೪೧. ಮೇತ್ತೇಯ್ಯವಗ್ಗೋ

೧. ತಿಸ್ಸಮೇತ್ತೇಯ್ಯತ್ಥೇರಅಪದಾನಂ

೧. ‘‘ಪಬ್ಭಾರಕೂಟಂ ನಿಸ್ಸಾಯ, ಸೋಭಿತೋ ನಾಮ ತಾಪಸೋ;

ಪವತ್ತಫಲಂ ಭುಞ್ಜಿತ್ವಾ, ವಸತಿ ಪಬ್ಬತನ್ತರೇ.

೨. ‘‘ಅಗ್ಗಿಂ ದಾರುಂ ಆಹರಿತ್ವಾ, ಉಜ್ಜಾಲೇಸಿಂ ಅಹಂ ತದಾ;

ಉತ್ತಮತ್ಥಂ ಗವೇಸನ್ತೋ, ಬ್ರಹ್ಮಲೋಕೂಪಪತ್ತಿಯಾ.

೩. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಮಮ ಸನ್ತಿಕೇ.

೪. ‘‘ಕಿಂ ಕರೋಸಿ ಮಹಾಪುಞ್ಞ, ದೇಹಿ ಮೇ ಅಗ್ಗಿದಾರುಕಂ;

ಅಹಮಗ್ಗಿಂ ಪರಿಚರೇ, ತತೋ ಮೇ ಸುದ್ಧಿ ಹೋಹಿತಿ [ಹೇಹಿತಿ (ಸೀ.)].

೫. ‘‘ಸುಭದ್ದಕೋ ತ್ವಂ ಮನುಜೇ, ದೇವತೇ ತ್ವಂ ಪಜಾನಸಿ;

ತುವಂ ಅಗ್ಗಿಂ ಪರಿಚರ, ಹನ್ದ ತೇ ಅಗ್ಗಿದಾರುಕಂ.

೬. ‘‘ತತೋ ಕಟ್ಠಂ ಗಹೇತ್ವಾನ, ಅಗ್ಗಿಂ ಉಜ್ಜಾಲಯೀ ಜಿನೋ;

ನ ತತ್ಥ ಕಟ್ಠಂ ಪಜ್ಝಾಯಿ, ಪಾಟಿಹೇರಂ ಮಹೇಸಿನೋ.

೭. ‘‘ನ ತೇ ಅಗ್ಗಿ ಪಜ್ಜಲತಿ, ಆಹುತೀ ತೇ ನ ವಿಜ್ಜತಿ;

ನಿರತ್ಥಕಂ ವತಂ ತುಯ್ಹಂ, ಅಗ್ಗಿಂ ಪರಿಚರಸ್ಸು ಮೇ.

೮. ‘‘ಕೀದಿಸೋ ಸೋ [ತೇ (ಸ್ಯಾ. ಕ.)] ಮಹಾವೀರ, ಅಗ್ಗಿ ತವ ಪವುಚ್ಚತಿ;

ಮಯ್ಹಮ್ಪಿ ಕಥಯಸ್ಸೇತಂ, ಉಭೋ ಪರಿಚರಾಮಸೇ.

೯. ‘‘ಹೇತುಧಮ್ಮನಿರೋಧಾಯ, ಕಿಲೇಸಸಮಣಾಯ ಚ;

ಇಸ್ಸಾಮಚ್ಛರಿಯಂ ಹಿತ್ವಾ, ತಯೋ ಏತೇ ಮಮಾಹುತೀ.

೧೦. ‘‘ಕೀದಿಸೋ ತ್ವಂ ಮಹಾವೀರ, ಕಥಂ ಗೋತ್ತೋಸಿ ಮಾರಿಸ;

ಆಚಾರಪಟಿಪತ್ತಿ ತೇ, ಬಾಳ್ಹಂ ಖೋ ಮಮ ರುಚ್ಚತಿ.

