೧೦. ಉದೇನತ್ಥೇರಅಪದಾನಂ

೩೩೦. ‘‘ಹಿಮವನ್ತಸ್ಸಾವಿದೂರೇ, ಪದುಮೋ ನಾಮ ಪಬ್ಬತೋ;

ಅಸ್ಸಮೋ ಸುಕತೋ ಮಯ್ಹಂ, ಪಣ್ಣಸಾಲಾ ಸುಮಾಪಿತಾ.

೩೩೧. ‘‘ನದಿಯೋ ಸನ್ದರೇ ತತ್ಥ, ಸುಪತಿತ್ಥಾ ಮನೋರಮಾ;

ಅಚ್ಛೋದಕಾ ಸೀತಜಲಾ, ಸನ್ದರೇ ನದಿಯೋ ಸದಾ.

೩೩೨. ‘‘ಪಾಠೀನಾ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ;

ಸೋಭೇನ್ತಾ ನದಿಯೋ ಏತೇ, ವಸನ್ತಿ ನದಿಯಾ ಸದಾ.

೩೩೩. ‘‘ಅಮ್ಬಜಮ್ಬೂಹಿ ಸಞ್ಛನ್ನಾ, ಕರೇರಿತಿಲಕಾ ತಥಾ;

ಉದ್ದಾಲಕಾ ಪಾಟಲಿಯೋ, ಸೋಭೇನ್ತಿ ಮಮ ಅಸ್ಸಮಂ.

೩೩೪. ‘‘ಅಙ್ಕೋಲಕಾ ಬಿಮ್ಬಿಜಾಲಾ, ಮಾಯಾಕಾರೀ ಚ ಪುಪ್ಫಿತಾ;

ಗನ್ಧೇನ ಉಪವಾಯನ್ತಾ, ಸೋಭೇನ್ತಿ ಮಮ ಅಸ್ಸಮಂ.

೩೩೫. ‘‘ಅತಿಮುತ್ತಾ ಸತ್ತಲಿಕಾ, ನಾಗಾ ಸಾಲಾ ಚ ಪುಪ್ಫಿತಾ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.

೩೩೬. ‘‘ಕೋಸಮ್ಬಾ ಸಳಲಾ ನೀಪಾ, ಅಟ್ಠಙ್ಗಾಪಿ ಚ ಪುಪ್ಫಿತಾ [ಅಟ್ಠಙ್ಗಾ ಚ ಸುಪುಪ್ಫಿತಾ (ಸೀ.), ಕಟ್ಠಙ್ಗಾ ಚ ಸುಪುಪ್ಫಿತಾ (ಪೀ.)];

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.

೩೩೭. ‘‘ಹರೀತಕಾ ಆಮಲಕಾ, ಅಮ್ಬಜಮ್ಬುವಿಭೀತಕಾ;

ಕೋಲಾ ಭಲ್ಲಾತಕಾ ಬಿಲ್ಲಾ, ಫಲಾನಿ ಬಹು ಅಸ್ಸಮೇ.

೩೩೮. ‘‘ಕಲಮ್ಬಾ ಕನ್ದಲೀ ತತ್ಥ, ಪುಪ್ಫನ್ತಿ ಮಮ ಅಸ್ಸಮೇ;

ದಿಬ್ಬಗನ್ಧಂ [ದಿಬ್ಬಗನ್ಧಾ (ಸೀ. ಸ್ಯಾ. ಪೀ.) ಏವಂ ಪರತ್ಥಪಿ] ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.

೩೩೯. ‘‘ಅಸೋಕಪಿಣ್ಡಿವಾರೀ ಚ [ಅಸೋಕಪಿಣ್ಡೀ ಚ ವರೀ (ಸೀ. ಸ್ಯಾ.), ಅಸೋಕಪಿಣ್ಡೀ ಚ ವಾರೀ (ಪೀ.)], ನಿಮ್ಬರುಕ್ಖಾ ಚ ಪುಪ್ಫಿತಾ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.

೩೪೦. ‘‘ಪುನ್ನಾಗಾ ಗಿರಿಪುನ್ನಾಗಾ, ತಿಮಿರಾ ತತ್ಥ ಪುಪ್ಫಿತಾ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.

