೮. ಚಙ್ಕಮನದಾಯಕತ್ಥೇರಅಪದಾನಂ

೯೩. ‘‘ಅತ್ಥದಸ್ಸಿಸ್ಸ ಮುನಿನೋ, ಲೋಕಜೇಟ್ಠಸ್ಸ ತಾದಿನೋ;

ಇಟ್ಠಕಾಹಿ ಚಿನಿತ್ವಾನ, ಚಙ್ಕಮಂ ಕಾರಯಿಂ ಅಹಂ.

೯೪. ‘‘ಉಚ್ಚತೋ ಪಞ್ಚರತನಂ, ಚಙ್ಕಮಂ ಸಾಧುಮಾಪಿತಂ;

ಆಯಾಮತೋ ಹತ್ಥಸತಂ, ಭಾವನೀಯ್ಯಂ ಮನೋರಮಂ.

೯೫. ‘‘ಪಟಿಗ್ಗಹೇಸಿ ಭಗವಾ, ಅತ್ಥದಸ್ಸೀ ನರುತ್ತಮೋ;

ಹತ್ಥೇನ ಪುಲಿನಂ ಗಯ್ಹ, ಇಮಾ ಗಾಥಾ ಅಭಾಸಥ.

೯೬. ‘‘‘ಇಮಿನಾ ಪುಲಿನದಾನೇನ, ಚಙ್ಕಮಂ ಸುಕತೇನ ಚ;

ಸತ್ತರತನಸಮ್ಪನ್ನಂ, ಪುಲಿನಂ ಅನುಭೋಸ್ಸತಿ.

೯೭. ‘‘‘ತೀಣಿ ಕಪ್ಪಾನಿ ದೇವೇಸು, ದೇವರಜ್ಜಂ ಕರಿಸ್ಸತಿ;

ಅನುಭೋಸ್ಸತಿ ಸಮ್ಪತ್ತಿಂ, ಅಚ್ಛರಾಹಿ ಪುರಕ್ಖತೋ.

೯೮. ‘‘‘ಮನುಸ್ಸಲೋಕಮಾಗನ್ತ್ವಾ, ರಾಜಾ ರಟ್ಠೇ ಭವಿಸ್ಸತಿ;

ತಿಕ್ಖತ್ತುಂ ಚಕ್ಕವತ್ತೀ ಚ, ಮಹಿಯಾ ಸೋ ಭವಿಸ್ಸತಿ’.

೯೯. ‘‘ಅಟ್ಠಾರಸೇ ಕಪ್ಪಸತೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಚಙ್ಕಮಸ್ಸ ಇದಂ ಫಲಂ.

೧೦೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಚಙ್ಕಮನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಚಙ್ಕಮನದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.