೩೫. ಏಕಪದುಮಿಯವಗ್ಗೋ

೧. ಏಕಪದುಮಿಯತ್ಥೇರಅಪದಾನಂ

೧. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಭವಾಭವೇ ವಿಭಾವೇನ್ತೋ, ತಾರೇಸಿ ಜನತಂ ಬಹುಂ.

೨. ‘‘ಹಂಸರಾಜಾ ತದಾ ಹೋಮಿ, ದಿಜಾನಂ ಪವರೋ ಅಹಂ;

ಜಾತಸ್ಸರಂ ಸಮೋಗಯ್ಹ, ಕೀಳಾಮಿ ಹಂಸಕೀಳಿತಂ.

೩. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಜಾತಸ್ಸರಸ್ಸ ಉಪರಿ, ಆಗಚ್ಛಿ ತಾವದೇ ಜಿನೋ.

೪. ‘‘ದಿಸ್ವಾನಹಂ ದೇವದೇವಂ, ಸಯಮ್ಭುಂ ಲೋಕನಾಯಕಂ;

ವಣ್ಟೇ ಛೇತ್ವಾನ ಪದುಮಂ, ಸತಪತ್ತಂ ಮನೋರಮಂ.

೫. ‘‘ಮುಖತುಣ್ಡೇನ ಪಗ್ಗಯ್ಹ, ಪಸನ್ನೋ ಲೋಕನಾಯಕೇ [ವಿಪ್ಪಸನ್ನೇನ ಚೇತಸಾ (ಸ್ಯಾ.)];

ಉಕ್ಖಿಪಿತ್ವಾನ ಗಗಣೇ [ಉಕ್ಖಿಪಿತ್ವಾ ನಲಾಟೇನ (ಕ.)], ಬುದ್ಧಸೇಟ್ಠಂ ಅಪೂಜಯಿಂ.

೬. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಅನ್ತಲಿಕ್ಖೇ ಠಿತೋ ಸತ್ಥಾ, ಅಕಾ ಮೇ ಅನುಮೋದನಂ.

೭. ‘‘‘ಇಮಿನಾ ಏಕಪದುಮೇನ, ಚೇತನಾಪಣಿಧೀಹಿ ಚ;

ಕಪ್ಪಾನಂ ಸತಸಹಸ್ಸಂ, ವಿನಿಪಾತಂ ನ ಗಚ್ಛಸಿ’.

೮. ‘‘ಇದಂ ವತ್ವಾನ ಸಮ್ಬುದ್ಧೋ, ಜಲಜುತ್ತಮನಾಮಕೋ;

ಮಮ ಕಮ್ಮಂ ಪಕಿತ್ತೇತ್ವಾ, ಅಗಮಾ ಯೇನ ಪತ್ಥಿತಂ.

೯. ‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೦. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಪದುಮಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕಪದುಮಿಯತ್ಥೇರಸ್ಸಾಪದಾನಂ ಪಠಮಂ.

೨. ತೀಣುಪ್ಪಲಮಾಲಿಯತ್ಥೇರಅಪದಾನಂ

೧೧. ‘‘ಚನ್ದಭಾಗಾನದೀತೀರೇ, ಅಹೋಸಿಂ ವಾನರೋ ತದಾ;

ಅದ್ದಸಂ ವಿರಜಂ ಬುದ್ಧಂ, ನಿಸಿನ್ನಂ ಪಬ್ಬತನ್ತರೇ.

೧೨. ‘‘ಓಭಾಸೇನ್ತಂ ದಿಸಾ ಸಬ್ಬಾ, ಸಾಲರಾಜಂವ ಫುಲ್ಲಿತಂ;

ಲಕ್ಖಣಬ್ಯಞ್ಜನೂಪೇತಂ, ದಿಸ್ವಾ ಅತ್ತಮನೋ ಅಹುಂ.

೧೩. ‘‘ಉದಗ್ಗಚಿತ್ತೋ ಸುಮನೋ, ಪೀತಿಯಾ ಹಟ್ಠಮಾನಸೋ;

ತೀಣಿ ಉಪ್ಪಲಪುಪ್ಫಾನಿ, ಮತ್ಥಕೇ ಅಭಿರೋಪಯಿಂ.

