೮. ತೋದೇಯ್ಯತ್ಥೇರಅಪದಾನಂ

೨೨೪. ‘‘ರಾಜಾ ಅಜಿತಞ್ಜಯೋ [ರಾಜಾಸಿ ವಿಜಯೋ (ಸೀ. ಅಟ್ಠ.), ರಾಜಾ ವಿಜಿತಜಯೋ (ಸ್ಯಾ.)] ನಾಮ, ಕೇತುಮತೀಪುರುತ್ತಮೇ;

ಸೂರೋ ವಿಕ್ಕಮಸಮ್ಪನ್ನೋ, ಪುರಮಜ್ಝಾವಸೀ ತದಾ.

೨೨೫. ‘‘ತಸ್ಸ ರಞ್ಞೋ ಪಮತ್ತಸ್ಸ, ಅಟವಿಯೋ ಸಮುಟ್ಠಹುಂ;

ಓತಾರಾ [ಉತ್ತರಾ (ಸ್ಯಾ.), ಓಚರಾ (ಪೀ.)] ತುಣ್ಡಿಕಾ ಚೇವ, ರಟ್ಠಂ ವಿದ್ಧಂಸಯುಂ ತದಾ.

೨೨೬. ‘‘ಪಚ್ಚನ್ತೇ ಕುಪಿತೇ ಖಿಪ್ಪಂ, ಸನ್ನಿಪಾತೇಸಿರಿನ್ದಮೋ;

ಭಟೇ ಚೇವ ಬಲತ್ಥೇ ಚ, ಅರಿಂ ನಿಗ್ಗಾಹಯಿ ತದಾ.

೨೨೭. ‘‘ಹತ್ಥಾರೋಹಾ ಅನೀಕಟ್ಠಾ, ಸೂರಾ ಚ ಚಮ್ಮಯೋಧಿನೋ;

ಧನುಗ್ಗಹಾ ಚ ಉಗ್ಗಾ ಚ, ಸಬ್ಬೇ ಸನ್ನಿಪತುಂ ತದಾ.

೨೨೮. ‘‘ಆಳಾರಿಕಾ ಚ ಕಪ್ಪಕಾ, ನ್ಹಾಪಕಾ ಮಾಲಕಾರಕಾ;

ಸೂರಾ ವಿಜಿತಸಙ್ಗಾಮಾ, ಸಬ್ಬೇ ಸನ್ನಿಪತುಂ ತದಾ.

೨೨೯. ‘‘ಖಗ್ಗಹತ್ಥಾ ಚ ಪುರಿಸಾ, ಚಾಪಹತ್ಥಾ ಚ ವಮ್ಮಿನೋ;

ಲುದ್ದಾ ವಿಜಿತಸಙ್ಗಾಮಾ, ಸಬ್ಬೇ ಸನ್ನಿಪತುಂ ತದಾ.

೨೩೦. ‘‘ತಿಧಾಪಭಿನ್ನಾ ಮಾತಙ್ಗಾ, ಕುಞ್ಜರಾ ಸಟ್ಠಿಹಾಯನಾ;

ಸುವಣ್ಣಕಚ್ಛಾಲಙ್ಕಾರಾ, ಸಬ್ಬೇ ಸನ್ನಿಪತುಂ ತದಾ.

೨೩೧. ‘‘ಖಮಾ ಸೀತಸ್ಸ ಉಣ್ಹಸ್ಸ, ಉಕ್ಕಾರುಹರಣಸ್ಸ ಚ;

ಯೋಧಾಜೀವಾ ಕತಕಮ್ಮಾ, ಸಬ್ಬೇ ಸನ್ನಿಪತುಂ ತದಾ.

