೧೦. ಅಜಿತತ್ಥೇರಅಪದಾನಂ

೪೮೪. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಅಜ್ಝೋಗಾಹೇತ್ವಾ ಹಿಮವನ್ತಂ, ನಿಸೀದಿ ಲೋಕನಾಯಕೋ.

೪೮೫. ‘‘ನಾಹಂ ಅದ್ದಕ್ಖಿಂ [ಪಸ್ಸಾಮಿ (?)] ಸಮ್ಬುದ್ಧಂ, ನಪಿ ಸದ್ದಂ ಸುಣೋಮಹಂ;

ಮಮ ಭಕ್ಖಂ ಗವೇಸನ್ತೋ, ಆಹಿಣ್ಡಾಮಿ ವನೇ ಅಹಂ [ತದಾ (ಸೀ.)].

೪೮೬. ‘‘ತತ್ಥದ್ದಸ್ಸಾಸಿಂ ಸಮ್ಬುದ್ಧಂ, ದ್ವತ್ತಿಂಸವರಲಕ್ಖಣಂ;

ದಿಸ್ವಾನ ವಿತ್ತಿಮಾಪಜ್ಜಿಂ [ಚಿತ್ತಮಾಪಜ್ಜಿ (ಸೀ.), ಚಿತ್ತಮಾಪಜ್ಜಿಂ (ಸ್ಯಾ.)], ಸತ್ತೋ ಕೋ ನಾಮಯಂ ಭವೇ.

೪೮೭. ‘‘ಲಕ್ಖಣಾನಿ ವಿಲೋಕೇತ್ವಾ, ಮಮ ವಿಜ್ಜಂ ಅನುಸ್ಸರಿಂ;

ಸುತಞ್ಹಿ ಮೇತಂ ವುಡ್ಢಾನಂ, ಪಣ್ಡಿತಾನಂ ಸುಭಾಸಿತಂ.

೪೮೮. ‘‘ತೇಸಂ ಯಥಾ ತಂ ವಚನಂ, ಅಯಂ ಬುದ್ಧೋ ಭವಿಸ್ಸತಿ;

ಯಂನೂನಾಹಂ ಸಕ್ಕರೇಯ್ಯಂ, ಗತಿಂ ಮೇ ಸೋಧಯಿಸ್ಸತಿ.

೪೮೯. ‘‘ಖಿಪ್ಪಂ ಅಸ್ಸಮಮಾಗನ್ತ್ವಾ, ಮಧುತೇಲಂ ಗಹಿಂ ಅಹಂ;

ಕೋಲಮ್ಬಕಂ ಗಹೇತ್ವಾನ, ಉಪಗಚ್ಛಿಂ ವಿನಾಯಕಂ [ನರಾಸಭಂ (ಸೀ.)].

೪೯೦. ‘‘ತಿದಣ್ಡಕೇ ಗಹೇತ್ವಾನ, ಅಬ್ಭೋಕಾಸೇ ಠಪೇಸಹಂ;

ಪದೀಪಂ ಪಜ್ಜಲಿತ್ವಾನ, ಅಟ್ಠಕ್ಖತ್ತುಂ ಅವನ್ದಹಂ.

೪೯೧. ‘‘ಸತ್ತರತ್ತಿನ್ದಿವಂ ಬುದ್ಧೋ, ನಿಸೀದಿ ಪುರಿಸುತ್ತಮೋ;

ತತೋ ರತ್ಯಾ ವಿವಸಾನೇ, ವುಟ್ಠಾಸಿ ಲೋಕನಾಯಕೋ.

೪೯೨. ‘‘ಪಸನ್ನಚಿತ್ತೋ ಸುಮನೋ, ಸಬ್ಬರತ್ತಿನ್ದಿವಂ ಅಹಂ;

ದೀಪಂ ಬುದ್ಧಸ್ಸ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.

೪೯೩. ‘‘ಸಬ್ಬೇ ವನಾ ಗನ್ಧಮಯಾ, ಪಬ್ಬತೇ ಗನ್ಧಮಾದನೇ;

ಬುದ್ಧಸ್ಸ ಆನುಭಾವೇನ, ಆಗಚ್ಛುಂ ಬುದ್ಧಸನ್ತಿಕಂ [ಉಪಗಚ್ಛುಂ ತದಾ ಜಿನಂ (ಸೀ.)].

೪೯೪. ‘‘ಯೇ ಕೇಚಿ ಪುಪ್ಫಗನ್ಧಾಸೇ, ಪುಪ್ಫಿತಾ ಧರಣೀರುಹಾ;

ಬುದ್ಧಸ್ಸ ಆನುಭಾವೇನ, ಸಬ್ಬೇ ಸನ್ನಿಪತುಂ ತದಾ.

