೩೪. ಗನ್ಧೋದಕವಗ್ಗೋ

೧. ಗನ್ಧಧೂಪಿಯತ್ಥೇರಅಪದಾನಂ

೧. ‘‘ಸಿದ್ಧತ್ಥಸ್ಸ ಭಗವತೋ, ಗನ್ಧಧೂಪಂ ಅದಾಸಹಂ;

ಸುಮನೇಹಿ ಪಟಿಚ್ಛನ್ನಂ, ಬುದ್ಧಾನುಚ್ಛವಿಕಞ್ಚ ತಂ.

೨. ‘‘ಕಞ್ಚನಗ್ಘಿಯಸಙ್ಕಾಸಂ, ಬುದ್ಧಂ ಲೋಕಗ್ಗನಾಯಕಂ;

ಇನ್ದೀವರಂವ ಜಲಿತಂ, ಆದಿತ್ತಂವ ಹುತಾಸನಂ.

೩. ‘‘ಬ್ಯಗ್ಘುಸಭಂವ ಪವರಂ, ಅಭಿಜಾತಂವ ಕೇಸರಿಂ;

ನಿಸಿನ್ನಂ ಸಮಣಾನಗ್ಗಂ, ಭಿಕ್ಖುಸಙ್ಘಪುರಕ್ಖತಂ.

೪. ‘‘ದಿಸ್ವಾ ಚಿತ್ತಂ ಪಸಾದೇತ್ವಾ, ಪಗ್ಗಹೇತ್ವಾನ ಅಞ್ಜಲಿಂ;

ವನ್ದಿತ್ವಾ ಸತ್ಥುನೋ ಪಾದೇ, ಪಕ್ಕಾಮಿಂ ಉತ್ತರಾಮುಖೋ.

೫. ‘‘ಚತುನ್ನವುತಿತೋ ಕಪ್ಪೇ, ಯಂ ಗನ್ಧಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಗನ್ಧಪೂಜಾಯಿದಂ ಫಲಂ.

೬. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಗನ್ಧಧೂಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಗನ್ಧಧೂಪಿಯತ್ಥೇರಸ್ಸಾಪದಾನಂ ಪಠಮಂ.

೨. ಉದಕಪೂಜಕತ್ಥೇರಅಪದಾನಂ

೭. ‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಗಚ್ಛನ್ತಂ ಅನಿಲಞ್ಜಸೇ;

ಘತಾಸನಂವ ಜಲಿತಂ, ಆದಿತ್ತಂವ ಹುತಾಸನಂ.

೮. ‘‘ಪಾಣಿನಾ ಉದಕಂ ಗಯ್ಹ, ಆಕಾಸೇ ಉಕ್ಖಿಪಿಂ ಅಹಂ;

ಸಮ್ಪಟಿಚ್ಛಿ ಮಹಾವೀರೋ, ಬುದ್ಧೋ ಕಾರುಣಿಕೋ ಇಸಿ.

೯. ‘‘ಅನ್ತಲಿಕ್ಖೇ ಠಿತೋ ಸತ್ಥಾ, ಪದುಮುತ್ತರನಾಮಕೋ;

ಮಮ ಸಙ್ಕಪ್ಪಮಞ್ಞಾಯ, ಇಮಂ ಗಾಥಮಭಾಸಥ.

೧೦. ‘‘‘ಇಮಿನಾ ದಕದಾನೇನ, ಪೀತಿಉಪ್ಪಾದನೇನ ಚ;

ಕಪ್ಪಸತಸಹಸ್ಸಮ್ಪಿ, ದುಗ್ಗತಿಂ ನುಪಪಜ್ಜಸಿ’.

೧೧. ‘‘ತೇನ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;

ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ.

೧೨. ‘‘ಸಹಸ್ಸರಾಜನಾಮೇನ, ತಯೋ ಚ ಚಕ್ಕವತ್ತಿನೋ;

ಪಞ್ಚಸಟ್ಠಿಕಪ್ಪಸತೇ, ಚಾತುರನ್ತಾ ಜನಾಧಿಪಾ.