೨೩೨. ‘‘ಸಙ್ಖಸದ್ದಂ ಭೇರಿಸದ್ದಂ, ಅಥೋ ಉತುಜ [ಉದ್ಧವ (ಸೀ.), ಉದ್ದಟ (ಸ್ಯಾ.)] ಸದ್ದಕಂ;

ಏತೇಹಿ ತೇ ಹಾಸಯನ್ತಾ, ಸಬ್ಬೇ ಸನ್ನಿಪತುಂ ತದಾ.

೨೩೩. ‘‘ತಿಸೂಲಕೋನ್ತಿಮನ್ತೇಹಿ [ತಿಸೂಲಕೋನ್ತಮನ್ತೇಹಿ (ಸೀ.), ಕವಚೇಹಿ ತೋಮರೇಹಿ (ಸೀ.), ಧನೂಹಿ ತೋಮರೇಹಿ (ಸ್ಯಾ.)] ಚ;

ಕೋಟ್ಟೇನ್ತಾನಂ ನಿಪಾತೇನ್ತಾ [ಕೋಟ್ಟಯನ್ತಾ ನಿವತ್ತೇನ್ತಾ (ಸ್ಯಾ.)], ಸಬ್ಬೇ ಸನ್ನಿಪತುಂ ತದಾ.

೨೩೪. ‘‘ಕಿಮೇವಾತಿನಿಸಾಮೇತ್ವಾ [ಕವಚಾನಿವಾಸೇತ್ವಾ (ಸ್ಯಾ.)], ಸರಾಜಾ ಅಜಿತಞ್ಜಯೋ [ಅಜಿನಂ ಜಿನೋ (ಸೀ.), ಅಜಿತಞ್ಜಿನೋ (ಸ್ಯಾ.)];

ಸಟ್ಠಿ ಪಾಣಸಹಸ್ಸಾನಿ, ಸೂಲೇ ಉತ್ತಾಸಯಿಂ ತದಾ.

೨೩೫. ‘‘ಸದ್ದಂ ಮಾನುಸಕಾಕಂಸು, ಅಹೋ ರಾಜಾ ಅಧಮ್ಮಿಕೋ;

ನಿರಯೇ ಪಚ್ಚಮಾನಸ್ಸ, ಕದಾ ಅನ್ತೋ ಭವಿಸ್ಸತಿ.

೨೩೬. ‘‘ಸಯನೇಹಂ ತುವಟ್ಟೇನ್ತೋ, ಪಸ್ಸಾಮಿ ನಿರಯೇ ತದಾ;

ನ ಸುಪಾಮಿ ದಿವಾರತ್ತಿಂ, ಸೂಲೇನ ತಜ್ಜಯನ್ತಿ ಮಂ.

೨೩೭. ‘‘ಕಿಂ ಪಮಾದೇನ ರಜ್ಜೇನ, ವಾಹನೇನ ಬಲೇನ ಚ;

ನ ತೇ ಪಹೋನ್ತಿ ಧಾರೇತುಂ, ತಾಪಯನ್ತಿ [ತಾಸಯನ್ತಿ (ಸೀ. ಸ್ಯಾ.)] ಮಮಂ ಸದಾ.

೨೩೮. ‘‘ಕಿಂ ಮೇ ಪುತ್ತೇಹಿ ದಾರೇಹಿ, ರಜ್ಜೇನ ಸಕಲೇನ ಚ;

ಯಂನೂನ ಪಬ್ಬಜೇಯ್ಯಾಹಂ, ಗತಿಮಗ್ಗಂ ವಿಸೋಧಯೇ.

೨೩೯. ‘‘ಸಟ್ಠಿ ನಾಗಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತೇ;

ಸುವಣ್ಣಕಚ್ಛೇ ಮಾತಙ್ಗೇ, ಹೇಮಕಪ್ಪನವಾಸಸೇ.

೨೪೦. ‘‘ಆರೂಳ್ಹೇ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ;

ಸಙ್ಗಾಮಾವಚರೇ ಠಾನೇ, ಅನಪೇಕ್ಖೋ ವಿಹಾಯಹಂ;

ಸಕಕಮ್ಮೇನ ಸನ್ತತ್ತೋ, ನಿಕ್ಖಮಿಂ ಅನಗಾರಿಯಂ.

