೩. ಕುರುರಾಜಚರಿಯಾ

೨೦. ‘‘ಪುನಾಪರಂ ಯದಾ ಹೋಮಿ, ಇನ್ದಪತ್ಥೇ [ಇನ್ದಪತ್ತೇ (ಸೀ. ಕ.)] ಪುರುತ್ತಮೇ;

ರಾಜಾ ಧನಞ್ಚಯೋ ನಾಮ, ಕುಸಲೇ ದಸಹುಪಾಗತೋ.

೨೧. ‘‘ಕಲಿಙ್ಗರಟ್ಠವಿಸಯಾ, ಬ್ರಾಹ್ಮಣಾ ಉಪಗಞ್ಛು ಮಂ;

ಆಯಾಚುಂ ಮಂ ಹತ್ಥಿನಾಗಂ, ಧಞ್ಞಂ ಮಙ್ಗಲಸಮ್ಮತಂ.

೨೨. ‘‘‘ಅವುಟ್ಠಿಕೋ ಜನಪದೋ, ದುಬ್ಭಿಕ್ಖೋ ಛಾತಕೋ ಮಹಾ;

ದದಾಹಿ ಪವರಂ ನಾಗಂ, ನೀಲಂ ಅಞ್ಜನಸವ್ಹಯಂ.

೨೩. ‘‘‘ನ ಮೇ ಯಾಚಕಮನುಪ್ಪತ್ತೇ, ಪಟಿಕ್ಖೇಪೋ ಅನುಚ್ಛವೋ;

ಮಾ ಮೇ ಭಿಜ್ಜಿ ಸಮಾದಾನಂ, ದಸ್ಸಾಮಿ ವಿಪುಲಂ ಗಜಂ’.

೨೪. ‘‘ನಾಗಂ ಗಹೇತ್ವಾ ಸೋಣ್ಡಾಯ, ಭಿಙ್ಗಾರೇ [ಭಿಙ್ಕಾರೇ (ಸೀ.)] ರತನಾಮಯೇ;

ಜಲಂ ಹತ್ಥೇ ಆಕಿರಿತ್ವಾ, ಬ್ರಾಹ್ಮಣಾನಂ ಅದಂ ಗಜಂ.

೨೫. ‘‘ತಸ್ಸ ನಾಗೇ ಪದಿನ್ನಮ್ಹಿ, ಅಮಚ್ಚಾ ಏತದಬ್ರವುಂ;

‘ಕಿಂ ನು ತುಯ್ಹಂ ವರಂ ನಾಗಂ, ಯಾಚಕಾನಂ ಪದಸ್ಸಸಿ.

೨೬. ‘‘‘ಧಞ್ಞಂ ಮಙ್ಗಲಸಮ್ಪನ್ನಂ, ಸಙ್ಗಾಮವಿಜಯುತ್ತಮಂ;

ತಸ್ಮಿಂ ನಾಗೇ ಪದಿನ್ನಮ್ಹಿ, ಕಿಂ ತೇ ರಜ್ಜಂ ಕರಿಸ್ಸತಿ.

೨೭. ‘‘‘ರಜ್ಜಮ್ಪಿ ಮೇ ದದೇ ಸಬ್ಬಂ, ಸರೀರಂ ದಜ್ಜಮತ್ತನೋ;

ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ನಾಗಂ ಅದಾಸಹ’’’ನ್ತಿ.

ಕುರುರಾಜಚರಿಯಂ ತತಿಯಂ.