೪೩. ಸಕಿಂಸಮ್ಮಜ್ಜಕವಗ್ಗೋ

೧. ಸಕಿಂಸಮ್ಮಜ್ಜಕತ್ಥೇರಅಪದಾನಂ

೧. ‘‘ವಿಪಸ್ಸಿನೋ ಭಗವತೋ, ಪಾಟಲಿಂ ಬೋಧಿಮುತ್ತಮಂ;

ದಿಸ್ವಾವ ತಂ ಪಾದಪಗ್ಗಂ, ತತ್ಥ ಚಿತ್ತಂ ಪಸಾದಯಿಂ.

೨. ‘‘ಸಮ್ಮಜ್ಜನಿಂ ಗಹೇತ್ವಾನ, ಬೋಧಿಂ ಸಮ್ಮಜ್ಜಿ ತಾವದೇ;

ಸಮ್ಮಜ್ಜಿತ್ವಾನ ತಂ ಬೋಧಿಂ, ಅವನ್ದಿಂ ಪಾಟಲಿಂ ಅಹಂ.

೩. ‘‘ತತ್ಥ ಚಿತ್ತಂ ಪಸಾದೇತ್ವಾ, ಸಿರೇ ಕತ್ವಾನ ಅಞ್ಜಲಿಂ;

ನಮಸ್ಸಮಾನೋ ತಂ ಬೋಧಿಂ, ಗಞ್ಛಿಂ ಪಟಿಕುಟಿಂ ಅಹಂ.

೪. ‘‘ತಾದಿಮಗ್ಗೇನ ಗಚ್ಛಾಮಿ, ಸರನ್ತೋ ಬೋಧಿಮುತ್ತಮಂ;

ಅಜಗರೋ ಮಂ ಪೀಳೇಸಿ, ಘೋರರೂಪೋ ಮಹಬ್ಬಲೋ.

೫. ‘‘ಆಸನ್ನೇ ಮೇ ಕತಂ ಕಮ್ಮಂ, ಫಲೇನ ತೋಸಯೀ ಮಮಂ;

ಕಳೇವರಂ ಮೇ ಗಿಲತಿ, ದೇವಲೋಕೇ ರಮಾಮಹಂ.

೬. ‘‘ಅನಾವಿಲಂ ಮಮ ಚಿತ್ತಂ, ವಿಸುದ್ಧಂ ಪಣ್ಡರಂ ಸದಾ;

ಸೋಕಸಲ್ಲಂ ನ ಜಾನಾಮಿ, ಚಿತ್ತಸನ್ತಾಪನಂ ಮಮ.

೭. ‘‘ಕುಟ್ಠಂ ಗಣ್ಡೋ ಕಿಲಾಸೋ ಚ, ಅಪಮಾರೋ ವಿತಚ್ಛಿಕಾ;

ದದ್ದು ಕಣ್ಡು ಚ ಮೇ ನತ್ಥಿ, ಫಲಂ ಸಮ್ಮಜ್ಜನಾಯಿದಂ [ಸಮ್ಮಜ್ಜನೇ ಇದಂ (ಸೀ.)].

೮. ‘‘ಸೋಕೋ ಚ ಪರಿದೇವೋ ಚ, ಹದಯೇ ಮೇ ನ ವಿಜ್ಜತಿ;

ಅಭನ್ತಂ ಉಜುಕಂ ಚಿತ್ತಂ, ಫಲಂ ಸಮ್ಮಜ್ಜನಾಯಿದಂ.

೯. ‘‘ಸಮಾಧೀಸು ನ ಮಜ್ಜಾಮಿ [ಸಮಾಧೀಸು ನ ಸಜ್ಜಾಮಿ (ಸೀ.), ಸಮಾಧಿಂ ಪುನ ಪಜ್ಜಾಮಿ (ಸ್ಯಾ)], ವಿಸದಂ ಹೋತಿ ಮಾನಸಂ;

ಯಂ ಯಂ ಸಮಾಧಿಮಿಚ್ಛಾಮಿ, ಸೋ ಸೋ ಸಮ್ಪಜ್ಜತೇ ಮಮಂ.