೧೪. ‘‘ಪುಪ್ಫಾನಿ ಅಭಿರೋಪೇತ್ವಾ, ವಿಪಸ್ಸಿಸ್ಸ ಮಹೇಸಿನೋ;

ಸಗಾರವೋ ಭವಿತ್ವಾನ [ಗಮಿತ್ವಾನ (ಸೀ.), ನಮಿತ್ವಾನ (ಕ.)], ಪಕ್ಕಾಮಿಂ ಉತ್ತರಾಮುಖೋ.

೧೫. ‘‘ಗಚ್ಛನ್ತೋ ಪಟಿಕುಟಿಕೋ, ವಿಪ್ಪಸನ್ನೇನ ಚೇತಸಾ;

ಸೇಲನ್ತರೇ ಪತಿತ್ವಾನ [ಪಪತಿತ್ವಾ (ಸ್ಯಾ. ಕ.)], ಪಾಪುಣಿಂ ಜೀವಿತಕ್ಖಯಂ.

೧೬. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ [ಪುರಿಮಂ ಜಾತಿಂ (?) ಉಪರಿ ೩೮ ವಗ್ಗೇ ತತಿಯಾಪದಾನೇ ಏವಮೇವ ದಿಸ್ಸತಿ], ತಾವತಿಂಸಮಗಚ್ಛಹಂ.

೧೭. ‘‘ಸತಾನಂ ತೀಣಿಕ್ಖತ್ತುಞ್ಚ, ದೇವರಜ್ಜಂ ಅಕಾರಯಿಂ;

ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.

೧೮. ‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತೀಣುಪ್ಪಲಮಾಲಿಯೋ [ತಿಉಪ್ಪಲಮಾಲಿಯೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತೀಣುಪ್ಪಲಮಾಲಿಯತ್ಥೇರಸ್ಸಾಪದಾನಂ ದುತಿಯಂ.

೩. ಧಜದಾಯಕತ್ಥೇರಅಪದಾನಂ

೨೦. ‘‘ತಿಸ್ಸೋ ನಾಮ ಅಹು ಸತ್ಥಾ, ಲೋಕಜೇಟ್ಠೋ ನರಾಸಭೋ;

ತಯೋಪಧಿಕ್ಖಯೇ [ತಸ್ಸೋಪಧಿಕ್ಖಯೇ (ಸೀ.)] ದಿಸ್ವಾ, ಧಜಂ ಆರೋಪಿತಂ ಮಯಾ.

೨೧. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೨೨. ‘‘ಸತಾನಂ ತೀಣಿಕ್ಖತ್ತುಞ್ಚ, ದೇವರಜ್ಜಂ ಅಕಾರಯಿಂ;

ಸತಾನಂ ಪಞ್ಚಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.

೨೩. ‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;

ಅನುಭೋಮಿ ಸಕಂ ಕಮ್ಮಂ, ಪುಬ್ಬೇ ಸುಕತಮತ್ತನೋ.

೨೪. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಧಜದಾನಸ್ಸಿದಂ ಫಲಂ.

೨೫. ‘‘ಇಚ್ಛಮಾನೋ ಚಹಂ ಅಜ್ಜ, ಸಕಾನನಂ ಸಪಬ್ಬತಂ;

ಖೋಮದುಸ್ಸೇನ ಛಾದೇಯ್ಯಂ, ತದಾ ಮಯ್ಹಂ ಕತೇ ಫಲಂ.

೨೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಧಜದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಧಜದಾಯಕತ್ಥೇರಸ್ಸಾಪದಾನಂ ತತಿಯಂ.

೪. ತಿಕಿಙ್ಕಣಿಪೂಜಕತ್ಥೇರಅಪದಾನಂ

೨೭. ‘‘ಹಿಮವನ್ತಸ್ಸಾವಿದೂರೇ, ಭೂತಗಣೋ ನಾಮ ಪಬ್ಬತೋ;

ತತ್ಥದ್ದಸಂ ಪಂಸುಕೂಲಂ, ದುಮಗ್ಗಮ್ಹಿ ವಿಲಗ್ಗಿತಂ.

