೫. ಉಪಸೀವತ್ಥೇರಅಪದಾನಂ

೧೦೦. ‘‘ಹಿಮವನ್ತಸ್ಸಾವಿದೂರೇ, ಅನೋಮೋ ನಾಮ ಪಬ್ಬತೋ;

ಅಸ್ಸಮೋ ಸುಕತೋ ಮಯ್ಹಂ, ಪಣ್ಣಸಾಲಾ ಸುಮಾಪಿತಾ.

೧೦೧. ‘‘ನದೀ ಚ ಸನ್ದತೀ ತತ್ಥ, ಸುಪತಿತ್ಥಾ ಮನೋರಮಾ;

ಅನೂಪತಿತ್ಥೇ ಜಾಯನ್ತಿ, ಪದುಮುಪ್ಪಲಕಾ ಬಹೂ.

೧೦೨. ‘‘ಪಾಠೀನಾ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ;

ಮಚ್ಛಕಚ್ಛಪಸಞ್ಛನ್ನಾ [ಮಚ್ಛಕಚ್ಛಪಸಮ್ಪನ್ನಾ (?)], ನದಿಕಾ ಸನ್ದತೇ ತದಾ.

೧೦೩. ‘‘ತಿಮಿರಾ ಪುಪ್ಫಿತಾ ತತ್ಥ, ಅಸೋಕಾ ಖುದ್ದಮಾಲಕಾ;

ಪುನ್ನಾಗಾ ಗಿರಿಪುನ್ನಾಗಾ, ಸಮ್ಪವನ್ತಿ ಮಮಸ್ಸಮಂ.

೧೦೪. ‘‘ಕುಟಜಾ ಪುಪ್ಫಿತಾ ತತ್ಥ, ತಿಣಸೂಲವನಾನಿ ಚ;

ಸಾಲಾ ಚ ಸಳಲಾ ತತ್ಥ, ಚಮ್ಪಕಾ ಪುಪ್ಫಿತಾ ಬಹೂ.

೧೦೫. ‘‘ಅಜ್ಜುನಾ ಅತಿಮುತ್ತಾ ಚ, ಮಹಾನಾಮಾ ಚ ಪುಪ್ಫಿತಾ;

ಅಸನಾ ಮಧುಗನ್ಧೀ ಚ, ಪುಪ್ಫಿತಾ ತೇ ಮಮಸ್ಸಮೇ.

೧೦೬. ‘‘ಉದ್ದಾಲಕಾ ಪಾಟಲಿಕಾ, ಯೂಥಿಕಾ ಚ ಪಿಯಙ್ಗುಕಾ;

ಬಿಮ್ಬಿಜಾಲಕಸಞ್ಛನ್ನಾ, ಸಮನ್ತಾ ಅಡ್ಢಯೋಜನಂ.

೧೦೭. ‘‘ಮಾತಗ್ಗಾರಾ [ಮಾತಙ್ಗವಾ (ಸೀ.), ಮಾತಕರಾ (ಸ್ಯಾ.), ಮಾತಙ್ಗಾ ವಾ (ಪೀ.)] ಸತ್ತಲಿಯೋ, ಪಾಟಲೀ ಸಿನ್ದುವಾರಕಾ;

ಅಙ್ಕೋಲಕಾ ಬಹೂ ತತ್ಥ, ತಾಲಕುಟ್ಠಿ [ತಾಲಕೂಟಾ (ಸೀ. ಸ್ಯಾ.), ತಾಲಕುಟ್ಠಾ (ಪೀ.)] ಚ ಪುಪ್ಫಿತಾ;

ಸೇಲೇಯ್ಯಕಾ ಬಹೂ ತತ್ಥ, ಪುಪ್ಫಿತಾ ಮಮ ಅಸ್ಸಮೇ.

