೩೬. ಸದ್ದಸಞ್ಞಕವಗ್ಗೋ

೧. ಸದ್ದಸಞ್ಞಕತ್ಥೇರಅಪದಾನಂ

೧. ‘‘ಮಿಗಲುದ್ದೋ ಪುರೇ ಆಸಿಂ, ಅರಞ್ಞೇ ಕಾನನೇ ಅಹಂ;

ತತ್ಥದ್ದಸಾಸಿಂ ಸಮ್ಬುದ್ಧಂ, ದೇವಸಙ್ಘಪುರಕ್ಖತಂ.

೨. ‘‘ಚತುಸಚ್ಚಂ ಪಕಾಸೇನ್ತಂ, ಉದ್ಧರನ್ತಂ ಮಹಾಜನಂ;

ಅಸ್ಸೋಸಿಂ ಮಧುರಂ ವಾಚಂ, ಕರವೀಕರುದೋಪಮಂ [ರುತೋಪಮಂ (?)].

೩. ‘‘ಬ್ರಹ್ಮಸರಸ್ಸ ಮುನಿನೋ, ಸಿಖಿನೋ ಲೋಕಬನ್ಧುನೋ;

ಘೋಸೇ ಚಿತ್ತಂ ಪಸಾದೇತ್ವಾ, ಪತ್ತೋಮ್ಹಿ ಆಸವಕ್ಖಯಂ.

೪. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಸಾದಸ್ಸ ಇದಂ ಫಲಂ.

೫. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸದ್ದಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸದ್ದಸಞ್ಞಕತ್ಥೇರಸ್ಸಾಪದಾನಂ ಪಠಮಂ.

೨. ಯವಕಲಾಪಿಯತ್ಥೇರಅಪದಾನಂ

೬. ‘‘ನಗರೇ ಅರುಣವತಿಯಾ, ಆಸಿಂ ಯವಸಿಕೋ ತದಾ;

ಪನ್ಥೇ ದಿಸ್ವಾನ ಸಮ್ಬುದ್ಧಂ, ಯವಕಲಾಪಂ ಸನ್ಥರಿಂ [ಯವಕಲಾಪಮವತ್ಥರಿಂ (ಸೀ.)].

೭. ‘‘ಅನುಕಮ್ಪಕೋ ಕಾರುಣಿಕೋ, ಸಿಖೀ ಲೋಕಗ್ಗನಾಯಕೋ;

ಮಮ ಸಙ್ಕಪ್ಪಮಞ್ಞಾಯ, ನಿಸೀದಿ ಯವಸನ್ಥರೇ.

೮. ‘‘ದಿಸ್ವಾ ನಿಸಿನ್ನಂ ವಿಮಲಂ, ಮಹಾಝಾಯಿಂ ವಿನಾಯಕಂ;

ಪಾಮೋಜ್ಜಂ ಜನಯಿತ್ವಾನ, ತತ್ಥ ಕಾಲಙ್ಕತೋ ಅಹಂ.

೯. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಯವತ್ಥರೇ ಇದಂ ಫಲಂ.

೧೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಯವಕಲಾಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಯವಕಲಾಪಿಯತ್ಥೇರಸ್ಸಾಪದಾನಂ ದುತಿಯಂ.

೩. ಕಿಂಸುಕಪೂಜಕತ್ಥೇರಅಪದಾನಂ

೧೧. ‘‘ಕಿಂಸುಕಂ ಪುಪ್ಫಿತಂ ದಿಸ್ವಾ, ಪಗ್ಗಹೇತ್ವಾನ ಅಞ್ಜಲಿಂ;

ಬುದ್ಧಂ ಸರಿತ್ವಾ ಸಿದ್ಧತ್ಥಂ, ಆಕಾಸೇ ಅಭಿಪೂಜಯಿಂ.

೧೨. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕಿಂಸುಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕಿಂಸುಕಪೂಜಕತ್ಥೇರಸ್ಸಾಪದಾನಂ ತತಿಯಂ.

೪. ಸಕೋಸಕಕೋರಣ್ಡದಾಯಕತ್ಥೇರಅಪದಾನಂ

೧೪. ‘‘ಅಕ್ಕನ್ತಞ್ಚ ಪದಂ ದಿಸ್ವಾ, ಸಿಖಿನೋ ಲೋಕಬನ್ಧುನೋ;

ಏಕಂಸಂ ಅಜಿನಂ ಕತ್ವಾ, ಪದಸೇಟ್ಠಂ ಅವನ್ದಹಂ.