೧೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಉದಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉದಕಪೂಜಕತ್ಥೇರಸ್ಸಾಪದಾನಂ ದುತಿಯಂ.

೩. ಪುನ್ನಾಗಪುಪ್ಫಿಯತ್ಥೇರಅಪದಾನಂ

೧೪. ‘‘ಕಾನನಂ ವನಮೋಗಯ್ಹ, ವಸಾಮಿ ಲುದ್ದಕೋ ಅಹಂ;

ಪುನ್ನಾಗಂ ಪುಪ್ಫಿತಂ ದಿಸ್ವಾ, ಬುದ್ಧಸೇಟ್ಠಂ ಅನುಸ್ಸರಿಂ.

೧೫. ‘‘ತಂ ಪುಪ್ಫಂ ಓಚಿನಿತ್ವಾನ, ಸುಗನ್ಧಂ ಗನ್ಧಿತಂ ಸುಭಂ;

ಥೂಪಂ ಕತ್ವಾನ ಪುಲಿನೇ, ಬುದ್ಧಸ್ಸ ಅಭಿರೋಪಯಿಂ.

೧೬. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೭. ‘‘ಏಕಮ್ಹಿ ನವುತೇ ಕಪ್ಪೇ, ಏಕೋ ಆಸಿಂ ತಮೋನುದೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೧೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪುನ್ನಾಗಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪುನ್ನಾಗಪುಪ್ಫಿಯತ್ಥೇರಸ್ಸಾಪದಾನಂ ತತಿಯಂ.

೪. ಏಕದುಸ್ಸದಾಯಕತ್ಥೇರಅಪದಾನಂ

೧೯. ‘‘ನಗರೇ ಹಂಸವತಿಯಾ, ಅಹೋಸಿಂ ತಿಣಹಾರಕೋ;

ತಿಣಹಾರೇನ ಜೀವಾಮಿ, ತೇನ ಪೋಸೇಮಿ ದಾರಕೇ.

೨೦. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ತಮನ್ಧಕಾರಂ ನಾಸೇತ್ವಾ, ಉಪ್ಪಜ್ಜಿ ಲೋಕನಾಯಕೋ.

೨೧. ‘‘ಸಕೇ ಘರೇ ನಿಸೀದಿತ್ವಾ, ಏವಂ ಚಿನ್ತೇಸಹಂ ತದಾ;

‘ಬುದ್ಧೋ ಲೋಕೇ ಸಮುಪ್ಪನ್ನೋ, ದೇಯ್ಯಧಮ್ಮೋ ಚ ನತ್ಥಿ ಮೇ.

೨೨. ‘‘‘ಇದಂ ಮೇ ಸಾಟಕಂ ಏಕಂ, ನತ್ಥಿ ಮೇ ಕೋಚಿ ದಾಯಕೋ;

ದುಕ್ಖೋ ನಿರಯಸಮ್ಫಸ್ಸೋ, ರೋಪಯಿಸ್ಸಾಮಿ ದಕ್ಖಿಣಂ’.

೨೩. ‘‘ಏವಾಹಂ ಚಿನ್ತಯಿತ್ವಾನ, ಸಕಂ ಚಿತ್ತಂ ಪಸಾದಯಿಂ;

ಏಕಂ ದುಸ್ಸಂ ಗಹೇತ್ವಾನ, ಬುದ್ಧಸೇಟ್ಠಸ್ಸದಾಸಹಂ.

೨೪. ‘‘ಏಕಂ ದುಸ್ಸಂ ದದಿತ್ವಾನ, ಉಕ್ಕುಟ್ಠಿಂ ಸಮ್ಪವತ್ತಯಿಂ;

ಯದಿ ಬುದ್ಧೋ ತುವಂ ವೀರ, ತಾರೇಹಿ ಮಂ ಮಹಾಮುನಿ.

