೪೦. ಪಿಲಿನ್ದವಚ್ಛವಗ್ಗೋ

೧. ಪಿಲಿನ್ದವಚ್ಛತ್ಥೇರಅಪದಾನಂ

೧. ‘‘ನಗರೇ ಹಂಸವತಿಯಾ, ಆಸಿಂ ದೋವಾರಿಕೋ ಅಹಂ;

ಅಕ್ಖೋಭಂ ಅಮಿತಂ ಭೋಗಂ, ಘರೇ ಸನ್ನಿಚಿತಂ ಮಮ.

೨. ‘‘ರಹೋಗತೋ ನಿಸೀದಿತ್ವಾ, ಪಹಂಸಿತ್ವಾನ ಮಾನಸಂ [ಸಮ್ಪಹಂಸಿತ್ವ ಮಾನಸಂ (ಸೀ.)];

ನಿಸಜ್ಜ ಪಾಸಾದವರೇ, ಏವಂ ಚಿನ್ತೇಸಹಂ ತದಾ.

(ಚಿನ್ತನಾಕಾರೋ)

೩. ‘‘‘ಬಹೂ ಮೇಧಿಗತಾ ಭೋಗಾ, ಫೀತಂ ಅನ್ತೇಪುರಂ ಮಮ;

ರಾಜಾಪಿ [ರಾಜಿಸಿ (ಕ.)] ಸನ್ನಿಮನ್ತೇಸಿ, ಆನನ್ದೋ ಪಥವಿಸ್ಸರೋ.

೪. ‘‘‘ಅಯಞ್ಚ ಬುದ್ಧೋ ಉಪ್ಪನ್ನೋ, ಅಧಿಚ್ಚುಪ್ಪತ್ತಿಕೋ ಮುನಿ;

ಸಂವಿಜ್ಜನ್ತಿ ಚ ಮೇ ಭೋಗಾ, ದಾನಂ ದಸ್ಸಾಮಿ ಸತ್ಥುನೋ.

೫. ‘‘‘ಪದುಮೇನ ರಾಜಪುತ್ತೇನ, ದಿನ್ನಂ ದಾನವರಂ ಜಿನೇ;

ಹತ್ಥಿನಾಗೇ ಚ ಪಲ್ಲಙ್ಕೇ, ಅಪಸ್ಸೇನಞ್ಚನಪ್ಪಕಂ.

೬. ‘‘‘ಅಹಮ್ಪಿ ದಾನಂ ದಸ್ಸಾಮಿ, ಸಙ್ಘೇ ಗಣವರುತ್ತಮೇ;

ಅದಿನ್ನಪುಬ್ಬಮಞ್ಞೇಸಂ, ಭವಿಸ್ಸಂ ಆದಿಕಮ್ಮಿಕೋ.

೭. ‘‘‘ಚಿನ್ತೇತ್ವಾಹಂ ಬಹುವಿಧಂ, ಯಾಗೇ ಯಸ್ಸ ಸುಖಂಫಲಂ;

ಪರಿಕ್ಖಾರದಾನಮದ್ದಕ್ಖಿಂ, ಮಮ ಸಙ್ಕಪ್ಪಪೂರಣಂ.

೮. ‘‘‘ಪರಿಕ್ಖಾರಾನಿ ದಸ್ಸಾಮಿ, ಸಙ್ಘೇ ಗಣವರುತ್ತಮೇ;

ಅದಿನ್ನಪುಬ್ಬಮಞ್ಞೇಸಂ, ಭವಿಸ್ಸಂ ಆದಿಕಮ್ಮಿಕೋ’.

(ದಾನವತ್ಥುಸಮ್ಪಾದನಂ)

೯. ‘‘ನಳಕಾರೇ ಉಪಾಗಮ್ಮ, ಛತ್ತಂ ಕಾರೇಸಿ ತಾವದೇ;

ಛತ್ತಸತಸಹಸ್ಸಾನಿ, ಏಕತೋ ಸನ್ನಿಪಾತಯಿಂ.

೧೦. ‘‘ದುಸ್ಸಸತಸಹಸ್ಸಾನಿ, ಏಕತೋ ಸನ್ನಿಪಾತಯಿಂ;

ಪತ್ತಸತಸಹಸ್ಸಾನಿ, ಏಕತೋ ಸನ್ನಿಪಾತಯಿಂ.

