೪. ಧೋತಕತ್ಥೇರಅಪದಾನಂ

೭೨. ‘‘ಗಙ್ಗಾ ಭಾಗೀರಥೀ ನಾಮ, ಹಿಮವನ್ತಾ ಪಭಾವಿತಾ [ಹಿಮವನ್ತಪ್ಪಭಾವಿತಾ (ಸೀ.)];

ಹಂಸವತಿಯಾ ದ್ವಾರೇನ, ಅನುಸನ್ದತಿ ತಾವದೇ.

೭೩. ‘‘ಸೋಭಿತೋ ನಾಮ ಆರಾಮೋ, ಗಙ್ಗಾಕೂಲೇ ಸುಮಾಪಿತೋ;

ತತ್ಥ ಪದುಮುತ್ತರೋ ಬುದ್ಧೋ, ವಸತೇ ಲೋಕನಾಯಕೋ.

೭೪. ‘‘ತಿದಸೇಹಿ ಯಥಾ ಇನ್ದೋ, ಮನುಜೇಹಿ ಪುರಕ್ಖತೋ;

ನಿಸೀದಿ ತತ್ಥ ಭಗವಾ, ಅಸಮ್ಭೀತೋವ ಕೇಸರೀ.

೭೫. ‘‘ನಗರೇ ಹಂಸವತಿಯಾ, ವಸಾಮಿ [ಅಹೋಸಿಂ (ಸ್ಯಾ.)] ಬ್ರಾಹ್ಮಣೋ ಅಹಂ;

ಛಳಙ್ಗೋ ನಾಮ ನಾಮೇನ, ಏವಂನಾಮೋ ಮಹಾಮುನಿ.

೭೬. ‘‘ಅಟ್ಠಾರಸ ಸಿಸ್ಸಸತಾ, ಪರಿವಾರೇನ್ತಿ ಮಂ ತದಾ;

ತೇಹಿ ಸಿಸ್ಸೇಹಿ ಸಮಿತೋ, ಗಙ್ಗಾತೀರಂ ಉಪಾಗಮಿಂ.

೭೭. ‘‘ತತ್ಥದ್ದಸಾಸಿಂ ಸಮಣೇ, ನಿಕ್ಕುಹೇ ಧೋತಪಾಪಕೇ;

ಭಾಗೀರಥಿಂ ತರನ್ತೇಹಂ [ತರನ್ತೋಹಂ (ಸ್ಯಾ. ಪೀ.)], ಏವಂ ಚಿನ್ತೇಸಿ ತಾವದೇ.

೭೮. ‘‘ಸಾಯಂ ಪಾತಂ [ಸಾಯಪಾತಂ (ಪೀ.)] ತರನ್ತಾಮೇ, ಬುದ್ಧಪುತ್ತಾ ಮಹಾಯಸಾ;

ವಿಹೇಸಯನ್ತಿ ಅತ್ತಾನಂ, ತೇಸಂ ಅತ್ತಾ ವಿಹಞ್ಞತಿ.

೭೯. ‘‘ಸದೇವಕಸ್ಸ ಲೋಕಸ್ಸ, ಬುದ್ಧೋ ಅಗ್ಗೋ ಪವುಚ್ಚತಿ;

ನತ್ಥಿ ಮೇ ದಕ್ಖಿಣೇ ಕಾರಂ, ಗತಿಮಗ್ಗವಿಸೋಧನಂ.

೮೦. ‘‘ಯಂನೂನ ಬುದ್ಧಸೇಟ್ಠಸ್ಸ, ಸೇತುಂ ಗಙ್ಗಾಯ ಕಾರಯೇ;

ಕಾರಾಪೇತ್ವಾ ಇಮಂ ಕಮ್ಮಂ [ಸೇತುಂ (ಸ್ಯಾ.)], ಸನ್ತರಾಮಿ ಇಮಂ ಭವಂ.

೮೧. ‘‘ಸತಸಹಸ್ಸಂ ದತ್ವಾನ, ಸೇತುಂ ಕಾರಾಪಯಿಂ ಅಹಂ;

ಸದ್ದಹನ್ತೋ ಕತಂ ಕಾರಂ, ವಿಪುಲಂ ಮೇ ಭವಿಸ್ಸತಿ.

೮೨. ‘‘ಕಾರಾಪೇತ್ವಾನ ತಂ ಸೇತುಂ, ಉಪೇಸಿಂ ಲೋಕನಾಯಕಂ;

ಸಿರಸಿ ಅಞ್ಜಲಿಂ ಕತ್ವಾ, ಇಮಂ ವಚನಮಬ್ರವಿಂ.