೨೫. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಮಮ ದಾನಂ ಪಕಿತ್ತೇನ್ತೋ, ಅಕಾ ಮೇ ಅನುಮೋದನಂ.

೨೬. ‘‘‘ಇಮಿನಾ ಏಕದುಸ್ಸೇನ, ಚೇತನಾಪಣಿಧೀಹಿ ಚ;

ಕಪ್ಪಸತಸಹಸ್ಸಾನಿ, ವಿನಿಪಾತಂ ನ ಗಚ್ಛತಿ.

೨೭. ‘‘‘ಛತ್ತಿಂಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ;

ತೇತ್ತಿಂಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೨೮. ‘‘‘ದೇವಲೋಕೇ ಮನುಸ್ಸೇ ವಾ, ಸಂಸರನ್ತೋ ತುವಂ ಭವೇ;

ರೂಪವಾ ಗುಣಸಮ್ಪನ್ನೋ, ಅನವಕ್ಕನ್ತದೇಹವಾ;

ಅಕ್ಖೋಭಂ ಅಮಿತಂ ದುಸ್ಸಂ, ಲಭಿಸ್ಸಸಿ ಯದಿಚ್ಛಕಂ’.

೨೯. ‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;

ನಭಂ ಅಬ್ಭುಗ್ಗಮೀ ಧೀರೋ, ಹಂಸರಾಜಾವ ಅಮ್ಬರೇ.

೩೦. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;

ಭೋಗೇ ಮೇ ಊನತಾ ನತ್ಥಿ, ಏಕದುಸ್ಸಸ್ಸಿದಂ ಫಲಂ.

೩೧. ‘‘ಪದುದ್ಧಾರೇ ಪದುದ್ಧಾರೇ, ದುಸ್ಸಂ ನಿಬ್ಬತ್ತತೇ ಮಮಂ;

ಹೇಟ್ಠಾ ದುಸ್ಸಮ್ಹಿ ತಿಟ್ಠಾಮಿ, ಉಪರಿ ಛದನಂ ಮಮ.

೩೨. ‘‘ಚಕ್ಕವಾಳಮುಪಾದಾಯ, ಸಕಾನನಂ ಸಪಬ್ಬತಂ;

ಇಚ್ಛಮಾನೋ ಚಹಂ ಅಜ್ಜ, ದುಸ್ಸೇಹಿ ಛಾದಯೇಯ್ಯಹಂ.

೩೩. ‘‘ತೇನೇವ ಏಕದುಸ್ಸೇನ, ಸಂಸರನ್ತೋ ಭವಾಭವೇ;

ಸುವಣ್ಣವಣ್ಣೋ ಹುತ್ವಾನ, ಸಂಸರಾಮಿ ಭವಾಭವೇ.

೩೪. ‘‘ವಿಪಾಕಂ ಏಕದುಸ್ಸಸ್ಸ, ನಜ್ಝಗಂ ಕತ್ಥಚಿಕ್ಖಯಂ;

ಅಯಂ ಮೇ ಅನ್ತಿಮಾ ಜಾತಿ, ವಿಪಚ್ಚತಿ ಇಧಾಪಿ ಮೇ.

೩೫. ‘‘ಸತಸಹಸ್ಸಿತೋ ಕಪ್ಪೇ, ಯಂ ದುಸ್ಸಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಏಕದುಸ್ಸಸ್ಸಿದಂ ಫಲಂ.

೩೬. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೩೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕದುಸ್ಸದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕದುಸ್ಸದಾಯಕತ್ಥೇರಸ್ಸಾಪದಾನಂ ಚತುತ್ಥಂ.

೫. ಫುಸಿತಕಮ್ಪಿಯತ್ಥೇರಅಪದಾನಂ

೩೮. ‘‘ವಿಪಸ್ಸೀ ನಾಮ [ಸಬ್ಬತ್ಥಪಿ ಏವಮೇವ ದಿಸ್ಸತಿ]

ಸಮ್ಬುದ್ಧೋ, ಲೋಕಜೇಟ್ಠೋ ನರಾಸಭೋ.