೩೪೧. ‘‘ನಿಗ್ಗುಣ್ಡೀ ಸಿರಿನಿಗ್ಗುಣ್ಡೀ, ಚಮ್ಪರುಕ್ಖೇತ್ಥ ಪುಪ್ಫಿತಾ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.

೩೪೨. ‘‘ಅವಿದೂರೇ ಪೋಕ್ಖರಣೀ, ಚಕ್ಕವಾಕೂಪಕೂಜಿತಾ;

ಮನ್ದಾಲಕೇಹಿ ಸಞ್ಛನ್ನಾ, ಪದುಮುಪ್ಪಲಕೇಹಿ ಚ.

೩೪೩. ‘‘ಅಚ್ಛೋದಕಾ ಸೀತಜಲಾ, ಸುಪತಿತ್ಥಾ ಮನೋರಮಾ;

ಅಚ್ಛಾ ಫಲಿಕಸಮಾನಾ, ಸೋಭೇನ್ತಿ ಮಮ ಅಸ್ಸಮಂ.

೩೪೪. ‘‘ಪದುಮಾ ಪುಪ್ಫರೇ ತತ್ಥ, ಪುಣ್ಡರೀಕಾ ಚ ಉಪ್ಪಲಾ;

ಮನ್ದಾಲಕೇಹಿ ಸಞ್ಛನ್ನಾ, ಸೋಭೇನ್ತಿ ಮಮ ಅಸ್ಸಮಂ.

೩೪೫. ‘‘ಪಾಠೀನಾ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ;

ವಿಚರನ್ತಾವ ತೇ ತತ್ಥ, ಸೋಭೇನ್ತಿ ಮಮ ಅಸ್ಸಮಂ.

೩೪೬. ‘‘ಕುಮ್ಭೀಲಾ ಸುಸುಮಾರಾ ಚ, ಕಚ್ಛಪಾ ಚ ಗಹಾ ಬಹೂ;

ಓಗಹಾ ಅಜಗರಾ ಚ, ಸೋಭೇನ್ತಿ ಮಮ ಅಸ್ಸಮಂ.

೩೪೭. ‘‘ಪಾರೇವತಾ ರವಿಹಂಸಾ, ಚಕ್ಕವಾಕಾ ನದೀಚರಾ;

ದಿನ್ದಿಭಾ ಸಾಳಿಕಾ ಚೇತ್ಥ, ಸೋಭೇನ್ತಿ ಮಮ ಅಸ್ಸಮಂ.

೩೪೮. ‘‘ನಯಿತಾ ಅಮ್ಬಗನ್ಧೀ ಚ, ಕೇತಕಾ ತತ್ಥ ಪುಪ್ಫಿತಾ;

ದಿಬ್ಬಗನ್ಧಂ ಸಮ್ಪವನ್ತಾ, ಸೋಭೇನ್ತಿ ಮಮ ಅಸ್ಸಮಂ.

೩೪೯. ‘‘ಸೀಹಾ ಬ್ಯಗ್ಘಾ ಚ ದೀಪೀ ಚ, ಅಚ್ಛಕೋಕತರಚ್ಛಕಾ;

ಅನುಸಞ್ಚರನ್ತಾ ಪವನೇ, ಸೋಭೇನ್ತಿ ಮಮ ಅಸ್ಸಮಂ.

೩೫೦. ‘‘ಜಟಾಭಾರೇನ ಭರಿತಾ, ಅಜಿನುತ್ತರವಾಸನಾ;

ಅನುಸಞ್ಚರನ್ತಾ ಪವನೇ, ಸೋಭೇನ್ತಿ ಮಮ ಅಸ್ಸಮಂ.

೩೫೧. ‘‘ಅಜಿನಾನಿಧರಾ ಏತೇ, ನಿಪಕಾ ಸನ್ತವುತ್ತಿನೋ;

ಅಪ್ಪಾಹಾರಾವ ತೇ ಸಬ್ಬೇ, ಸೋಭೇನ್ತಿ ಮಮ ಅಸ್ಸಮಂ.