೧೦೮. ‘‘ಏತೇಸು ಪುಪ್ಫಜಾತೇಸು [ಪುಪ್ಫಮಾನೇಸು (ಸೀ. ಪೀ.)], ಸೋಭನ್ತಿ ಪಾದಪಾ ಬಹೂ;

ಸಮನ್ತಾ ತೇನ ಗನ್ಧೇನ, ವಾಯತೇ ಮಮ ಅಸ್ಸಮೋ.

೧೦೯. ‘‘ಹರೀತಕಾ ಆಮಲಕಾ, ಅಮ್ಬಜಮ್ಬುವಿಭೀತಕಾ [ವಿಭಿಟಕಾ (ಸೀ.)];

ಕೋಲಾ ಭಲ್ಲಾತಕಾ ಬಿಲ್ಲಾ, ಫಾರುಸಕಫಲಾನಿ ಚ.

೧೧೦. ‘‘ತಿನ್ದುಕಾ ಚ ಪಿಯಾಲಾ ಚ, ಮಧುಕಾ ಕಾಸುಮಾರಯೋ;

ಲಬುಜಾ ಪನಸಾ ತತ್ಥ, ಕದಲೀ ಬದರೀಫಲಾ [ಮನ್ದರಿಫಲಾ (ಕ.), ಚನ್ದರೀಫಲಾ (ಸ್ಯಾ. ಪೀ.)].

೧೧೧. ‘‘ಅಮ್ಬಾಟಕಾ ಬಹೂ ತತ್ಥ, ವಲ್ಲಿಕಾರಫಲಾನಿ ಚ;

ಬೀಜಪೂರಸಪಾರಿಯೋ [ಚಿರಸಂರಸಪಾಕಾ ಚ (ಸ್ಯಾ.), ವಿಟಪಾ ಚ ಸಪಾಕಾ ಚ (ಪೀ), ವಿದಪರಪದಾದಯೋ (ಕ.)], ಫಲಿತಾ ಮಮ ಅಸ್ಸಮೇ.

೧೧೨. ‘‘ಆಳಕಾ ಇಸಿಮುಗ್ಗಾ ಚ, ತತೋ ಮೋದಫಲಾ ಬಹೂ;

ಅವಟಾ ಪಕ್ಕಭರಿತಾ [ಸಕ್ಕರಾರಿತಾ (ಕ.)], ಪಿಲಕ್ಖುದುಮ್ಬರಾನಿ ಚ.

೧೧೩. ‘‘ಪಿಪ್ಫಿಲೀ ಮರೀಚಾ ತತ್ಥ, ನಿಗ್ರೋಧಾ ಚ ಕಪಿತ್ಥನಾ;

ಉದುಮ್ಬರಕಾ ಬಹವೋ, ಕಣ್ಡುಪಣ್ಣಾ ಚ ಹರಿಯೋ [ಕಣ್ಡಪಕ್ಕಾ ಚ ಪಾರಿಯೋ (ಸೀ. ಸ್ಯಾ. ಪೀ.)].

೧೧೪. ‘‘ಏತೇ ಚಞ್ಞೇ ಚ ಬಹವೋ, ಫಲಿತಾ ಅಸ್ಸಮೇ ಮಮ;

ಪುಪ್ಫರುಕ್ಖಾಪಿ ಬಹವೋ, ಪುಪ್ಫಿತಾ ಮಮ ಅಸ್ಸಮೇ.

೧೧೫. ‘‘ಆಲುವಾ ಚ ಕಳಮ್ಬಾ ಚ, ಬಿಳಾಲೀ ತಕ್ಕಲಾನಿ ಚ;

ಆಲಕಾ ತಾಲಕಾ ಚೇವ, ವಿಜ್ಜನ್ತಿ ಅಸ್ಸಮೇ ಮಮ.

೧೧೬. ‘‘ಅಸ್ಸಮಸ್ಸಾವಿದೂರೇ ಮೇ, ಮಹಾಜಾತಸ್ಸರೋ ಅಹು;

ಅಚ್ಛೋದಕೋ ಸೀತಜಲೋ, ಸುಪತಿತ್ಥೋ ಮನೋರಮೋ.

