೬. ಬೀಜನಿವಗ್ಗೋ

೧. ವಿಧೂಪನದಾಯಕತ್ಥೇರಅಪದಾನಂ

೧. ‘‘ಪದುಮುತ್ತರಬುದ್ಧಸ್ಸ, ಲೋಕಜೇಟ್ಠಸ್ಸ ತಾದಿನೋ;

ಬೀಜನಿಕಾ [ವೀಜನಿಕಾ (ಸೀ. ಸ್ಯಾ.)] ಮಯಾ ದಿನ್ನಾ, ದ್ವಿಪದಿನ್ದಸ್ಸ ತಾದಿನೋ.

೨. ‘‘ಸಕಂ ಚಿತ್ತಂ ಪಸಾದೇತ್ವಾ, ಪಗ್ಗಹೇತ್ವಾನ ಅಞ್ಜಲಿಂ;

ಸಮ್ಬುದ್ಧಮಭಿವಾದೇತ್ವಾ, ಪಕ್ಕಮಿಂ ಉತ್ತರಾಮುಖೋ.

೩. ‘‘ಬೀಜನಿಂ ಪಗ್ಗಹೇತ್ವಾನ, ಸತ್ಥಾ ಲೋಕಗ್ಗನಾಯಕೋ [ಲೋಕೇ ಅನುತ್ತರೋ (ಸೀ.)];

ಭಿಕ್ಖುಸಙ್ಘೇ ಠಿತೋ ಸನ್ತೋ, ಇಮಾ ಗಾಥಾ ಅಭಾಸಥ.

೪. ‘‘‘ಇಮಿನಾ ಬೀಜನಿದಾನೇನ, ಚಿತ್ತಸ್ಸ ಪಣಿಧೀಹಿ [ಚೇತನಾಪಣಿಧೀಹಿ (ಅಞ್ಞತ್ಥ)] ಚ;

ಕಪ್ಪಾನಂ ಸತಸಹಸ್ಸಂ, ವಿನಿಪಾತಂ ನ ಗಚ್ಛತಿ’.

೫. ‘‘ಆರದ್ಧವೀರಿಯೋ ಪಹಿತತ್ತೋ, ಚೇತೋಗುಣಸಮಾಹಿತೋ;

ಜಾತಿಯಾ ಸತ್ತವಸ್ಸೋಹಂ, ಅರಹತ್ತಂ ಅಪಾಪುಣಿಂ.

೬. ‘‘ಸಟ್ಠಿಕಪ್ಪಸಹಸ್ಸಮ್ಹಿ, ಬೀಜಮಾನಸನಾಮಕಾ;

ಸೋಳಸಾಸಿಂಸು ರಾಜಾನೋ, ಚಕ್ಕವತ್ತೀ ಮಹಬ್ಬಲಾ.

೭. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ವಿಧೂಪನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ವಿಧೂಪನದಾಯಕತ್ಥೇರಸ್ಸಾಪದಾನಂ ಪಠಮಂ.

೨. ಸತರಂಸಿತ್ಥೇರಅಪದಾನಂ

೮. ‘‘ಉಬ್ಬಿದ್ಧಂ ಸೇಲಮಾರುಯ್ಹ, ನಿಸೀದಿ ಪುರಿಸುತ್ತಮೋ;

ಪಬ್ಬತಸ್ಸಾವಿದೂರಮ್ಹಿ, ಬ್ರಾಹ್ಮಣೋ ಮನ್ತಪಾರಗೂ.

೯. ‘‘ಉಪವಿಟ್ಠಂ ಮಹಾವೀರಂ, ದೇವದೇವಂ ನರಾಸಭಂ;

ಅಞ್ಜಲಿಂ ಪಗ್ಗಹೇತ್ವಾನ, ಸನ್ಥವಿಂ ಲೋಕನಾಯಕಂ.

೧೦. ‘‘‘ಏಸ ಬುದ್ಧೋ ಮಹಾವೀರೋ, ವರಧಮ್ಮಪ್ಪಕಾಸಕೋ;

ಜಲತಿ ಅಗ್ಗಿಖನ್ಧೋವ, ಭಿಕ್ಖುಸಙ್ಘಪುರಕ್ಖತೋ.