೨೮. ‘‘ತೀಣಿ ಕಿಙ್ಕಣಿಪುಪ್ಫಾನಿ, ಓಚಿನಿತ್ವಾನಹಂ ತದಾ;

ಹಟ್ಠೋ ಹಟ್ಠೇನ ಚಿತ್ತೇನ, ಪಂಸುಕೂಲಂ ಅಪೂಜಯಿಂ.

೨೯. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ತಿಣ್ಣಂ ಪುಪ್ಫಾನಿದಂ ಫಲಂ.

೩೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಕಿಙ್ಕಣಿಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಕಿಙ್ಕಣಿಪೂಜಕತ್ಥೇರಸ್ಸಾಪದಾನಂ ಚತುತ್ಥಂ.

೫. ನಳಾಗಾರಿಕತ್ಥೇರಅಪದಾನಂ

೩೧. ‘‘ಹಿಮವನ್ತಸ್ಸಾವಿದೂರೇ, ಹಾರಿತೋ ನಾಮ ಪಬ್ಬತೋ;

ಸಯಮ್ಭೂ ನಾರದೋ ನಾಮ, ರುಕ್ಖಮೂಲೇ ವಸೀ ತದಾ.

೩೨. ‘‘ನಳಾಗಾರಂ ಕರಿತ್ವಾನ, ತಿಣೇನ ಛಾದಯಿಂ ಅಹಂ;

ಚಙ್ಕಮಂ ಸೋಧಯಿತ್ವಾನ, ಸಯಮ್ಭುಸ್ಸ ಅದಾಸಹಂ.

೩೩. ‘‘ಚತುದ್ದಸಸು ಕಪ್ಪೇಸು, ದೇವಲೋಕೇ ರಮಿಂ ಅಹಂ;

ಚತುಸತ್ತತಿಕ್ಖತ್ತುಞ್ಚ, ದೇವರಜ್ಜಂ ಅಕಾರಯಿಂ.

೩೪. ‘‘ಚತುಸತ್ತತಿ [ಸತ್ತಸತ್ತತಿ (ಸೀ.)] ಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೩೫. ‘‘ಉಬ್ಬಿದ್ಧಂ ಭವನಂ ಮಯ್ಹಂ, ಇನ್ದಲಟ್ಠೀವ ಉಗ್ಗತಂ;

ಸಹಸ್ಸಥಮ್ಭಂ ಅತುಲಂ, ವಿಮಾನಂ ಸಪಭಸ್ಸರಂ.

೩೬. ‘‘ದ್ವೇ ಸಮ್ಪತ್ತೀ ಅನುಭೋತ್ವಾ, ಸುಕ್ಕಮೂಲೇನ ಚೋದಿತೋ;

ಗೋತಮಸ್ಸ ಭಗವತೋ, ಸಾಸನೇ ಪಬ್ಬಜಿಂ ಅಹಂ.

೩೭. ‘‘ಪಧಾನಪಹಿತತ್ತೋಮ್ಹಿ, ಉಪಸನ್ತೋ ನಿರೂಪಧಿ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೩೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನಳಾಗಾರಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ನಳಾಗಾರಿಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಚಮ್ಪಕಪುಪ್ಫಿಯತ್ಥೇರಅಪದಾನಂ

೩೯. ‘‘ಹಿಮವನ್ತಸ್ಸಾವಿದೂರೇ, ಜಾಪಲೋ [ಚಾಪಲೋ (ಸೀ.), ಛಾಪಲೋ (ಸ್ಯಾ.)] ನಾಮ ಪಬ್ಬತೋ;

ಬುದ್ಧೋ ಸುದಸ್ಸನೋ ನಾಮ, ವಿಹಾಸಿ ಪಬ್ಬತನ್ತರೇ.

೪೦. ‘‘ಪುಪ್ಫಂ ಹೇಮವನ್ತಂ [ಹೇಮವತಂ (ಸೀ.), ಹೇಮವಣ್ಣಂ (ಸ್ಯಾ.)] ಗಯ್ಹ, ಗಚ್ಛಂ ವೇಹಾಯಸೇನಹಂ;

ಅದ್ದಸಂ ವಿರಜಂ ಬುದ್ಧಂ, ಓಘತಿಣ್ಣಮನಾಸವಂ.