೩೫೨. ‘‘ಖಾರಿಭಾರಂ ಗಹೇತ್ವಾನ, ಅಜ್ಝೋಗಯ್ಹ ವನಂ ತದಾ;

ಮೂಲಫಲಾನಿ ಭುಞ್ಜನ್ತಾ, ವಸನ್ತಿ ಅಸ್ಸಮೇ ತದಾ.

೩೫೩. ‘‘ನ ತೇ ದಾರುಂ ಆಹರನ್ತಿ, ಉದಕಂ ಪಾದಧೋವನಂ;

ಸಬ್ಬೇಸಂ ಆನುಭಾವೇನ, ಸಯಮೇವಾಹರೀಯತಿ.

೩೫೪. ‘‘ಚುಲ್ಲಾಸೀತಿಸಹಸ್ಸಾನಿ, ಇಸಯೇತ್ಥ ಸಮಾಗತಾ;

ಸಬ್ಬೇವ ಝಾಯಿನೋ ಏತೇ, ಉತ್ತಮತ್ಥಗವೇಸಕಾ.

೩೫೫. ‘‘ತಪಸ್ಸಿನೋ ಬ್ರಹ್ಮಚಾರೀ, ಚೋದೇನ್ತಾ ಅಪ್ಪನಾವ ತೇ;

ಅಮ್ಬರಾವಚರಾ ಸಬ್ಬೇ, ವಸನ್ತಿ ಅಸ್ಸಮೇ ತದಾ.

೩೫೬. ‘‘ಪಞ್ಚಾಹಂ ಸನ್ನಿಪತನ್ತಿ, ಏಕಗ್ಗಾ ಸನ್ತವುತ್ತಿನೋ;

ಅಞ್ಞೋಞ್ಞಂ ಅಭಿವಾದೇತ್ವಾ, ಪಕ್ಕಮನ್ತಿ ದಿಸಾಮುಖಾ.

೩೫೭. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ತಮನ್ಧಕಾರಂ ವಿಧಮಂ, ಉಪ್ಪಜ್ಜಿ ತಾವದೇ ಜಿನೋ.

೩೫೮. ‘‘ಮಮ ಅಸ್ಸಮಸಾಮನ್ತಾ, ಯಕ್ಖೋ ಆಸಿ ಮಹಿದ್ಧಿಕೋ;

ಸೋ ಮೇ ಸಂಸಿತ್ಥ ಸಮ್ಬುದ್ಧಂ, ಜಲಜುತ್ತಮನಾಯಕಂ.

೩೫೯. ‘‘ಏಸ ಬುದ್ಧೋ ಸಮುಪ್ಪನ್ನೋ, ಪದುಮುತ್ತರೋ ಮಹಾಮುನಿ;

ಖಿಪ್ಪಂ ಗನ್ತ್ವಾನ ಸಮ್ಬುದ್ಧಂ, ಪಯಿರೂಪಾಸ ಮಾರಿಸ.

೩೬೦. ‘‘ಯಕ್ಖಸ್ಸ ವಚನಂ ಸುತ್ವಾ, ವಿಪ್ಪಸನ್ನೇನ ಚೇತಸಾ;

ಅಸ್ಸಮಂ ಸಂಸಾಮೇತ್ವಾನ, ನಿಕ್ಖಮಿಂ ವಿಪಿನಾ ತದಾ.

೩೬೧. ‘‘ಚೇಳೇವ ಡಯ್ಹಮಾನಮ್ಹಿ, ನಿಕ್ಖಮಿತ್ವಾನ ಅಸ್ಸಮಾ;

ಏಕರತ್ತಿಂ ನಿವಾಸೇತ್ವಾ [ನಿವಸಿತ್ವಾ (ಸೀ.), ನಿವಾಸೇನ (?)], ಉಪಗಚ್ಛಿಂ ವಿನಾಯಕಂ.

೩೬೨. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಚತುಸಚ್ಚಂ ಪಕಾಸೇನ್ತೋ, ದೇಸೇಸಿ ಅಮತಂ ಪದಂ.

೩೬೩. ‘‘ಸುಫುಲ್ಲಂ ಪದುಮಂ ಗಯ್ಹ, ಉಪಗನ್ತ್ವಾ ಮಹೇಸಿನೋ;

ಪಸನ್ನಚಿತ್ತೋ ಸುಮನೋ, ಬುದ್ಧಸ್ಸ ಅಭಿರೋಪಯಿಂ.

