೯. ಜತುಕಣ್ಣಿತ್ಥೇರಅಪದಾನಂ

೨೭೬. ‘‘ನಗರೇ ಹಂಸವತಿಯಾ, ಸೇಟ್ಠಿಪುತ್ತೋ ಅಹೋಸಹಂ;

ಸಮಪ್ಪಿತೋ ಕಾಮಗುಣೇ, ಪರಿಚಾರೇಮಹಂ ತದಾ.

೨೭೭. ‘‘ತತೋ [ತಯೋ (ಸೀ.)] ಪಾಸಾದಮಾರುಯ್ಹ, ಮಹಾಭೋಗೇ ವಲಞ್ಜಕೋ [ಉಬ್ಬಿದ್ಧಾ ಗೇಹಲುಞ್ಜಕಾ (ಕ.), ಉಬ್ಬಿದ್ಧಾಗೇಹಲಞ್ಛಕಾ (ಸೀ.)];

ತತ್ಥ ನಚ್ಚೇಹಿ ಗೀತೇಹಿ, ಪರಿಚಾರೇಮಹಂ ತದಾ.

೨೭೮. ‘‘ತೂರಿಯಾ ಆಹತಾ ಮಯ್ಹಂ, ಸಮ್ಮತಾಳಸಮಾಹಿತಾ;

ನಚ್ಚನ್ತಾ [ರಞ್ಜನ್ತೀ (ಸ್ಯಾ.), ರಜ್ಜನ್ತಾ (ಕ.)] ಇತ್ಥಿಯೋ ಸಬ್ಬಾ, ಹರನ್ತಿಯೇವ ಮೇ ಮನೋ.

೨೭೯. ‘‘ಚೇಲಾಪಿಕಾ [ಚೇಲಾವಕಾ (ಸ್ಯಾ.), ವೇಲಾಮಿಕಾ (ಪೀ.)] ಲಾಮಣಿಕಾ [ವಾಮನಿಕಾ (ಸ್ಯಾ. ಪೀ.)], ಕುಞ್ಜವಾಸೀ ತಿಮಜ್ಝಿಕಾ [ಕುಞ್ಜವಾ ಸೀಹಿಮಜ್ಝಿತಾ (ಸ್ಯಾ.), ಕುಜ್ಜಾ ವಾ ಸೀಹಿಮಜ್ಝಿಕಾ (ಪೀ.)];

ಲಙ್ಘಿಕಾ ಸೋಕಜ್ಝಾಯೀ ಚ, ಪರಿವಾರೇನ್ತಿ ಮಂ ಸದಾ.

೨೮೦. ‘‘ವೇತಾಳಿನೋ ಕುಮ್ಭಥೂನೀ, ನಟಾ ಚ ನಚ್ಚಕಾ ಬಹೂ;

ನಟಕಾ ನಾಟಕಾ ಚೇವ, ಪರಿವಾರೇನ್ತಿ ಮಂ ಸದಾ.

೨೮೧. ‘‘ಕಪ್ಪಕಾ ನ್ಹಾಪಕಾ ಸೂದಾ, ಮಾಲಾಕಾರಾ ಸುಪಾಸಕಾ [ಸುಮಾಪಕಾ (ಸೀ. ಸ್ಯಾ.)];

ಜಲ್ಲಾ ಮಲ್ಲಾ ಚ ತೇ ಸಬ್ಬೇ, ಪರಿವಾರೇನ್ತಿ ಮಂ ಸದಾ.

೨೮೨. ‘‘ಏತೇಸು ಕೀಳಮಾನೇಸು, ಸಿಕ್ಖಿತೇ ಕತುಪಾಸನೇ;

ರತ್ತಿನ್ದಿವಂ ನ ಜಾನಾಮಿ, ಇನ್ದೋವ ತಿದಸಙ್ಗಣೇ.

೨೮೩. ‘‘ಅದ್ಧಿಕಾ ಪಥಿಕಾ ಸಬ್ಬೇ, ಯಾಚಕಾ ವರಕಾ ಬಹೂ;

ಉಪಗಚ್ಛನ್ತಿ ತೇ ನಿಚ್ಚಂ, ಭಿಕ್ಖಯನ್ತಾ ಮಮಂ ಘರಂ.