೧೧. ‘‘ಖತ್ತಿಯಮ್ಹಿ ಕುಲೇ ಜಾತೋ, ಅಭಿಞ್ಞಾಪಾರಮಿಂ ಗತೋ;

ಸಬ್ಬಾಸವಪರಿಕ್ಖೀಣೋ, ನತ್ಥಿ ದಾನಿ ಪುನಬ್ಭವೋ.

೧೨. ‘‘ಯದಿ ಬುದ್ಧೋಸಿ ಸಬ್ಬಞ್ಞೂ, ಪಭಙ್ಕರ ತಮೋನುದ;

ನಮಸ್ಸಿಸ್ಸಾಮಿ ತಂ ದೇವ, ದುಕ್ಖಸ್ಸನ್ತಕರೋ ತುವಂ.

೧೩. ‘‘ಪತ್ಥರಿತ್ವಾಜಿನಚಮ್ಮಂ, ನಿಸೀದನಮದಾಸಹಂ;

ನಿಸೀದ ನಾಥ ಸಬ್ಬಞ್ಞು, ಉಪಟ್ಠಿಸ್ಸಾಮಹಂ ತುವಂ.

೧೪. ‘‘ನಿಸೀದಿ ಭಗವಾ ತತ್ಥ, ಅಜಿನಮ್ಹಿ ಸುವಿತ್ಥತೇ;

ನಿಮನ್ತಯಿತ್ವಾ ಸಮ್ಬುದ್ಧಂ, ಪಬ್ಬತಂ ಅಗಮಾಸಹಂ.

೧೫. ‘‘ಖಾರಿಭಾರಞ್ಚ ಪೂರೇತ್ವಾ, ತಿನ್ದುಕಫಲಮಾಹರಿಂ;

ಮಧುನಾ ಯೋಜಯಿತ್ವಾನ, ಫಲಂ ಬುದ್ಧಸ್ಸದಾಸಹಂ.

೧೬. ‘‘ಮಮ ನಿಜ್ಝಾಯಮಾನಸ್ಸ, ಪರಿಭುಞ್ಜಿ ತದಾ ಜಿನೋ;

ತತ್ಥ ಚಿತ್ತಂ ಪಸಾದೇಸಿಂ, ಪೇಕ್ಖನ್ತೋ ಲೋಕನಾಯಕಂ.

೧೭. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಮಮಸ್ಸಮೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೧೮. ‘‘‘ಯೋ ಮಂ ಫಲೇನ ತಪ್ಪೇಸಿ, ಪಸನ್ನೋ ಸೇಹಿ ಪಾಣಿಭಿ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೧೯. ‘‘‘ಪಞ್ಚವೀಸತಿಕ್ಖತ್ತುಂ ಸೋ, ದೇವರಜ್ಜಂ ಕರಿಸ್ಸತಿ;

ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.

೨೦. ‘‘‘ತಸ್ಸ ಸಙ್ಕಪ್ಪಮಞ್ಞಾಯ, ಪುಬ್ಬಕಮ್ಮಸಮಙ್ಗಿನೋ;

ಅನ್ನಂ ಪಾನಞ್ಚ ವತ್ಥಞ್ಚ, ಸಯನಞ್ಚ ಮಹಾರಹಂ.

೨೧. ‘‘‘ಪುಞ್ಞಕಮ್ಮೇನ ಸಂಯುತ್ತಾ, ನಿಬ್ಬತ್ತಿಸ್ಸನ್ತಿ ತಾವದೇ;

ಸದಾ ಪಮುದಿತೋ ಚಾಯಂ, ಭವಿಸ್ಸತಿ ಅನಾಮಯೋ.

೨೨. ‘‘‘ಉಪಪಜ್ಜತಿ ಯಂ ಯೋನಿಂ, ದೇವತ್ತಂ ಅಥ ಮಾನುಸಂ;

ಸಬ್ಬತ್ಥ ಸುಖಿತೋ ಹುತ್ವಾ, ಮನುಸ್ಸತ್ತಂ ಗಮಿಸ್ಸತಿ.

