೭. ಹೇಮಕತ್ಥೇರಅಪದಾನಂ

೧೮೩. ‘‘ಪಬ್ಭಾರಕೂಟಂ ನಿಸ್ಸಾಯ, ಅನೋಮೋ ನಾಮ ತಾಪಸೋ;

ಅಸ್ಸಮಂ ಸುಕತಂ ಕತ್ವಾ, ಪಣ್ಣಸಾಲೇ ವಸೀ ತದಾ.

೧೮೪. ‘‘ಸಿದ್ಧಂ ತಸ್ಸ ತಪೋ ಕಮ್ಮಂ, ಸಿದ್ಧಿಪತ್ತೋ ಸಕೇ ಬಲೇ;

ಸಕಸಾಮಞ್ಞವಿಕ್ಕನ್ತೋ, ಆತಾಪೀ ನಿಪಕೋ ಮುನಿ.

೧೮೫. ‘‘ವಿಸಾರದೋ ಸಸಮಯೇ, ಪರವಾದೇ ಚ ಕೋವಿದೋ;

ಪಟ್ಠೋ ಭೂಮನ್ತಲಿಕ್ಖಮ್ಹಿ, ಉಪ್ಪಾತಮ್ಹಿ ಚ ಕೋವಿದೋ.

೧೮೬. ‘‘ವೀತಸೋಕೋ ನಿರಾರಮ್ಭೋ, ಅಪ್ಪಾಹಾರೋ ಅಲೋಲುಪೋ;

ಲಾಭಾಲಾಭೇನ ಸನ್ತುಟ್ಠೋ, ಝಾಯೀ ಝಾನರತೋ ಮುನಿ.

೧೮೭. ‘‘ಪಿಯದಸ್ಸೀ ನಾಮ ಸಮ್ಬುದ್ಧೋ, ಅಗ್ಗೋ ಕಾರುಣಿಕೋ ಮುನಿ;

ಸತ್ತೇ ತಾರೇತುಕಾಮೋ ಸೋ, ಕರುಣಾಯ ಫರೀ ತದಾ.

೧೮೮. ‘‘ಬೋಧನೇಯ್ಯಂ ಜನಂ ದಿಸ್ವಾ, ಪಿಯದಸ್ಸೀ ಮಹಾಮುನಿ;

ಚಕ್ಕವಾಳಸಹಸ್ಸಮ್ಪಿ, ಗನ್ತ್ವಾ ಓವದತೇ ಮುನಿ.

೧೮೯. ‘‘ಮಮುದ್ಧರಿತುಕಾಮೋ ಸೋ, ಮಮಸ್ಸಮಮುಪಾಗಮಿ;

ನ ದಿಟ್ಠೋ ಮೇ ಜಿನೋ ಪುಬ್ಬೇ, ನ ಸುತೋಪಿ ಚ ಕಸ್ಸಚಿ.

೧೯೦. ‘‘ಉಪ್ಪಾತಾ ಸುಪಿನಾ ಮಯ್ಹಂ, ಲಕ್ಖಣಾ ಸುಪ್ಪಕಾಸಿತಾ;

ಪಟ್ಠೋ ಭೂಮನ್ತಲಿಕ್ಖಮ್ಹಿ, ನಕ್ಖತ್ತಪದಕೋವಿದೋ.

೧೯೧. ‘‘ಸೋಹಂ ಬುದ್ಧಸ್ಸ ಸುತ್ವಾನ, ತತ್ಥ ಚಿತ್ತಂ ಪಸಾದಯಿಂ;

ತಿಟ್ಠನ್ತೋ [ಭುಞ್ಜನ್ತೋ (ಸೀ. ಪೀ. ಕ.)] ವಾ ನಿಸಿನ್ನೋ ವಾ, ಸರಾಮಿ ನಿಚ್ಚಕಾಲಿಕಂ.

೧೯೨. ‘‘ಮಯಿ ಏವಂ ಸರನ್ತಮ್ಹಿ, ಭಗವಾಪಿ ಅನುಸ್ಸರಿ;

ಬುದ್ಧಂ ಅನುಸ್ಸರನ್ತಸ್ಸ, ಪೀತಿ ಮೇ ಹೋತಿ ತಾವದೇ.

೧೯೩. ‘‘ಕಾಲಞ್ಚ ಪುನರಾಗಮ್ಮ, ಉಪೇಸಿ ಮಂ ಮಹಾಮುನಿ;

ಸಮ್ಪತ್ತೇಪಿ ನ ಜಾನಾಮಿ, ಅಯಂ ಬುದ್ಧೋ ಮಹಾಮುನಿ.

