೯. ಸೋವಣ್ಣಕಿಙ್ಕಣಿಯತ್ಥೇರಅಪದಾನಂ

೧೪೦. ‘‘ಸದ್ಧಾಯ ಅಭಿನಿಕ್ಖಮ್ಮ, ಪಬ್ಬಜಿಂ ಅನಗಾರಿಯಂ;

ವಾಕಚೀರಧರೋ ಆಸಿಂ, ತಪೋಕಮ್ಮಮಪಸ್ಸಿತೋ.

೧೪೧. ‘‘ಅತ್ಥದಸ್ಸೀ ತು ಭಗವಾ, ಲೋಕಜೇಟ್ಠೋ ನರಾಸಭೋ;

ಉಪ್ಪಜ್ಜಿ ತಮ್ಹಿ ಸಮಯೇ, ತಾರಯನ್ತೋ ಮಹಾಜನಂ.

೧೪೨. ‘‘ಬಲಞ್ಚ ವತ ಮೇ ಖೀಣಂ, ಬ್ಯಾಧಿನಾ ಪರಮೇನ ತಂ;

ಬುದ್ಧಸೇಟ್ಠಂ ಸರಿತ್ವಾನ, ಪುಲಿನೇ ಥೂಪಮುತ್ತಮಂ.

೧೪೩. ‘‘ಕರಿತ್ವಾ ಹಟ್ಠಚಿತ್ತೋಹಂ, ಸಹತ್ಥೇನ [ಪಸಾದೇನ (ಕ.)] ಸಮೋಕಿರಿಂ;

ಸೋಣ್ಣಕಿಙ್ಕಣಿಪುಪ್ಫಾನಿ, ಉದಗ್ಗಮನಸೋ ಅಹಂ.

೧೪೪. ‘‘ಸಮ್ಮುಖಾ ವಿಯ ಸಮ್ಬುದ್ಧಂ, ಥೂಪಂ ಪರಿಚರಿಂ ಅಹಂ;

ತೇನ ಚೇತೋಪಸಾದೇನ, ಅತ್ಥದಸ್ಸಿಸ್ಸ ತಾದಿನೋ.

೧೪೫. ‘‘ದೇವಲೋಕಂ ಗತೋ ಸನ್ತೋ, ಲಭಾಮಿ ವಿಪುಲಂ ಸುಖಂ;

ಸುವಣ್ಣವಣ್ಣೋ ತತ್ಥಾಸಿಂ, ಬುದ್ಧಪೂಜಾಯಿದಂ ಫಲಂ.

೧೪೬. ‘‘ಅಸೀತಿಕೋಟಿಯೋ ಮಯ್ಹಂ, ನಾರಿಯೋ ಸಮಲಙ್ಕತಾ;

ಸದಾ ಮಯ್ಹಂ ಉಪಟ್ಠನ್ತಿ, ಬುದ್ಧಪೂಜಾಯಿದಂ ಫಲಂ.

೧೪೭. ‘‘ಸಟ್ಠಿತುರಿಯಸಹಸ್ಸಾನಿ [ಸಟ್ಠಿತೂರಿಯ… (ಕ.)], ಭೇರಿಯೋ ಪಣವಾನಿ ಚ;

ಸಙ್ಖಾ ಚ ಡಿಣ್ಡಿಮಾ ತತ್ಥ, ವಗ್ಗೂ ವಜ್ಜನ್ತಿ [ನದನ್ತಿ (ಸೀ.), ವದನ್ತಿ (ಪೀ.)] ದುನ್ದುಭೀ.

೧೪೮. ‘‘ಚುಲ್ಲಾಸೀತಿಸಹಸ್ಸಾನಿ, ಹತ್ಥಿನೋ ಸಮಲಙ್ಕತಾ;

ತಿಧಾಪಭಿನ್ನಮಾತಙ್ಗಾ, ಕುಞ್ಜರಾ ಸಟ್ಠಿಹಾಯನಾ.

೧೪೯. ‘‘ಹೇಮಜಾಲಾಭಿಸಞ್ಛನ್ನಾ, ಉಪಟ್ಠಾನಂ ಕರೋನ್ತಿ ಮೇ;

ಬಲಕಾಯೇ ಗಜೇ ಚೇವ, ಊನತಾ ಮೇ ನ ವಿಜ್ಜತಿ.

೧೫೦. ‘‘ಸೋಣ್ಣಕಿಙ್ಕಣಿಪುಪ್ಫಾನಂ, ವಿಪಾಕಂ ಅನುಭೋಮಹಂ;

ಅಟ್ಠಪಞ್ಞಾಸಕ್ಖತ್ತುಞ್ಚ, ದೇವರಜ್ಜಮಕಾರಯಿಂ.

೧೫೧. ‘‘ಏಕಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;

ಪಥಬ್ಯಾ ರಜ್ಜಂ ಏಕಸತಂ, ಮಹಿಯಾ ಕಾರಯಿಂ ಅಹಂ.

೧೫೨. ‘‘ಸೋ ದಾನಿ ಅಮತಂ ಪತ್ತೋ, ಅಸಙ್ಖತಂ ಸುದುದ್ದಸಂ [ಗಮ್ಭೀರಂ ದುದ್ದಸಂ ಪದಂ (ಸ್ಯಾ.)];

ಸಂಯೋಜನಪರಿಕ್ಖೀಣೋ, ನತ್ಥಿ ದಾನಿ ಪುನಬ್ಭವೋ.

೧೫೩. ‘‘ಅಟ್ಠಾರಸೇ ಕಪ್ಪಸತೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೫೪. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೫೫. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೫೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸೋವಣ್ಣಕಿಙ್ಕಣಿಯೋ ಥೇರೋ ಇಮಾ

ಗಾಥಾಯೋ ಅಭಾಸಿತ್ಥಾತಿ.

ಸೋವಣ್ಣಕಿಙ್ಕಣಿಯತ್ಥೇರಸ್ಸಾಪದಾನಂ ನವಮಂ.