೮. ಸುಚಿನ್ತಿತತ್ಥೇರಅಪದಾನಂ

೧೦೭. ‘‘ನಗರೇ ಹಂಸವತಿಯಾ, ಅಹೋಸಿಂ ಕಸ್ಸಕೋ ತದಾ;

ಕಸಿಕಮ್ಮೇನ ಜೀವಾಮಿ, ತೇನ ಪೋಸೇಮಿ ದಾರಕೇ.

೧೦೮. ‘‘ಸುಸಮ್ಪನ್ನಂ ತದಾ ಖೇತ್ತಂ, ಧಞ್ಞಂ ಮೇ ಫಲಿನಂ [ಫಲಿತಂ (ಸೀ. ಪೀ.)] ಅಹು;

ಪಾಕಕಾಲೇ ಚ ಸಮ್ಪತ್ತೇ, ಏವಂ ಚಿನ್ತೇಸಹಂ ತದಾ.

೧೦೯. ‘‘ನಚ್ಛನ್ನಂ ನಪ್ಪತಿರೂಪಂ, ಜಾನನ್ತಸ್ಸ ಗುಣಾಗುಣಂ;

ಯೋಹಂ ಸಙ್ಘೇ ಅದತ್ವಾನ, ಅಗ್ಗಂ ಭುಞ್ಜೇಯ್ಯ ಚೇ ತದಾ [ಮತ್ತನಾ (ಸ್ಯಾ.)].

೧೧೦. ‘‘ಅಯಂ ಬುದ್ಧೋ ಅಸಮಸಮೋ, ದ್ವತ್ತಿಂಸವರಲಕ್ಖಣೋ;

ತತೋ ಪಭಾವಿತೋ ಸಙ್ಘೋ, ಪುಞ್ಞಕ್ಖೇತ್ತೋ ಅನುತ್ತರೋ.

೧೧೧. ‘‘ತತ್ಥ ದಸ್ಸಾಮಹಂ ದಾನಂ, ನವಸಸ್ಸಂ ಪುರೇ ಪುರೇ;

ಏವಾಹಂ ಚಿನ್ತಯಿತ್ವಾನ, ಹಟ್ಠೋ ಪೀಣಿತಮಾನಸೋ [ಪೀತಿಕ… (ಸ್ಯಾ.)].

೧೧೨. ‘‘ಖೇತ್ತತೋ ಧಞ್ಞಮಾಹತ್ವಾ, ಸಮ್ಬುದ್ಧಂ ಉಪಸಙ್ಕಮಿಂ;

ಉಪಸಙ್ಕಮ್ಮ ಸಮ್ಬುದ್ಧಂ, ಲೋಕಜೇಟ್ಠಂ ನರಾಸಭಂ;

ವನ್ದಿತ್ವಾ ಸತ್ಥುನೋ ಪಾದೇ, ಇದಂ ವಚನಮಬ್ರವಿಂ.

೧೧೩. ‘‘‘ನವಸಸ್ಸಞ್ಚ ಸಮ್ಪನ್ನಂ, ಆಯಾಗೋಸಿ [ಇಧ ಹೋಸಿ (ಸ್ಯಾ.)] ಚ ತ್ವಂ ಮುನೇ;

ಅನುಕಮ್ಪಮುಪಾದಾಯ, ಅಧಿವಾಸೇಹಿ ಚಕ್ಖುಮ’.

೧೧೪. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಮಮ ಸಙ್ಕಪ್ಪಮಞ್ಞಾಯ, ಇದಂ ವಚನಮಬ್ರವಿ.

೧೧೫. ‘‘‘ಚತ್ತಾರೋ ಚ ಪಟಿಪನ್ನಾ, ಚತ್ತಾರೋ ಚ ಫಲೇ ಠಿತಾ;

ಏಸ ಸಙ್ಘೋ ಉಜುಭೂತೋ, ಪಞ್ಞಾಸೀಲಸಮಾಹಿತೋ;

ಯಜನ್ತಾನಂ ಮನುಸ್ಸಾನಂ, ಪುಞ್ಞಪೇಕ್ಖಾನ ಪಾಣಿನಂ.

