೭. ಏಕಧಮ್ಮಸ್ಸವನಿಯತ್ಥೇರಅಪದಾನಂ

೮೮. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಚತುಸಚ್ಚಂ ಪಕಾಸೇನ್ತೋ, ಸನ್ತಾರೇಸಿ ಬಹುಂ ಜನಂ.

೮೯. ‘‘ಅಹಂ ತೇನ ಸಮಯೇನ, ಜಟಿಲೋ ಉಗ್ಗತಾಪನೋ;

ಧುನನ್ತೋ ವಾಕಚೀರಾನಿ, ಗಚ್ಛಾಮಿ ಅಮ್ಬರೇ ತದಾ.

೯೦. ‘‘ಬುದ್ಧಸೇಟ್ಠಸ್ಸ ಉಪರಿ, ಗನ್ತುಂ ನ ವಿಸಹಾಮಹಂ;

ಪಕ್ಖೀವ ಸೇಲಮಾಸಜ್ಜ, ಗಮನಂ ನ ಲಭಾಮಹಂ.

೯೧. ‘‘ಉದಕೇ ವೋಕ್ಕಮಿತ್ವಾನ, ಏವಂ ಗಚ್ಛಾಮಿ ಅಮ್ಬರೇ;

ನ ಮೇ ಇದಂ ಭೂತಪುಬ್ಬಂ, ಇರಿಯಾಪಥವಿಕೋಪನಂ.

೯೨. ‘‘ಹನ್ದ ಮೇತಂ ಗವೇಸಿಸ್ಸಂ, ಅಪ್ಪೇವತ್ಥಂ ಲಭೇಯ್ಯಹಂ;

ಓರೋಹನ್ತೋ ಅನ್ತಲಿಕ್ಖಾ, ಸದ್ದಮಸ್ಸೋಸಿ ಸತ್ಥುನೋ.

೯೩. ‘‘ಸರೇನ ರಜನೀಯೇನ, ಸವನೀಯೇನ ವಗ್ಗುನಾ;

ಅನಿಚ್ಚತಂ ಕಥೇನ್ತಸ್ಸ, ತಞ್ಞೇವ ಉಗ್ಗಹಿಂ ತದಾ;

ಅನಿಚ್ಚಸಞ್ಞಮುಗ್ಗಯ್ಹ, ಅಗಮಾಸಿಂ ಮಮಸ್ಸಮಂ.

೯೪. ‘‘ಯಾವತಾಯುಂ ವಸಿತ್ವಾನ, ತತ್ಥ ಕಾಲಙ್ಕತೋ ಅಹಂ;

ಚರಿಮೇ ವತ್ತಮಾನಮ್ಹಿ, ಸದ್ಧಮ್ಮಸ್ಸವನಂ ಸರಿಂ.

೯೫. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೯೬. ‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಂ ಅಹಂ;

ಏಕಪಞ್ಞಾಸಕ್ಖತ್ತುಞ್ಚ, ದೇವರಜ್ಜಮಕಾರಯಿಂ.

೯೭. ‘‘ಏಕವೀಸತಿಕ್ಖತ್ತುಞ್ಚ [ಏಕತಿಂಸತಿ… (ಸ್ಯಾ.)], ಚಕ್ಕವತ್ತೀ ಅಹೋಸಹಂ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೯೮. ‘‘ಅನುಭೋಮಿ ಸಕಂ ಪುಞ್ಞಂ, ಸುಖಿತೋಹಂ ಭವಾಭವೇ;

ಅನುಸ್ಸರಾಮಿ ತಂ ಸಞ್ಞಂ, ಸಂಸರನ್ತೋ ಭವಾಭವೇ;

ನ ಕೋಟಿಂ ಪಟಿವಿಜ್ಝಾಮಿ, ನಿಬ್ಬಾನಂ ಅಚ್ಚುತಂ ಪದಂ.

೯೯. ‘‘ಪಿತುಗೇಹೇ ನಿಸೀದಿತ್ವಾ, ಸಮಣೋ ಭಾವಿತಿನ್ದ್ರಿಯೋ;

ಕಥಂಸ [ಕಥಯಂ (ಸೀ. ಪೀ. ಕ.)] ಪರಿದೀಪೇನ್ತೋ, ಅನಿಚ್ಚತಮುದಾಹರಿ.

೧೦೦. ‘‘‘ಅನಿಚ್ಚಾ ವತ ಸಙ್ಖಾರಾ, ಉಪ್ಪಾದವಯಧಮ್ಮಿನೋ;

ಉಪ್ಪಜ್ಜಿತ್ವಾ ನಿರುಜ್ಝನ್ತಿ, ತೇಸಂ ವೂಪಸಮೋ ಸುಖೋ’.

೧೦೧. ‘‘ಸಹ ಗಾಥಂ ಸುಣಿತ್ವಾನ, ಪುಬ್ಬಸಞ್ಞಮನುಸ್ಸರಿಂ;

ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.

೧೦೨. ‘‘ಜಾತಿಯಾ ಸತ್ತವಸ್ಸೇನ, ಅರಹತ್ತಮಪಾಪುಣಿಂ;

ಉಪಸಮ್ಪಾದಯೀ ಬುದ್ಧೋ, ಧಮ್ಮಸ್ಸವನಸ್ಸಿದಂ ಫಲಂ.

೧೦೩. ‘‘ಸತಸಹಸ್ಸಿತೋ ಕಪ್ಪೇ, ಯಂ ಧಮ್ಮಮಸುಣಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಧಮ್ಮಸ್ಸವನಸ್ಸಿದಂ ಫಲಂ.

೧೦೪. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೦೫. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೦೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಧಮ್ಮಸ್ಸವನಿಯೋ ಥೇರೋ ಇಮಾ

ಗಾಥಾಯೋ ಅಭಾಸಿತ್ಥಾತಿ.

ಏಕಧಮ್ಮಸ್ಸವನಿಯತ್ಥೇರಸ್ಸಾಪದಾನಂ ಸತ್ತಮಂ.