೧೦. ‘‘ರಜನೀಯೇ ನ ರಜ್ಜಾಮಿ, ಅಥೋ ದುಸ್ಸನಿಯೇಸು [ದೋಸನಿಯೇಸು (ಸೀ. ಸ್ಯಾ. ಕ.)] ಚ;

ಮೋಹನೀಯೇ ನ ಮುಯ್ಹಾಮಿ, ಫಲಂ ಸಮ್ಮಜ್ಜನಾಯಿದಂ.

೧೧. ‘‘ಏಕನವುತಿತೋ [ಏಕನವುತೇ ಇತೋ (ಸೀ. ಸ್ಯಾ.)] ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಫಲಂ ಸಮ್ಮಜ್ಜನಾಯಿದಂ.

೧೨. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೧೩. ‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೧೪. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಕಿಂಸಮ್ಮಜ್ಜಕೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಸಕಿಂಸಮ್ಮಜ್ಜಕತ್ಥೇರಸ್ಸಾಪದಾನಂ ಪಠಮಂ.

೨. ಏಕದುಸ್ಸದಾಯಕತ್ಥೇರಅಪದಾನಂ

೧೫. ‘‘ನಗರೇ ಹಂಸವತಿಯಾ, ಅಹೋಸಿಂ ತಿಣಹಾರಕೋ;

ತಿಣಹಾರೇನ ಜೀವಾಮಿ, ತೇನ ಪೋಸೇಮಿ ದಾರಕೇ.

೧೬. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ತಮನ್ಧಕಾರಂ ನಾಸೇತ್ವಾ, ಉಪ್ಪಜ್ಜಿ ಲೋಕನಾಯಕೋ.

೧೭. ‘‘ಸಕೇ ಘರೇ ನಿಸೀದಿತ್ವಾ, ಏವಂ ಚಿನ್ತೇಸಿ ತಾವದೇ;

‘ಬುದ್ಧೋ ಲೋಕೇ ಸಮುಪ್ಪನ್ನೋ, ದೇಯ್ಯಧಮ್ಮೋ ನ ವಿಜ್ಜತಿ.

೧೮. ‘‘‘ಇದಂ ಮೇ ಸಾಟಕಂ ಏಕಂ, ನತ್ಥಿ ಮೇ ಕೋಚಿ ದಾಯಕೋ;

ದುಕ್ಖೋ ನಿರಯಸಮ್ಫಸ್ಸೋ, ರೋಪಯಿಸ್ಸಾಮಿ ದಕ್ಖಿಣಂ’.

೧೯. ‘‘ಏವಾಹಂ ಚಿನ್ತಯಿತ್ವಾನ, ಸಕಂ ಚಿತ್ತಂ ಪಸಾದಯಿಂ;

ಏಕಂ ದುಸ್ಸಂ ಗಹೇತ್ವಾನ, ಬುದ್ಧಸೇಟ್ಠಸ್ಸದಾಸಹಂ.

೨೦. ‘‘ಏಕಂ ದುಸ್ಸಂ ದದಿತ್ವಾನ, ಉಕ್ಕುಟ್ಠಿಂ ಸಮ್ಪವತ್ತಯಿಂ;

‘ಯದಿ ಬುದ್ಧೋ ತುವಂ ವೀರ, ತಾರೇಹಿ ಮಂ ಮಹಾಮುನಿ’.

೨೧. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಮಮ ದಾನಂ ಪಕಿತ್ತೇನ್ತೋ, ಅಕಾ ಮೇ ಅನುಮೋದನಂ.

೨೨. ‘‘‘ಇಮಿನಾ ಏಕದುಸ್ಸೇನ, ಚೇತನಾಪಣಿಧೀಹಿ ಚ;

ಕಪ್ಪಸತಸಹಸ್ಸಾನಿ, ವಿನಿಪಾತಂ ನ ಗಚ್ಛಸಿ.