೨೩. ‘‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;

ಸಮ್ಬುದ್ಧಂ ಉಪಗನ್ತ್ವಾನ, ಅರಹಾ ಸೋ ಭವಿಸ್ಸತಿ’.

೨೪. ‘‘ಯತೋ ಸರಾಮಿ ಅತ್ತಾನಂ, ಯತೋ ಪತ್ತೋಸ್ಮಿ ವಿಞ್ಞುತಂ;

ಭೋಗೇ ಮೇ ಊನತಾ ನತ್ಥಿ, ಫಲದಾನಸ್ಸಿದಂ ಫಲಂ.

೨೫. ‘‘ವರಧಮ್ಮಮನುಪ್ಪತ್ತೋ, ರಾಗದೋಸೇ ಸಮೂಹನಿಂ;

ಸಬ್ಬಾಸವಪರಿಕ್ಖೀಣೋ, ನತ್ಥಿ ದಾನಿ ಪುನಬ್ಭವೋ.

೨೬. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೨೭. ‘‘ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೨೮. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಸ್ಸಮೇತ್ತೇಯ್ಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಸ್ಸಮೇತ್ತೇಯ್ಯತ್ಥೇರಸ್ಸಾಪದಾನಂ ಪಠಮಂ.

೨. ಪುಣ್ಣಕತ್ಥೇರಅಪದಾನಂ

೨೯. ‘‘ಪಬ್ಭಾರಕೂಟಂ ನಿಸ್ಸಾಯ, ಸಯಮ್ಭೂ ಅಪರಾಜಿತೋ;

ಆಬಾಧಿಕೋ ಚ ಸೋ [ಆಬಾಧಿಕೋ ಗರು (ಸೀ.)] ಬುದ್ಧೋ, ವಸತಿ ಪಬ್ಬತನ್ತರೇ.

೩೦. ‘‘ಮಮ ಅಸ್ಸಮಸಾಮನ್ತಾ, ಪನಾದೋ ಆಸಿ ತಾವದೇ;

ಬುದ್ಧೇ ನಿಬ್ಬಾಯಮಾನಮ್ಹಿ, ಆಲೋಕೋ ಉದಪಜ್ಜಥ [ಆಸಿ ತಾವದೇ (ಸ್ಯಾ. ಕ.)].

೩೧. ‘‘ಯಾವತಾ ವನಸಣ್ಡಸ್ಮಿಂ, ಅಚ್ಛಕೋಕತರಚ್ಛಕಾ;

ವಾಳಾ ಚ [ಬ್ಯಗ್ಘಾ (ಸೀ.)] ಕೇಸರೀ ಸಬ್ಬೇ, ಅಭಿಗಜ್ಜಿಂಸು ತಾವದೇ.

೩೨. ‘‘ಉಪ್ಪಾತಂ ತಮಹಂ ದಿಸ್ವಾ, ಪಬ್ಭಾರಂ ಅಗಮಾಸಹಂ;

ತತ್ಥದ್ದಸ್ಸಾಸಿಂ ಸಮ್ಬುದ್ಧಂ, ನಿಬ್ಬುತಂ ಅಪರಾಜಿತಂ.

೩೩. ‘‘ಸುಫುಲ್ಲಂ ಸಾಲರಾಜಂವ, ಸತರಂಸಿಂವ ಉಗ್ಗತಂ;

ವೀತಚ್ಚಿಕಂವ ಅಙ್ಗಾರಂ, ನಿಬ್ಬುತಂ ಅಪರಾಜಿತಂ.