೧೯೪. ‘‘ಅನುಕಮ್ಪಕೋ ಕಾರುಣಿಕೋ, ಪಿಯದಸ್ಸೀ ಮಹಾಮುನಿ;

ಸಞ್ಜಾನಾಪೇಸಿ ಅತ್ತಾನಂ, ‘ಅಹಂ ಬುದ್ಧೋ ಸದೇವಕೇ’.

೧೯೫. ‘‘ಸಞ್ಜಾನಿತ್ವಾನ ಸಮ್ಬುದ್ಧಂ, ಪಿಯದಸ್ಸಿಂ ಮಹಾಮುನಿಂ;

ಸಕಂ ಚಿತ್ತಂ ಪಸಾದೇತ್ವಾ, ಇದಂ ವಚನಮಬ್ರವಿಂ.

೧೯೬. ‘‘‘ಅಞ್ಞೇ [ಸಬ್ಬೇ (ಸ್ಯಾ.)] ಪೀಠೇ ಚ ಪಲ್ಲಙ್ಕೇ, ಆಸನ್ದೀಸು ನಿಸೀದರೇ;

ತುವಮ್ಪಿ ಸಬ್ಬದಸ್ಸಾವೀ, ನಿಸೀದ ರತನಾಸನೇ’.

೧೯೭. ‘‘ಸಬ್ಬರತನಮಯಂ ಪೀಠಂ, ನಿಮ್ಮಿನಿತ್ವಾನ ತಾವದೇ;

ಪಿಯದಸ್ಸಿಸ್ಸ ಮುನಿನೋ, ಅದಾಸಿಂ ಇದ್ಧಿನಿಮ್ಮಿತಂ.

೧೯೮. ‘‘ರತನೇ ಚ ನಿಸಿನ್ನಸ್ಸ, ಪೀಠಕೇ ಇದ್ಧಿನಿಮ್ಮಿತೇ;

ಕುಮ್ಭಮತ್ತಂ ಜಮ್ಬುಫಲಂ, ಅದಾಸಿಂ ತಾವದೇ ಅಹಂ.

೧೯೯. ‘‘ಮಮ ಹಾಸಂ ಜನೇತ್ವಾನ, ಪರಿಭುಞ್ಜಿ ಮಹಾಮುನಿ;

ತದಾ ಚಿತ್ತಂ ಪಸಾದೇತ್ವಾ, ಸತ್ಥಾರಂ ಅಭಿವಾದಯಿಂ.

೨೦೦. ‘‘ಪಿಯದಸ್ಸೀ ತು ಭಗವಾ, ಲೋಕಜೇಟ್ಠೋ ನರಾಸಭೋ;

ರತನಾಸನಮಾಸೀನೋ, ಇಮಾ ಗಾಥಾ ಅಭಾಸಥ.

೨೦೧. ‘‘‘ಯೋ ಮೇ ರತನಮಯಂ ಪೀಠಂ, ಅಮತಞ್ಚ ಫಲಂ ಅದಾ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೨೦೨. ‘‘‘ಸತ್ತಸತ್ತತಿ ಕಪ್ಪಾನಿ, ದೇವಲೋಕೇ ರಮಿಸ್ಸತಿ;

ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.

೨೦೩. ‘‘‘ದ್ವತ್ತಿಂಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೨೦೪. ‘‘‘ಸೋಣ್ಣಮಯಂ ರೂಪಿಮಯಂ, ಪಲ್ಲಙ್ಕಂ ಸುಕತಂ ಬಹುಂ;

ಲೋಹಿತಙ್ಗಮಯಞ್ಚೇವ, ಲಚ್ಛತಿ ರತನಾಮಯಂ.

೨೦೫. ‘‘‘ಚಙ್ಕಮನ್ತಮ್ಪಿ ಮನುಜಂ, ಪುಞ್ಞಕಮ್ಮಸಮಙ್ಗಿನಂ;

ಪಲ್ಲಙ್ಕಾನಿ ಅನೇಕಾನಿ, ಪರಿವಾರೇಸ್ಸರೇ ತದಾ.

೨೦೬. ‘‘‘ಕೂಟಾಗಾರಾ ಚ ಪಾಸಾದಾ, ಸಯನಞ್ಚ ಮಹಾರಹಂ;

ಇಮಸ್ಸ ಚಿತ್ತಮಞ್ಞಾಯ, ನಿಬ್ಬತ್ತಿಸ್ಸನ್ತಿ ತಾವದೇ.

೨೦೭. ‘‘‘ಸಟ್ಠಿ ನಾಗಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;

ಸುವಣ್ಣಕಚ್ಛಾ ಮಾತಙ್ಗಾ, ಹೇಮಕಪ್ಪನವಾಸಸಾ [ಹೇಮಕಪ್ಪನಿವಾಸನಾ (ಸೀ. ಸ್ಯಾ.), ಹೇಮಕಪ್ಪನಿವಾಸಸಾ (ಕ.)].

