೬. ನನ್ದಕತ್ಥೇರಅಪದಾನಂ

೧೬೧. ‘‘ಮಿಗಲುದ್ದೋ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;

ಪಸದಂ ಮಿಗಮೇಸನ್ತೋ, ಸಯಮ್ಭುಂ ಅದ್ದಸಂ ಅಹಂ [ಜಿನಂ (ಸೀ.)].

೧೬೨. ‘‘ಅನುರುದ್ಧೋ ನಾಮ ಸಮ್ಬುದ್ಧೋ, ಸಯಮ್ಭೂ ಅಪರಾಜಿತೋ;

ವಿವೇಕಕಾಮೋ ಸೋ ಧೀರೋ, ವನಮಜ್ಝೋಗಹೀ ತದಾ.

೧೬೩. ‘‘ಚತುದಣ್ಡೇ ಗಹೇತ್ವಾನ, ಚತುಟ್ಠಾನೇ ಠಪೇಸಹಂ;

ಮಣ್ಡಪಂ ಸುಕತಂ ಕತ್ವಾ, ಪದ್ಮಪುಪ್ಫೇಹಿ ಛಾದಯಿಂ.

೧೬೪. ‘‘ಮಣ್ಡಪಂ ಛಾದಯಿತ್ವಾನ, ಸಯಮ್ಭುಂ ಅಭಿವಾದಯಿಂ;

ಧನುಂ ತತ್ಥೇವ ನಿಕ್ಖಿಪ್ಪ, ಪಬ್ಬಜಿಂ ಅನಗಾರಿಯಂ.

೧೬೫. ‘‘ನಚಿರಂ ಪಬ್ಬಜಿತಸ್ಸ [ಪಬ್ಬಜಿತಸ್ಸ ಅಚಿರಂ (ಸೀ.)], ಬ್ಯಾಧಿ ಮೇ ಉದಪಜ್ಜಥ;

ಪುಬ್ಬಕಮ್ಮಂ ಸರಿತ್ವಾನ, ತತ್ಥ ಕಾಲಙ್ಕತೋ ಅಹಂ.

೧೬೬. ‘‘ಪುಬ್ಬಕಮ್ಮೇನ ಸಂಯುತ್ತೋ, ತುಸಿತಂ ಅಗಮಾಸಹಂ;

ತತ್ಥ ಸೋಣ್ಣಮಯಂ ಬ್ಯಮ್ಹಂ, ನಿಬ್ಬತ್ತತಿ ಯದಿಚ್ಛಕಂ.

೧೬೭. ‘‘ಸಹಸ್ಸಯುತ್ತಂ ಹಯವಾಹಿಂ, ದಿಬ್ಬಯಾನಮಧಿಟ್ಠಿತೋ;

ಆರುಹಿತ್ವಾನ ತಂ ಯಾನಂ, ಗಚ್ಛಾಮಹಂ ಯದಿಚ್ಛಕಂ.

೧೬೮. ‘‘ತತೋ ಮೇ ನಿಯ್ಯಮಾನಸ್ಸ, ದೇವಭೂತಸ್ಸ ಮೇ ಸತೋ;

ಸಮನ್ತಾ ಯೋಜನಸತಂ, ಮಣ್ಡಪೋ ಮೇ ಧರೀಯತಿ.

೧೬೯. ‘‘ಸಯನೇಹಂ ತುವಟ್ಟಾಮಿ, ಅಚ್ಛನ್ನೇ [ಅಚ್ಚನ್ತಂ (ಸೀ.), ಅಚ್ಚನ್ತ (ಪೀ.)] ಪುಪ್ಫಸನ್ಥತೇ;

ಅನ್ತಲಿಕ್ಖಾ ಚ ಪದುಮಾ, ವಸ್ಸನ್ತೇ ನಿಚ್ಚಕಾಲಿಕಂ.