೮೩. ‘‘‘ಸತಸಹಸ್ಸಸ್ಸ ವಯಂ [ವಯಂ ಸತಸಹಸ್ಸಂವ (ಕ.)], ದತ್ವಾ [ಕತ್ವಾ (ಸೀ. ಪೀ.)] ಕಾರಾಪಿತೋ ಮಯಾ;

ತವತ್ಥಾಯ ಮಹಾಸೇತು, ಪಟಿಗ್ಗಣ್ಹ ಮಹಾಮುನೇ.

೮೪. ‘‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೮೫. ‘‘‘ಯೋ ಮೇ ಸೇತುಂ ಅಕಾರೇಸಿ, ಪಸನ್ನೋ ಸೇಹಿ ಪಾಣಿಭಿ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

(ಸೇತುದಾನಆನಿಸಂಸೋ)

೮೬. ‘‘‘ದರಿತೋ ಪಬ್ಬತತೋ ವಾ, ರುಕ್ಖತೋ ಪತಿತೋಪಿಯಂ;

ಚುತೋಪಿ ಲಚ್ಛತೀ ಠಾನಂ, ಸೇತುದಾನಸ್ಸಿದಂ ಫಲಂ.

೮೭. ‘‘‘ವಿರೂಳ್ಹಮೂಲಸನ್ತಾನಂ, ನಿಗ್ರೋಧಮಿವ ಮಾಲುತೋ;

ಅಮಿತ್ತಾ ನಪ್ಪಸಹನ್ತಿ, ಸೇತುದಾನಸ್ಸಿದಂ ಫಲಂ.

೮೮. ‘‘‘ನಾಸ್ಸ ಚೋರಾ ಪಸಹನ್ತಿ, ನಾತಿಮಞ್ಞನ್ತಿ ಖತ್ತಿಯಾ;

ಸಬ್ಬೇ ತರಿಸ್ಸತಾಮಿತ್ತೇ, ಸೇತುದಾನಸ್ಸಿದಂ ಫಲಂ.

೮೯. ‘‘‘ಅಬ್ಭೋಕಾಸಗತಂ ಸನ್ತಂ, ಕಠಿನಾತಪತಾಪಿತಂ;

ಪುಞ್ಞಕಮ್ಮೇನ ಸಂಯುತ್ತಂ, ನ ಭವಿಸ್ಸತಿ ವೇದನಾ [ತಾವದೇ (ಕ.)].

೯೦. ‘‘‘ದೇವಲೋಕೇ ಮನುಸ್ಸೇ ವಾ, ಹತ್ಥಿಯಾನಂ ಸುನಿಮ್ಮಿತಂ;

ತಸ್ಸ ಸಙ್ಕಪ್ಪಮಞ್ಞಾಯ, ನಿಬ್ಬತ್ತಿಸ್ಸತಿ ತಾವದೇ.

೯೧. ‘‘‘ಸಹಸ್ಸಸ್ಸಾ ವಾತಜವಾ, ಸಿನ್ಧವಾ ಸೀಘವಾಹನಾ;

ಸಾಯಂ ಪಾತಂ ಉಪೇಸ್ಸನ್ತಿ, ಸೇತುದಾನಸ್ಸಿದಂ ಫಲಂ.

೯೨. ‘‘‘ಆಗನ್ತ್ವಾನ ಮನುಸ್ಸತ್ತಂ, ಸುಖಿತೋಯಂ ಭವಿಸ್ಸತಿ;

ವೇಹಾಸಂ [ಇಹಾಪಿ (ಸೀ. ಸ್ಯಾ. ಪೀ.)] ಮನುಜಸ್ಸೇವ, ಹತ್ಥಿಯಾನಂ ಭವಿಸ್ಸತಿ.

೯೩. ‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೯೪. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.

೯೫. ‘‘ಅಹೋ ಮೇ ಸುಕತಂ ಕಮ್ಮಂ, ಜಲಜುತ್ತಮನಾಮಕೇ;

ತತ್ಥ ಕಾರಂ ಕರಿತ್ವಾನ, ಪತ್ತೋಹಂ ಆಸವಕ್ಖಯಂ.

೯೬. ‘‘ಪಧಾನಂ ಪಹಿತತ್ತೋಮ್ಹಿ, ಉಪಸನ್ತೋ ನಿರೂಪಧಿ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೯೭. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೯೮. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೯೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಧೋತಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಧೋತಕತ್ಥೇರಸ್ಸಾಪದಾನಂ ಚತುತ್ಥಂ.