೧೧೭. ‘‘ಪದುಮುಪ್ಪಲಾ ಬಹೂ ತತ್ಥ, ಪುಣ್ಡರೀಕಸಮಾಯುತಾ;

ಮನ್ದಾಲಕೇಹಿ ಸಞ್ಛನ್ನಾ, ನಾನಾಗನ್ಧಸಮೇರಿತಾ.

೧೧೮. ‘‘ಗಬ್ಭಂ ಗಣ್ಹನ್ತಿ ಪದುಮಾ, ಅಞ್ಞೇ ಪುಪ್ಫನ್ತಿ ಕೇಸರೀ;

ಓಪುಪ್ಫಪತ್ತಾ ತಿಟ್ಠನ್ತಿ, ಪದುಮಾಕಣ್ಣಿಕಾ ಬಹೂ.

೧೧೯. ‘‘ಮಧು ಭಿಸಮ್ಹಾ ಸವತಿ, ಖೀರಂ ಸಪ್ಪಿ ಮುಲಾಳಿಭಿ;

ಸಮನ್ತಾ ತೇನ ಗನ್ಧೇನ, ನಾನಾಗನ್ಧಸಮೇರಿತಾ.

೧೨೦. ‘‘ಕುಮುದಾ ಅಮ್ಬಗನ್ಧಿ ಚ, ನಯಿತಾ ದಿಸ್ಸರೇ ಬಹೂ;

ಜಾತಸ್ಸರಸ್ಸಾನುಕೂಲಂ, ಕೇತಕಾ ಪುಪ್ಫಿತಾ ಬಹೂ.

೧೨೧. ‘‘ಸುಫುಲ್ಲಾ ಬನ್ಧುಜೀವಾ ಚ, ಸೇತವಾರೀ ಸುಗನ್ಧಿಕಾ;

ಕುಮ್ಭಿಲಾ ಸುಸುಮಾರಾ ಚ, ಗಹಕಾ ತತ್ಥ ಜಾಯರೇ.

೧೨೨. ‘‘ಉಗ್ಗಾಹಕಾ ಅಜಗರಾ, ತತ್ಥ ಜಾತಸ್ಸರೇ ಬಹೂ;

ಪಾಠೀನಾ ಪಾವುಸಾ ಮಚ್ಛಾ, ಬಲಜಾ ಮುಞ್ಜರೋಹಿತಾ.

೧೨೩. ‘‘ಮಚ್ಛಕಚ್ಛಪಸಞ್ಛನ್ನಾ, ಅಥೋ ಪಪಟಕಾಹಿ [ಪಮ್ಪಟಕೇಹಿ (ಸೀ.), ಸಪಟಕೇಹಿ (ಸ್ಯಾ.), ಪಪ್ಪಟಕೇಹಿ (ಪೀ)] ಚ;

ಪಾರೇವತಾ ರವಿಹಂಸಾ, ಕುಕುತ್ಥಾ [ಕುಕ್ಕುತ್ಥಾ (ಸ್ಯಾ. ಕ.), ಕುತ್ಥಕಾ (ಪೀ.)] ಚ ನದೀಚರಾ.

೧೨೪. ‘‘ದಿನ್ದಿಭಾ [ಟಿಟ್ಟಿಭಾ (ಪೀ.)] ಚಕ್ಕವಾಕಾ ಚ, ಪಮ್ಪಕಾ ಜೀವಜೀವಕಾ;

ಕಲನ್ದಕಾ ಉಕ್ಕುಸಾ ಚ, ಸೇನಕಾ ಉದ್ಧರಾ ಬಹೂ.

೧೨೫. ‘‘ಕೋಟ್ಠಕಾ ಸುಕಪೋತಾ ಚ, ತುಲಿಯಾ ಚಮರಾ ಬಹೂ;

ಕಾರೇನಿಯೋ [ಕಾಸೇನಿಯಾ (ಸ್ಯಾ.)] ಚ ತಿಲಕಾ [ಕಿಲಕಾ (ಕ.)], ಉಪಜೀವನ್ತಿ ತಂ ಸರಂ.