ಖೀಣಾಸವೇಹಿ ಸಹಿತೋ, ಸಙ್ಘಾರಾಮೇ ವಸೀ ತದಾ.

೩೯. ‘‘ಆರಾಮದ್ವಾರಾ ನಿಕ್ಖಮ್ಮ, ವಿಪಸ್ಸೀ [ಸಬ್ಬತ್ಥಪಿ ಏವಮೇವ ದಿಸ್ಸತಿ] ಲೋಕನಾಯಕೋ;

ಸಹ ಸತಸಹಸ್ಸೇಹಿ, ಅಟ್ಠ [ಸಹಸ್ಸಸತಸಿಸ್ಸೇಹಿ, ಅಟ್ಠ (ಕ.), ಅಟ್ಠ ಸತಸಹಸ್ಸೇಹಿ, ಸಹ (?)] ಖೀಣಾಸವೇಹಿ ಸೋ.

೪೦. ‘‘ಅಜಿನೇನ ನಿವತ್ಥೋಹಂ, ವಾಕಚೀರಧರೋಪಿ ಚ;

ಕುಸುಮೋದಕಮಾದಾಯ [ಕುಸುಮ್ಭೋದಕ… (ಸೀ. ಸ್ಯಾ.)], ಸಮ್ಬುದ್ಧಂ ಉಪಸಙ್ಕಮಿಂ.

೪೧. ‘‘ಸಕಂ ಚಿತ್ತಂ ಪಸಾದೇತ್ವಾ, ವೇದಜಾತೋ ಕತಞ್ಜಲೀ;

ಕುಸುಮೋದಕಮಾದಾಯ, ಬುದ್ಧಮಬ್ಭುಕ್ಕಿರಿಂ ಅಹಂ.

೪೨. ‘‘ತೇನ ಕಮ್ಮೇನ ಸಮ್ಬುದ್ಧೋ, ಜಲಜುತ್ತಮನಾಮಕೋ [ಸಬ್ಬತ್ಥಪಿ ಏವಮೇವ ದಿಸ್ಸತಿ];

ಮಮ ಕಮ್ಮಂ ಪಕಿತ್ತೇತ್ವಾ, ಅಗಮಾ ಯೇನ ಪತ್ಥಿತಂ.

೪೩. ‘‘ಫುಸಿತಾ ಪಞ್ಚಸಹಸ್ಸಾ, ಯೇಹಿ ಪೂಜೇಸಹಂ ಜಿನಂ;

ಅಡ್ಢತೇಯ್ಯಸಹಸ್ಸೇಹಿ, ದೇವರಜ್ಜಂ ಅಕಾರಯಿಂ.

೪೪. ‘‘ಅಡ್ಢತೇಯ್ಯಸಹಸ್ಸೇಹಿ, ಚಕ್ಕವತ್ತೀ ಅಹೋಸಹಂ;

ಅವಸೇಸೇನ ಕಮ್ಮೇನ, ಅರಹತ್ತಮಪಾಪುಣಿಂ.

೪೫. ‘‘ದೇವರಾಜಾ ಯದಾ ಹೋಮಿ [ಅಹೋಸಿಂ (ಸ್ಯಾ. ಕ.)], ಮನುಜಾಧಿಪತೀ ಯದಾ [ತದಾ (ಸ್ಯಾ. ಕ.)];

ತಮೇವ ನಾಮಧೇಯ್ಯಂ ಮೇ, ಫುಸಿತೋ ನಾಮ ಹೋಮಹಂ.

೪೬. ‘‘ದೇವಭೂತಸ್ಸ ಸನ್ತಸ್ಸ, ಅಥಾಪಿ ಮಾನುಸಸ್ಸ ವಾ;

ಸಮನ್ತಾ ಬ್ಯಾಮತೋ ಮಯ್ಹಂ, ಫುಸಿತಂವ ಪವಸ್ಸತಿ.