೨೩. ‘‘‘ಛತ್ತಿಂಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸಸಿ;

ತೇತ್ತಿಂಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ [ಚಕ್ಕವತ್ತಿ (ಸ್ಯಾ.)] ಭವಿಸ್ಸಸಿ.

೨೪. ‘‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ [ಅಸಙ್ಕಯಂ (ಸ್ಯಾ. ಕ.) ಏವಮುಪರಿಪಿ];

ದೇವಲೋಕೇ ಮನುಸ್ಸೇ ವಾ, ಸಂಸರನ್ತೋ ತುವಂ ಭವೇ.

೨೫. ‘‘‘ರೂಪವಾ ಗುಣಸಮ್ಪನ್ನೋ, ಅನವಕ್ಕನ್ತದೇಹವಾ [ಅನುವತ್ತನ್ತ… (ಸ್ಯಾ)];

ಅಕ್ಖೋಭಂ ಅಮಿತಂ ದುಸ್ಸಂ, ಲಭಿಸ್ಸಸಿ ಯದಿಚ್ಛಕಂ’.

೨೬. ‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;

ನಭಂ ಅಬ್ಭುಗ್ಗಮೀ ವೀರೋ [ಧೀರೋ (ಸೀ. ಸ್ಯಾ.)], ಹಂಸರಾಜಾವ ಅಮ್ಬರೇ.

೨೭. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;

ಭೋಗೇ ಮೇ ಊನತಾ ನತ್ಥಿ, ಏಕದುಸ್ಸಸ್ಸಿದಂ ಫಲಂ.

೨೮. ‘‘ಪದುದ್ಧಾರೇ ಪದುದ್ಧಾರೇ, ದುಸ್ಸಂ ನಿಬ್ಬತ್ತತೇ ಮಮಂ;

ಹೇಟ್ಠಾ ದುಸ್ಸಮ್ಹಿ ತಿಟ್ಠಾಮಿ, ಉಪರಿಚ್ಛದನಂ ಮಮ.

೨೯. ‘‘ಚಕ್ಕವಾಳಂ ಉಪಾದಾಯ, ಸಕಾನನಂ ಸಪಬ್ಬತಂ;

ಇಚ್ಛಮಾನೋ ಚಹಂ ಅಜ್ಜ, ದುಸ್ಸೇಹಚ್ಛಾದಯೇಯ್ಯ ತಂ.

೩೦. ‘‘ತೇನೇವ ಏಕದುಸ್ಸೇನ, ಸಂಸರನ್ತೋ ಭವಾಭವೇ;

ಸುವಣ್ಣವಣ್ಣೋ ಹುತ್ವಾನ, ಸಂಸರಾಮಿ ಭವಾಭವೇ.

೩೧. ‘‘ವಿಪಾಕಂ ವಿಏಕದುಸ್ಸಸ್ಸ, ನಾಜ್ಝಗಂ ಕತ್ಥಚಿಕ್ಖಯಂ;

ಅಯಂ ಮೇ ಅನ್ತಿಮಾ ಜಾತಿ, ವಿಪಚ್ಚತಿ ಇಧಾಪಿ ಮೇ.

೩೨. ‘‘ಸತಸಹಸ್ಸಿತೋ ಕಪ್ಪೇ, ಯಂ ದುಸ್ಸಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಏಕದುಸ್ಸಸ್ಸಿದಂ ಫಲಂ.

೩೩. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೩೪. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೩೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕದುಸ್ಸದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಏಕದುಸ್ಸದಾಯಕತ್ಥೇರಸ್ಸಾಪದಾನಂ ದುತಿಯಂ.

