೧೦. ಸೋಣ್ಣಕೋನ್ತರಿಕತ್ಥೇರಅಪದಾನಂ

೧೫೭. ‘‘ಮನೋಭಾವನಿಯಂ ಬುದ್ಧಂ, ಅತ್ತದನ್ತಂ ಸಮಾಹಿತಂ;

ಇರಿಯಮಾನಂ ಬ್ರಹ್ಮಪಥೇ, ಚಿತ್ತವೂಪಸಮೇ ರತಂ.

೧೫೮. ‘‘ನಿತ್ತಿಣ್ಣಓಘಂ ಸಮ್ಬುದ್ಧಂ, ಝಾಯಿಂ ಝಾನರತಂ ಮುನಿಂ;

ಉಪತಿತ್ಥಂ ಸಮಾಪನ್ನಂ, ಇನ್ದಿವರದಲಪ್ಪಭಂ.

೧೫೯. ‘‘ಅಲಾಬುನೋದಕಂ ಗಯ್ಹ, ಬುದ್ಧಸೇಟ್ಠಂ ಉಪಾಗಮಿಂ;

ಬುದ್ಧಸ್ಸ ಪಾದೇ ಧೋವಿತ್ವಾ, ಅಲಾಬುಕಮದಾಸಹಂ.

೧೬೦. ‘‘ಆಣಾಪೇಸಿ ಚ ಸಮ್ಬುದ್ಧೋ, ಪದುಮುತ್ತರನಾಮಕೋ;

‘ಇಮಿನಾ ದಕಮಾಹತ್ವಾ, ಪಾದಮೂಲೇ ಠಪೇಹಿ ಮೇ’.

೧೬೧. ‘‘ಸಾಧೂತಿಹಂ ಪಟಿಸ್ಸುತ್ವಾ, ಸತ್ಥುಗಾರವತಾಯ ಚ;

ದಕಂ ಅಲಾಬುನಾಹತ್ವಾ, ಬುದ್ಧಸೇಟ್ಠಂ ಉಪಾಗಮಿಂ.

೧೬೨. ‘‘ಅನುಮೋದಿ ಮಹಾವೀರೋ, ಚಿತ್ತಂ ನಿಬ್ಬಾಪಯಂ ಮಮ;

‘ಇಮಿನಾಲಾಬುದಾನೇನ, ಸಙ್ಕಪ್ಪೋ ತೇ ಸಮಿಜ್ಝತು’.

೧೬೩. ‘‘ಪನ್ನರಸೇಸು ಕಪ್ಪೇಸು, ದೇವಲೋಕೇ ರಮಿಂ ಅಹಂ;

ತಿಂಸತಿಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಅಹೋಸಹಂ.

೧೬೪. ‘‘ದಿವಾ ವಾ ಯದಿ ವಾ ರತ್ತಿಂ, ಚಙ್ಕಮನ್ತಸ್ಸ ತಿಟ್ಠತೋ;

ಸೋವಣ್ಣಂ ಕೋನ್ತರಂ ಗಯ್ಹ, ತಿಟ್ಠತೇ ಪುರತೋ ಮಮ.

೧೬೫. ‘‘ಬುದ್ಧಸ್ಸ ದತ್ವಾನಲಾಬುಂ, ಲಭಾಮಿ ಸೋಣ್ಣಕೋನ್ತರಂ;

ಅಪ್ಪಕಮ್ಪಿ ಕತಂ ಕಾರಂ, ವಿಪುಲಂ ಹೋತಿ ತಾದಿಸು.

೧೬೬. ‘‘ಸತಸಹಸ್ಸಿತೋ ಕಪ್ಪೇ, ಯಂಲಾಬುಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಅಲಾಬುಸ್ಸ ಇದಂ ಫಲಂ.

೧೬೭. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೬೮. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೬೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸೋಣ್ಣಕೋನ್ತರಿಕೋ ಥೇರೋ ಇಮಾ

ಗಾಥಾಯೋ ಅಭಾಸಿತ್ಥಾತಿ.

ಸೋಣ್ಣಕೋನ್ತರಿಕತ್ಥೇರಸ್ಸಾಪದಾನಂ ದಸಮಂ.

ಸಕಿಂಸಮ್ಮಜ್ಜಕವಗ್ಗೋ ತೇಚತ್ತಾಲೀಸಮೋ.