೩೪. ‘‘ತಿಣಂ ಕಟ್ಠಞ್ಚ ಪೂರೇತ್ವಾ, ಚಿತಕಂ ತತ್ಥಕಾಸಹಂ;

ಚಿತಕಂ ಸುಕತಂ ಕತ್ವಾ, ಸರೀರಂ ಝಾಪಯಿಂ ಅಹಂ.

೩೫. ‘‘ಸರೀರಂ ಝಾಪಯಿತ್ವಾನ, ಗನ್ಧತೋಯಂ ಸಮೋಕಿರಿಂ;

ಅನ್ತಲಿಕ್ಖೇ ಠಿತೋ ಯಕ್ಖೋ, ನಾಮಮಗ್ಗಹಿ ತಾವದೇ.

೩೬. ‘‘ಯಂ ಪೂರಿತಂ [ತಂ ಪೂರಿತಂ (ಸ್ಯಾ.), ಸಪ್ಪುರಿಸ (ಕ.)] ತಯಾ ಕಿಚ್ಚಂ, ಸಯಮ್ಭುಸ್ಸ ಮಹೇಸಿನೋ;

ಪುಣ್ಣಕೋ ನಾಮ ನಾಮೇನ, ಸದಾ ಹೋಹಿ ತುವಂ [ಯದಾ ಹೋಸಿ ತುವಂ (ಸ್ಯಾ.), ಸದಾ ಹೋಹಿತಿ ತ್ವಂ (ಕ.)] ಮುನೇ.

೩೭. ‘‘ತಮ್ಹಾ ಕಾಯಾ ಚವಿತ್ವಾನ, ದೇವಲೋಕಂ ಅಗಚ್ಛಹಂ;

ತತ್ಥ ದಿಬ್ಬಮಯೋ ಗನ್ಧೋ, ಅನ್ತಲಿಕ್ಖಾ ಪವಸ್ಸತಿ [ಅನ್ತಲಿಕ್ಖೇ ಪವಾಯತಿ (ಸೀ.)].

೩೮. ‘‘ತತ್ರಾಪಿ ನಾಮಧೇಯ್ಯಂ ಮೇ, ಪುಣ್ಣಕೋತಿ ಅಹೂ ತದಾ;

ದೇವಭೂತೋ ಮನುಸ್ಸೋ ವಾ, ಸಙ್ಕಪ್ಪಂ ಪೂರಯಾಮಹಂ.

೩೯. ‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;

ಇಧಾಪಿ ಪುಣ್ಣಕೋ ನಾಮ, ನಾಮಧೇಯ್ಯಂ ಪಕಾಸತಿ.

೪೦. ‘‘ತೋಸಯಿತ್ವಾನ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೪೧. ‘‘ಏಕನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ತನುಕಿಚ್ಚಸ್ಸಿದಂ ಫಲಂ.

೪೨. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೪೩. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೪೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪುಣ್ಣಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪುಣ್ಣಕತ್ಥೇರಸ್ಸಾಪದಾನಂ ದುತಿಯಂ.

೩. ಮೇತ್ತಗುತ್ಥೇರಅಪದಾನಂ

೪೫. ‘‘ಹಿಮವನ್ತಸ್ಸಾವಿದೂರೇ, ಅಸೋಕೋ ನಾಮ ಪಬ್ಬತೋ;

ತತ್ಥಾಸಿ ಅಸ್ಸಮೋ ಮಯ್ಹಂ, ವಿಸ್ಸಕಮ್ಮೇನ [ವಿಸುಕಮ್ಮೇನ (ಸೀ. ಸ್ಯಾ. ಕ.)] ಮಾಪಿತೋ.

೪೬. ‘‘ಸುಮೇಧೋ ನಾಮ ಸಮ್ಬುದ್ಧೋ, ಅಗ್ಗೋ ಕಾರುಣಿಕೋ ಮುನಿ;

ನಿವಾಸಯಿತ್ವಾ ಪುಬ್ಬಣ್ಹೇ, ಪಿಣ್ಡಾಯ ಮೇ [ಮಂ (ಸೀ.)] ಉಪಾಗಮಿ.