೪೭. ‘‘ಭವಾ ಉಗ್ಘಾಟಿತಾ ಮಯ್ಹಂ, ಕಿಲೇಸಾ ಝಾಪಿತಾ ಮಮ;

ಸಬ್ಬಾಸವಪರಿಕ್ಖೀಣೋ, ಫುಸಿತಸ್ಸ ಇದಂ ಫಲಂ.

೪೮. ‘‘ಚನ್ದನಸ್ಸೇವ ಮೇ ಕಾಯಾ, ತಥಾ ಗನ್ಧೋ ಪವಾಯತಿ;

ಸರೀರತೋ ಮಮ ಗನ್ಧೋ, ಅಡ್ಢಕೋಸೇ ಪವಾಯತಿ.

೪೯. ‘‘ದಿಬ್ಬಗನ್ಧಂ ಸಮ್ಪವನ್ತಂ, ಪುಞ್ಞಕಮ್ಮಸಮಙ್ಗಿನಂ;

ಗನ್ಧಂ ಘತ್ವಾನ ಜಾನನ್ತಿ, ಫುಸಿತೋ ಆಗತೋ ಇಧ.

೫೦. ‘‘ಸಾಖಾಪಲಾಸಕಟ್ಠಾನಿ, ತಿಣಾನಿಪಿ ಚ ಸಬ್ಬಸೋ;

ಮಮ ಸಙ್ಕಪ್ಪಮಞ್ಞಾಯ, ಗನ್ಧೋ ಸಮ್ಪಜ್ಜತೇ ಖಣೇ.

೫೧. ‘‘ಸತಸಹಸ್ಸಿತೋ [ಸಬ್ಬತ್ಥಪಿ ಏವಮೇವ ದಿಸ್ಸತಿ] ಕಪ್ಪೇ, ಚನ್ದನಂ ಅಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಫುಸಿತಸ್ಸ ಇದಂ ಫಲಂ.

೫೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಫುಸಿತಕಮ್ಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಫುಸಿತಕಮ್ಪಿಯತ್ಥೇರಸ್ಸಾಪದಾನಂ ಪಞ್ಚಮಂ.

೬. ಪಭಙ್ಕರತ್ಥೇರಅಪದಾನಂ

೫೩. ‘‘ಪದುಮುತ್ತರಭಗವತೋ, ಲೋಕಜೇಟ್ಠಸ್ಸ ತಾದಿನೋ;

ವಿಪಿನೇ ಚೇತಿಯಂ ಆಸಿ, ವಾಳಮಿಗಸಮಾಕುಲೇ.

೫೪. ‘‘ನ ಕೋಚಿ ವಿಸಹಿ ಗನ್ತುಂ, ಚೇತಿಯಂ ಅಭಿವನ್ದಿತುಂ;

ತಿಣಕಟ್ಠಲತೋನದ್ಧಂ, ಪಲುಗ್ಗಂ ಆಸಿ ಚೇತಿಯಂ.

೫೫. ‘‘ವನಕಮ್ಮಿಕೋ ತದಾ ಆಸಿಂ, ಪಿತುಮಾತುಮತೇನಹಂ [ಪಿತುಪೇತಾಮಹೇನಹಂ (ಸೀ.), ಪಿತಾಪೇತಾಮಹೇನಹಂ (ಸ್ಯಾ.)];

ಅದ್ದಸಂ ವಿಪಿನೇ ಥೂಪಂ, ಲುಗ್ಗಂ ತಿಣಲತಾಕುಲಂ.

೫೬. ‘‘ದಿಸ್ವಾನಾಹಂ ಬುದ್ಧಥೂಪಂ, ಗರುಚಿತ್ತಂ ಉಪಟ್ಠಹಿಂ;

ಬುದ್ಧಸೇಟ್ಠಸ್ಸ ಥೂಪೋಯಂ, ಪಲುಗ್ಗೋ ಅಚ್ಛತೀ ವನೇ.

