೪. ಮಹಾಸುದಸ್ಸನಚರಿಯಾ

೨೮. ‘‘ಕುಸಾವತಿಮ್ಹಿ ನಗರೇ, ಯದಾ ಆಸಿಂ ಮಹೀಪತಿ;

ಮಹಾಸುದಸ್ಸನೋ ನಾಮ, ಚಕ್ಕವತ್ತೀ ಮಹಬ್ಬಲೋ.

೨೯. ‘‘ತತ್ಥಾಹಂ ದಿವಸೇ ತಿಕ್ಖತ್ತುಂ, ಘೋಸಾಪೇಮಿ ತಹಿಂ ತಹಿಂ;

‘ಕೋ ಕಿಂ ಇಚ್ಛತಿ ಪತ್ಥೇತಿ, ಕಸ್ಸ ಕಿಂ ದೀಯತೂ ಧನಂ.

೩೦. ‘‘‘ಕೋ ಛಾತಕೋ ಕೋ ತಸಿತೋ, ಕೋ ಮಾಲಂ ಕೋ ವಿಲೇಪನಂ;

ನಾನಾರತ್ತಾನಿ ವತ್ಥಾನಿ, ಕೋ ನಗ್ಗೋ ಪರಿದಹಿಸ್ಸತಿ.

೩೧. ‘‘‘ಕೋ ಪಥೇ ಛತ್ತಮಾದೇತಿ, ಕೋಪಾಹನಾ ಮುದೂ ಸುಭಾ’;

ಇತಿ ಸಾಯಞ್ಚ ಪಾತೋ ಚ, ಘೋಸಾಪೇಮಿ ತಹಿಂ ತಹಿಂ.

೩೨. ‘‘ನ ತಂ ದಸಸು ಠಾನೇಸು, ನಪಿ ಠಾನಸತೇಸು ವಾ;

ಅನೇಕಸತಠಾನೇಸು, ಪಟಿಯತ್ತಂ ಯಾಚಕೇ ಧನಂ.

೩೩. ‘‘ದಿವಾ ವಾ ಯದಿ ವಾ ರತ್ತಿಂ, ಯದಿ ಏತಿ ವನಿಬ್ಬಕೋ;

ಲದ್ಧಾ ಯದಿಚ್ಛಕಂ ಭೋಗಂ, ಪೂರಹತ್ಥೋವ ಗಚ್ಛತಿ.

೩೪. ‘‘ಏವರೂಪಂ ಮಹಾದಾನಂ, ಅದಾಸಿಂ ಯಾವಜೀವಿಕಂ;

ನಪಾಹಂ ದೇಸ್ಸಂ ಧನಂ ದಮ್ಮಿ, ನಪಿ ನತ್ಥಿ ನಿಚಯೋ ಮಯಿ.

೩೫. ‘‘ಯಥಾಪಿ ಆತುರೋ ನಾಮ, ರೋಗತೋ ಪರಿಮುತ್ತಿಯಾ;

ಧನೇನ ವೇಜ್ಜಂ ತಪ್ಪೇತ್ವಾ, ರೋಗತೋ ಪರಿಮುಚ್ಚತಿ.

೩೬. ‘‘ತಥೇವಾಹಂ ಜಾನಮಾನೋ, ಪರಿಪೂರೇತುಮಸೇಸತೋ;

ಊನಮನಂ ಪೂರಯಿತುಂ, ದೇಮಿ ದಾನಂ ವನಿಬ್ಬಕೇ;

ನಿರಾಲಯೋ ಅಪಚ್ಚಾಸೋ, ಸಮ್ಬೋಧಿಮನುಪತ್ತಿಯಾ’’ತಿ.

ಮಹಾಸುದಸ್ಸನಚರಿಯಂ ಚತುತ್ಥಂ.