೩೬೪. ‘‘ಪೂಜಯಿತ್ವಾನ ಸಮ್ಬುದ್ಧಂ, ಜಲಜುತ್ತಮನಾಯಕಂ;

ಏಕಂಸಂ ಅಜಿನಂ ಕತ್ವಾ, ಸನ್ಥವಿಂ ಲೋಕನಾಯಕಂ.

೩೬೫. ‘‘ಯೇನ ಞಾಣೇನ ಸಮ್ಬುದ್ಧೋ, ವಸತೀಹ ಅನಾಸವೋ;

ತಂ ಞಾಣಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೩೬೬. ‘‘‘ಸಂಸಾರಸೋತಂ ಛಿನ್ದಿತ್ವಾ, ತಾರೇಸಿ ಸಬ್ಬಪಾಣಿನಂ;

ತವ ಧಮ್ಮಂ ಸುಣಿತ್ವಾನ, ತಣ್ಹಾಸೋತಂ ತರನ್ತಿ ತೇ.

೩೬೭. ‘‘‘ತುವಂ ಸತ್ಥಾ ಚ ಕೇತು ಚ, ಧಜೋ ಯೂಪೋ ಚ ಪಾಣಿನಂ;

ಪರಾಯಣೋ ಪತಿಟ್ಠಾ ಚ, ದೀಪೋ ಚ ದ್ವಿಪದುತ್ತಮ [ದಿಪದುತ್ತಮ (ಸೀ. ಸ್ಯಾ. ಪೀ.)].

೩೬೮. ‘‘‘ಯಾವತಾ ಗಣಿನೋ ಲೋಕೇ, ಸತ್ಥವಾಹಾ ಪವುಚ್ಚರೇ;

ತುವಂ ಅಗ್ಗೋಸಿ ಸಬ್ಬಞ್ಞು, ತವ ಅನ್ತೋಗಧಾವ ತೇ.

೩೬೯. ‘‘‘ತವ ಞಾಣೇನ ಸಬ್ಬಞ್ಞು, ತಾರೇಸಿ ಜನತಂ ಬಹುಂ;

ತವ ದಸ್ಸನಮಾಗಮ್ಮ, ದುಕ್ಖಸ್ಸನ್ತಂ ಕರಿಸ್ಸರೇ.

೩೭೦. ‘‘‘ಯೇ ಕೇಚಿಮೇ ಗನ್ಧಜಾತಾ, ಲೋಕೇ ವಾಯನ್ತಿ ಚಕ್ಖುಮ;

ತವ ಗನ್ಧಸಮೋ ನತ್ಥಿ, ಪುಞ್ಞಕ್ಖೇತ್ತೇ ಮಹಾಮುನೇ’.

೩೭೧. ‘‘‘ತಿರಚ್ಛಾನಯೋನಿಂ ನಿರಯಂ, ಪರಿಮೋಚೇಸಿ [ಪರಿಮೋಚೇಹಿ (ಸ್ಯಾ. ಕ.)] ಚಕ್ಖುಮ;

ಅಸಙ್ಖತಂ ಪದಂ ಸನ್ತಂ, ದೇಸೇಸಿ [ದೇಸೇಹಿ (ಸ್ಯಾ. ಕ.)] ತ್ವಂ ಮಹಾಮುನೇ’.

೩೭೨. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೩೭೩. ‘‘‘ಯೋ ಮೇ ಞಾಣಂ ಅಪೂಜೇಸಿ, ಪಸನ್ನೋ ಸೇಹಿ ಪಾಣಿಭಿ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೩೭೪. ‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;

ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ’.

೩೭೫. ‘‘ಸುಲದ್ಧಲಾಭಂ ಲದ್ಧೋಮ್ಹಿ, ತೋಸಯಿತ್ವಾನ ಸುಬ್ಬತಂ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೩೭೬. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೩೭೭. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೩೭೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಉದೇನೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉದೇನತ್ಥೇರಸ್ಸಾಪದಾನಂ ದಸಮಂ.

ಮೇತ್ತೇಯ್ಯವಗ್ಗೋ ಏಕಚತ್ತಾಲೀಸಮೋ.