೫. ಉಪಾಲಿವಗ್ಗೋ

೧. ಭಾಗಿನೇಯ್ಯುಪಾಲಿತ್ಥೇರಅಪದಾನಂ

೧. ‘‘ಖೀಣಾಸವಸಹಸ್ಸೇಹಿ, ಪರಿವುತೋ [ಪರೇತೋ (ಕ. ಅಟ್ಠ)] ಲೋಕನಾಯಕೋ;

ವಿವೇಕಮನುಯುತ್ತೋ ಸೋ, ಗಚ್ಛತೇ ಪಟಿಸಲ್ಲಿತುಂ.

೨. ‘‘ಅಜಿನೇನ ನಿವತ್ಥೋಹಂ, ತಿದಣ್ಡಪರಿಧಾರಕೋ;

ಭಿಕ್ಖುಸಙ್ಘಪರಿಬ್ಯೂಳ್ಹಂ, ಅದ್ದಸಂ ಲೋಕನಾಯಕಂ.

೩. ‘‘ಏಕಂಸಂ ಅಜಿನಂ ಕತ್ವಾ, ಸಿರೇ ಕತ್ವಾನ ಅಞ್ಜಲಿಂ;

ಸಮ್ಬುದ್ಧಂ ಅಭಿವಾದೇತ್ವಾ, ಸನ್ಥವಿಂ ಲೋಕನಾಯಕಂ.

೪. ‘‘ಯಥಾಣ್ಡಜಾ ಚ ಸಂಸೇದಾ, ಓಪಪಾತೀ ಜಲಾಬುಜಾ;

ಕಾಕಾದಿಪಕ್ಖಿನೋ ಸಬ್ಬೇ, ಅನ್ತಲಿಕ್ಖಚರಾ ಸದಾ.

೫. ‘‘ಯೇ ಕೇಚಿ ಪಾಣಭೂತತ್ಥಿ, ಸಞ್ಞಿನೋ ವಾ ಅಸಞ್ಞಿನೋ;

ಸಬ್ಬೇ ತೇ ತವ ಞಾಣಮ್ಹಿ, ಅನ್ತೋ ಹೋನ್ತಿ ಸಮೋಗಧಾ.

೬. ‘‘ಗನ್ಧಾ ಚ ಪಬ್ಬತೇಯ್ಯಾ ಯೇ, ಹಿಮವನ್ತನಗುತ್ತಮೇ;

ಸಬ್ಬೇ ತೇ ತವ ಸೀಲಮ್ಹಿ, ಕಲಾಯಪಿ ನ ಯುಜ್ಜರೇ.

೭. ‘‘ಮೋಹನ್ಧಕಾರಪಕ್ಖನ್ದೋ, ಅಯಂ ಲೋಕೋ ಸದೇವಕೋ;

ತವ ಞಾಣಮ್ಹಿ ಜೋತನ್ತೇ, ಅನ್ಧಕಾರಾ ವಿಧಂಸಿತಾ.

೮. ‘‘ಯಥಾ ಅತ್ಥಙ್ಗತೇ ಸೂರಿಯೇ, ಹೋನ್ತಿ ಸತ್ತಾ ತಮೋಗತಾ;

ಏವಂ ಬುದ್ಧೇ ಅನುಪ್ಪನ್ನೇ, ಹೋತಿ ಲೋಕೋ ತಮೋಗತೋ.

೯. ‘‘ಯಥೋದಯನ್ತೋ ಆದಿಚ್ಚೋ, ವಿನೋದೇತಿ ತಮಂ ಸದಾ;

ತಥೇವ ತ್ವಂ ಬುದ್ಧಸೇಟ್ಠ, ವಿದ್ಧಂಸೇಸಿ ತಮಂ ಸದಾ.

೧೦. ‘‘ಪಧಾನಪಹಿತತ್ತೋಸಿ, ಬುದ್ಧೋ ಲೋಕೇ ಸದೇವಕೇ;

ತವ ಕಮ್ಮಾಭಿರದ್ಧೇನ, ತೋಸೇಸಿ ಜನತಂ ಬಹುಂ.