೧೧. ‘‘ವಾಸಿಯೋ ಸತ್ಥಕೇ ಚಾಪಿ, ಸೂಚಿಯೋ ನಖಛೇದನೇ;

ಹೇಟ್ಠಾಛತ್ತೇ ಠಪಾಪೇಸಿಂ, ಕಾರೇತ್ವಾ ತದನುಚ್ಛವೇ.

೧೨. ‘‘ವಿಧೂಪನೇ ತಾಲವಣ್ಟೇ, ಮೋರಹತ್ಥೇ ಚ ಚಾಮರೇ;

ಪರಿಸ್ಸಾವನೇ ತೇಲಧಾರೇ [ತೇಲಧರೇ (ಸೀ.)], ಕಾರಯಿಂ ತದನುಚ್ಛವೇ.

೧೩. ‘‘ಸೂಚಿಘರೇ ಅಂಸಬದ್ಧೇ, ಅಥೋಪಿ ಕಾಯಬನ್ಧನೇ;

ಆಧಾರಕೇ ಚ ಸುಕತೇ, ಕಾರಯಿಂ ತದನುಚ್ಛವೇ.

೧೪. ‘‘ಪರಿಭೋಗಭಾಜನೇ ಚ, ಅಥೋಪಿ ಲೋಹಥಾಲಕೇ;

ಭೇಸಜ್ಜೇ ಪೂರಯಿತ್ವಾನ, ಹೇಟ್ಠಾಛತ್ತೇ ಠಪೇಸಹಂ.

೧೫. ‘‘ವಚಂ ಉಸೀರಂ ಲಟ್ಠಿಮಧುಂ, ಪಿಪ್ಫಲೀ ಮರಿಚಾನಿ ಚ;

ಹರೀತಕಿಂ ಸಿಙ್ಗೀವೇರಂ, ಸಬ್ಬಂ ಪೂರೇಸಿ ಭಾಜನೇ.

೧೬. ‘‘ಉಪಾಹನಾ ಪಾದುಕಾಯೋ, ಅಥೋ ಉದಕಪುಞ್ಛನೇ;

ಕತ್ತರದಣ್ಡೇ ಸುಕತೇ, ಕಾರಯಿಂ ತದನುಚ್ಛವೇ.

೧೭. ‘‘ಓಸಧಞ್ಜನನಾಳೀ ಚ [ಓಸಧಂ ಅಞ್ಜನಾಪಿಚ (ಸ್ಯಾ.)], ಸಲಾಕಾ ಧಮ್ಮಕುತ್ತರಾ;

ಕುಞ್ಚಿಕಾ ಪಞ್ಚವಣ್ಣೇಹಿ, ಸಿಬ್ಬಿತೇ ಕುಞ್ಚಿಕಾಘರೇ.

೧೮. ‘‘ಆಯೋಗೇ ಧೂಮನೇತ್ತೇ ಚ, ಅಥೋಪಿ ದೀಪಧಾರಕೇ;

ತುಮ್ಬಕೇ ಚ ಕರಣ್ಡೇ ಚ, ಕಾರಯಿಂ ತದನುಚ್ಛವೇ.

೧೯. ‘‘ಸಣ್ಡಾಸೇ ಪಿಪ್ಫಲೇ ಚೇವ, ಅಥೋಪಿ ಮಲಹಾರಕೇ;

ಭೇಸಜ್ಜಥವಿಕೇ ಚೇವ, ಕಾರಯಿಂ ತದನುಚ್ಛವೇ.

೨೦. ‘‘ಆಸನ್ದಿಯೋ ಪೀಠಕೇ ಚ, ಪಲ್ಲಙ್ಕೇ ಚತುರೋಮಯೇ;

ತದನುಚ್ಛವೇ ಕಾರಯಿತ್ವಾ, ಹೇಟ್ಠಾಛತ್ತೇ ಠಪೇಸಹಂ.

೨೧. ‘‘ಉಣ್ಣಾಭಿಸೀ ತೂಲಭಿಸೀ, ಅಥೋಪಿ ಪೀಠಿಕಾಭಿಸೀ [ಪೀಠಕಾಭಿಸೀ (ಸ್ಯಾ. ಕ.)];

ಬಿಮ್ಬೋಹನೇ [ಬಿಬ್ಬೋಹನೇ (ಸ್ಯಾ. ಕ.)] ಚ ಸುಕತೇ, ಕಾರಯಿಂ ತದನುಚ್ಛವೇ.