೧೧. ‘‘‘ಮಹಾಸಮುದ್ದೋವ‘ಕ್ಖುಬ್ಭೋ [’ಕ್ಖೋಭೋ (ಸೀ. ಸ್ಯಾ.)], ಅಣ್ಣವೋವ ದುರುತ್ತರೋ;

ಮಿಗರಾಜಾವಸಮ್ಭೀತೋ [ಛಮ್ಭಿತೋ (ಕ.)], ಧಮ್ಮಂ ದೇಸೇತಿ ಚಕ್ಖುಮಾ’.

೧೨. ‘‘ಮಮ ಸಙ್ಕಪ್ಪಮಞ್ಞಾಯ, ಪದುಮುತ್ತರನಾಯಕೋ;

ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ.

೧೩. ‘‘‘ಯೇನಾಯಂ [ಯೇನಾಹಂ (ಕ.)] ಅಞ್ಜಲೀ ದಿನ್ನೋ, ಬುದ್ಧಸೇಟ್ಠೋ ಚ ಥೋಮಿತೋ;

ತಿಂಸಕಪ್ಪಸಹಸ್ಸಾನಿ, ದೇವರಜ್ಜಂ ಕರಿಸ್ಸತಿ.

೧೪. ‘‘‘ಕಪ್ಪಸತಸಹಸ್ಸಮ್ಹಿ, ಅಙ್ಗೀರಸಸನಾಮಕೋ;

ವಿವಟ್ಟಚ್ಛದೋ [ವಿವತ್ಥಚ್ಛದ್ದೋ (ಸೀ.)] ಸಮ್ಬುದ್ಧೋ, ಉಪ್ಪಜ್ಜಿಸ್ಸತಿ ತಾವದೇ.

೧೫. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಸತರಂಸೀತಿ ನಾಮೇನ, ಅರಹಾ ಸೋ ಭವಿಸ್ಸತಿ’.

೧೬. ‘‘ಜಾತಿಯಾ ಸತ್ತವಸ್ಸೋಹಂ, ಪಬ್ಬಜಿಂ ಅನಗಾರಿಯಂ;

ಸತರಂಸಿಮ್ಹಿ ನಾಮೇನ, ಪಭಾ ನಿದ್ಧಾವತೇ ಮಮ.

೧೭. ‘‘ಮಣ್ಡಪೇ ರುಕ್ಖಮೂಲೇ ವಾ, ಝಾಯೀ ಝಾನರತೋ ಅಹಂ;

ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.

೧೮. ‘‘ಸಟ್ಠಿಕಪ್ಪಸಹಸ್ಸಮ್ಹಿ, ಚತುರೋ ರಾಮನಾಮಕಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೧೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸತರಂಸಿ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸತರಂಸಿತ್ಥೇರಸ್ಸಾಪದಾನಂ ದುತಿಯಂ.

೩. ಸಯನದಾಯಕತ್ಥೇರಅಪದಾನಂ

೨೦. ‘‘ಪದುಮುತ್ತರಬುದ್ಧಸ್ಸ, ಸಬ್ಬಲೋಕಾನುಕಮ್ಪಿನೋ;

ಸಯನಂ ತಸ್ಸ ಪಾದಾಸಿಂ, ವಿಪ್ಪಸನ್ನೇನ ಚೇತಸಾ.

೨೧. ‘‘ತೇನ ಸಯನದಾನೇನ, ಸುಖೇತ್ತೇ ಬೀಜಸಮ್ಪದಾ;

ಭೋಗಾ ನಿಬ್ಬತ್ತರೇ ತಸ್ಸ, ಸಯನಸ್ಸ ಇದಂ ಫಲಂ.

೨೨. ‘‘ಆಕಾಸೇ ಸೇಯ್ಯಂ ಕಪ್ಪೇಮಿ, ಧಾರೇಮಿ ಪಥವಿಂ ಇಮಂ;

ಪಾಣೇಸು ಮೇ ಇಸ್ಸರಿಯಂ, ಸಯನಸ್ಸ ಇದಂ ಫಲಂ.