೨೮೪. ‘‘ಸಮಣಾ ಬ್ರಾಹ್ಮಣಾ ಚೇವ, ಪುಞ್ಞಕ್ಖೇತ್ತಾ ಅನುತ್ತರಾ;

ವಡ್ಢಯನ್ತಾ ಮಮಂ ಪುಞ್ಞಂ, ಆಗಚ್ಛನ್ತಿ ಮಮಂ ಘರಂ.

೨೮೫. ‘‘ಪಟಗಾ [ಪಟಕಾ (ಸೀ. ಸ್ಯಾ.), ಪದಕಾ (ಪೀ.)] ಲಟುಕಾ [ಲಟಕಾ (ಸೀ.)] ಸಬ್ಬೇ, ನಿಗಣ್ಠಾ ಪುಪ್ಫಸಾಟಕಾ;

ತೇದಣ್ಡಿಕಾ ಏಕಸಿಖಾ, ಆಗಚ್ಛನ್ತಿ ಮಮಂ ಘರಂ.

೨೮೬. ‘‘ಆಜೀವಕಾ ವಿಲುತ್ತಾವೀ, ಗೋಧಮ್ಮಾ ದೇವಧಮ್ಮಿಕಾ;

ರಜೋಜಲ್ಲಧರಾ ಏತೇ, ಆಗಚ್ಛನ್ತಿ ಮಮಂ ಘರಂ.

೨೮೭. ‘‘ಪರಿತ್ತಕಾ ಸನ್ತಿಪತ್ತಾ [ಪರಿವತ್ತಕಾ ಸಿದ್ಧಿಪತ್ತಾ (ಸೀ. ಸ್ಯಾ. ಪೀ.)], ಕೋಧಪುಗ್ಗನಿಕಾ [ಕೋಣ್ಡಪುಗ್ಗಣಿಕಾ (ಸೀ.), ಕೋಣ್ಡಪುಗ್ಗಲಿಕಾ (ಪೀ.)] ಬಹೂ;

ತಪಸ್ಸೀ ವನಚಾರೀ ಚ, ಆಗಚ್ಛನ್ತಿ ಮಮಂ ಘರಂ.

೨೮೮. ‘‘ಓಡ್ಡಕಾ ದಮಿಳಾ ಚೇವ, ಸಾಕುಳಾ ಮಲವಾಳಕಾ [ಮಲಯಾಲಕಾ (ಸೀ. ಸ್ಯಾ. ಪೀ.)];

ಸವರಾ ಯೋನಕಾ ಚೇವ, ಆಗಚ್ಛನ್ತಿ ಮಮಂ ಘರಂ.

೨೮೯. ‘‘ಅನ್ಧಕಾ ಮುಣ್ಡಕಾ ಸಬ್ಬೇ, ಕೋಟಲಾ ಹನುವಿನ್ದಕಾ [ಕೋಲಕಾ ಸಾನುವಿನ್ದಕಾ (ಸೀ. ಪೀ.)];

ಆರಾವಚೀನರಟ್ಠಾ ಚ, ಆಗಚ್ಛನ್ತಿ ಮಮಂ ಘರಂ.

೨೯೦. ‘‘ಅಲಸನ್ದಕಾ [ಅಲಸನ್ತಾ (ಕ.)] ಪಲ್ಲವಕಾ, ಧಮ್ಮರಾ ನಿಗ್ಗಮಾನುಸಾ [ಬಬ್ಬರಾ ಭಗ್ಗಕಾರುಸಾ (ಸೀ.)];

ಗೇಹಿಕಾ [ರೋಹಿತಾ (ಸೀ.), ಬಾಹಿಕಾ (ಪೀ.)] ಚೇತಪುತ್ತಾ ಚ, ಆಗಚ್ಛನ್ತಿ ಮಮಂ ಘರಂ.

೨೯೧. ‘‘ಮಾಧುರಕಾ ಕೋಸಲಕಾ, ಕಲಿಙ್ಗಾ [ಕಾಸಿಕಾ (ಸೀ.)] ಹತ್ಥಿಪೋರಿಕಾ;

ಇಸಿಣ್ಡಾ ಮಕ್ಕಲಾ ಚೇವ, ಆಗಚ್ಛನ್ತಿ ಮಮಂ ಘರಂ.