೧೨೬. ‘‘ಸೀಹಾ ಬ್ಯಗ್ಘಾ ಚ ದೀಪೀ ಚ, ಅಚ್ಛಕೋಕತರಚ್ಛಕಾ;

ವಾನರಾ ಕಿನ್ನರಾ ಚೇವ, ದಿಸ್ಸನ್ತಿ ಮಮ ಅಸ್ಸಮೇ.

೧೨೭. ‘‘ತಾನಿ ಗನ್ಧಾನಿ ಘಾಯನ್ತೋ, ಭಕ್ಖಯನ್ತೋ ಫಲಾನಹಂ;

ಗನ್ಧೋದಕಂ ಪಿವನ್ತೋ ಚ, ವಸಾಮಿ ಮಮ ಅಸ್ಸಮೇ.

೧೨೮. ‘‘ಏಣೀಮಿಗಾ ವರಾಹಾ ಚ, ಪಸದಾ ಖುದ್ದರೂಪಕಾ;

ಅಗ್ಗಿಕಾ ಜೋತಿಕಾ ಚೇವ, ವಸನ್ತಿ ಮಮ ಅಸ್ಸಮೇ.

೧೨೯. ‘‘ಹಂಸಾ ಕೋಞ್ಚಾ ಮಯೂರಾ ಚ, ಸಾಲಿಕಾಪಿ ಚ ಕೋಕಿಲಾ;

ಮಜ್ಜಾರಿಕಾ [ಮಞ್ಜರಿಕಾ (ಸೀ. ಸ್ಯಾ. ಪೀ.)] ಬಹೂ ತತ್ಥ, ಕೋಸಿಕಾ ಪೋಟ್ಠಸೀಸಕಾ.

೧೩೦. ‘‘ಪಿಸಾಚಾ ದಾನವಾ ಚೇವ, ಕುಮ್ಭಣ್ಡಾ ರಕ್ಖಸಾ ಬಹೂ;

ಗರುಳಾ ಪನ್ನಗಾ ಚೇವ, ವಸನ್ತಿ ಮಮ ಅಸ್ಸಮೇ.

೧೩೧. ‘‘ಮಹಾನುಭಾವಾ ಇಸಯೋ, ಸನ್ತಚಿತ್ತಾ ಸಮಾಹಿತಾ;

ಕಮಣ್ಡಲುಧರಾ ಸಬ್ಬೇ, ಅಜಿನುತ್ತರವಾಸನಾ;

ಜಟಾಭಾರಭರಿತಾವ [ತೇ ಜಟಾಭಾರಭರಿತಾ (ಸೀ. ಪೀ.), ಜಟಾಭಾರಭರಿತಾ ಚ (ಸ್ಯಾ.)], ವಸನ್ತಿ ಮಮ ಅಸ್ಸಮೇ.

೧೩೨. ‘‘ಯುಗಮತ್ತಞ್ಚ ಪೇಕ್ಖನ್ತಾ, ನಿಪಕಾ ಸನ್ತವುತ್ತಿನೋ;

ಲಾಭಾಲಾಭೇನ ಸನ್ತುಟ್ಠಾ, ವಸನ್ತಿ ಮಮ ಅಸ್ಸಮೇ.

೧೩೩. ‘‘ವಾಕಚೀರಂ ಧುನನ್ತಾ ತೇ, ಫೋಟೇನ್ತಾಜಿನಚಮ್ಮಕಂ;

ಸಬಲೇಹಿ ಉಪತ್ಥದ್ಧಾ, ಗಚ್ಛನ್ತಿ ಅಮ್ಬರೇ ತದಾ.

೧೩೪. ‘‘ನ ತೇ ದಕಂ ಆಹರನ್ತಿ, ಕಟ್ಠಂ ವಾ ಅಗ್ಗಿದಾರುಕಂ;

ಸಯಞ್ಚ ಉಪಸಮ್ಪನ್ನಾ, ಪಾಟಿಹೀರಸ್ಸಿದಂ ಫಲಂ.