೧೭೦. ‘‘ಮರೀಚಿಕೇ ಫನ್ದಮಾನೇ, ತಪ್ಪಮಾನೇ ಚ ಆತಪೇ;

ನ ಮಂ ತಾಪೇತಿ ಆತಾಪೋ, ಮಣ್ಡಪಸ್ಸ ಇದಂ ಫಲಂ.

೧೭೧. ‘‘ದುಗ್ಗತಿಂ ಸಮತಿಕ್ಕನ್ತೋ, ಅಪಾಯಾ ಪಿಹಿತಾ ಮಮ;

ಮಣ್ಡಪೇ ರುಕ್ಖಮೂಲೇ ವಾ, ಸನ್ತಾಪೋ ಮೇ ನ ವಿಜ್ಜತಿ.

೧೭೨. ‘‘ಮಹೀಸಞ್ಞಂ ಅಧಿಟ್ಠಾಯ, ಲೋಣತೋಯಂ ತರಾಮಹಂ;

ತಸ್ಸ ಮೇ ಸುಕತಂ ಕಮ್ಮಂ, ಬುದ್ಧಪೂಜಾಯಿದಂ ಫಲಂ.

೧೭೩. ‘‘ಅಪಥಮ್ಪಿ [ಅಬ್ಭಮ್ಹಿ (ಸ್ಯಾ. ಕ.)] ಪಥಂ ಕತ್ವಾ, ಗಚ್ಛಾಮಿ ಅನಿಲಞ್ಜಸೇ;

ಅಹೋ ಮೇ ಸುಕತಂ ಕಮ್ಮಂ, ಬುದ್ಧಪೂಜಾಯಿದಂ ಫಲಂ.

೧೭೪. ‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ;

ಆಸವಾ ಮೇ ಪರಿಕ್ಖೀಣಾ, ಬುದ್ಧಪೂಜಾಯಿದಂ ಫಲಂ.

೧೭೫. ‘‘ಜಹಿತಾ ಪುರಿಮಾ ಜಾತಿ, ಬುದ್ಧಸ್ಸ ಓರಸೋ ಅಹಂ;

ದಾಯಾದೋಮ್ಹಿ ಚ ಸದ್ಧಮ್ಮೇ, ಬುದ್ಧಪೂಜಾಯಿದಂ ಫಲಂ.

೧೭೬. ‘‘ಆರಾಧಿತೋಮ್ಹಿ ಸುಗತಂ, ಗೋತಮಂ ಸಕ್ಯಪುಙ್ಗವಂ;

ಧಮ್ಮಧಜೋ ಧಮ್ಮದಾಯಾದೋ [ಧಮ್ಮಾದಾಸೋ (ಕ.)], ಬುದ್ಧಪೂಜಾಯಿದಂ ಫಲಂ.

೧೭೭. ‘‘ಉಪಟ್ಠಿತ್ವಾನ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;

ಪಾರಙ್ಗಮನಿಯಂ ಮಗ್ಗಂ, ಅಪುಚ್ಛಿಂ ಲೋಕನಾಯಕಂ.

೧೭೮. ‘‘ಅಜ್ಝಿಟ್ಠೋ ಕಥಯೀ ಬುದ್ಧೋ, ಗಮ್ಭೀರಂ ನಿಪುಣಂ ಪದಂ;

ತಸ್ಸಾಹಂ ಧಮ್ಮಂ ಸುತ್ವಾನ, ಪತ್ತೋಮ್ಹಿ ಆಸವಕ್ಖಯಂ.

೧೭೯. ‘‘ಅಹೋ ಮೇ ಸುಕತಂ ಕಮ್ಮಂ, ಪರಿಮುತ್ತೋಮ್ಹಿ ಜಾತಿಯಾ;

ಸಬ್ಬಾಸವಪರಿಕ್ಖೀಣೋ, ನತ್ಥಿ ದಾನಿ ಪುನಬ್ಭವೋ.

೧೮೦. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೮೧. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೮೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನನ್ದಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ನನ್ದಕತ್ಥೇರಸ್ಸಾಪದಾನಂ ಛಟ್ಠಂ.