೨೪೧. ‘‘ಸಟ್ಠಿ ಅಸ್ಸಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತೇ;

ಆಜಾನೀಯೇವ ಜಾತಿಯಾ, ಸಿನ್ಧವೇ ಸೀಘವಾಹನೇ.

೨೪೨. ‘‘ಆರೂಳ್ಹೇ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;

ಪಹಾರೇತ್ವಾನ [ಪಹಾಯಿತ್ವಾನ (ಸೀ. ಪೀ.), ಛಡ್ಡಯಿತ್ವಾನ (ಸ್ಯಾ.)] ತೇ ಸಬ್ಬೇ, ನಿಕ್ಖಮಿಂ ಅನಗಾರಿಯಂ.

೨೪೩. ‘‘ಸಟ್ಠಿ ರಥಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತೇ;

ದೀಪೇ ಅಥೋಪಿ ವೇಯಗ್ಘೇ, ಸನ್ನದ್ಧೇ ಉಸ್ಸಿತದ್ಧಜೇ;

ತೇ ಸಬ್ಬೇ ಪರಿಹಾರೇತ್ವಾ [ಪರಿವಜ್ಜೇತ್ವಾ (ಸ್ಯಾ.), ಪರಿಹಾಯಿತ್ವಾ (ಪೀ.)], ಪಬ್ಬಜಿಂ ಅನಗಾರಿಯಂ.

೨೪೪. ‘‘ಸಟ್ಠಿ ಧೇನುಸಹಸ್ಸಾನಿ, ಸಬ್ಬಾ ಕಂಸೂಪಧಾರಣಾ;

ತಾಯೋಪಿ [ಗಾವಿಯೋ (ಸ್ಯಾ.), ಧೇನುಯೋ (ಕ.)] ಛಡ್ಡಯಿತ್ವಾನ, ಪಬ್ಬಜಿಂ ಅನಗಾರಿಯಂ.

೨೪೫. ‘‘ಸಟ್ಠಿ ಇತ್ಥಿಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;

ವಿಚಿತ್ತವತ್ಥಾಭರಣಾ, ಆಮುಕ್ಕಮಣಿಕುಣ್ಡಲಾ.

೨೪೬. ‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;

ತಾ ಹಿತ್ವಾ ಕನ್ದಮಾನಾಯೋ, ಪಬ್ಬಜಿಂ ಅನಗಾರಿಯಂ.

೨೪೭. ‘‘ಸಟ್ಠಿ ಗಾಮಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ಛಡ್ಡಯಿತ್ವಾನ ತಂ ರಜ್ಜಂ, ಪಬ್ಬಜಿಂ ಅನಗಾರಿಯಂ.

೨೪೮. ‘‘ನಗರಾ ನಿಕ್ಖಮಿತ್ವಾನ, ಹಿಮವನ್ತಮುಪಾಗಮಿಂ;

ಭಾಗೀರಥೀನದೀತೀರೇ, ಅಸ್ಸಮಂ ಮಾಪಯಿಂ ಅಹಂ.

೨೪೯. ‘‘ಪಣ್ಣಸಾಲಂ ಕರಿತ್ವಾನ, ಅಗ್ಯಾಗಾರಂ ಅಕಾಸಹಂ;

ಆರದ್ಧವೀರಿಯೋ ಪಹಿತತ್ತೋ, ವಸಾಮಿ ಅಸ್ಸಮೇ ಅಹಂ.

೨೫೦. ‘‘ಮಣ್ಡಪೇ ರುಕ್ಖಮೂಲೇ ವಾ, ಸುಞ್ಞಾಗಾರೇ ಚ ಝಾಯತೋ;

ನ ತು ವಿಜ್ಜತಿ ತಾಸೋ ಮೇ, ನ ಪಸ್ಸೇ ಭಯಭೇರವಂ.