೨೩. ‘‘ಪಞ್ಚಕಪ್ಪಸಹಸ್ಸಮ್ಹಿ, ಅಟ್ಠ ಆಸುಂ ಮಹಾತೇಜಾ [ಮಹಾವರಾ (ಸೀ.), ಮಹಾವೀರಾ (ಸ್ಯಾ.)];

ಚತುತ್ತಿಂಸೇ ಕಪ್ಪಸತೇ, ಚತುರೋ ಚ ಮಹಬ್ಬಲಾ.

೨೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಯನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಯನದಾಯಕತ್ಥೇರಸ್ಸಾಪದಾನಂ ತತಿಯಂ.

೪. ಗನ್ಧೋದಕಿಯತ್ಥೇರಅಪದಾನಂ

೨೫. ‘‘ಪದುಮುತ್ತರಬುದ್ಧಸ್ಸ, ಮಹಾಬೋಧಿಮಹೋ ಅಹು;

ವಿಚಿತ್ತಂ ಘಟಮಾದಾಯ, ಗನ್ಧೋದಕಮದಾಸಹಂ.

೨೬. ‘‘ನ್ಹಾನಕಾಲೇ ಚ ಬೋಧಿಯಾ, ಮಹಾಮೇಘೋ ಪವಸ್ಸಥ;

ನಿನ್ನಾದೋ ಚ ಮಹಾ ಆಸಿ, ಅಸನಿಯಾ ಫಲನ್ತಿಯಾ.

೨೭. ‘‘ತೇನೇವಾಸನಿವೇಗೇನ, ತತ್ಥ ಕಾಲಙ್ಕತೋ [ಕಾಲಕತೋ (ಸೀ. ಸ್ಯಾ.)] ಅಹಂ [ಅಹುಂ (ಸೀ.)];

ದೇವಲೋಕೇ ಠಿತೋ ಸನ್ತೋ, ಇಮಾ ಗಾಥಾ ಅಭಾಸಹಂ.

೨೮. ‘‘‘ಅಹೋ ಬುದ್ಧೋ ಅಹೋ ಧಮ್ಮೋ, ಅಹೋ ನೋ ಸತ್ಥುಸಮ್ಪದಾ;

ಕಳೇವರಂ [ಕಲೇಬರಂ (ಸೀ.)] ಮೇ ಪತಿತಂ, ದೇವಲೋಕೇ ರಮಾಮಹಂ.

೨೯. ‘‘‘ಉಬ್ಬಿದ್ಧಂ ಭವನಂ ಮಯ್ಹಂ, ಸತಭೂಮಂ ಸಮುಗ್ಗತಂ;

ಕಞ್ಞಾಸತಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ.

೩೦. ‘‘‘ಆಬಾಧಾ ಮೇ ನ ವಿಜ್ಜನ್ತಿ, ಸೋಕೋ ಮಯ್ಹಂ ನ ವಿಜ್ಜತಿ;

ಪರಿಳಾಹಂ ನ ಪಸ್ಸಾಮಿ, ಪುಞ್ಞಕಮ್ಮಸ್ಸಿದಂ ಫಲಂ.

೩೧. ‘‘‘ಅಟ್ಠವೀಸೇ ಕಪ್ಪಸತೇ, ರಾಜಾ ಸಂವಸಿತೋ ಅಹುಂ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ’.

೩೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಗನ್ಧೋದಕಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಗನ್ಧೋದಕಿಯತ್ಥೇರಸ್ಸಾಪದಾನಂ ಚತುತ್ಥಂ.

೫. ಓಪವಯ್ಹತ್ಥೇರಅಪದಾನಂ

೩೩. ‘‘ಪದುಮುತ್ತರಬುದ್ಧಸ್ಸ, ಆಜಾನೀಯಮದಾಸಹಂ;

ನಿಯ್ಯಾದೇತ್ವಾನ ಸಮ್ಬುದ್ಧೇ [ಸಮ್ಬುದ್ಧಂ (ಸೀ. ಕ.)], ಅಗಮಾಸಿಂ ಸಕಂ ಘರಂ.