೧೧೬. ‘‘‘ಕರೋತೋಪಧಿಕಂ ಪುಞ್ಞಂ, ಸಙ್ಘೇ ದಿನ್ನಂ ಮಹಪ್ಫಲಂ;

ತಸ್ಮಿಂ ಸಙ್ಘೇವ [ಸಂಘೇ ಚ (ಸ್ಯಾ. ಪೀ.)] ದಾತಬ್ಬಂ, ತವ ಸಸ್ಸಂ ತಥೇತರಂ.

೧೧೭. ‘‘‘ಸಙ್ಘತೋ ಉದ್ದಿಸಿತ್ವಾನ, ಭಿಕ್ಖೂ ನೇತ್ವಾನ ಸಂಘರಂ;

ಪಟಿಯತ್ತಂ ಘರೇ ಸನ್ತಂ, ಭಿಕ್ಖುಸಙ್ಘಸ್ಸ ದೇಹಿ ತ್ವಂ’.

೧೧೮. ‘‘ಸಙ್ಘತೋ ಉದ್ದಿಸಿತ್ವಾನ, ಭಿಕ್ಖೂ ನೇತ್ವಾನ ಸಂಘರಂ;

ಯಂ ಘರೇ ಪಟಿಯತ್ತಂ ಮೇ, ಭಿಕ್ಖುಸಙ್ಘಸ್ಸದಾಸಹಂ.

೧೧೯. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೧೨೦. ‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಸೋವಣ್ಣಂ ಸಪ್ಪಭಸ್ಸರಂ;

ಸಟ್ಠಿಯೋಜನಮುಬ್ಬೇಧಂ, ತಿಂಸಯೋಜನವಿತ್ಥತಂ.

ಏಕೂನವೀಸತಿಮಂ ಭಾಣವಾರಂ.

೧೨೧. ‘‘ಆಕಿಣ್ಣಂ ಭವನಂ ಮಯ್ಹಂ, ನಾರೀಗಣಸಮಾಕುಲಂ;

ತತ್ಥ ಭುತ್ವಾ ಪಿವಿತ್ವಾ ಚ, ವಸಾಮಿ ತಿದಸೇ ಅಹಂ.

೧೨೨. ‘‘ಸತಾನಂ ತೀಣಿಕ್ಖತ್ತುಞ್ಚ, ದೇವರಜ್ಜಮಕಾರಯಿಂ;

ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೧೨೩. ‘‘ಭವಾಭವೇ ಸಂಸರನ್ತೋ, ಲಭಾಮಿ ಅಮಿತಂ ಧನಂ;

ಭೋಗೇ ಮೇ ಊನತಾ ನತ್ಥಿ, ನವಸಸ್ಸಸ್ಸಿದಂ ಫಲಂ.

೧೨೪. ‘‘ಹತ್ಥಿಯಾನಂ ಅಸ್ಸಯಾನಂ, ಸಿವಿಕಂ ಸನ್ದಮಾನಿಕಂ;

ಲಭಾಮಿ ಸಬ್ಬಮೇವೇತಂ [ಸಬ್ಬಮೇತಮ್ಪಿ (ಕ.)], ನವಸಸ್ಸಸ್ಸಿದಂ ಫಲಂ.

೧೨೫. ‘‘ನವವತ್ಥಂ ನವಫಲಂ, ನವಗ್ಗರಸಭೋಜನಂ;

ಲಭಾಮಿ ಸಬ್ಬಮೇವೇತಂ, ನವಸಸ್ಸಸ್ಸಿದಂ ಫಲಂ.

೧೨೬. ‘‘ಕೋಸೇಯ್ಯಕಮ್ಬಲಿಯಾನಿ, ಖೋಮಕಪ್ಪಾಸಿಕಾನಿ ಚ;

ಲಭಾಮಿ ಸಬ್ಬಮೇವೇತಂ, ನವಸಸ್ಸಸ್ಸಿದಂ ಫಲಂ.

