ಪಾಸಾದತೋ ಇಧಾಗತೋ;

ತ್ವಂ ಮಮ ಚಿತ್ತಮಞ್ಞಾಯ, ನೇತ್ತಂ ಯಾಚಿತುಮಾಗತೋ.

೬೨. ‘‘‘ಅಹೋ ಮೇ ಮಾನಸಂ ಸಿದ್ಧಂ, ಸಙ್ಕಪ್ಪೋ ಪರಿಪೂರಿತೋ;

ಅದಿನ್ನಪುಬ್ಬಂ ದಾನವರಂ, ಅಜ್ಜ ದಸ್ಸಾಮಿ ಯಾಚಕೇ.

೬೩. ‘‘‘ಏಹಿ ಸಿವಕ ಉಟ್ಠೇಹಿ, ಮಾ ದನ್ಧಯಿ ಮಾ ಪವೇಧಯಿ;

ಉಭೋಪಿ ನಯನಂ ದೇಹಿ, ಉಪ್ಪಾಟೇತ್ವಾ ವಣಿಬ್ಬಕೇ’.

೬೪. ‘‘ತತೋ ಸೋ ಚೋದಿತೋ ಮಯ್ಹಂ, ಸಿವಕೋ ವಚನಂ ಕರೋ;

ಉದ್ಧರಿತ್ವಾನ ಪಾದಾಸಿ, ತಾಲಮಿಞ್ಜಂವ ಯಾಚಕೇ.

೬೫. ‘‘ದದಮಾನಸ್ಸ ದೇನ್ತಸ್ಸ, ದಿನ್ನದಾನಸ್ಸ ಮೇ ಸತೋ;

ಚಿತ್ತಸ್ಸ ಅಞ್ಞಥಾ ನತ್ಥಿ, ಬೋಧಿಯಾಯೇವ ಕಾರಣಾ.

೬೬. ‘‘ನ ಮೇ ದೇಸ್ಸಾ ಉಭೋ ಚಕ್ಖೂ, ಅತ್ತಾ ನ ಮೇ ನ ದೇಸ್ಸಿಯೋ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ಚಕ್ಖುಂ ಅದಾಸಹ’’ನ್ತಿ.

ಸಿವಿರಾಜಚರಿಯಂ ಅಟ್ಠಮಂ.