೪೧. ‘‘ಸತ್ತ ಚಮ್ಪಕಪುಪ್ಫಾನಿ, ಸೀಸೇ ಕತ್ವಾನಹಂ ತದಾ;

ಬುದ್ಧಸ್ಸ ಅಭಿರೋಪೇಸಿಂ, ಸಯಮ್ಭುಸ್ಸ ಮಹೇಸಿನೋ.

೪೨. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೪೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಚಮ್ಪಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಚಮ್ಪಕಪುಪ್ಫಿಯತ್ಥೇರಸ್ಸಾಪದಾನಂ ಛಟ್ಠಂ.

೭. ಪದುಮಪೂಜಕತ್ಥೇರಅಪದಾನಂ

೪೪. ‘‘ಹಿಮವನ್ತಸ್ಸಾವಿದೂರೇ, ರೋಮಸೋ ನಾಮ ಪಬ್ಬತೋ;

ಬುದ್ಧೋಪಿ ಸಮ್ಭವೋ ನಾಮ, ಅಬ್ಭೋಕಾಸೇ ವಸೀ ತದಾ.

೪೫. ‘‘ಭವನಾ ನಿಕ್ಖಮಿತ್ವಾನ, ಪದುಮಂ ಧಾರಯಿಂ ಅಹಂ;

ಏಕಾಹಂ ಧಾರಯಿತ್ವಾನ, ಪುನ ಭವನುಪಾಗಮಿಂ.

೪೬. ‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೪೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪದುಮಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪದುಮಪೂಜಕತ್ಥೇರಸ್ಸಾಪದಾನಂ ಸತ್ತಮಂ.

ತೇರಸಮಂ ಭಾಣವಾರಂ.

೮. ತಿಣಮುಟ್ಠಿದಾಯಕತ್ಥೇರಅಪದಾನಂ

೪೮. ‘‘ಹಿಮವನ್ತಸ್ಸಾವಿದೂರೇ, ಲಮ್ಬಕೋ ನಾಮ ಪಬ್ಬತೋ;

ಉಪತಿಸ್ಸೋ ನಾಮ ಸಮ್ಬುದ್ಧೋ, ಅಬ್ಭೋಕಾಸಮ್ಹಿ ಚಙ್ಕಮಿ.

೪೯. ‘‘ಮಿಗಲುದ್ದೋ ತದಾ ಆಸಿಂ, ಅರಞ್ಞೇ ಕಾನನೇ ಅಹಂ;

ದಿಸ್ವಾನ ತಂ ದೇವದೇವಂ, ಸಯಮ್ಭುಂ ಅಪರಾಜಿತಂ.

೫೦. ‘‘ವಿಪ್ಪಸನ್ನೇನ ಚಿತ್ತೇನ, ತದಾ ತಸ್ಸ ಮಹೇಸಿನೋ;

ನಿಸೀದನತ್ಥಂ ಬುದ್ಧಸ್ಸ, ತಿಣಮುಟ್ಠಿಮದಾಸಹಂ.

೫೧. ‘‘ದತ್ವಾನ ದೇವದೇವಸ್ಸ, ಭಿಯ್ಯೋ ಚಿತ್ತಂ ಪಸಾದಯಿಂ;

ಸಮ್ಬುದ್ಧಂ ಅಭಿವಾದೇತ್ವಾ, ಪಕ್ಕಾಮಿಂ ಉತ್ತರಾಮುಖೋ.

೫೨. ‘‘ಅಚಿರಂ ಗತಮತ್ತಂ ಮಂ, ಮಿಗರಾಜಾ ಅಪೋಥಯಿ [ಅಹೇಠಯಿ (ಸೀ. ಸ್ಯಾ.)];

ಸೀಹೇನ ಪೋಥಿತೋ [ಪಾತಿತೋ (ಸೀ. ಸ್ಯಾ.)] ಸನ್ತೋ, ತತ್ಥ ಕಾಲಙ್ಕತೋ ಅಹಂ.