೧೧. ‘‘ತಂ ಸಬ್ಬಂ ಅನುಮೋದಿತ್ವಾ, ಪದುಮುತ್ತರೋ ಮಹಾಮುನಿ;

ನಭಂ ಅಬ್ಭುಗ್ಗಮೀ ಧೀರೋ, ಹಂಸರಾಜಾವ ಅಮ್ಬರೇ.

೧೨. ‘‘ಅಬ್ಭುಗ್ಗನ್ತ್ವಾನ ಸಮ್ಬುದ್ಧೋ, ಮಹೇಸಿ ಪದುಮುತ್ತರೋ;

ಅನ್ತಲಿಕ್ಖೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.

೧೩. ‘‘ಯೇನಿದಂ ಥವಿತಂ ಞಾಣಂ, ಓಪಮ್ಮೇಹಿ ಸಮಾಯುತಂ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೧೪. ‘‘‘ಅಟ್ಠಾರಸಞ್ಚ ಖತ್ತುಂ ಸೋ, ದೇವರಾಜಾ ಭವಿಸ್ಸತಿ;

ಪಥಬ್ಯಾ ರಜ್ಜಂ ತಿಸತಂ, ವಸುಧಂ ಆವಸಿಸ್ಸತಿ.

೧೫. ‘‘‘ಪಞ್ಚವೀಸತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೧೬. ‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೧೭. ‘‘‘ತುಸಿತಾ ಹಿ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;

ಹೀನೋವ ಜಾತಿಯಾ ಸನ್ತೋ, ಉಪಾಲಿ ನಾಮ ಹೇಸ್ಸತಿ.

೧೮. ‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ವಿರಾಜೇತ್ವಾನ ಪಾಪಕಂ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.

೧೯. ‘‘‘ತುಟ್ಠೋ ಚ ಗೋತಮೋ ಬುದ್ಧೋ, ಸಕ್ಯಪುತ್ತೋ ಮಹಾಯಸೋ;

ವಿನಯಾಧಿಗತಂ ತಸ್ಸ, ಏತದಗ್ಗೇ ಠಪೇಸ್ಸತಿ’.

೨೦. ‘‘ಸದ್ಧಾಯಾಹಂ ಪಬ್ಬಜಿತೋ, ಕತಕಿಚ್ಚೋ ಅನಾಸವೋ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೨೧. ‘‘ಭಗವಾ ಚಾನುಕಮ್ಪೀ ಮಂ, ವಿನಯೇಹಂ ವಿಸಾರದೋ;

ಸಕಕಮ್ಮಾಭಿರದ್ಧೋ ಚ, ವಿಹರಾಮಿ ಅನಾಸವೋ.

೨೨. ‘‘ಸಂವುತೋ ಪಾತಿಮೋಕ್ಖಮ್ಹಿ, ಇನ್ದ್ರಿಯೇಸು ಚ ಪಞ್ಚಸು;

ಧಾರೇಮಿ ವಿನಯಂ ಸಬ್ಬಂ, ಕೇವಲಂ ರತನಾಕರಂ [ರತನಗ್ಘರಂ (ಕ.)].

೨೩. ‘‘ಮಮಞ್ಚ ಗುಣಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸಿ ಮಂ.

೨೪. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಉಪಾಲಿಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಭಾಗಿನೇಯ್ಯುಪಾಲಿತ್ಥೇರಸ್ಸಾಪದಾನಂ ಪಠಮಂ.

೨. ಸೋಣಕೋಳಿವಿಸತ್ಥೇರಅಪದಾನಂ

೨೫. ‘‘ಅನೋಮದಸ್ಸಿಸ್ಸ ಮುನಿನೋ, ಲೋಕಜೇಟ್ಠಸ್ಸ ತಾದಿನೋ;

ಸುಧಾಯ ಲೇಪನಂ ಕತ್ವಾ, ಚಙ್ಕಮಂ ಕಾರಯಿಂ ಅಹಂ.

೨೬. ‘‘ನಾನಾವಣೇಹಿ ಪುಪ್ಫೇಹಿ, ಚಙ್ಕಮಂ ಸನ್ಥರಿಂ ಅಹಂ;

ಆಕಾಸೇ ವಿತಾನಂ ಕತ್ವಾ, ಭೋಜಯಿಂ ಬುದ್ಧಮುತ್ತಮಂ.

೨೭. ‘‘ಅಞ್ಜಲಿಂ ಪಗ್ಗಹೇತ್ವಾನ, ಅಭಿವಾದೇತ್ವಾನ ಸುಬ್ಬತಂ [ಪುಪ್ಫಕಂ (ಕ.)];

ದೀಘಸಾಲಂ ಭಗವತೋ, ನಿಯ್ಯಾದೇಸಿಮಹಂ ತದಾ.

೨೮. ‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ;

ಪಟಿಗ್ಗಹೇಸಿ ಭಗವಾ, ಅನುಕಮ್ಪಾಯ ಚಕ್ಖುಮಾ.

೨೯. ‘‘ಪಟಿಗ್ಗಹೇತ್ವಾನ ಸಮ್ಬುದ್ಧೋ, ದಕ್ಖಿಣೇಯ್ಯೋ ಸದೇವಕೇ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೩೦. ‘‘‘ಯೋ ಸೋ ಹಟ್ಠೇನ ಚಿತ್ತೇನ, ದೀಘಸಾಲಂ ಅದಾಸಿ [ಅಕಾಸಿ (ಸೀ.)] ಮೇ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೩೧. ‘‘‘ಇಮಸ್ಸ ಮಚ್ಚುಕಾಲಮ್ಹಿ, ಪುಞ್ಞಕಮ್ಮಸಮಙ್ಗಿನೋ;

ಸಹಸ್ಸಯುತ್ತಸ್ಸರಥೋ, ಉಪಟ್ಠಿಸ್ಸತಿ ತಾವದೇ.

೩೨. ‘‘‘ತೇನ ಯಾನೇನಯಂ ಪೋಸೋ, ದೇವಲೋಕಂ ಗಮಿಸ್ಸತಿ;

ಅನುಮೋದಿಸ್ಸರೇ ದೇವಾ, ಸಮ್ಪತ್ತೇ ಕುಸಲಬ್ಭವೇ [ಕುಸಲೇ ಭವೇ (ಸೀ. ಸ್ಯಾ.)].

೩೩. ‘‘‘ಮಹಾರಹಂ ಬ್ಯಮ್ಹಂ ಸೇಟ್ಠಂ, ರತನಮತ್ತಿಕಲೇಪನಂ;

ಕೂಟಾಗಾರವರೂಪೇತಂ, ಬ್ಯಮ್ಹಂ ಅಜ್ಝಾವಸಿಸ್ಸತಿ.

೩೪. ‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;

ಪಞ್ಚವೀಸತಿ ಕಪ್ಪಾನಿ, ದೇವರಾಜಾ ಭವಿಸ್ಸತಿ.

೩೫. ‘‘‘ಸತ್ತಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;

ಯಸೋಧರಸನಾಮಾ [ಯಸೇಧರಾ ಸಮಾನಾ (ಸೀ.)] ತೇ, ಸಬ್ಬೇಪಿ ಏಕನಾಮಕಾ.

೩೬. ‘‘‘ದ್ವೇ ಸಮ್ಪತ್ತೀ ಅನುಭೋತ್ವಾ, ವಡ್ಢೇತ್ವಾ [ಚಿನಿತ್ವಾ (ಸ್ಯಾ.)] ಪುಞ್ಞಸಞ್ಚಯಂ;

ಅಟ್ಠವೀಸತಿಕಪ್ಪಮ್ಹಿ, ಚಕ್ಕವತ್ತೀ ಭವಿಸ್ಸತಿ.

೩೭. ‘‘‘ತತ್ರಾಪಿ ಬ್ಯಮ್ಹಂ ಪವರಂ, ವಿಸ್ಸಕಮ್ಮೇನ ಮಾಪಿತಂ;

ದಸಸದ್ದಾವಿವಿತ್ತಂ ತಂ, ಪುರಮಜ್ಝಾವಸಿಸ್ಸತಿ.

೩೮. ‘‘‘ಅಪರಿಮೇಯ್ಯೇ ಇತೋ ಕಪ್ಪೇ, ಭೂಮಿಪಾಲೋ ಮಹಿದ್ಧಿಕೋ;

ಓಕ್ಕಾಕೋ ನಾಮ ನಾಮೇನ, ರಾಜಾ ರಟ್ಠೇ ಭವಿಸ್ಸತಿ.

೩೯. ‘‘‘ಸೋಳಸಿತ್ಥಿಸಹಸ್ಸಾನಂ, ಸಬ್ಬಾಸಂ ಪವರಾ ಚ ಸಾ [ಪವರಾವ ಯಾ (ಸ್ಯಾ.), ಪವರಾ ಪಿಯಾ (?)];

ಅಭಿಜಾತಾ ಖತ್ತಿಯಾನೀ, ನವ ಪುತ್ತೇ ಜನೇಸ್ಸತಿ.

೪೦. ‘‘‘ನವ ಪುತ್ತೇ ಜನೇತ್ವಾನ, ಖತ್ತಿಯಾನೀ ಮರಿಸ್ಸತಿ;

ತರುಣೀ ಚ ಪಿಯಾ ಕಞ್ಞಾ, ಮಹೇಸಿತ್ತಂ ಕರಿಸ್ಸತಿ.

೪೧. ‘‘‘ಓಕ್ಕಾಕಂ ತೋಸಯಿತ್ವಾನ, ವರಂ ಕಞ್ಞಾ ಲಭಿಸ್ಸತಿ;

ವರಂ ಲದ್ಧಾನ ಸಾ ಕಞ್ಞಾ, ಪುತ್ತೇ ಪಬ್ಬಾಜಯಿಸ್ಸತಿ.

೪೨. ‘‘‘ಪಬ್ಬಾಜಿತಾ ಚ ತೇ ಸಬ್ಬೇ, ಗಮಿಸ್ಸನ್ತಿ ನಗುತ್ತಮಂ;

ಜಾತಿಭೇದಭಯಾ ಸಬ್ಬೇ, ಭಗಿನೀಹಿ ವಸಿಸ್ಸರೇ [ಸಂವಸಿಸ್ಸರೇ (ಸೀ.)].

೪೩. ‘‘‘ಏಕಾ ಚ ಕಞ್ಞಾ ಬ್ಯಾಧೀಹಿ, ಭವಿಸ್ಸತಿ ಪರಿಕ್ಖತಾ [ಪುರಕ್ಖತಾ (ಸ್ಯಾ. ಕ.)];

ಮಾ ನೋ ಜಾತಿ ಪಭಿಜ್ಜೀತಿ, ನಿಖಣಿಸ್ಸನ್ತಿ ಖತ್ತಿಯಾ.

೪೪. ‘‘‘ಖತ್ತಿಯೋ ನೀಹರಿತ್ವಾನ, ತಾಯ ಸದ್ಧಿಂ ವಸಿಸ್ಸತಿ;

ಭವಿಸ್ಸತಿ ತದಾ ಭೇದೋ, ಓಕ್ಕಾಕಕುಲಸಮ್ಭವೋ.

೪೫. ‘‘‘ತೇಸಂ ಪಜಾ ಭವಿಸ್ಸನ್ತಿ, ಕೋಳಿಯಾ ನಾಮ ಜಾತಿಯಾ;

ತತ್ಥ ಮಾನುಸಕಂ ಭೋಗಂ, ಅನುಭೋಸ್ಸತಿನಪ್ಪಕಂ.

೪೬. ‘‘‘ತಮ್ಹಾ ಕಾಯಾ ಚವಿತ್ವಾನ, ದೇವಲೋಕಂ ಗಮಿಸ್ಸತಿ;

ತತ್ರಾಪಿ ಪವರಂ ಬ್ಯಮ್ಹಂ, ಲಭಿಸ್ಸತಿ ಮನೋರಮಂ.

೪೭. ‘‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;

ಆಗನ್ತ್ವಾನ ಮನುಸ್ಸತ್ತಂ, ಸೋಣೋ ನಾಮ ಭವಿಸ್ಸತಿ.

೪೮. ‘‘‘ಆರದ್ಧವೀರಿಯೋ ಪಹಿತತ್ತೋ, ಪದಹಂ ಸತ್ಥು ಸಾಸನೇ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.

೪೯. ‘‘‘ಅನನ್ತದಸ್ಸೀ ಭಗವಾ, ಗೋತಮೋ ಸಕ್ಯಪುಙ್ಗವೋ;

ವಿಸೇಸಞ್ಞೂ ಮಹಾವೀರೋ, ಅಗ್ಗಟ್ಠಾನೇ ಠಪೇಸ್ಸತಿ’.

೫೦. ‘‘ವುಟ್ಠಮ್ಹಿ ದೇವೇ ಚತುರಙ್ಗುಲಮ್ಹಿ, ತಿಣೇ ಅನಿಲೇರಿತಅಙ್ಗಣಮ್ಹಿ;

ಠತ್ವಾನ ಯೋಗಸ್ಸ ಪಯುತ್ತತಾದಿನೋ, ತತೋತ್ತರಿಂ ಪಾರಮತಾ ನ ವಿಜ್ಜತಿ.

೫೧. ‘‘ಉತ್ತಮೇ ದಮಥೇ ದನ್ತೋ, ಚಿತ್ತಂ ಮೇ ಸುಪಣೀಹಿತಂ;

ಭಾರೋ ಮೇ ಓಹಿತೋ ಸಬ್ಬೋ, ನಿಬ್ಬುತೋಮ್ಹಿ ಅನಾಸವೋ.

೫೨. ‘‘ಅಙ್ಗೀರಸೋ ಮಹಾನಾಗೋ, ಅಭಿಜಾತೋವ ಕೇಸರೀ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸಿ ಮಂ.

೫೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸೋಣೋ ಕೋಳಿವಿಸೋ [ಕೋಳಿಯವೇಸ್ಸೋ (ಸೀ. ಸ್ಯಾ.), ಕೋಟಿಕಣ್ಣೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸೋಣಕೋಳಿವಿಸತ್ಥೇರಸ್ಸಾಪದಾನಂ ದುತಿಯಂ.

೩. ಕಾಳಿಗೋಧಾಪುತ್ತಭದ್ದಿಯತ್ಥೇರಅಪದಾನಂ

೫೪. ‘‘ಪದುಮುತ್ತರಸಮ್ಬುದ್ಧಂ, ಮೇತ್ತಚಿತ್ತಂ ಮಹಾಮುನಿಂ;

ಉಪೇತಿ ಜನತಾ ಸಬ್ಬಾ, ಸಬ್ಬಲೋಕಗ್ಗನಾಯಕಂ.

೫೫. ‘‘ಸತ್ತುಕಞ್ಚ ಬದ್ಧಕಞ್ಚ [ವತ್ಥಂ ಸೇನಾಸನಞ್ಚೇವ (ಸೀ.), ಸತ್ತುಕಞ್ಚ ಪದಕಞ್ಚ (ಸೀ. ಅಟ್ಠ.), ಸತ್ತುಕಞ್ಚ ಪವಾಕಞ್ಚ (ಸ್ಯಾ.)], ಆಮಿಸಂ ಪಾನಭೋಜನಂ;

ದದನ್ತಿ ಸತ್ಥುನೋ ಸಬ್ಬೇ, ಪುಞ್ಞಕ್ಖೇತ್ತೇ ಅನುತ್ತರೇ.

೫೬. ‘‘ಅಹಮ್ಪಿ ದಾನಂ ದಸ್ಸಾಮಿ, ದೇವದೇವಸ್ಸ ತಾದಿನೋ;

ಬುದ್ಧಸೇಟ್ಠಂ ನಿಮನ್ತೇತ್ವಾ, ಸಙ್ಘಮ್ಪಿ ಚ ಅನುತ್ತರಂ.

೫೭. ‘‘ಉಯ್ಯೋಜಿತಾ ಮಯಾ ಚೇತೇ, ನಿಮನ್ತೇಸುಂ ತಥಾಗತಂ;

ಕೇವಲಂ ಭಿಕ್ಖುಸಙ್ಘಞ್ಚ, ಪುಞ್ಞಕ್ಖೇತ್ತಂ ಅನುತ್ತರಂ.

೫೮. ‘‘ಸತಸಹಸ್ಸಪಲ್ಲಙ್ಕಂ, ಸೋವಣ್ಣಂ ಗೋನಕತ್ಥತಂ;

ತೂಲಿಕಾಪಟಲಿಕಾಯ, ಖೋಮಕಪ್ಪಾಸಿಕೇಹಿ ಚ;

ಮಹಾರಹಂ ಪಞ್ಞಾಪಯಿಂ, ಆಸನಂ ಬುದ್ಧಯುತ್ತಕಂ.