೩. ಏಕಾಸನದಾಯಕತ್ಥೇರಅಪದಾನಂ

೩೬. ‘‘ಹಿಮವನ್ತಸ್ಸಾವಿದೂರೇ, ಗೋಸಿತೋ ನಾಮ ಪಬ್ಬತೋ;

ಅಸ್ಸಮೋ ಸುಕತೋ ಮಯ್ಹಂ, ಪಣ್ಣಸಾಲಾ ಸುಮಾಪಿತಾ.

೩೭. ‘‘ನಾರದೋ ನಾಮ ನಾಮೇನ, ಕಸ್ಸಪೋ ಇತಿ ಮಂ ವಿದೂ;

ಸುದ್ಧಿಮಗ್ಗಂ ಗವೇಸನ್ತೋ, ವಸಾಮಿ ಗೋಸಿತೇ ತದಾ.

೩೮. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ವಿವೇಕಕಾಮೋ ಸಮ್ಬುದ್ಧೋ, ಅಗಞ್ಛಿ ಅನಿಲಞ್ಜಸಾ.

೩೯. ‘‘ವನಗ್ಗೇ ಗಚ್ಛಮಾನಸ್ಸ, ದಿಸ್ವಾ ರಂಸಿಂ ಮಹೇಸಿನೋ;

ಕಟ್ಠಮಞ್ಚಂ ಪಞ್ಞಾಪೇತ್ವಾ, ಅಜಿನಞ್ಚ ಅಪತ್ಥರಿಂ.

೪೦. ‘‘ಆಸನಂ ಪಞ್ಞಾಪೇತ್ವಾನ, ಸಿರೇ ಕತ್ವಾನ ಅಞ್ಜಲಿಂ;

ಸೋಮನಸ್ಸಂ ಪವೇದಿತ್ವಾ, ಇದಂ ವಚನಮಬ್ರವಿಂ.

೪೧. ‘‘‘ಸಲ್ಲಕತ್ತೋ ಮಹಾವೀರ, ಆತುರಾನಂ ತಿಕಿಚ್ಛಕೋ;

ಮಮಂ ರೋಗಪರೇತಸ್ಸ [ರಾಗ… (ಸ್ಯಾ.)], ತಿಕಿಚ್ಛಂ ದೇಹಿ ನಾಯಕ.

೪೨. ‘‘‘ಕಲ್ಲತ್ಥಿಕಾ ಯೇ ಪಸ್ಸನ್ತಿ, ಬುದ್ಧಸೇಟ್ಠ ತುವಂ ಮುನೇ;

ಧುವತ್ಥಸಿದ್ಧಿಂ ಪಪ್ಪೋನ್ತಿ, ಏತೇಸಂ ಅಜರೋ [ಜಜ್ಜರೋ (ಸೀ. ಪೀ. ಕ.)] ಭವೇ.

೪೩. ‘‘‘ನ ಮೇ ದೇಯ್ಯಧಮ್ಮೋ ಅತ್ಥಿ, ಪವತ್ತಫಲಭೋಜಿಹಂ;

ಇದಂ ಮೇ ಆಸನಂ ಅತ್ಥಿ [ನ ಮೇ ದೇಯ್ಯಂ ತವ ಅತ್ಥಿ (ಸೀ. ಸ್ಯಾ.)], ನಿಸೀದ ಕಟ್ಠಮಞ್ಚಕೇ’.

೪೪. ‘‘ನಿಸೀದಿ ತತ್ಥ ಭಗವಾ, ಅಸಮ್ಭೀತೋವ [ಅಚ್ಛಮ್ಭಿತೋವ (ಸ್ಯಾ. ಕ.)] ಕೇಸರೀ;

ಮುಹುತ್ತಂ ವೀತಿನಾಮೇತ್ವಾ, ಇದಂ ವಚನಮಬ್ರವಿ.