೪೯೫. ‘‘ಯಾವತಾ ಹಿಮವನ್ತಮ್ಹಿ, ನಾಗಾ ಚ ಗರುಳಾ ಉಭೋ;

ಧಮ್ಮಞ್ಚ ಸೋತುಕಾಮಾ ತೇ, ಆಗಚ್ಛುಂ ಬುದ್ಧಸನ್ತಿಕಂ.

೪೯೬. ‘‘ದೇವಲೋ ನಾಮ ಸಮಣೋ, ಬುದ್ಧಸ್ಸ ಅಗ್ಗಸಾವಕೋ;

ವಸೀಸತಸಹಸ್ಸೇಹಿ, ಬುದ್ಧಸನ್ತಿಕುಪಾಗಮಿ.

೪೯೭. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೪೯೮. ‘‘‘ಯೋ ಮೇ ದೀಪಂ ಪದೀಪೇಸಿ, ಪಸನ್ನೋ ಸೇಹಿ ಪಾಣಿಭಿ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೪೯೯. ‘‘‘ಸಟ್ಠಿ ಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;

ಸಹಸ್ಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ.

ಸೋಳಸಮಂ ಭಾಣವಾರಂ.

೫೦೦. ‘‘‘ಛತ್ತಿಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;

ಪಥವಿಯಂ ಸತ್ತಸತಂ, ವಿಪುಲಂ ರಜ್ಜಂ ಕರಿಸ್ಸತಿ.

೫೦೧. ‘‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;

ಇಮಿನಾ ದೀಪದಾನೇನ, ದಿಬ್ಬಚಕ್ಖು ಭವಿಸ್ಸತಿ.

೫೦೨. ‘‘‘ಸಮನ್ತತೋ ಅಟ್ಠಕೋಸಂ [ಅಡ್ಢಕೋಸಂ (ಸೀ. ಸ್ಯಾ.)], ಪಸ್ಸಿಸ್ಸತಿ ಅಯಂ ಸದಾ;

ದೇವಲೋಕಾ ಚವನ್ತಸ್ಸ, ನಿಬ್ಬತ್ತನ್ತಸ್ಸ ಜನ್ತುನೋ.

೫೦೩. ‘‘‘ದಿವಾ ವಾ ಯದಿ ವಾ ರತ್ತಿಂ, ಪದೀಪಂ ಧಾರಯಿಸ್ಸತಿ;

ಜಾಯಮಾನಸ್ಸ ಸತ್ತಸ್ಸ, ಪುಞ್ಞಕಮ್ಮಸಮಙ್ಗಿನೋ.

೫೦೪. ‘‘‘ಯಾವತಾ ನಗರಂ ಆಸಿ, ತಾವತಾ ಜೋತಯಿಸ್ಸತಿ;

ಉಪಪಜ್ಜತಿ ಯಂ ಯೋನಿಂ, ದೇವತ್ತಂ ಅಥ ಮಾನುಸಂ.

೫೦೫. ‘‘‘ಅಸ್ಸೇವ ದೀಪದಾನಸ್ಸ, [ಅಟ್ಠದೀಪಫಲೇನ ಹಿ; ಉಪಟ್ಠಿಸ್ಸನ್ತಿಮಂ ಜನ್ತುಂ (ಸ್ಯಾ.), ಅಟ್ಠ ದೀಪಾ ಫಲೇನ ಹಿ; ನ ಜಹಿಸ್ಸನ್ತಿ’ಮಂ ಜನ್ತುಂ (?)] ಅಟ್ಠದೀಪಫಲೇನ ಹಿ;

ನ ಜಯಿಸ್ಸನ್ತಿಮಂ ಜನ್ತೂ [ಅಟ್ಠದೀಪಫಲೇನ ಹಿ; ಉಪಟ್ಠಿಸ್ಸನ್ತಿಮಂ ಜನ್ತುಂ (ಸ್ಯಾ.), ಅಟ್ಠ ದೀಪಾ ಫಲೇನ ಹಿ; ನ ಜಹಿಸ್ಸನ್ತಿ’ಮಂ ಜನ್ತುಂ (?)], ದೀಪದಾನಸ್ಸಿದಂ ಫಲಂ.

೫೦೬. ‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೫೦೭. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.

೫೦೮. ‘‘‘ತೋಸಯಿತ್ವಾನ ಸಮ್ಬುದ್ಧಂ, ಗೋತಮಂ ಸಕ್ಯಪುಙ್ಗವಂ;

ಅಜಿತೋ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ’.

೫೦೯. ‘‘ಸಟ್ಠಿ ಕಪ್ಪಸಹಸ್ಸಾನಿ, ದೇವಲೋಕೇ ರಮಿಂ ಅಹಂ;

ತತ್ರಾಪಿ ಮೇ ದೀಪಸತಂ, ಜೋತತೇ ನಿಚ್ಚಕಾಲಿಕಂ [ಸಬ್ಬಕಾಲಿಕಂ (ಸೀ.)].