೧೨೭. ‘‘ದಾಸೀಗಣಂ ದಾಸಗಣಂ, ನಾರಿಯೋ ಚ ಅಲಙ್ಕತಾ;

ಲಭಾಮಿ ಸಬ್ಬಮೇವೇತಂ, ನವಸಸ್ಸಸ್ಸಿದಂ ಫಲಂ.

೧೨೮. ‘‘ನ ಮಂ ಸೀತಂ ವಾ ಉಣ್ಹಂ ವಾ, ಪರಿಳಾಹೋ ನ ವಿಜ್ಜತಿ;

ಅಥೋ ಚೇತಸಿಕಂ ದುಕ್ಖಂ, ಹದಯೇ ಮೇ ನ ವಿಜ್ಜತಿ.

೧೨೯. ‘‘ಇದಂ ಖಾದ ಇದಂ ಭುಞ್ಜ, ಇಮಮ್ಹಿ ಸಯನೇ ಸಯ;

ಲಭಾಮಿ ಸಬ್ಬಮೇವೇತಂ, ನವಸಸ್ಸಸ್ಸಿದಂ ಫಲಂ.

೧೩೦. ‘‘ಅಯಂ ಪಚ್ಛಿಮಕೋ ದಾನಿ, ಚರಿಮೋ ವತ್ತತೇ ಭವೋ;

ಅಜ್ಜಾಪಿ ದೇಯ್ಯಧಮ್ಮೋ ಮೇ, ಫಲಂ ತೋಸೇಸಿ ಸಬ್ಬದಾ.

೧೩೧. ‘‘ನವಸಸ್ಸಂ ದದಿತ್ವಾನ, ಸಙ್ಘೇ ಗಣವರುತ್ತಮೇ;

ಅಟ್ಠಾನಿಸಂಸೇ ಅನುಭೋಮಿ, ಕಮ್ಮಾನುಚ್ಛವಿಕೇ ಮಮ.

೧೩೨. ‘‘ವಣ್ಣವಾ ಯಸವಾ ಹೋಮಿ, ಮಹಾಭೋಗೋ ಅನೀತಿಕೋ;

ಮಹಾಪಕ್ಖೋ [ಮಹಾಭಕ್ಖೋ (ಸ್ಯಾ. ಕ.)] ಸದಾ ಹೋಮಿ, ಅಭೇಜ್ಜಪರಿಸೋ ಸದಾ.

೧೩೩. ‘‘ಸಬ್ಬೇ ಮಂ ಅಪಚಾಯನ್ತಿ, ಯೇ ಕೇಚಿ ಪಥವಿಸ್ಸಿತಾ;

ದೇಯ್ಯಧಮ್ಮಾ ಚ ಯೇ ಕೇಚಿ, ಪುರೇ ಪುರೇ ಲಭಾಮಹಂ.

೧೩೪. ‘‘ಭಿಕ್ಖುಸಙ್ಘಸ್ಸ ವಾ ಮಜ್ಝೇ, ಬುದ್ಧಸೇಟ್ಠಸ್ಸ ಸಮ್ಮುಖಾ;

ಸಬ್ಬೇಪಿ ಸಮತಿಕ್ಕಮ್ಮ, ದೇನ್ತಿ ಮಮೇವ ದಾಯಕಾ.

೧೩೫. ‘‘ಪಠಮಂ ನವಸಸ್ಸಞ್ಹಿ, ದತ್ವಾ ಸಙ್ಘೇ ಗಣುತ್ತಮೇ;

ಇಮಾನಿಸಂಸೇ ಅನುಭೋಮಿ, ನವಸಸ್ಸಸ್ಸಿದಂ ಫಲಂ.

೧೩೬. ‘‘ಸತಸಹಸ್ಸಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ನವಸಸ್ಸಸ್ಸಿದಂ ಫಲಂ.

೧೩೭. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ;

೧೩೮. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೩೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸುಚಿನ್ತಿತೋ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಸುಚಿನ್ತಿತತ್ಥೇರಸ್ಸಾಪದಾನಂ ಅಟ್ಠಮಂ.