೩೪. ‘‘ದೇವಲೋ ನಾಮ ನಾಮೇನ, ಸತ್ಥುನೋ ಅಗ್ಗಸಾವಕೋ;

ವರಧಮ್ಮಸ್ಸ ದಾಯಾದೋ, ಆಗಚ್ಛಿ ಮಮ ಸನ್ತಿಕಂ.

೩೫. ‘‘ಸಪತ್ತಭಾರೋ ಭಗವಾ, ಆಜಾನೇಯ್ಯೋ ನ ಕಪ್ಪತಿ;

ತವ ಸಙ್ಕಪ್ಪಮಞ್ಞಾಯ, ಅಧಿವಾಸೇಸಿ ಚಕ್ಖುಮಾ.

೩೬. ‘‘ಅಗ್ಘಾಪೇತ್ವಾ ವಾತಜವಂ, ಸಿನ್ಧವಂ ಸೀಘವಾಹನಂ;

ಪದುಮುತ್ತರಬುದ್ಧಸ್ಸ, ಖಮನೀಯಮದಾಸಹಂ.

೩೭. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ [ದೇವೇ ಚ ಮಾನುಸೇ ಭವೇ (ಸೀ. ಕ.)];

ಖಮನೀಯಂ ವಾತಜವಂ, ಚಿತ್ತಂ ನಿಬ್ಬತ್ತತೇ [ಆಜಾನೀಯಾ ವಾತಜವಾ, ವಿತ್ತಿ ನಿಬ್ಬತ್ತರೇ (ಸ್ಯಾ.), ಖಮನೀಯಾ ವಾತಜವಾ, ಚಿತ್ತಾ ನಿಬ್ಬತ್ತರೇ (ಸೀ.)] ಮಮ.

೩೮. ‘‘ಲಾಭಂ ತೇಸಂ ಸುಲದ್ಧಂವ, ಯೇ ಲಭನ್ತುಪಸಮ್ಪದಂ;

ಪುನಪಿ ಪಯಿರುಪಾಸೇಯ್ಯಂ, ಬುದ್ಧೋ ಲೋಕೇ ಸಚೇ ಭವೇ.

೩೯. ‘‘ಅಟ್ಠವೀಸತಿಕ್ಖತ್ತುಂಹಂ, ರಾಜಾ ಆಸಿಂ ಮಹಬ್ಬಲೋ;

ಚಾತುರನ್ತೋ ವಿಜಿತಾವೀ, ಜಮ್ಬುಸಣ್ಡಸ್ಸ [ಜಮ್ಬುದೀಪಸ್ಸ (ಸ್ಯಾ.), ಜಮ್ಬುಮಣ್ಡಸ್ಸ (ಕ.)] ಜಮ್ಬುಇಸ್ಸರೋ.

೪೦. ‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;

ಪತ್ತೋಸ್ಮಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.

೪೧. ‘‘ಚತುತಿಂಸಸಹಸ್ಸಮ್ಹಿ, ಮಹಾತೇಜೋಸಿ ಖತ್ತಿಯೋ;

ಸತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೪೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಓಪವಯ್ಹೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಓಪವಯ್ಹತ್ಥೇರಸ್ಸಾಪದಾನಂ ಪಞ್ಚಮಂ.

೬. ಸಪರಿವಾರಾಸನತ್ಥೇರಅಪದಾನಂ

೪೩. ‘‘ಪದುಮುತ್ತರಬುದ್ಧಸ್ಸ, ಪಿಣ್ಡಪಾತಂ ಅದಾಸಹಂ;

ಗನ್ತ್ವಾ ಕಿಲಿಟ್ಠಕಂ ಠಾನಂ [ತಂ ಭೋಜನಟ್ಠಾನಂ (ಸೀ.)], ಮಲ್ಲಿಕಾಹಿ ಪರಿಕ್ಖಿತಂ [ಪರಿಕ್ಖಿಪಿಂ (ಸೀ.)].

೪೪. ‘‘ತಮ್ಹಾಸನಮ್ಹಿ ಆಸೀನೋ, ಬುದ್ಧೋ ಲೋಕಗ್ಗನಾಯಕೋ;

ಅಕಿತ್ತಯಿ ಪಿಣ್ಡಪಾತಂ, ಉಜುಭೂತೋ ಸಮಾಹಿತೋ.

೪೫. ‘‘ಯಥಾಪಿ ಭದ್ದಕೇ ಖೇತ್ತೇ, ಬೀಜಂ ಅಪ್ಪಮ್ಪಿ ರೋಪಿತಂ;

ಸಮ್ಮಾ ಧಾರಂ ಪವೇಚ್ಛನ್ತೇ, ಫಲಂ ತೋಸೇತಿ ಕಸ್ಸಕಂ.

೪೬. ‘‘ತಥೇವಾಯಂ ಪಿಣ್ಡಪಾತೋ, ಸುಖೇತ್ತೇ ರೋಪಿತೋ ತಯಾ;

ಭವೇ ನಿಬ್ಬತ್ತಮಾನಮ್ಹಿ, ಫಲಂ ತೇ [ನಿಬ್ಬತ್ತಮಾನಂ ಹಿ, ಫಲತೋ (ಸೀ.)] ತೋಸಯಿಸ್ಸತಿ [ತಪ್ಪಯಿಸ್ಸತಿ (ಕ.)].

೪೭. ‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;

ಪಿಣ್ಡಪಾತಂ ಗಹೇತ್ವಾನ, ಪಕ್ಕಾಮಿ ಉತ್ತರಾಮುಖೋ.

೪೮. ‘‘ಸಂವುತೋ ಪಾತಿಮೋಕ್ಖಸ್ಮಿಂ, ಇನ್ದ್ರಿಯೇಸು ಚ ಪಞ್ಚಸು;

ಪವಿವೇಕಮನುಯುತ್ತೋ, ವಿಹರಾಮಿ ಅನಾಸವೋ.

೪೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಪರಿವಾರಾಸನೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಪರಿವಾರಾಸನತ್ಥೇರಸ್ಸಾಪದಾನಂ ಛಟ್ಠಂ.

೭. ಪಞ್ಚದೀಪಕತ್ಥೇರಅಪದಾನಂ

೫೦. ‘‘ಪದುಮುತ್ತರಬುದ್ಧಸ್ಸ, ಸಬ್ಬಭೂತಾನುಕಮ್ಪಿನೋ;

ಸದ್ದಹಿತ್ವಾನ [ಸುಸಣ್ಠಹಿತ್ವಾ (ಸೀ.)] ಸದ್ಧಮ್ಮೇ, ಉಜುದಿಟ್ಠಿ ಅಹೋಸಹಂ.

೫೧. ‘‘ಪದೀಪದಾನಂ ಪಾದಾಸಿಂ, ಪರಿವಾರೇತ್ವಾನ ಬೋಧಿಯಂ;

ಸದ್ದಹನ್ತೋ ಪದೀಪಾನಿ, ಅಕರಿಂ ತಾವದೇ ಅಹಂ.

೫೨. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;

ಆಕಾಸೇ ಉಕ್ಕಂ ಧಾರೇನ್ತಿ, ದೀಪದಾನಸ್ಸಿದಂ ಫಲಂ.

೫೩. ‘‘ತಿರೋಕುಟ್ಟಂ ತಿರೋಸೇಲಂ, ಸಮತಿಗ್ಗಯ್ಹ ಪಬ್ಬತಂ;

ಸಮನ್ತಾ ಯೋಜನಸತಂ, ದಸ್ಸನಂ ಅನುಭೋಮಹಂ.

೫೪. ‘‘ತೇನ ಕಮ್ಮಾವಸೇಸೇನ, ಪತ್ತೋಮ್ಹಿ ಆಸವಕ್ಖಯಂ;

ಧಾರೇಮಿ ಅನ್ತಿಮಂ ದೇಹಂ, ದ್ವಿಪದಿನ್ದಸ್ಸ ಸಾಸನೇ.

೫೫. ‘‘ಚತುತ್ತಿಂಸೇ ಕಪ್ಪಸತೇ, ಸತಚಕ್ಖುಸನಾಮಕಾ;

ರಾಜಾಹೇಸುಂ ಮಹಾತೇಜಾ, ಚಕ್ಕವತ್ತೀ ಮಹಬ್ಬಲಾ.

೫೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಞ್ಚದೀಪಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಞ್ಚದೀಪಕತ್ಥೇರಸ್ಸಾಪದಾನಂ ಸತ್ತಮಂ.

೮. ಧಜದಾಯಕತ್ಥೇರಅಪದಾನಂ

೫೭. ‘‘ಪದುಮುತ್ತರಬುದ್ಧಸ್ಸ, ಬೋಧಿಯಾ ಪಾದಪುತ್ತಮೇ;

ಹಟ್ಠೋ ಹಟ್ಠೇನ ಚಿತ್ತೇನ, ಧಜಮಾರೋಪಯಿಂ ಅಹಂ.

೫೮. ‘‘ಪತಿತಪತ್ತಾನಿ ಗಣ್ಹಿತ್ವಾ, ಬಹಿದ್ಧಾ ಛಡ್ಡಯಿಂ ಅಹಂ;

ಅನ್ತೋಸುದ್ಧಂ ಬಹಿಸುದ್ಧಂ, ಅಧಿಮುತ್ತಮನಾಸವಂ.

೫೯. ‘‘ಸಮ್ಮುಖಾ ವಿಯ ಸಮ್ಬುದ್ಧಂ, ಅವನ್ದಿಂ ಬೋಧಿಮುತ್ತಮಂ;

ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ.

೬೦. ‘‘ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಾ ಗಾಥಾ ಅಭಾಸಥ;

‘‘‘ಇಮಿನಾ ಧಜದಾನೇನ, ಉಪಟ್ಠಾನೇನ ಚೂಭಯಂ.

೬೧. ‘‘‘ಕಪ್ಪಾನಂ ಸತಸಹಸ್ಸಂ, ದುಗ್ಗತಿಂ ಸೋ ನ ಗಚ್ಛತಿ;

ದೇವೇಸು ದೇವಸೋಭಗ್ಯಂ, ಅನುಭೋಸ್ಸತಿನಪ್ಪಕಂ.

೬೨. ‘‘‘ಅನೇಕಸತಕ್ಖತ್ತುಞ್ಚ, ರಾಜಾ ರಟ್ಠೇ ಭವಿಸ್ಸತಿ;

ಉಗ್ಗತೋ ನಾಮ ನಾಮೇನ, ಚಕ್ಕವತ್ತೀ ಭವಿಸ್ಸತಿ.

೬೩. ‘‘‘ಸಮ್ಪತ್ತಿಂ ಅನುಭೋತ್ವಾನ, ಸುಕ್ಕಮೂಲೇನ ಚೋದಿತೋ;

ಗೋತಮಸ್ಸ ಭಗವತೋ, ಸಾಸನೇಭಿರಮಿಸ್ಸತಿ’.

೬೪. ‘‘ಪಧಾನಪಹಿತತ್ತೋಮ್ಹಿ, ಉಪಸನ್ತೋ ನಿರೂಪಧಿ;

ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ.

೬೫. ‘‘ಏಕಪಞ್ಞಾಸಸಹಸ್ಸೇ, ಕಪ್ಪೇ ಉಗ್ಗತಸವ್ಹಯೋ [ಸವ್ಹಯಾ (ಸ್ಯಾ.)];

ಪಞ್ಞಾಸಸತಸಹಸ್ಸೇ, ಖತ್ತಿಯೋ ಮೇಘಸವ್ಹಯೋ [ಖತ್ತಿಯಾ ಖೇಮಸವ್ಹಯಾ (ಸ್ಯಾ.)].

೬೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಧಜದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಧಜದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.