೨೨. ‘‘ಕುರುವಿನ್ದೇ ಮಧುಸಿತ್ಥೇ, ತೇಲಂ ಹತ್ಥಪ್ಪತಾಪಕಂ;

ಸಿಪಾಟಿಫಲಕೇ ಸುಚೀ, ಮಞ್ಚಂ ಅತ್ಥರಣೇನ ಚ.

೨೩. ‘‘ಸೇನಾಸನೇ ಪಾದಪುಞ್ಛೇ, ಸಯನಾಸನದಣ್ಡಕೇ;

ದನ್ತಪೋಣೇ ಚ ಆಟಲೀ [ಕಥಲಿಂ (ಸ್ಯಾ.)], ಸೀಸಾಲೇಪನಗನ್ಧಕೇ.

೨೪. ‘‘ಅರಣೀ ಫಲಪೀಠೇ [ಪಲಾಲಪೀಠೇ (ಸೀ.)] ಚ, ಪತ್ತಪಿಧಾನಥಾಲಕೇ;

ಉದಕಸ್ಸ ಕಟಚ್ಛೂ ಚ, ಚುಣ್ಣಕಂ ರಜನಮ್ಬಣಂ [ರಜನಮ್ಮಣಂ (ಸೀ.)].

೨೫. ‘‘ಸಮ್ಮಜ್ಜನಂ [ಸಮ್ಮುಞ್ಜನಂ (ಸ್ಯಾ.), ಸಮ್ಮಜ್ಜನಿಂ, ಸಮ್ಮುಞ್ಜನಿಂ (?)] ಉದಪತ್ತಂ, ತಥಾ ವಸ್ಸಿಕಸಾಟಿಕಂ;

ನಿಸೀದನಂ ಕಣ್ಡುಚ್ಛಾದಿ, ಅಥ ಅನ್ತರವಾಸಕಂ.

೨೬. ‘‘ಉತ್ತರಾಸಙ್ಗಸಙ್ಘಾಟೀ, ನತ್ಥುಕಂ ಮುಖಸೋಧನಂ;

ಬಿಳಙ್ಗಲೋಣಂ ಪಹೂತಞ್ಚ [ಲೋಣಭೂತಞ್ಚ (ಕ.)], ಮಧುಞ್ಚ ದಧಿಪಾನಕಂ.

೨೭. ‘‘ಧೂಪಂ [ಧೂಮಂ (ಕ.)] ಸಿತ್ಥಂ ಪಿಲೋತಿಞ್ಚ, ಮುಖಪುಞ್ಛನಸುತ್ತಕಂ;

ದಾತಬ್ಬಂ ನಾಮ ಯಂ ಅತ್ಥಿ, ಯಞ್ಚ ಕಪ್ಪತಿ ಸತ್ಥುನೋ.

೨೮. ‘‘ಸಬ್ಬಮೇತಂ ಸಮಾನೇತ್ವಾ, ಆನನ್ದಂ ಉಪಸಙ್ಕಮಿಂ;

ಉಪಸಙ್ಕಮ್ಮ ರಾಜಾನಂ, ಜನೇತಾರಂ ಮಹೇಸಿನೋ [ಮಹೇಸಿನಂ (ಸೀ.), ಮಹಾಯಸಂ (ಸ್ಯಾ.), ಮಹಿಸ್ಸರಂ (ಕ.)];

ಸಿರಸಾ ಅಭಿವಾದೇತ್ವಾ, ಇದಂ ವಚನಮಬ್ರವಿಂ.

(ದಾನೋಕಾಸಯಾಚನಾ)

೨೯. ‘‘‘ಏಕತೋ ಜಾತಸಂವದ್ಧಾ, ಉಭಿನ್ನಂ ಏಕತೋ ಮನಂ [ಯಸೋ (ಸ್ಯಾ.), ಮನೋ (?)];

ಸಾಧಾರಣಾ ಸುಖದುಕ್ಖೇ, ಉಭೋ ಚ ಅನುವತ್ತಕಾ.

೩೦. ‘‘‘ಅತ್ಥಿ ಚೇತಸಿಕಂ ದುಕ್ಖಂ, ತವಾಧೇಯ್ಯಂ ಅರಿನ್ದಮ;

ಯದಿ ಸಕ್ಕೋಸಿ ತಂ ದುಕ್ಖಂ, ವಿನೋದೇಯ್ಯಾಸಿ ಖತ್ತಿಯ.

೩೧. ‘‘‘ತವ ದುಕ್ಖಂ ಮಮ ದುಕ್ಖಂ, ಉಭಿನ್ನಂ ಏಕತೋ ಮನೋ [ಮನಂ (ಸೀ. ಸ್ಯಾ.)];

ನಿಟ್ಠಿತನ್ತಿ ವಿಜಾನಾಹಿ, ಮಮಾಧೇಯ್ಯಂ ಸಚೇ ತುವಂ.

೩೨. ‘‘‘ಜಾನಾಹಿ ಖೋ ಮಹಾರಾಜ, ದುಕ್ಖಂ ಮೇ ದುಬ್ಬಿನೋದಯಂ;

ಪಹು ಸಮಾನೋ ಗಜ್ಜಸು, ಏಕಂ ತೇ ದುಚ್ಚಜಂ ವರಂ.

೩೩. ‘‘‘ಯಾವತಾ ವಿಜಿತೇ ಅತ್ಥಿ, ಯಾವತಾ ಮಮ ಜೀವಿತಂ;

ಏತೇಹಿ ಯದಿ ತೇ ಅತ್ಥೋ, ದಸ್ಸಾಮಿ ಅವಿಕಮ್ಪಿತೋ.

೩೪. ‘‘‘ಗಜ್ಜಿತಂ ಖೋ ತಯಾ ದೇವ, ಮಿಚ್ಛಾ ತಂ ಬಹು ಗಜ್ಜಿತಂ;

ಜಾನಿಸ್ಸಾಮಿ ತುವಂ ಅಜ್ಜ, ಸಬ್ಬಧಮ್ಮೇ [ಸಚ್ಚಧಮ್ಮೇ (?)] ಪತಿಟ್ಠಿತಂ.

೩೫. ‘‘‘ಅತಿಬಾಳ್ಹಂ ನಿಪೀಳೇಸಿ, ದದಮಾನಸ್ಸ ಮೇ ಸತೋ;

ಕಿಂ ತೇ ಮೇ ಪೀಳಿತೇನತ್ಥೋ, ಪತ್ಥಿತಂ ತೇ ಕಥೇಹಿ ಮೇ.

೩೬. ‘‘‘ಇಚ್ಛಾಮಹಂ ಮಹಾರಾಜ, ಬುದ್ಧಸೇಟ್ಠಂ ಅನುತ್ತರಂ;

ಭೋಜಯಿಸ್ಸಾಮಿ ಸಮ್ಬುದ್ಧಂ, ವಜ್ಜಂ [ವಞ್ಚುಂ (?)] ಮೇ ಮಾಹು ಜೀವಿತಂ.

೩೭. ‘‘‘ಅಞ್ಞಂ ತೇಹಂ ವರಂ ದಮ್ಮಿ, ಮಾ ಯಾಚಿತ್ಥೋ ತಥಾಗತಂ [ಅಯಾಚಿತೋ ತಥಾಗತೋ (ಸ್ಯಾ. ಕ.)];

ಅದೇಯ್ಯೋ ಕಸ್ಸಚಿ ಬುದ್ಧೋ, ಮಣಿ ಜೋತಿರಸೋ ಯಥಾ.

೩೮. ‘‘‘ನನು ತೇ ಗಜ್ಜಿತಂ ದೇವ, ಯಾವ ಜೀವಿತಮತ್ತನೋ [ವಿಜಿತಮತ್ಥಿತಂ (ಕ.), ಜೀವಿತಮತ್ಥಿಕಂ (ಸ್ಯಾ.)];

ಜೀವಿತಂ [ವಿಜಿತಂ (ಕ.)] ದದಮಾನೇನ, ಯುತ್ತಂ ದಾತುಂ ತಥಾಗತಂ.

೩೯. ‘‘‘ಠಪನೀಯೋ ಮಹಾವೀರೋ, ಅದೇಯ್ಯೋ ಕಸ್ಸಚಿ ಜಿನೋ;

ನ ಮೇ ಪಟಿಸ್ಸುತೋ ಬುದ್ಧೋ, ವರಸ್ಸು ಅಮಿತಂ ಧನಂ.

೪೦. ‘‘‘ವಿನಿಚ್ಛಯಂ ಪಾಪುಣಾಮ, ಪುಚ್ಛಿಸ್ಸಾಮ ವಿನಿಚ್ಛಯೇ;

ಯಥಾಸಣ್ಠಂ [ಯಥಾಸನ್ತಂ (ಸೀ.)] ಕಥೇಸ್ಸನ್ತಿ, ಪಟಿಪುಚ್ಛಾಮ ತಂ ತಥಾ.

೪೧. ‘‘‘ರಞ್ಞೋ ಹತ್ಥೇ ಗಹೇತ್ವಾನ, ಅಗಮಾಸಿಂ ವಿನಿಚ್ಛಯಂ;

ಪುರತೋ ಅಕ್ಖದಸ್ಸಾನಂ, ಇದಂ ವಚನಮಬ್ರವಿಂ.

೪೨. ‘‘‘ಸುಣನ್ತು ಮೇ ಅಕ್ಖದಸ್ಸಾ, ರಾಜಾ ವರಮದಾಸಿ ಮೇ;

ನ ಕಿಞ್ಚಿ ಠಪಯಿತ್ವಾನ, ಜೀವಿತಮ್ಪಿ [ವಿಜಿತಂಪಿ (ಕ.)] ಪವಾರಯಿ.

೪೩. ‘‘‘ತಸ್ಸ ಮೇ ವರದಿನ್ನಸ್ಸ, ಬುದ್ಧಸೇಟ್ಠಂ ವರಿಂ ಅಹಂ;

ಸುದಿನ್ನೋ ಹೋತಿ ಮೇ ಬುದ್ಧೋ, ಛಿನ್ದಥ ಸಂಸಯಂ ಮಮ.

೪೪. ‘‘‘ಸೋಸ್ಸಾಮ ತವ ವಚನಂ, ಭೂಮಿಪಾಲಸ್ಸ ರಾಜಿನೋ;

ಉಭಿನ್ನಂ ವಚನಂ ಸುತ್ವಾ, ಛಿನ್ದಿಸ್ಸಾಮೇತ್ಥ ಸಂಸಯಂ.

೪೫. ‘‘‘ಸಬ್ಬಂ ದೇವ ತಯಾ ದಿನ್ನಂ, ಇಮಸ್ಸ ಸಬ್ಬಗಾಹಿಕಂ [ಸಬ್ಬಗಾಹಿತಂ (ಸ್ಯಾ. ಕ.)];

ನ ಕಿಞ್ಚಿ ಠಪಯಿತ್ವಾನ, ಜೀವಿತಮ್ಪಿ ಪವಾರಯಿ.

೪೬. ‘‘‘ಕಿಚ್ಛಪ್ಪತ್ತೋವ ಹುತ್ವಾನ, ಯಾಚೀ ವರಮನುತ್ತರಂ [ಯಾವಜೀವಮನುತ್ತರಂ (ಸ್ಯಾ. ಕ.)];

ಇಮಂ ಸುದುಕ್ಖಿತಂ ಞತ್ವಾ, ಅದಾಸಿಂ ಸಬ್ಬಗಾಹಿಕಂ.

೪೭. ‘‘‘ಪರಾಜಯೋ ತುವಂ [ತವಂ (ಸೀ.)] ದೇವ, ಅಸ್ಸ ದೇಯ್ಯೋ ತಥಾಗತೋ;

ಉಭಿನ್ನಂ ಸಂಸಯೋ ಛಿನ್ನೋ, ಯಥಾಸಣ್ಠಮ್ಹಿ [ಯಥಾಸನ್ತಮ್ಹಿ (ಸೀ.)] ತಿಟ್ಠಥ.

೪೮. ‘‘‘ರಾಜಾ ತತ್ಥೇವ ಠತ್ವಾನ, ಅಕ್ಖದಸ್ಸೇತದಬ್ರವಿ;

ಸಮ್ಮಾ ಮಯ್ಹಮ್ಪಿ ದೇಯ್ಯಾಥ, ಪುನ ಬುದ್ಧಂ ಲಭಾಮಹಂ.

೪೯. ‘‘‘ಪೂರೇತ್ವಾ ತವ ಸಙ್ಕಪ್ಪಂ, ಭೋಜಯಿತ್ವಾ ತಥಾಗತಂ;

ಪುನ ದೇಯ್ಯಾಸಿ [ದೇಯ್ಯಾಥ (ಕ.)] ಸಮ್ಬುದ್ಧಂ, ಆನನ್ದಸ್ಸ ಯಸಸ್ಸಿನೋ’.

(ನಿಮನ್ತನಕಥಾ)

೫೦. ‘‘ಅಕ್ಖದಸ್ಸೇಭಿವಾದೇತ್ವಾ, ಆನನ್ದಞ್ಚಾಪಿ ಖತ್ತಿಯಂ;

ತುಟ್ಠೋ ಪಮುದಿತೋ ಹುತ್ವಾ, ಸಮ್ಬುದ್ಧಮುಪಸಙ್ಕಮಿಂ.

೫೧. ‘‘ಉಪಸಙ್ಕಮ್ಮ ಸಮ್ಬುದ್ಧಂ, ಓಘತಿಣ್ಣಮನಾಸವಂ;

ಸಿರಸಾ ಅಭಿವಾದೇತ್ವಾ, ಇದಂ ವಚನಮಬ್ರವಿಂ.

೫೨. ‘ವಸೀಸತಸಹಸ್ಸೇಹಿ, ಅಧಿವಾಸೇಹಿ ಚಕ್ಖುಮ;

ಹಾಸಯನ್ತೋ ಮಮ ಚಿತ್ತಂ, ನಿವೇಸನಮುಪೇಹಿ ಮೇ’.

೫೩. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಮಮ ಸಙ್ಕಪ್ಪಮಞ್ಞಾಯ, ಅಧಿವಾಸೇಸಿ ಚಕ್ಖುಮಾ.

೫೪. ‘‘ಅಧಿವಾಸನಮಞ್ಞಾಯ, ಅಭಿವಾದಿಯ ಸತ್ಥುನೋ;

ಹಟ್ಠೋ ಉದಗ್ಗಚಿತ್ತೋಹಂ, ನಿವೇಸನಮುಪಾಗಮಿಂ.

(ದಾನಪಟಿಯಾದನಂ)

೫೫. ‘‘ಮಿತ್ತಾಮಚ್ಚೇ ಸಮಾನೇತ್ವಾ, ಇದಂ ವಚನಮಬ್ರವಿಂ;

‘ಸುದುಲ್ಲಭೋ ಮಯಾ ಲದ್ಧೋ, ಮಣಿ ಜೋತಿರಸೋ ಯಥಾ.

೫೬. ‘‘‘ಕೇನ ತಂ ಪೂಜಯಿಸ್ಸಾಮ, ಅಪ್ಪಮೇಯ್ಯೋ ಅನೂಪಮೋ;

ಅತುಲೋ ಅಸಮೋ ಧೀರೋ, ಜಿನೋ ಅಪ್ಪಟಿಪುಗ್ಗಲೋ.

೫೭. ‘‘‘ತಥಾಸಮಸಮೋ ಚೇವ, ಅದುತಿಯೋ ನರಾಸಭೋ;

ದುಕ್ಕರಂ ಅಧಿಕಾರಞ್ಹಿ, ಬುದ್ಧಾನುಚ್ಛವಿಕಂ ಮಯಾ.

೫೮. ‘‘‘ನಾನಾಪುಪ್ಫೇ ಸಮಾನೇತ್ವಾ, ಕರೋಮ ಪುಪ್ಫಮಣ್ಡಪಂ;

ಬುದ್ಧಾನುಚ್ಛವಿಕಂ ಏತಂ, ಸಬ್ಬಪೂಜಾ ಭವಿಸ್ಸತಿ’.

೫೯. ‘‘ಉಪ್ಪಲಂ ಪದುಮಂ ವಾಪಿ, ವಸ್ಸಿಕಂ ಅಧಿಮುತ್ತಕಂ [ಅತಿಮುತ್ತಕಂ (?)];

ಚಮ್ಪಕಂ [ಚನ್ದನಂ (ಕ.)] ನಾಗಪುಪ್ಫಞ್ಚ, ಮಣ್ಡಪಂ ಕಾರಯಿಂ ಅಹಂ.

೬೦. ‘‘ಸತಾಸನಸಹಸ್ಸಾನಿ, ಛತ್ತಚ್ಛಾಯಾಯ ಪಞ್ಞಪಿಂ;

ಪಚ್ಛಿಮಂ ಆಸನಂ ಮಯ್ಹಂ, ಅಧಿಕಂ ಸತಮಗ್ಘತಿ.

೬೧. ‘‘ಸತಾಸನಸಹಸ್ಸಾನಿ, ಛತ್ತಚ್ಛಾಯಾಯ ಪಞ್ಞಪಿಂ;

ಪಟಿಯಾದೇತ್ವಾ ಅನ್ನಪಾನಂ, ಕಾಲಂ ಆರೋಚಯಿಂ ಅಹಂ.

೬೨. ‘‘ಆರೋಚಿತಮ್ಹಿ ಕಾಲಮ್ಹಿ, ಪದುಮುತ್ತರೋ ಮಹಾಮುನಿ;

ವಸೀಸತಸಹಸ್ಸೇಹಿ, ನಿವೇಸನಮುಪೇಸಿ ಮೇ.

೬೩. ‘‘ಧಾರೇನ್ತಂ ಉಪರಿಚ್ಛತ್ತಂ [ಧಾರೇನ್ತಮುಪರಿಚ್ಛತ್ತೇ (ಸೀ.)], ಸುಫುಲ್ಲಪುಪ್ಫಮಣ್ಡಪೇ;

ವಸೀಸತಸಹಸ್ಸೇಹಿ, ನಿಸೀದಿ ಪುರಿಸುತ್ತಮೋ.

೬೪. ‘‘‘ಛತ್ತಸತಸಹಸ್ಸಾನಿ, ಸತಸಹಸ್ಸಮಾಸನಂ;

ಕಪ್ಪಿಯಂ ಅನವಜ್ಜಞ್ಚ, ಪಟಿಗಣ್ಹಾಹಿ ಚಕ್ಖುಮ’.

೬೫. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಮಮಂ ತಾರೇತುಕಾಮೋ ಸೋ, ಸಮ್ಪಟಿಚ್ಛಿ ಮಹಾಮುನಿ.

(ದಾನಕಥಾ)

೬೬. ‘‘ಭಿಕ್ಖುನೋ ಏಕಮೇಕಸ್ಸ, ಪಚ್ಚೇಕಂ ಪತ್ತಮದಾಸಹಂ;

ಜಹಿಂಸು ಸುಮ್ಭಕಂ [ಪುಬ್ಬಕಂ (ಸೀ.), ಸಮ್ಭತಂ (ಸ್ಯಾ.), ಮತ್ತಿಕಂ (?)] ಪತ್ತಂ, ಲೋಹಪತ್ತಂ ಅಧಾರಯುಂ.

೬೭. ‘‘ಸತ್ತರತ್ತಿನ್ದಿವಂ ಬುದ್ಧೋ, ನಿಸೀದಿ ಪುಪ್ಫಮಣ್ಡಪೇ;

ಬೋಧಯನ್ತೋ ಬಹೂ ಸತ್ತೇ, ಧಮ್ಮಚಕ್ಕಂ ಪವತ್ತಯಿ.

೬೮. ‘‘ಧಮ್ಮಚಕ್ಕಂ ಪವತ್ತೇನ್ತೋ, ಹೇಟ್ಠತೋ ಪುಪ್ಫಮಣ್ಡಪೇ;

ಚುಲ್ಲಾಸೀತಿಸಹಸ್ಸಾನಂ, ಧಮ್ಮಾಭಿಸಮಯೋ ಅಹು.

೬೯. ‘‘ಸತ್ತಮೇ ದಿವಸೇ ಪತ್ತೇ, ಪದುಮುತ್ತರೋ ಮಹಾಮುನಿ;

ಛತ್ತಚ್ಛಾಯಾಯಮಾಸೀನೋ, ಇಮಾ ಗಾಥಾ ಅಭಾಸಥ.

(ಬ್ಯಾಕರಣಂ)

೭೦. ‘‘‘ಅನೂನಕಂ ದಾನವರಂ, ಯೋ ಮೇ ಪಾದಾಸಿ ಮಾಣವೋ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.