೨೯೨. ‘‘ಚೇಲಾವಕಾ ಆರಬ್ಭಾ [ಅರಮ್ಮಾ (ಸೀ. ಪೀ.)] ಚ, ಓಘುಳ್ಹಾ [ಓಕ್ಕಲಾ (ಸೀ.)] ಮೇಘಲಾ ಬಹೂ;

ಖುದ್ದಕಾ ಸುದ್ದಕಾ ಚೇವ, ಆಗಚ್ಛನ್ತಿ ಮಮಂ ಘರಂ.

೨೯೩. ‘‘ರೋಹಣಾ ಸಿನ್ಧವಾ ಚೇವ, ಚಿತಕಾ ಏಕಕಣ್ಣಿಕಾ;

ಸುರಟ್ಠಾ ಅಪರನ್ತಾ ಚ, ಆಗಚ್ಛನ್ತಿ ಮಮಂ ಘರಂ.

೨೯೪. ‘‘ಸುಪ್ಪಾರಕಾ ಕುಮಾರಾ [ಕಿಕುಮಾರಾ (ಸೀ. ಪೀ.)] ಚ, ಮಲ್ಲಸೋವಣ್ಣಭೂಮಿಕಾ [ಮಲಯಾ ಸೋಣ್ಣಭೂಮಿಕಾ (ಸೀ. ಸ್ಯಾ. ಪೀ.)];

ವಜ್ಜೀತಙ್ಗಾ [ವಜ್ಜೀ ತಾರಾ (ಸೀ.), ವಜ್ಜೀಹಾರಾ (ಸ್ಯಾ. ಪೀ.)] ಚ ತೇ ಸಬ್ಬೇ, ಆಗಚ್ಛನ್ತಿ ಮಮಂ ಘರಂ.

೨೯೫. ‘‘ನಳಕಾರಾ ಪೇಸಕಾರಾ, ಚಮ್ಮಕಾರಾ ಚ ತಚ್ಛಕಾ;

ಕಮ್ಮಾರಾ ಕುಮ್ಭಕಾರಾ ಚ, ಆಗಚ್ಛನ್ತಿ ಮಮಂ ಘರಂ.

೨೯೬. ‘‘ಮಣಿಕಾರಾ ಲೋಹಕಾರಾ, ಸೋಣ್ಣಕಾರಾ ಚ ದುಸ್ಸಿಕಾ;

ತಿಪುಕಾರಾ ಚ ತೇ ಸಬ್ಬೇ, ಆಗಚ್ಛನ್ತಿ ಮಮಂ ಘರಂ.

೨೯೭. ‘‘ಉಸುಕಾರಾ ಭಮಕಾರಾ, ಪೇಸಕಾರಾ ಚ ಗನ್ಧಿಕಾ;

ರಜಕಾ ತುನ್ನವಾಯಾ ಚ, ಆಗಚ್ಛನ್ತಿ ಮಮಂ ಘರಂ.

೨೯೮. ‘‘ತೇಲಿಕಾ ಕಟ್ಠಹಾರಾ ಚ, ಉದಹಾರಾ ಚ ಪೇಸ್ಸಿಕಾ;

ಸೂಪಿಕಾ ಸೂಪರಕ್ಖಾ ಚ, ಆಗಚ್ಛನ್ತಿ ಮಮಂ ಘರಂ.

೨೯೯. ‘‘ದೋವಾರಿಕಾ ಅನೀಕಟ್ಠಾ, ಬನ್ಧಿಕಾ [ವನ್ದಿಕಾ (ಸೀ.), ಗನ್ಥಿಕಾ (ಸ್ಯಾ.), ಸನ್ದಿಕಾ (ಪೀ.)] ಪುಪ್ಫಛಡ್ಡಕಾ;

ಹತ್ಥಾರುಹಾ ಹತ್ಥಿಪಾಲಾ, ಆಗಚ್ಛನ್ತಿ ಮಮಂ ಘರಂ.

೩೦೦. ‘‘ಆನನ್ದಸ್ಸ ಮಹಾರಞ್ಞೋ [ಆನನ್ದಸ್ಸ ನಾಮ ರಞ್ಞೋ (ಸ್ಯಾ.), ಅರಿನ್ದಮನಾಮ ರಞ್ಞೋ (ಪೀ.)], ಮಮತ್ಥಸ್ಸ [ಪಮತ್ತಸ್ಸ (ಸೀ. ಪೀ.), ಸಮಗ್ಗಸ್ಸ (ಸ್ಯಾ.)] ಅದಾಸಹಂ;

ಸತ್ತವಣ್ಣೇನ ರತನೇನ, ಊನತ್ಥಂ [ಊನತ್ತಂ (ಸೀ. ಸ್ಯಾ. ಪೀ.)] ಪೂರಯಾಮಹಂ.