೪೭. ‘‘ಉಪಾಗತಂ ಮಹಾವೀರಂ, ಸುಮೇಧಂ ಲೋಕನಾಯಕಂ;

ಪಗ್ಗಯ್ಹ ಸುಗತಪತ್ತಂ [ಸುಗತಂ ಪತ್ತಂ (ಸೀ.), ಸುಭಕಂ ಪತ್ತಂ (ಪೀ.)], ಸಪ್ಪಿತೇಲಂ ಅಪೂರಯಿಂ [ಸಪ್ಪಿತೇಲೇನ ಪೂರಯಿಂ (ಸೀ.), ಸಪ್ಪಿತೇಲಸ್ಸ’ಪೂರಯಿಂ (?)].

೪೮. ‘‘ದತ್ವಾನಹಂ ಬುದ್ಧಸೇಟ್ಠೇ, ಸುಮೇಧೇ ಲೋಕನಾಯಕೇ;

ಅಞ್ಜಲಿಂ ಪಗ್ಗಹೇತ್ವಾನ, ಭಿಯ್ಯೋ [ಭೀಯೋ (ಸೀ.), ಭೀಯ್ಯೋ (ಪೀ.)] ಹಾಸಂ ಜನೇಸಹಂ.

೪೯. ‘‘ಇಮಿನಾ ಸಪ್ಪಿದಾನೇನ, ಚೇತನಾಪಣಿಧೀಹಿ ಚ;

ದೇವಭೂತೋ ಮನುಸ್ಸೋ ವಾ, ಲಭಾಮಿ ವಿಪುಲಂ ಸುಖಂ.

೫೦. ‘‘ವಿನಿಪಾತಂ ವಿವಜ್ಜೇತ್ವಾ, ಸಂಸರಾಮಿ ಭವಾಭವೇ;

ತತ್ಥ ಚಿತ್ತಂ ಪಣಿಧಿತ್ವಾ, ಲಭಾಮಿ ಅಚಲಂ ಪದಂ.

೫೧. ‘‘ಲಾಭಾ ತುಯ್ಹಂ ಸುಲದ್ಧಂ ತೇ, ಯಂ ಮಂ ಅದ್ದಕ್ಖಿ ಬ್ರಾಹ್ಮಣ;

ಮಮ ದಸ್ಸನಮಾಗಮ್ಮ, ಅರಹತ್ತಂ ಭವಿಸ್ಸತಿ [ಅರಹಾ ತ್ವಂ ಭವಿಸ್ಸಸಿ (ಸೀ. ಪೀ.), ಅರಹತ್ತಂ ಗಮಿಸ್ಸಸಿ (ಸ್ಯಾ.)].

೫೨. ‘‘ವಿಸ್ಸತ್ಥೋ [ವಿಸ್ಸಟ್ಠೋ (ಸ್ಯಾ. ಪೀ.), ವಿಸಟ್ಠೋ (ಕ.)] ಹೋಹಿ ಮಾ ಭಾಯಿ, ಅಧಿಗನ್ತ್ವಾ ಮಹಾಯಸಂ;

ಮಮಞ್ಹಿ ಸಪ್ಪಿಂ ದತ್ವಾನ, ಪರಿಮೋಕ್ಖಸಿ ಜಾತಿಯಾ.

೫೩. ‘‘ಇಮಿನಾ ಸಪ್ಪಿದಾನೇನ, ಚೇತನಾಪಣಿಧೀಹಿ ಚ;

ದೇವಭೂತೋ ಮನುಸ್ಸೋ ವಾ, ಲಭಸೇ ವಿಪುಲಂ ಸುಖಂ.

೫೪. ‘‘ಇಮಿನಾ ಸಪ್ಪಿದಾನೇನ, ಮೇತ್ತಚಿತ್ತವತಾಯ ಚ;

ಅಟ್ಠಾರಸೇ ಕಪ್ಪಸತೇ, ದೇವಲೋಕೇ ರಮಿಸ್ಸಸಿ.