೨೫೧. ‘‘ಸುಮೇಧೋ ನಾಮ ಸಮ್ಬುದ್ಧೋ, ಅಗ್ಗೋ ಕಾರುಣಿಕೋ ಮುನಿ;

ಞಾಣಾಲೋಕೇನ ಜೋತನ್ತೋ, ಲೋಕೇ ಉಪ್ಪಜ್ಜಿ ತಾವದೇ.

೨೫೨. ‘‘ಮಮ ಅಸ್ಸಮಸಾಮನ್ತಾ, ಯಕ್ಖೋ ಆಸಿ ಮಹಿದ್ಧಿಕೋ;

ಬುದ್ಧಸೇಟ್ಠಮ್ಹಿ ಉಪ್ಪನ್ನೇ, ಆರೋಚೇಸಿ ಮಮಂ ತದಾ.

೨೫೩. ‘‘ಬುದ್ಧೋ ಲೋಕೇ ಸಮುಪ್ಪನ್ನೋ, ಸುಮೇಧೋ ನಾಮ ಚಕ್ಖುಮಾ;

ತಾರೇತಿ ಜನತಂ ಸಬ್ಬಂ, ತಮ್ಪಿ ಸೋ ತಾರಯಿಸ್ಸತಿ.

೨೫೪. ‘‘ಯಕ್ಖಸ್ಸ ವಚನಂ ಸುತ್ವಾ, ಸಂವಿಗ್ಗೋ ಆಸಿ ತಾವದೇ;

ಬುದ್ಧೋ ಬುದ್ಧೋತಿ ಚಿನ್ತೇನ್ತೋ, ಅಸ್ಸಮಂ ಪಟಿಸಾಮಯಿಂ.

೨೫೫. ‘‘ಅಗ್ಗಿದಾರುಞ್ಚ ಛಡ್ಡೇತ್ವಾ, ಸಂಸಾಮೇತ್ವಾನ ಸನ್ಥತಂ;

ಅಸ್ಸಮಂ ಅಭಿವನ್ದಿತ್ವಾ, ನಿಕ್ಖಮಿಂ ವಿಪಿನಾ ಅಹಂ.

೨೫೬. ‘‘ತತೋ ಚನ್ದನಮಾದಾಯ, ಗಾಮಾ ಗಾಮಂ ಪುರಾ ಪುರಂ;

ದೇವದೇವಂ ಗವೇಸನ್ತೋ, ಉಪಗಚ್ಛಿಂ ವಿನಾಯಕಂ.

೨೫೭. ‘‘ಭಗವಾ ತಮ್ಹಿ ಸಮಯೇ, ಸುಮೇಧೋ ಲೋಕನಾಯಕೋ;

ಚತುಸಚ್ಚಂ ಪಕಾಸೇನ್ತೋ, ಬೋಧೇತಿ ಜನತಂ ಬಹುಂ.

೨೫೮. ‘‘ಅಞ್ಜಲಿಂ ಪಗ್ಗಹೇತ್ವಾನ, ಸೀಸೇ ಕತ್ವಾನ ಚನ್ದನಂ;

ಸಮ್ಬುದ್ಧಂ ಅಭಿವಾದೇತ್ವಾ, ಇಮಾ ಗಾಥಾ ಅಭಾಸಹಂ.

೨೫೯. ‘‘‘ವಸ್ಸಿಕೇ ಪುಪ್ಫಮಾನಮ್ಹಿ, ಸನ್ತಿಕೇ ಉಪವಾಯತಿ;

ತ್ವಂ ವೀರ ಗುಣಗನ್ಧೇನ, ದಿಸಾ ಸಬ್ಬಾ ಪವಾಯಸಿ.

೨೬೦. ‘‘‘ಚಮ್ಪಕೇ ನಾಗವನಿಕೇ, ಅತಿಮುತ್ತಕಕೇತಕೇ;

ಸಾಲೇಸು ಪುಪ್ಫಮಾನೇಸು, ಅನುವಾತಂ ಪವಾಯತಿ.