೩೦೧. ‘‘ಯೇ ಮಯಾ ಕಿತ್ತಿತಾ ಸಬ್ಬೇ, ನಾನಾವಣ್ಣಾ ಬಹೂ ಜನಾ;

ತೇಸಾಹಂ ಚಿತ್ತಮಞ್ಞಾಯ, ತಪ್ಪಯಿಂ ರತನೇನಹಂ.

೩೦೨. ‘‘ವಗ್ಗೂಸು ಭಾಸಮಾನಾಸು, ವಜ್ಜಮಾನಾಸು ಭೇರಿಸು;

ಸಙ್ಖೇಸು ಧಮಯನ್ತೇಸು, ಸಕಗೇಹೇ ರಮಾಮಹಂ.

೩೦೩. ‘‘ಭಗವಾ ತಮ್ಹಿ ಸಮಯೇ, ಪದುಮುತ್ತರನಾಯಕೋ;

ವಸೀಸತಸಹಸ್ಸೇಹಿ, ಪರಿಕ್ಖೀಣಾಸವೇಹಿ ಸೋ.

೩೦೪. ‘‘ಭಿಕ್ಖೂಹಿ ಸಹಿತೋ ವೀಥಿಂ, ಪಟಿಪಜ್ಜಿತ್ಥ ಚಕ್ಖುಮಾ;

ಓಭಾಸೇನ್ತೋ ದಿಸಾ ಸಬ್ಬಾ, ದೀಪರುಕ್ಖೋವ ಜೋತತಿ.

೩೦೫. ‘‘ವಜ್ಜನ್ತಿ ಭೇರಿಯೋ ಸಬ್ಬಾ, ಗಚ್ಛನ್ತೇ ಲೋಕನಾಯಕೇ;

ಪಭಾ ನಿದ್ಧಾವತೇ ತಸ್ಸ, ಸತರಂಸೀವ ಉಗ್ಗತೋ.

೩೦೬. ‘‘ಕವಾಟನ್ತರಿಕಾಯಾಪಿ, ಪವಿಟ್ಠೇನ ಚ ರಸ್ಮಿನಾ;

ಅನ್ತೋಘರೇಸು ವಿಪುಲೋ, ಆಲೋಕೋ ಆಸಿ ತಾವದೇ.

೩೦೭. ‘‘ಪಭಂ ದಿಸ್ವಾನ ಬುದ್ಧಸ್ಸ, ಪಾರಿಸಜ್ಜೇ ಅವೋಚಹಂ;

ನಿಸ್ಸಂಸಯಂ ಬುದ್ಧಸೇಟ್ಠೋ, ಇಮಂ ವೀಥಿಮುಪಾಗತೋ.

೩೦೮. ‘‘ಖಿಪ್ಪಂ ಓರುಯ್ಹ ಪಾಸಾದಾ, ಅಗಮಿಂ ಅನ್ತರಾಪಣಂ;

ಸಮ್ಬುದ್ಧಂ ಅಭಿವಾದೇತ್ವಾ, ಇದಂ ವಚನಮಬ್ರವಿಂ.

೩೦೯. ‘‘‘ಅನುಕಮ್ಪತು ಮೇ ಬುದ್ಧೋ, ಜಲಜುತ್ತಮನಾಯಕೋ;

ವಸೀಸತಸಹಸ್ಸೇಹಿ, ಅಧಿವಾಸೇಸಿ ಸೋ ಮುನಿ’.

೩೧೦. ‘‘ನಿಮನ್ತೇತ್ವಾನ ಸಮ್ಬುದ್ಧಂ, ಅಭಿನೇಸಿಂ ಸಕಂ ಘರಂ;

ತತ್ಥ ಅನ್ನೇನ ಪಾನೇನ, ಸನ್ತಪ್ಪೇಸಿಂ ಮಹಾಮುನಿಂ.

೩೧೧. ‘‘ಭುತ್ತಾವಿಂ ಕಾಲಮಞ್ಞಾಯ, ಬುದ್ಧಸೇಟ್ಠಸ್ಸ ತಾದಿನೋ;

ಸತಙ್ಗಿಕೇನ ತೂರಿಯೇನ, ಬುದ್ಧಸೇಟ್ಠಂ ಉಪಟ್ಠಹಿಂ.