೫೧೦. ‘‘ದೇವಲೋಕೇ ಮನುಸ್ಸೇ ವಾ, ನಿದ್ಧಾವನ್ತಿ ಪಭಾ ಮಮ;

ಬುದ್ಧಸೇಟ್ಠಂ ಸರಿತ್ವಾನ, ಭಿಯ್ಯೋ ಹಾಸಂ ಜನೇಸಹಂ.

೫೧೧. ‘‘ತುಸಿತಾಹಂ ಚವಿತ್ವಾನ, ಓಕ್ಕಮಿಂ ಮಾತುಕುಚ್ಛಿಯಂ;

ಜಾಯಮಾನಸ್ಸ ಸನ್ತಸ್ಸ, ಆಲೋಕೋ ವಿಪುಲೋ ಅಹು.

೫೧೨. ‘‘ಅಗಾರಾ ಅಭಿನಿಕ್ಖಮ್ಮ, ಪಬ್ಬಜಿಂ ಅನಗಾರಿಯಂ;

ಬಾವರಿಂ ಉಪಸಙ್ಕಮ್ಮ, ಸಿಸ್ಸತ್ತಂ ಅಜ್ಝುಪಾಗಮಿಂ.

೫೧೩. ‘‘ಹಿಮವನ್ತೇ ವಸನ್ತೋಹಂ, ಅಸ್ಸೋಸಿಂ ಲೋಕನಾಯಕಂ;

ಉತ್ತಮತ್ಥಂ ಗವೇಸನ್ತೋ, ಉಪಗಚ್ಛಿಂ ವಿನಾಯಕಂ.

೫೧೪. ‘‘ದನ್ತೋ ಬುದ್ಧೋ ದಮೇತಾವೀ, ಓಘತಿಣ್ಣೋ ನಿರೂಪಧಿ;

ನಿಬ್ಬಾನಂ ಕಥಯೀ ಬುದ್ಧೋ, ಸಬ್ಬದುಕ್ಖಪ್ಪಮೋಚನಂ.

೫೧೫. ‘‘ತಂ ಮೇ ಆಗಮನಂ ಸಿದ್ಧಂ, ತೋಸಿತೋಹಂ ಮಹಾಮುನಿಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೫೧೬. ‘‘ಸತಸಹಸ್ಸಿತೋ ಕಪ್ಪೇ, ಯಂ ದೀಪಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ದೀಪದಾನಸ್ಸಿದಂ ಫಲಂ.

೫೧೭. ‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ವಿಹರಾಮಿ ಅನಾಸವೋ.

೫೧೮. ‘‘ಸ್ವಾಗತಂ ವತ ಮೇ ಆಸಿ…ಪೇ… ಕತಂ ಬುದ್ಧಸ್ಸ ಸಾಸನಂ.

೫೧೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಜಿತೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅಜಿತತ್ಥೇರಸ್ಸಾಪದಾನಂ ದಸಮಂ.

ಪಿಲಿನ್ದವಚ್ಛವಗ್ಗೋ ಚತ್ತಾಲೀಸಮೋ.

ತಸ್ಸುದ್ದಾನಂ –

ಪಿಲಿನ್ದವಚ್ಛೋ ಸೇಲೋ ಚ, ಸಬ್ಬಕಿತ್ತೀ ಮಧುಂದದೋ;

ಕೂಟಾಗಾರೀ ಬಾಕುಲೋ ಚ, ಗಿರಿ ಸಳಲಸವ್ಹಯೋ.

ಸಬ್ಬದೋ ಅಜಿತೋ ಚೇವ, ಗಾಥಾಯೋ ಗಣಿತಾ ಇಹ;

ಸತಾನಿ ಪಞ್ಚ ಗಾಥಾನಂ, ವೀಸತಿ ಚ ತದುತ್ತರೀತಿ.

ಅಥ ವಗ್ಗುದ್ದಾನಂ –

ಪದುಮಾರಕ್ಖದೋ ಚೇವ, ಉಮಾ ಗನ್ಧೋದಕೇನ ಚ;

ಏಕಪದ್ಮ ಸದ್ದಸಞ್ಞೀ, ಮನ್ದಾರಂ ಬೋಧಿವನ್ದಕೋ.

ಅವಟಞ್ಚ ಪಿಲಿನ್ದಿ [ಏವಮೇವ ದಿಸ್ಸತಿ] ಚ, ಗಾಥಾಯೋ ಗಣಿತಾ ಇಹ;

ಚತುಸತ್ತತಿ ಗಾಥಾಯೋ, ಏಕಾದಸ ಸತಾನಿ ಚ.

ಪದುಮವಗ್ಗದಸಕಂ.