೯. ಧಮ್ಮಸವನಿಯತ್ಥೇರಅಪದಾನಂ

೧೧೧. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಚತುಸಚ್ಚಂ ಪಕಾಸೇನ್ತೋ, ಸನ್ತಾರೇಸಿ ಬಹುಂ ಜನಂ.

೧೧೨. ‘‘ಅಹಂ ತೇನ ಸಮಯೇನ, ಜಟಿಲೋ ಉಗ್ಗತಾಪನೋ;

ಧುನನ್ತೋ ವಾಕಚೀರಾನಿ, ಗಚ್ಛಾಮಿ ಅಮ್ಬರೇ ತದಾ.

೧೧೩. ‘‘ಬುದ್ಧಸೇಟ್ಠಸ್ಸ ಉಪರಿ, ಗನ್ತುಂ ನ ವಿಸಹಾಮಹಂ;

ಪಕ್ಖೀವ ಸೇಲಮಾಸಜ್ಜ [ಸೇಲಮಾಪಜ್ಜ (ಸ್ಯಾ.)], ಗಮನಂ ನ ಲಭಾಮಹಂ.

೧೧೪. ‘‘ನ ಮೇ ಇದಂ ಭೂತಪುಬ್ಬಂ, ಇರಿಯಸ್ಸ ವಿಕೋಪನಂ;

ದಕೇ ಯಥಾ ಉಮ್ಮುಜ್ಜಿತ್ವಾ, ಏವಂ ಗಚ್ಛಾಮಿ ಅಮ್ಬರೇ.

೧೧೫. ‘‘ಉಳಾರಭೂತೋ ಮನುಜೋ, ಹೇಟ್ಠಾಸೀನೋ [ಹೇಟ್ಠಾಪಿ ನೋ (ಕ.)] ಭವಿಸ್ಸತಿ;

ಹನ್ದ ಮೇನಂ ಗವೇಸಿಸ್ಸಂ, ಅಪಿ ಅತ್ಥಂ ಲಭೇಯ್ಯಹಂ.

೧೧೬. ‘‘ಓರೋಹನ್ತೋ ಅನ್ತಲಿಕ್ಖಾ, ಸದ್ದಮಸ್ಸೋಸಿ ಸತ್ಥುನೋ;

ಅನಿಚ್ಚತಂ ಕಥೇನ್ತಸ್ಸ, ತಮಹಂ ಉಗ್ಗಹಿಂ ತದಾ.

೧೧೭. ‘‘ಅನಿಚ್ಚಸಞ್ಞಮುಗ್ಗಯ್ಹ, ಅಗಮಾಸಿಂ ಮಮಸ್ಸಮಂ;

ಯಾವತಾಯುಂ ವಸಿತ್ವಾನ, ತತ್ಥ ಕಾಲಙ್ಕತೋ ಅಹಂ.

೧೧೮. ‘‘ಚರಿಮೇ ವತ್ತಮಾನಮ್ಹಿ, ತಂ ಧಮ್ಮಸವನಂ [ಧಮ್ಮಸವಣಂ (ಸೀ.)] ಸರಿಂ;

ತೇನ ಕಮ್ಮೇನ ಸುಕತೇನ, ತಾವತಿಂಸಮಗಚ್ಛಹಂ.

೧೧೯. ‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಂ ಅಹಂ;

ಏಕಪಞ್ಞಾಸಕ್ಖತ್ತುಞ್ಚ, ದೇವರಜ್ಜಮಕಾರಯಿಂ.

೧೨೦. ‘‘ಏಕಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೧೨೧. ‘‘ಪಿತುಗೇಹೇ ನಿಸೀದಿತ್ವಾ, ಸಮಣೋ ಭಾವಿತಿನ್ದ್ರಿಯೋ;

ಗಾಥಾಯ ಪರಿದೀಪೇನ್ತೋ, ಅನಿಚ್ಚತಮುದಾಹರಿ [ಅನಿಚ್ಚವತ್ಥುದಾಹರಿ (ಸ್ಯಾ. ಕ.)].

೧೨೨. ‘‘ಅನುಸ್ಸರಾಮಿ ತಂ ಸಞ್ಞಂ, ಸಂಸರನ್ತೋ ಭವಾಭವೇ;

ನ ಕೋಟಿಂ ಪಟಿವಿಜ್ಝಾಮಿ [ನ ಕೋಚಿ ಪಟಿವಜ್ಜಾಮಿ (ಕ.)], ನಿಬ್ಬಾನಂ ಅಚ್ಚುತಂ ಪದಂ [ಅಯಂ ಗಾಥಾ ಉಪರಿ ೪೩ ವಗ್ಗೇ ಸತ್ತಮಾಪದಾನೇ ಪುರಿಮಗಾಥಾಯ ಪುರೇತರಂ ದಿಸ್ಸತಿ].

೧೨೩. ‘‘ಅನಿಚ್ಚಾ ವತ ಸಙ್ಖಾರಾ, ಉಪ್ಪಾದವಯಧಮ್ಮಿನೋ;

ಉಪ್ಪಜ್ಜಿತ್ವಾ ನಿರುಜ್ಝನ್ತಿ, ತೇಸಂ ವೂಪಸಮೋ ಸುಖೋ.

೧೨೪. ‘‘ಸಹ ಗಾಥಂ ಸುಣಿತ್ವಾನ, ಪುಬ್ಬಕಮ್ಮಂ ಅನುಸ್ಸರಿಂ;

ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.

೧೨೫. ‘‘ಜಾತಿಯಾ ಸತ್ತವಸ್ಸೋಹಂ, ಅರಹತ್ತಮಪಾಪುಣಿಂ;

ಉಪಸಮ್ಪಾದಯಿ ಬುದ್ಧೋ, ಗುಣಮಞ್ಞಾಯ ಚಕ್ಖುಮಾ.

೧೨೬. ‘‘ದಾರಕೋವ ಅಹಂ ಸನ್ತೋ, ಕರಣೀಯಂ ಸಮಾಪಯಿಂ;

ಕಿಂ ಮೇ ಕರಣೀಯಂ ಅಜ್ಜ, ಸಕ್ಯಪುತ್ತಸ್ಸ ಸಾಸನೇ.

೧೨೭. ‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಸದ್ಧಮ್ಮಸವನೇ ಫಲಂ.

೧೨೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಧಮ್ಮಸವನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಧಮ್ಮಸವನಿಯತ್ಥೇರಸ್ಸಾಪದಾನಂ ನವಮಂ.