೧೩೫. ‘‘ಲೋಹದೋಣಿಂ ಗಹೇತ್ವಾನ, ವನಮಜ್ಝೇ ವಸನ್ತಿ ತೇ;

ಕುಞ್ಜರಾವ ಮಹಾನಾಗಾ, ಅಸಮ್ಭೀತಾವ ಕೇಸರೀ.

೧೩೬. ‘‘ಅಞ್ಞೇ ಗಚ್ಛನ್ತಿ ಗೋಯಾನಂ, ಅಞ್ಞೇ ಪುಬ್ಬವಿದೇಹಕಂ [ಪುಬ್ಬವಿದೇಹನಂ (ಸ್ಯಾ. ಪೀ. ಕ.)];

ಅಞ್ಞೇ ಚ ಉತ್ತರಕುರುಂ, ಸಕಂ ಬಲಮವಸ್ಸಿತಾ [ಬಲಮಪಸ್ಸಿತಾ (ಸ್ಯಾ. ಪೀ. ಕ.)].

೧೩೭. ‘‘ತತೋ ಪಿಣ್ಡಂ ಆಹರಿತ್ವಾ, ಪರಿಭುಞ್ಜನ್ತಿ ಏಕತೋ;

ಸಬ್ಬೇಸಂ ಪಕ್ಕಮನ್ತಾನಂ, ಉಗ್ಗತೇಜಾನ ತಾದಿನಂ.

೧೩೮. ‘‘ಅಜಿನಚಮ್ಮಸದ್ದೇನ, ವನಂ ಸದ್ದಾಯತೇ ತದಾ;

ಏದಿಸಾ ತೇ ಮಹಾವೀರ, ಸಿಸ್ಸಾ ಉಗ್ಗತಪಾ ಮಮ.

೧೩೯. ‘‘ಪರಿವುತೋ ಅಹಂ ತೇಹಿ, ವಸಾಮಿ ಮಮ ಅಸ್ಸಮೇ;

ತೋಸಿತಾ ಸಕಕಮ್ಮೇನ, ವಿನೀತಾಪಿ ಸಮಾಗತಾ.

೧೪೦. ‘‘ಆರಾಧಯಿಂಸು ಮಂ ಏತೇ, ಸಕಕಮ್ಮಾಭಿಲಾಸಿನೋ;

ಸೀಲವನ್ತೋ ಚ ನಿಪಕಾ, ಅಪ್ಪಮಞ್ಞಾಸು ಕೋವಿದಾ.

೧೪೧. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಸಮಯಂ ಸಂವಿದಿತ್ವಾನ, ಉಪಗಚ್ಛಿ ವಿನಾಯಕೋ.

೧೪೨. ‘‘ಉಪಗನ್ತ್ವಾನ ಸಮ್ಬುದ್ಧೋ, ಆತಾಪೀ ನಿಪಕೋ ಮುನಿ;

ಪತ್ತಂ ಪಗ್ಗಯ್ಹ ಸಮ್ಬುದ್ಧೋ, ಭಿಕ್ಖಾಯ ಮಮುಪಾಗಮಿ.

೧೪೩. ‘‘ಉಪಾಗತಂ ಮಹಾವೀರಂ, ಜಲಜುತ್ತಮನಾಯಕಂ;

ತಿಣಸನ್ಥರಂ [ತಿಣತ್ಥರಂ (ಸ್ಯಾ.), ತಿಣತ್ಥತಂ (ಕ.)] ಪಞ್ಞಾಪೇತ್ವಾ, ಸಾಲಪುಪ್ಫೇಹಿ ಓಕಿರಿಂ.

೧೪೪. ‘‘ನಿಸಾದೇತ್ವಾನ [ನಿಸೀದೇತ್ವಾನ (ಸೀ.), ನಿಸೀದಿತ್ವಾನ (ಸ್ಯಾ. ಪೀ.)] ಸಮ್ಬುದ್ಧಂ, ಹಟ್ಠೋ ಸಂವಿಗ್ಗಮಾನಸೋ;

ಖಿಪ್ಪಂ ಪಬ್ಬತಮಾರುಯ್ಹ, ಅಗಳುಂ [ಅಗರುಂ (ಸೀ.)] ಅಗ್ಗಹಿಂ ಅಹಂ.