೪೫. ‘‘‘ವಿಸಟ್ಠೋ [ವಿಸ್ಸತ್ಥೋ (ಸೀ. ಪೀ), ವಿಸ್ಸಟ್ಠೋ (ಸ್ಯಾ. ಕ.)] ಹೋಹಿ ಮಾ ಭಾಯಿ, ಲದ್ಧೋ ಜೋತಿರಸೋ ತಯಾ;

ಯಂ ತುಯ್ಹಂ ಪತ್ಥಿತಂ ಸಬ್ಬಂ, ಪರಿಪೂರಿಸ್ಸತಿನಾಗತೇ [ಪರಿಪೂರಿಸ್ಸತಾಸನಂ (ಸ್ಯಾ. ಕ.)].

೪೬. ‘‘‘ನ ಮೋಘಂ ತಂ ಕತಂ ತುಯ್ಹಂ, ಪುಞ್ಞಕ್ಖೇತ್ತೇ ಅನುತ್ತರೇ;

ಸಕ್ಕಾ ಉದ್ಧರಿತುಂ ಅತ್ತಾ, ಯಸ್ಸ ಚಿತ್ತಂ ಪಣೀಹಿತಂ [ಸುನೀಹಿತಂ (ಸ್ಯಾ.)].

೪೭. ‘‘‘ಇಮಿನಾಸನದಾನೇನ, ಚೇತನಾಪಣಿಧೀಹಿ ಚ;

ಕಪ್ಪಸತಸಹಸ್ಸಾನಿ, ವಿನಿಪಾತಂ ನ ಗಚ್ಛಸಿ.

೪೮. ‘‘‘ಪಞ್ಞಾಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸಸಿ;

ಅಸೀತಿಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸಸಿ.

೪೯. ‘‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;

ಸಬ್ಬತ್ಥ ಸುಖಿತೋ ಹುತ್ವಾ, ಸಂಸಾರೇ ಸಂಸರಿಸ್ಸಸಿ’.

೫೦. ‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;

ನಭಂ ಅಬ್ಭುಗ್ಗಮೀ ವೀರೋ, ಹಂಸರಾಜಾವ ಅಮ್ಬರೇ.

೫೧. ‘‘ಹತ್ಥಿಯಾನಂ ಅಸ್ಸಯಾನಂ, ಸರಥಂ ಸನ್ದಮಾನಿಕಂ;

ಲಭಾಮಿ ಸಬ್ಬಮೇವೇತಂ, ಏಕಾಸನಸ್ಸಿದಂ ಫಲಂ.

೫೨. ‘‘ಕಾನನಂ ಪವಿಸಿತ್ವಾಪಿ, ಯದಾ ಇಚ್ಛಾಮಿ ಆಸನಂ;

ಮಮ ಸಙ್ಕಪ್ಪಮಞ್ಞಾಯ, ಪಲ್ಲಙ್ಕೋ ಉಪತಿಟ್ಠತಿ.

೫೩. ‘‘ವಾರಿಮಜ್ಝಗತೋ ಸನ್ತೋ, ಯದಾ ಇಚ್ಛಾಮಿ ಆಸನಂ;

ಮಮ ಸಙ್ಕಪ್ಪಮಞ್ಞಾಯ, ಪಲ್ಲಙ್ಕೋ ಉಪತಿಟ್ಠತಿ.

೫೪. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;

ಪಲ್ಲಙ್ಕಸತಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ.

೫೫. ‘‘ದುವೇ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ;

ದುವೇ ಕುಲೇ ಪಜಾಯಾಮಿ, ಖತ್ತಿಯೇ ಅಥ ಬ್ರಾಹ್ಮಣೇ.

೫೬. ‘‘ಏಕಾಸನಂ ದದಿತ್ವಾನ, ಪುಞ್ಞಕ್ಖೇತ್ತೇ ಅನುತ್ತರೇ;

ಧಮ್ಮಪಲ್ಲಙ್ಕಮಾದಾಯ [ಧಮ್ಮಪಲ್ಲಙ್ಕಮಞ್ಞಾಯ (ಸ್ಯಾ. ಕ.)], ವಿಹರಾಮಿ ಅನಾಸವೋ.