೫೫. ‘‘ಅಟ್ಠತಿಂಸತಿಕ್ಖತ್ತುಞ್ಚ, ದೇವರಾಜಾ ಭವಿಸ್ಸಸಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೫೬. ‘‘ಏಕಪಞ್ಞಾಸಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸಸಿ;

ಚಾತುರನ್ತೋ ವಿಜಿತಾವೀ, ಜಮ್ಬುಮಣ್ಡಸ್ಸ [ಜಮ್ಬುಸಣ್ಡಸ್ಸ (ಸೀ. ಪೀ.)] ಇಸ್ಸರೋ.

೫೭. ‘‘ಮಹಾಸಮುದ್ದೋವಕ್ಖೋಭೋ, ದುದ್ಧರೋ ಪಥವೀ ಯಥಾ;

ಏವಮೇವ ಚ ತೇ ಭೋಗಾ, ಅಪ್ಪಮೇಯ್ಯಾ ಭವಿಸ್ಸರೇ.

೫೮. ‘‘ಸಟ್ಠಿಕೋಟೀ ಹಿರಞ್ಞಸ್ಸ, ಚಜಿತ್ವಾ [ಚತ್ವಾನ (ಸೀ. ಕ.), ದತ್ವಾನ (ಸ್ಯಾ. ಪೀ.)] ಪಬ್ಬಜಿಂ ಅಹಂ;

ಕಿಂ ಕುಸಲಂ ಗವೇಸನ್ತೋ, ಬಾವರಿಂ ಉಪಸಙ್ಕಮಿಂ.

೫೯. ‘‘ತತ್ಥ ಮನ್ತೇ ಅಧೀಯಾಮಿ, ಛಳಙ್ಗಂ ನಾಮ ಲಕ್ಖಣಂ;

ತಮನ್ಧಕಾರಂ ವಿಧಮಂ, ಉಪ್ಪಜ್ಜಿ ತ್ವಂ ಮಹಾಮುನಿ.

೬೦. ‘‘ತವ ದಸ್ಸನಕಾಮೋಹಂ, ಆಗತೋಮ್ಹಿ ಮಹಾಮುನಿ;

ತವ ಧಮ್ಮಂ ಸುಣಿತ್ವಾನ, ಪತ್ತೋಮ್ಹಿ ಅಚಲಂ ಪದಂ.

೬೧. ‘‘ತಿಂಸಕಪ್ಪಸಹಸ್ಸಮ್ಹಿ, ಸಪ್ಪಿಂ ಬುದ್ಧಸ್ಸದಾಸಹಂ;

ಏತ್ಥನ್ತರೇ ನಾಭಿಜಾನೇ, ಸಪ್ಪಿಂ ವಿಞ್ಞಾಪಿತಂ [ವಿಞ್ಞಾಪಿತಾ (?)] ಮಯಾ.

೬೨. ‘‘ಮಮ ಸಙ್ಕಪ್ಪಮಞ್ಞಾಯ, ಉಪ್ಪಜ್ಜತಿ ಯದಿಚ್ಛಕಂ;

ಚಿತ್ತಮಞ್ಞಾಯ ನಿಬ್ಬತ್ತಂ, ಸಬ್ಬೇ ಸನ್ತಪ್ಪಯಾಮಹಂ.

೬೩. ‘‘ಅಹೋ ಬುದ್ಧಾ ಅಹೋ ಧಮ್ಮಾ [ಅಹೋ ಬುದ್ಧೋ ಅಹೋ ಧಮ್ಮೋ (ಸೀ.) ಥೇರಗಾ. ೨೦೧ ಥೇರಗಾಥಾಯ ತದಟ್ಠಕಥಾಯ ಚ ಸಂಸನ್ದೇತಬ್ಬಂ], ಅಹೋ ನೋ ಸತ್ಥು ಸಮ್ಪದಾ;

ಥೋಕಞ್ಹಿ ಸಪ್ಪಿಂ ದತ್ವಾನ, ಅಪ್ಪಮೇಯ್ಯಂ ಲಭಾಮಹಂ.