೧೪೫. ‘‘ಕುಮ್ಭಮತ್ತಂ ಗಹೇತ್ವಾನ, ಪನಸಂ ದೇವಗನ್ಧಿಕಂ;

ಖನ್ಧೇ ಆರೋಪಯಿತ್ವಾನ, ಉಪಗಚ್ಛಿಂ ವಿನಾಯಕಂ.

೧೪೬. ‘‘ಫಲಂ ಬುದ್ಧಸ್ಸ ದತ್ವಾನ, ಅಗಳುಂ ಅನುಲಿಮ್ಪಹಂ;

ಪಸನ್ನಚಿತ್ತೋ ಸುಮನೋ, ಬುದ್ಧಸೇಟ್ಠಂ ಅವನ್ದಿಹಂ.

೧೪೭. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಇಸಿಮಜ್ಝೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೧೪೮. ‘‘‘ಯೋ ಮೇ ಫಲಞ್ಚ ಅಗಳುಂ, ಆಸನಞ್ಚ ಅದಾಸಿ ಮೇ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೧೪೯. ‘‘‘ಗಾಮೇ ವಾ ಯದಿ ವಾರಞ್ಞೇ, ಪಬ್ಭಾರೇಸು ಗುಹಾಸು ವಾ;

ಇಮಸ್ಸ ಚಿತ್ತಮಞ್ಞಾಯ, ನಿಬ್ಬತ್ತಿಸ್ಸತಿ ಭೋಜನಂ.

೧೫೦. ‘‘‘ದೇವಲೋಕೇ ಮನುಸ್ಸೇ ವಾ, ಉಪಪನ್ನೋ ಅಯಂ ನರೋ;

ಭೋಜನೇಹಿ ಚ ವತ್ಥೇಹಿ, ಪರಿಸಂ ತಪ್ಪಯಿಸ್ಸತಿ.

೧೫೧. ‘‘‘ಉಪಪಜ್ಜತಿ ಯಂ ಯೋನಿಂ, ದೇವತ್ತಂ ಅಥ ಮಾನುಸಂ;

ಅಕ್ಖೋಭಭೋಗೋ ಹುತ್ವಾನ, ಸಂಸರಿಸ್ಸತಿಯಂ ನರೋ.

೧೫೨. ‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;

ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.

೧೫೩. ‘‘‘ಏಕಸತ್ತತಿಕ್ಖತ್ತುಞ್ಚ, ದೇವರಜ್ಜಂ ಕರಿಸ್ಸತಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೧೫೪. ‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೧೫೫. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ [(ಉಪಸೀವೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ) (ಸ್ಯಾ.)];

ಸಬ್ಬಾಸವೇ ಪರಿಞ್ಞಾಯ, ವಿಹರಿಸ್ಸತಿನಾಸವೋ’.

೧೫೬. ‘‘ಸುಲದ್ಧಲಾಭೋ ಲದ್ಧೋ ಮೇ, ಯೋಹಂ ಅದ್ದಕ್ಖಿಂ ನಾಯಕಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೧೫೭. ‘‘ಗಾಮೇ ವಾ ಯದಿ ವಾರಞ್ಞೇ, ಪಬ್ಭಾರೇಸು ಗುಹಾಸು ವಾ;

ಮಮ ಸಙ್ಕಪ್ಪಮಞ್ಞಾಯ, ಭೋಜನಂ ಹೋತಿ ಮೇ ಸದಾ.

೧೫೮. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೧೫೯. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೧೬೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಉಪಸೀವೋ [ಉಪಸಿವೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉಪಸೀವತ್ಥೇರಸ್ಸಾಪದಾನಂ ಪಞ್ಚಮಂ.