೫೭. ‘‘ಸತಸಹಸ್ಸಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಏಕಾಸನಸ್ಸಿದಂ ಫಲಂ.

೫೮. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೫೯. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೬೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಾಸನದಾಯಕೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಏಕಾಸನದಾಯಕತ್ಥೇರಸ್ಸಾಪದಾನಂ ತತಿಯಂ.

೪. ಸತ್ತಕದಮ್ಬಪುಪ್ಫಿಯತ್ಥೇರಅಪದಾನಂ

೬೧. ‘‘ಹಿಮವನ್ತಸ್ಸಾವಿದೂರೇ, ಕುಕ್ಕುಟೋ [ಕದಮ್ಬೋ (ಸೀ. ಸ್ಯಾ. ಪೀ.)] ನಾಮ ಪಬ್ಬತೋ;

ತಮ್ಹಿ ಪಬ್ಬತಪಾದಮ್ಹಿ, ಸತ್ತ ಬುದ್ಧಾ ವಸಿಂಸು ತೇ.

೬೨. ‘‘ಕದಮ್ಬಂ ಪುಪ್ಫಿತಂ ದಿಸ್ವಾ, ಪಗ್ಗಹೇತ್ವಾನ ಅಞ್ಜಲಿಂ;

ಸತ್ತ ಮಾಲಾ ಗಹೇತ್ವಾನ, ಪುಞ್ಞಚಿತ್ತೇನ [ಪುಣ್ಣಚಿತ್ತೇನ (ಕ.)] ಓಕಿರಿಂ.

೬೩. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೬೪. ‘‘ಚತುನ್ನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೬೫. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೬೬. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೬೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸತ್ತಕದಮ್ಬಪುಪ್ಫಿಯೋ ಥೇರೋ ಇಮಾ

ಗಾಥಾಯೋ ಅಭಾಸಿತ್ಥಾತಿ.

ಸತ್ತಕದಮ್ಬಪುಪ್ಫಿಯತ್ಥೇರಸ್ಸಾಪದಾನಂ ಚತುತ್ಥಂ.

೫. ಕೋರಣ್ಡಪುಪ್ಫಿಯತ್ಥೇರಅಪದಾನಂ

೬೮. ‘‘ವನಕಮ್ಮಿಕೋ ಪುರೇ ಆಸಿಂ, ಪಿತುಮಾತುಮತೇನಹಂ [ಪಿತುಪಿತಾಮಹೇನಹಂ (ಸೀ. ಸ್ಯಾ. ಪೀ.)];

ಪಸುಮಾರೇನ ಜೀವಾಮಿ, ಕುಸಲಂ ಮೇ ನ ವಿಜ್ಜತಿ.

೬೯. ‘‘ಮಮ ಆಸಯಸಾಮನ್ತಾ, ತಿಸ್ಸೋ ಲೋಕಗ್ಗನಾಯಕೋ;

ಪದಾನಿ ತೀಣಿ ದಸ್ಸೇಸಿ, ಅನುಕಮ್ಪಾಯ ಚಕ್ಖುಮಾ.

೭೦. ‘‘ಅಕ್ಕನ್ತೇ ಚ ಪದೇ ದಿಸ್ವಾ, ತಿಸ್ಸನಾಮಸ್ಸ ಸತ್ಥುನೋ;

ಹಟ್ಠೋ ಹಟ್ಠೇನ ಚಿತ್ತೇನ, ಪದೇ ಚಿತ್ತಂ ಪಸಾದಯಿಂ.

೭೧. ‘‘ಕೋರಣ್ಡಂ ಪುಪ್ಫಿತಂ ದಿಸ್ವಾ, ಪಾದಪಂ ಧರಣೀರುಹಂ;

ಸಕೋಸಕಂ ಗಹೇತ್ವಾನ, ಪದಸೇಟ್ಠಮಪೂಜಯಿಂ.