೫೩. ‘‘ಆಸನ್ನೇ ಮೇ ಕತಂ ಕಮ್ಮಂ, ಬುದ್ಧಸೇಟ್ಠೇ ಅನಾಸವೇ;

ಸುಮುತ್ತೋ ಸರವೇಗೋವ, ದೇವಲೋಕಂ ಅಗಞ್ಛಹಂ.

೫೪. ‘‘ಯೂಪೋ ತತ್ಥ ಸುಭೋ ಆಸಿ, ಪುಞ್ಞಕಮ್ಮಾಭಿನಿಮ್ಮಿತೋ;

ಸಹಸ್ಸಕಣ್ಡೋ ಸತಭೇಣ್ಡು, ಧಜಾಲು ಹರಿತಾಮಯೋ.

೫೫. ‘‘ಪಭಾ ನಿದ್ಧಾವತೇ ತಸ್ಸ, ಸತರಂಸೀವ ಉಗ್ಗತೋ;

ಆಕಿಣ್ಣೋ ದೇವಕಞ್ಞಾಹಿ, ಆಮೋದಿಂ ಕಾಮಕಾಮಹಂ.

೫೬. ‘‘ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;

ಆಗನ್ತ್ವಾನ ಮನುಸ್ಸತ್ತಂ, ಪತ್ತೋಮ್ಹಿ ಆಸವಕ್ಖಯಂ.

೫೭. ‘‘ಚತುನ್ನವುತಿತೋ ಕಪ್ಪೇ, ನಿಸೀದನಮದಾಸಹಂ;

ದುಗ್ಗತಿಂ ನಾಭಿಜಾನಾಮಿ, ತಿಣಮುಟ್ಠಿಯಿದಂ ಫಲಂ.

೫೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಣಮುಟ್ಠಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಣಮುಟ್ಠಿದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.

೯. ತಿನ್ದುಕಫಲದಾಯಕತ್ಥೇರಅಪದಾನಂ

೫೯. ‘‘ಕಣಿಕಾರಂವ ಜೋತನ್ತಂ, ನಿಸಿನ್ನಂ ಪಬ್ಬತನ್ತರೇ;

ಅದ್ದಸಂ ವಿರಜಂ ಬುದ್ಧಂ, ಓಘತಿಣ್ಣಮನಾಸವಂ.

೬೦. ‘‘ತಿನ್ದುಕಂ ಸಫಲಂ ದಿಸ್ವಾ, ಭಿನ್ದಿತ್ವಾನ ಸಕೋಸಕಂ [ಸಕೋಟಕಂ (ಸೀ.), ಸಕೋಟಿಕಂ (ಸ್ಯಾ.)];

ಪಸನ್ನಚಿತ್ತೋ ಸುಮನೋ, ಸಯಮ್ಭುಸ್ಸ ಮದಾಸಹಂ [ವೇಸ್ಸಭುಸ್ಸ ಅದಾಸಹಂ (ಸೀ.)].

೬೧. ‘‘ಏಕನವುತಿತೋ ಕಪ್ಪೇ, ಯಂ ಫಲಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.

೬೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿನ್ದುಕಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿನ್ದುಕಫಲದಾಯಕತ್ಥೇರಸ್ಸಾಪದಾನಂ ನವಮಂ.

೧೦. ಏಕಞ್ಜಲಿಯತ್ಥೇರಅಪದಾನಂ

೬೩. ‘‘ರೋಮಸೋ [ರೇವತೋ (ಸೀ.)] ನಾಮ ಸಮ್ಬುದ್ಧೋ, ನದೀಕೂಲೇ ವಸೀ ತದಾ;

ಅದ್ದಸಂ ವಿರಜಂ ಬುದ್ಧಂ, ಪೀತರಂಸಿಂವ ಭಾಣುಮಂ.

೬೪. ‘‘ಉಕ್ಕಾಮುಖಪಹಟ್ಠಂವ, ಖದಿರಙ್ಗಾರಸನ್ನಿಭಂ;

ಓಸಧಿಂವ ವಿರೋಚನ್ತಂ, ಏಕಞ್ಜಲಿಮಕಾಸಹಂ.