೨೬೧. ‘‘‘ತವ ಗನ್ಧಂ ಸುಣಿತ್ವಾನ, ಹಿಮವನ್ತಾ ಇಧಾಗಮಿಂ;

ಪೂಜೇಮಿ ತಂ ಮಹಾವೀರ, ಲೋಕಜೇಟ್ಠ ಮಹಾಯಸ’.

೨೬೨. ‘‘ವರಚನ್ದನೇನಾನುಲಿಮ್ಪಿಂ, ಸುಮೇಧಂ ಲೋಕನಾಯಕಂ;

ಸಕಂ ಚಿತ್ತಂ ಪಸಾದೇತ್ವಾ, ತುಣ್ಹೀ ಅಟ್ಠಾಸಿ ತಾವದೇ.

೨೬೩. ‘‘ಸುಮೇಧೋ ನಾಮ ಭಗವಾ, ಲೋಕಜೇಟ್ಠೋ ನರಾಸಭೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೨೬೪. ‘‘‘ಯೋ ಮೇ ಗುಣೇ ಪಕಿತ್ತೇಸಿ, ಚನ್ದನಞ್ಚ ಅಪೂಜಯಿ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೨೬೫. ‘‘‘ಆದೇಯ್ಯವಾಕ್ಯವಚನೋ, ಬ್ರಹ್ಮಾ ಉಜು ಪತಾಪವಾ;

ಪಞ್ಚವೀಸತಿಕಪ್ಪಾನಿ, ಸಪ್ಪಭಾಸೋ ಭವಿಸ್ಸತಿ.

೨೬೬. ‘‘‘ಛಬ್ಬೀಸತಿಕಪ್ಪಸತೇ, ದೇವಲೋಕೇ ರಮಿಸ್ಸತಿ;

ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.

೨೬೭. ‘‘‘ತೇತ್ತಿಂಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೨೬೮. ‘‘‘ತತೋ ಚುತೋಯಂ ಮನುಜೋ, ಮನುಸ್ಸತ್ತಂ ಗಮಿಸ್ಸತಿ;

ಪುಞ್ಞಕಮ್ಮೇನ ಸಂಯುತ್ತೋ, ಬ್ರಹ್ಮಬನ್ಧು ಭವಿಸ್ಸತಿ.

೨೬೯. ‘‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;

ತಿಲಕ್ಖಣೇನ ಸಮ್ಪನ್ನೋ, ಬಾವರೀ ನಾಮ ಬ್ರಾಹ್ಮಣೋ.

೨೭೦. ‘‘‘ತಸ್ಸ ಸಿಸ್ಸೋ ಭವಿತ್ವಾನ, ಹೇಸ್ಸತಿ ಮನ್ತಪಾರಗೂ;

ಉಪಗನ್ತ್ವಾನ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ.

೨೭೧. ‘‘‘ಪುಚ್ಛಿತ್ವಾ ನಿಪುಣೇ ಪಞ್ಹೇ, ಭಾವಯಿತ್ವಾನ ಅಞ್ಜಸಂ [ಹಾಸಯಿತ್ವಾನ ಮಾನಸಂ (ಸ್ಯಾ.), ಭಾವಯಿತ್ವಾನ ಸಞ್ಚಯಂ (ಕ.)];

ಸಬ್ಬಾಸವೇ ಪರಿಞ್ಞಾಯ, ವಿಹರಿಸ್ಸತಿನಾಸವೋ’.

೨೭೨. ‘‘ತಿವಿಧಗ್ಗಿ ನಿಬ್ಬುತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೨೭೩. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೨೭೪. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೨೭೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತೋದೇಯ್ಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತೋದೇಯ್ಯತ್ಥೇರಸ್ಸಾಪದಾನಂ ಅಟ್ಠಮಂ.