೨೦೮. ‘‘‘ಆರೂಳ್ಹಾ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ;

ಇಮಂ ಪರಿಚರಿಸ್ಸನ್ತಿ, ರತ್ನಪೀಠಸ್ಸಿದಂ ಫಲಂ.

೨೦೯. ‘‘‘ಸಟ್ಠಿ ಅಸ್ಸಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;

ಆಜಾನೀಯಾವ ಜಾತಿಯಾ, ಸಿನ್ಧವಾ ಸೀಘವಾಹಿನೋ.

೨೧೦. ‘‘‘ಆರೂಳ್ಹಾ ಗಾಮಣೀಯೇಹಿ, ಇಲ್ಲಿಯಾಚಾಪಧಾರಿಭಿ;

ತೇಪಿಮಂ ಪರಿಚರಿಸ್ಸನ್ತಿ, ರತ್ನಪೀಠಸ್ಸಿದಂ ಫಲಂ.

೨೧೧. ‘‘‘ಸಟ್ಠಿ ರಥಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;

ದೀಪಾ ಅಥೋಪಿ ವೇಯಗ್ಘಾ, ಸನ್ನದ್ಧಾ ಉಸ್ಸಿತದ್ಧಜಾ.

೨೧೨. ‘‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ;

ಪರಿವಾರೇಸ್ಸನ್ತಿಮಂ ನಿಚ್ಚಂ, ರತ್ನಪೀಠಸ್ಸಿದಂ ಫಲಂ.

೨೧೩. ‘‘‘ಸಟ್ಠಿ ಧೇನುಸಹಸ್ಸಾನಿ, ದೋಹಞ್ಞಾ ಪುಙ್ಗವೂಸಭೇ;

ವಚ್ಛಕೇ ಜನಯಿಸ್ಸನ್ತಿ, ರತ್ನಪೀಠಸ್ಸಿದಂ ಫಲಂ.

೨೧೪. ‘‘‘ಸೋಳಸಿತ್ಥಿಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ;

ವಿಚಿತ್ತವತ್ಥಾಭರಣಾ, ಆಮುಕ್ಕಮಣಿಕುಣ್ಡಲಾ.

೨೧೫. ‘‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;

ಪರಿವಾರೇಸ್ಸನ್ತಿಮಂ ನಿಚ್ಚಂ, ರತ್ನಪೀಠಸ್ಸಿದಂ ಫಲಂ.

೨೧೬. ‘‘‘ಅಟ್ಠಾರಸೇ ಕಪ್ಪಸತೇ, ಗೋತಮೋ ನಾಮ ಚಕ್ಖುಮಾ;

ತಮನ್ಧಕಾರಂ ವಿಧಮಿತ್ವಾ, ಬುದ್ಧೋ ಲೋಕೇ ಭವಿಸ್ಸತಿ.

೨೧೭. ‘‘‘ತಸ್ಸ ದಸ್ಸನಮಾಗಮ್ಮ, ಪಬ್ಬಜಿಸ್ಸತಿಕಿಞ್ಚನೋ;

ತೋಸಯಿತ್ವಾನ ಸತ್ಥಾರಂ, ಸಾಸನೇಭಿರಮಿಸ್ಸತಿ.

೨೧೮. ‘‘‘ತಸ್ಸ ಧಮ್ಮಂ ಸುಣಿತ್ವಾನ, ಕಿಲೇಸೇ ಘಾತಯಿಸ್ಸತಿ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.

೨೧೯. ‘‘ವೀರಿಯಂ ಮೇ ಧುರಧೋರಯ್ಹಂ, ಯೋಗಕ್ಖೇಮಾಧಿವಾಹನಂ;

ಉತ್ತಮತ್ಥಂ ಪತ್ಥಯನ್ತೋ, ಸಾಸನೇ ವಿಹರಾಮಹಂ.

೨೨೦. ‘‘ಇದಂ ಪಚ್ಛಿಮಕಂ ಮಯ್ಹಂ, ಚರಿಮೋ ವತ್ತತೇ ಭವೋ;

ಸಬ್ಬಾಸವಾ ಪರಿಕ್ಖೀಣಾ, ನತ್ಥಿ ದಾನಿ ಪುನಬ್ಭವೋ.

೨೨೧. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೨೨೨. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೨೨೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಹೇಮಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಹೇಮಕತ್ಥೇರಸ್ಸಾಪದಾನಂ ಸತ್ತಮಂ.

ಸತ್ತರಸಮಂ ಭಾಣವಾರಂ.