೬೪. ‘‘ಮಹಾಸಮುದ್ದೇ ಉದಕಂ, ಯಾವತಾ ನೇರುಪಸ್ಸತೋ;

ಮಮ ಸಪ್ಪಿಂ ಉಪಾದಾಯ, ಕಲಭಾಗಂ ನ ಹೇಸ್ಸತಿ [ಹಿಸ್ಸತಿ (ಸ್ಯಾ. ಕ.), ಏಸ್ಸತಿ (ಸೀ.)].

೬೫. ‘‘ಯಾವತಾ ಚಕ್ಕವಾಳಸ್ಸ, ಕರಿಯನ್ತಸ್ಸ [ಕಾರಯನ್ತಸ್ಸ (ಸ್ಯಾ.), ಕಯಿರನ್ತಸ್ಸ (ಪೀ.), ಆಹರನ್ತಸ್ಸ (ಕ.)] ರಾಸಿತೋ;

ಮಮ ನಿಬ್ಬತ್ತವತ್ಥಾನಂ [ಮಯಾ ನಿವತ್ಥವತ್ಥಾನಂ (ಪೀ.)], ಓಕಾಸೋ ಸೋ ನ ಸಮ್ಮತಿ.

೬೬. ‘‘ಪಬ್ಬತರಾಜಾ ಹಿಮವಾ, ಪವರೋಪಿ ಸಿಲುಚ್ಚಯೋ;

ಮಮಾನುಲಿತ್ತಗನ್ಧಸ್ಸ, ಉಪನಿಧಿಂ [ಉಪನಿಧಂ (ಸೀ. ಸ್ಯಾ. ಕ.), ಉಪನೀಯಂ (ಪೀ.)] ನ ಹೇಸ್ಸತಿ.

೬೭. ‘‘ವತ್ಥಂ ಗನ್ಧಞ್ಚ ಸಪ್ಪಿಞ್ಚ, ಅಞ್ಞಞ್ಚ ದಿಟ್ಠಧಮ್ಮಿಕಂ;

ಅಸಙ್ಖತಞ್ಚ ನಿಬ್ಬಾನಂ, ಸಪ್ಪಿದಾನಸ್ಸಿದಂ ಫಲಂ.

೬೮. ‘‘ಸತಿಪಟ್ಠಾನಸಯನೋ, ಸಮಾಧಿಝಾನಗೋಚರೋ;

ಬೋಜ್ಝಙ್ಗಭೋಜನೋ [… ಜನನೋ (ಸ್ಯಾ. ಕ.)] ಅಜ್ಜ, ಸಪ್ಪಿದಾನಸ್ಸಿದಂ ಫಲಂ.

೬೯. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೭೦. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೭೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮೇತ್ತಗೂ ಥೇರೋ ಇಮಾ ಗಾಥಾಯೋ

ಅಭಾಸಿತ್ಥಾತಿ.

ಮೇತ್ತಗುತ್ಥೇರಸ್ಸಾಪದಾನಂ ತತಿಯಂ.

೪. ಧೋತಕತ್ಥೇರಅಪದಾನಂ

೭೨. ‘‘ಗಙ್ಗಾ ಭಾಗೀರಥೀ ನಾಮ, ಹಿಮವನ್ತಾ ಪಭಾವಿತಾ [ಹಿಮವನ್ತಪ್ಪಭಾವಿತಾ (ಸೀ.)];

ಹಂಸವತಿಯಾ ದ್ವಾರೇನ, ಅನುಸನ್ದತಿ ತಾವದೇ.