೩೧೨. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಅನ್ತೋಘರೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೩೧೩. ‘‘‘ಯೋ ಮಂ ತೂರಿಯೇಹುಪಟ್ಠಾಸಿ, ಅನ್ನಪಾನಞ್ಚದಾಸಿ ಮೇ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೩೧೪. ‘‘‘ಪಹೂತಭಕ್ಖೋ ಹುತ್ವಾನ, ಸಹಿರಞ್ಞೋ ಸಭೋಜನೋ;

ಚತುದೀಪೇ ಏಕರಜ್ಜಂ, ಕಾರಯಿಸ್ಸತಿಯಂ ನರೋ.

೩೧೫. ‘‘‘ಪಞ್ಚಸೀಲೇ ಸಮಾದಾಯ, ದಸಕಮ್ಮಪಥೇ ತತೋ;

ಸಮಾದಾಯ ಪವತ್ತೇನ್ತೋ, ಪರಿಸಂ ಸಿಕ್ಖಾಪಯಿಸ್ಸತಿ.

೩೧೬. ‘‘‘ತೂರಿಯಸತಸಹಸ್ಸಾನಿ, ಭೇರಿಯೋ ಸಮಲಙ್ಕತಾ;

ವಜ್ಜಯಿಸ್ಸನ್ತಿಮಂ ನಿಚ್ಚಂ, ಉಪಟ್ಠಾನಸ್ಸಿದಂ ಫಲಂ.

೩೧೭. ‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;

ಚತುಸಟ್ಠಿಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.

೩೧೮. ‘‘‘ಚತುಸಟ್ಠಿಕ್ಖತ್ತುಂ ರಾಜಾ, ಚಕ್ಕವತ್ತೀ ಭವಿಸ್ಸತಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೩೧೯. ‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೩೨೦. ‘‘‘ಉಪಪಜ್ಜತಿ ಯಂ ಯೋನಿಂ, ದೇವತ್ತಂ ಅಥ ಮಾನುಸಂ;

ಅನೂನಭೋಗೋ ಹುತ್ವಾನ, ಮನುಸ್ಸತ್ತಂ ಗಮಿಸ್ಸತಿ.

೩೨೧. ‘‘‘ಅಜ್ಝಾಯಕೋ ಭವಿತ್ವಾನ, ತಿಣ್ಣಂ ವೇದಾನ ಪಾರಗೂ;

ಉತ್ತಮತ್ಥಂ ಗವೇಸನ್ತೋ, ಚರಿಸ್ಸತಿ ಮಹಿಂ ಇಮಂ.

೩೨೨. ‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಸುಕ್ಕಮೂಲೇನ ಚೋದಿತೋ;

ಗೋತಮಸ್ಸ ಭಗವತೋ, ಸಾಸನೇಭಿರಮಿಸ್ಸತಿ.

೩೨೩. ‘‘‘ಆರಾಧಯಿತ್ವಾನ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;

ಕಿಲೇಸೇ ಝಾಪಯಿತ್ವಾನ, ಅರಹಾಯಂ ಭವಿಸ್ಸತಿ’.

೩೨೪. ‘‘ವಿಪಿನೇ ಬ್ಯಗ್ಘರಾಜಾವ, ಮಿಗರಾಜಾವ ಕೇಸರೀ;

ಅಭೀತೋ ವಿಹರಾಮಜ್ಜ, ಸಕ್ಯಪುತ್ತಸ್ಸ ಸಾಸನೇ.

೩೨೫. ‘‘ದೇವಲೋಕೇ ಮನುಸ್ಸೇ ವಾ, ದಲಿದ್ದೇ ದುಗ್ಗತಿಮ್ಹಿ ವಾ;

ನಿಬ್ಬತ್ತಿಂ ಮೇ ನ ಪಸ್ಸಾಮಿ, ಉಪಟ್ಠಾನಸ್ಸಿದಂ ಫಲಂ.

೩೨೬. ‘‘ವಿವೇಕಮನುಯುತ್ತೋಮ್ಹಿ, ಉಪಸನ್ತೋ ನಿರೂಪಧಿ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೩೨೭. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೩೨೮. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೩೨೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಜತುಕಣ್ಣಿತ್ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಜತುಕಣ್ಣಿತ್ಥೇರಸ್ಸಾಪದಾನಂ ನವಮಂ.