೫೭. ‘‘ನಚ್ಛನ್ನಂ ನಪ್ಪತಿರೂಪಂ, ಜಾನನ್ತಸ್ಸ ಗುಣಾಗುಣಂ;

ಬುದ್ಧಥೂಪಂ ಅಸೋಧೇತ್ವಾ, ಅಞ್ಞಂ ಕಮ್ಮಂ ಪಯೋಜಯೇ.

೫೮. ‘‘ತಿಣಕಟ್ಠಞ್ಚ ವಲ್ಲಿಞ್ಚ, ಸೋಧಯಿತ್ವಾನ ಚೇತಿಯೇ;

ವನ್ದಿತ್ವಾ ಅಟ್ಠ ವಾರಾನಿ [ಅಟ್ಠ ಠಾನಾನಿ (ಕ.)], ಪಟಿಕುಟಿಕೋ ಅಗಚ್ಛಹಂ.

೫೯. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೬೦. ‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಸೋವಣ್ಣಂ ಸಪಭಸ್ಸರಂ;

ಸಟ್ಠಿಯೋಜನಮುಬ್ಬಿದ್ಧಂ, ತಿಂಸಯೋಜನವಿತ್ಥತಂ.

೬೧. ‘‘ತಿಸತಾನಿ ಚ ವಾರಾನಿ, ದೇವರಜ್ಜಮಕಾರಯಿಂ;

ಪಞ್ಚವೀಸತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.

೬೨. ‘‘ಭವಾಭವೇ ಸಂಸರನ್ತೋ, ಮಹಾಭೋಗಂ ಲಭಾಮಹಂ;

ಭೋಗೇ ಮೇ ಊನತಾ ನತ್ಥಿ, ಸೋಧನಾಯ ಇದಂ ಫಲಂ.

೬೩. ‘‘ಸಿವಿಕಾ ಹತ್ಥಿಖನ್ಧೇನ, ವಿಪಿನೇ ಗಚ್ಛತೋ ಮಮ;

ಯಂ ಯಂ ದಿಸಾಹಂ ಗಚ್ಛಾಮಿ, ಸರಣಂ ಸಮ್ಪತೇ [ಸಿಜ್ಝತೇ (ಕ.)] ವನಂ.

೬೪. ‘‘ಖಾಣುಂ ವಾ ಕಣ್ಟಕಂ ವಾಪಿ, ನಾಹಂ ಪಸ್ಸಾಮಿ ಚಕ್ಖುನಾ;

ಪುಞ್ಞಕಮ್ಮೇನ ಸಂಯುತ್ತೋ, ಸಯಮೇವಾಪನೀಯರೇ.

೬೫. ‘‘ಕುಟ್ಠಂ ಗಣ್ಡೋ ಕಿಲಾಸೋ ಚ, ಅಪಮಾರೋ ವಿತಚ್ಛಿಕಾ;

ದದ್ದು ಕಚ್ಛು [ಕಣ್ಡು (ಸ್ಯಾ.)] ಚ ಮೇ ನತ್ಥಿ, ಸೋಧನಾಯ ಇದಂ ಫಲಂ.

೬೬. ‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಸ್ಸ ಸೋಧನೇ [ಬುದ್ಧಥೂಪಮ್ಹಿ ಸೋಧಿತೇ (ಸ್ಯಾ.)];

ನಾಭಿಜಾನಾಮಿ ಮೇ ಕಾಯೇ, ಜಾತಂ ಪಿಳಕಬಿನ್ದುಕಂ.

೬೭. ‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಮ್ಹಿ ಸೋಧಿತೇ [ಸಬ್ಬತ್ಥಪಿ ಏವಮೇವ ದಿಸ್ಸತಿ, ತಥಾ ಉಪರಿಪಿ];

ದುವೇ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ.