೧೦. ಚುನ್ದತ್ಥೇರಅಪದಾನಂ

೧೨೫. ‘‘ಸಿದ್ಧತ್ಥಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;

ಅಗ್ಘಿಯಂ ಕಾರಯಿತ್ವಾನ, ಜಾತಿಪುಪ್ಫೇಹಿ ಛಾದಯಿಂ.

೧೨೬. ‘‘ನಿಟ್ಠಾಪೇತ್ವಾನ ತಂ ಪುಪ್ಫಂ, ಬುದ್ಧಸ್ಸ ಉಪನಾಮಯಿಂ;

ಪುಪ್ಫಾವಸೇಸಂ ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ.

೧೨೭. ‘‘ಕಞ್ಚನಗ್ಘಿಯಸಙ್ಕಾಸಂ, ಬುದ್ಧಂ ಲೋಕಗ್ಗನಾಯಕಂ;

ಪಸನ್ನಚಿತ್ತೋ ಸುಮನೋ, ಪುಪ್ಫಗ್ಘಿಯಮುಪಾನಯಿಂ.

೧೨೮. ‘‘ವಿತಿಣ್ಣಕಙ್ಖೋ ಸಮ್ಬುದ್ಧೋ, ತಿಣ್ಣೋಘೇಹಿ ಪುರಕ್ಖತೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೧೨೯. ‘‘‘ದಿಬ್ಬಗನ್ಧಂ ಪವಾಯನ್ತಂ, ಯೋ ಮೇ ಪುಪ್ಫಗ್ಘಿಯಂ ಅದಾ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೧೩೦. ‘‘‘ಇತೋ ಚುತೋ ಅಯಂ ಪೋಸೋ, ದೇವಸಙ್ಘಪುರಕ್ಖತೋ;

ಜಾತಿಪುಪ್ಫೇಹಿ ಪರಿಕಿಣ್ಣೋ, ದೇವಲೋಕಂ ಗಮಿಸ್ಸತಿ.

೧೩೧. ‘‘‘ಉಬ್ಬಿದ್ಧಂ ಭವನಂ ತಸ್ಸ, ಸೋವಣ್ಣಞ್ಚ ಮಣೀಮಯಂ;

ಬ್ಯಮ್ಹಂ ಪಾತುಭವಿಸ್ಸತಿ, ಪುಞ್ಞಕಮ್ಮಪ್ಪಭಾವಿತಂ.

೧೩೨. ‘‘‘ಚತುಸತ್ತತಿಕ್ಖತ್ತುಂ ಸೋ, ದೇವರಜ್ಜಂ ಕರಿಸ್ಸತಿ;

ಅನುಭೋಸ್ಸತಿ ಸಮ್ಪತ್ತಿಂ, ಅಚ್ಛರಾಹಿ ಪುರಕ್ಖತೋ.

೧೩೩. ‘‘‘ಪಥಬ್ಯಾ ರಜ್ಜಂ ತಿಸತಂ, ವಸುಧಂ ಆವಸಿಸ್ಸತಿ;

ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.

೧೩೪. ‘‘‘ದುಜ್ಜಯೋ ನಾಮ ನಾಮೇನ, ಹೇಸ್ಸತಿ ಮನುಜಾಧಿಪೋ;

ಅನುಭೋತ್ವಾನ ತಂ ಪುಞ್ಞಂ, ಸಕಕಮ್ಮಂ ಅಪಸ್ಸಿತೋ [ಸಕಕಮ್ಮೂಪಸಂಹಿತೋ (ಸ್ಯಾ.)].

೧೩೫. ‘‘‘ವಿನಿಪಾತಂ ಅಗನ್ತ್ವಾನ, ಮನುಸ್ಸತ್ತಂ ಗಮಿಸ್ಸತಿ;

ಹಿರಞ್ಞಂ ತಸ್ಸ [ಹಿರಞ್ಞಸ್ಸ ಚ (ಸೀ. ಕ.)] ನಿಚಿತಂ, ಕೋಟಿಸತಮನಪ್ಪಕಂ.

೧೩೬. ‘‘‘ನಿಬ್ಬತ್ತಿಸ್ಸತಿ ಯೋನಿಮ್ಹಿ, ಬ್ರಾಹ್ಮಣೇ ಸೋ ಭವಿಸ್ಸತಿ;

ವಙ್ಗನ್ತಸ್ಸ ಸುತೋ ಧೀಮಾ, ಸಾರಿಯಾ ಓರಸೋ ಪಿಯೋ.

೧೩೭. ‘‘‘ಸೋ ಚ ಪಚ್ಛಾ ಪಬ್ಬಜಿತ್ವಾ, ಅಙ್ಗೀರಸಸ್ಸ ಸಾಸನೇ;

ಚೂಳಚುನ್ದೋತಿ [ಚೂಲಚುನ್ದೋತಿ (ಸೀ.)] ನಾಮೇನ, ಹೇಸ್ಸತಿ ಸತ್ಥು ಸಾವಕೋ.

೧೩೮. ‘‘‘ಸಾಮಣೇರೋವ ಸೋ ಸನ್ತೋ, ಖೀಣಾಸವೋ ಭವಿಸ್ಸತಿ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.

೧೩೯. ‘‘ಉಪಟ್ಠಹಿಂ ಮಹಾವೀರಂ, ಅಞ್ಞೇ ಚ ಪೇಸಲೇ ಬಹೂ;

ಭಾತರಂ ಮೇ ಚುಪಟ್ಠಾಸಿಂ, ಉತ್ತಮತ್ಥಸ್ಸ ಪತ್ತಿಯಾ.

೧೪೦. ‘‘ಭಾತರಂ ಮೇ ಉಪಟ್ಠಿತ್ವಾ, ಧಾತುಂ ಪತ್ತಮ್ಹಿ ಓಹಿಯ [ಓಪಿಯ (ಸೀ.), ಓಚಿಯ (ಸ್ಯಾ.)];

ಸಮ್ಬುದ್ಧಂ ಉಪನಾಮೇಸಿಂ, ಲೋಕಜೇಟ್ಠಂ ನರಾಸಭಂ.

೧೪೧. ‘‘ಉಭೋ ಹತ್ಥೇಹಿ ಪಗ್ಗಯ್ಹ, ಬುದ್ಧೋ ಲೋಕೇ ಸದೇವಕೇ;

ಸನ್ದಸ್ಸಯನ್ತೋ ತಂ ಧಾತುಂ, ಕಿತ್ತಯಿ ಅಗ್ಗಸಾವಕಂ.

೧೪೨. ‘‘ಚಿತ್ತಞ್ಚ ಸುವಿಮುತ್ತಂ ಮೇ, ಸದ್ಧಾ ಮಯ್ಹಂ ಪತಿಟ್ಠಿತಾ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೧೪೩. ‘‘ಪಟಿಸಮ್ಭಿದಾನುಪ್ಪತ್ತಾ, ವಿಮೋಕ್ಖಾಪಿ ಚ ಫಸ್ಸಿತಾ [ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ (ಸ್ಯಾ.)];

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಚುನ್ದೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಚುನ್ದತ್ಥೇರಸ್ಸಾಪದಾನಂ ದಸಮಂ.

ಉಪಾಲಿವಗ್ಗೋ ಪಞ್ಚಮೋ.