೫೯. ‘‘ಪದುಮುತ್ತರೋ ಲೋಕವಿದೂ, ದೇವದೇವೋ ನರಾಸಭೋ;

ಭಿಕ್ಖುಸಙ್ಘಪರಿಬ್ಯೂಳ್ಹೋ, ಮಮ ದ್ವಾರಮುಪಾಗಮಿ.

೬೦. ‘‘ಪಚ್ಚುಗ್ಗನ್ತ್ವಾನ ಸಮ್ಬುದ್ಧಂ, ಲೋಕನಾಥಂ ಯಸಸ್ಸಿನಂ;

ಪಸನ್ನಚಿತ್ತೋ ಸುಮನೋ, ಅಭಿನಾಮಯಿಂ ಸಙ್ಘರಂ [ಸಕಂ ಘರಂ (ಸೀ.)].

೬೧. ‘‘ಭಿಕ್ಖೂನಂ ಸತಸಹಸ್ಸಂ, ಬುದ್ಧಞ್ಚ ಲೋಕನಾಯಕಂ;

ಪಸನ್ನಚಿತ್ತೋ ಸುಮನೋ, ಪರಮನ್ನೇನ ತಪ್ಪಯಿಂ.

೬೨. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೬೩. ‘‘‘ಯೇನಿದಂ ಆಸನಂ ದಿನ್ನಂ, ಸೋವಣ್ಣಂ ಗೋನಕತ್ಥತಂ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೬೪. ‘‘‘ಚತುಸತ್ತತಿಕ್ಖತ್ತುಂ ಸೋ, ದೇವರಜ್ಜಂ ಕರಿಸ್ಸತಿ;

ಅನುಭೋಸ್ಸತಿ ಸಮ್ಪತ್ತಿಂ, ಅಚ್ಛರಾಹಿ ಪುರಕ್ಖತೋ.

೬೫. ‘‘‘ಪದೇಸರಜ್ಜಂ ಸಹಸ್ಸಂ, ವಸುಧಂ ಆವಸಿಸ್ಸತಿ;

ಏಕಪಞ್ಞಾಸಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.

೬೬. ‘‘‘ಸಬ್ಬಾಸು ಭವಯೋನೀಸು, ಉಚ್ಚಾಕುಲೀ [ಉಚ್ಚಾಕುಲೇ (ಕ.)] ಭವಿಸ್ಸತಿ;

ಸೋ ಚ ಪಚ್ಛಾ ಪಬ್ಬಜಿತ್ವಾ, ಸುಕ್ಕಮೂಲೇನ ಚೋದಿತೋ;

ಭದ್ದಿಯೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.

೬೭. ‘‘‘ವಿವೇಕಮನುಯುತ್ತೋಮ್ಹಿ, ಪನ್ತಸೇನನಿವಾಸಹಂ;

ಫಲಞ್ಚಾಧಿಗತಂ ಸಬ್ಬಂ, ಚತ್ತಕ್ಲೇಸೋಮ್ಹಿ ಅಜ್ಜಹಂ.

೬೮. ‘‘‘ಮಮ ಸಬ್ಬಂ [ಕಮ್ಮಂ (?)] ಅಭಿಞ್ಞಾಯ, ಸಬ್ಬಞ್ಞೂ ಲೋಕನಾಯಕೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸಿ ಮಂ’.

೬೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಭದ್ದಿಯೋ ಕಾಳಿಗೋಧಾಯ ಪುತ್ತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಭದ್ದಿಯಸ್ಸ ಕಾಳಿಗೋಧಾಯ ಪುತ್ತತ್ಥೇರಸ್ಸಾಪದಾನಂ ತತಿಯಂ.

೪. ಸನ್ನಿಟ್ಠಾಪಕತ್ಥೇರಅಪದಾನಂ

೭೦. ‘‘ಅರಞ್ಞೇ ಕುಟಿಕಂ ಕತ್ವಾ, ವಸಾಮಿ ಪಬ್ಬತನ್ತರೇ;