೧೫. ‘‘ಕೋರಣ್ಡಂ ಪುಪ್ಫಿತಂ ದಿಸ್ವಾ, ಪಾದಪಂ ಧರಣೀರುಹಂ;

ಸಕೋಸಕಂ [ಸಕೋಟಕಂ (ಸೀ. ಸ್ಯಾ.)] ಗಹೇತ್ವಾನ, ಪದಚಕ್ಕಂ ಅಪೂಜಯಿಂ.

೧೬. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪದಪೂಜಾಯಿದಂ ಫಲಂ.

೧೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಕೋಸಕ [ಸಕೋಟಕ (ಸೀ. ಸ್ಯಾ.)] ಕೋರಣ್ಡದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಕೋಸಕಕೋರಣ್ಡದಾಯಕತ್ಥೇರಸ್ಸಾಪದಾನಂ ಚತುತ್ಥಂ.

೫. ದಣ್ಡದಾಯಕತ್ಥೇರಅಪದಾನಂ

೧೮. ‘‘ಕಾನನಂ ವನಮೋಗಯ್ಹ, ವೇಳುಂ ಛೇತ್ವಾನಹಂ ತದಾ;

ಆಲಮ್ಬನಂ ಕರಿತ್ವಾನ, ಸಙ್ಘಸ್ಸ ಅದದಂ ಅಹಂ.

೧೯. ‘‘ತೇನ ಚಿತ್ತಪ್ಪಸಾದೇನ, ಸುಬ್ಬತೇ ಅಭಿವಾದಿಯ;

ಆಲಮ್ಬನಮ್ಪಿ ದತ್ವಾನ, ಪಕ್ಕಾಮಿಂ ಉತ್ತರಾಮುಖೋ.

೨೦. ‘‘ಚತುನ್ನವುತಿತೋ ಕಪ್ಪೇ, ಯಂ ದಣ್ಡಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ದಣ್ಡದಾನಸ್ಸಿದಂ ಫಲಂ.

೨೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ದಣ್ಡದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ದಣ್ಡದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಅಮ್ಬಯಾಗುದಾಯಕತ್ಥೇರಅಪದಾನಂ

೨೨. ‘‘ಸತರಂಸೀ ನಾಮ ಸಮ್ಬುದ್ಧೋ, ಸಯಮ್ಭೂ ಅಪರಾಜಿತೋ;

ವುಟ್ಠಹಿತ್ವಾ ಸಮಾಧಿಮ್ಹಾ, ಭಿಕ್ಖಾಯ ಮಮುಪಾಗಮಿ.

೨೩. ‘‘ಪಚ್ಚೇಕಬುದ್ಧಂ ದಿಸ್ವಾನ, ಅಮ್ಬಯಾಗುಂ ಅದಾಸಹಂ;

ವಿಪ್ಪಸನ್ನಮನಂ ತಸ್ಸ, ವಿಪ್ಪಸನ್ನೇನ ಚೇತಸಾ.

೨೪. ‘‘ಚತುನ್ನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಅಮ್ಬಯಾಗುಯಿದಂ ಫಲಂ.

೨೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಮ್ಬಯಾಗುದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅಮ್ಬಯಾಗುದಾಯಕತ್ಥೇರಸ್ಸಾಪದಾನಂ ಛಟ್ಠಂ.

೭. ಸುಪುಟಕಪೂಜಕತ್ಥೇರಅಪದಾನಂ

೨೬. ‘‘ದಿವಾವಿಹಾರಾ ನಿಕ್ಖನ್ತೋ, ವಿಪಸ್ಸೀ ಲೋಕನಾಯಕೋ;

ಭಿಕ್ಖಾಯ ವಿಚರನ್ತೋ ಸೋ, ಮಮ ಸನ್ತಿಕುಪಾಗಮಿ.

೨೭. ‘‘ತತೋ ಪತೀತೋ ಸುಮನೋ, ಬುದ್ಧಸೇಟ್ಠಸ್ಸ ತಾದಿನೋ;

ಲೋಣಸುಪುಟಕಂ ದತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.

೨೮. ‘‘ಏಕನವುತಿತೋ ಕಪ್ಪೇ, ಯಂ ಪುಟಕಮದಾಸಹಂ;

ದುಗ್ಗತಿಂ ನಾಭಿಜಾನಾಮಿ, ಪುಟಕಸ್ಸ ಇದಂ ಫಲಂ.

೨೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸುಪುಟಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸುಪುಟಕಪೂಜಕತ್ಥೇರಸ್ಸಾಪದಾನಂ ಸತ್ತಮಂ.

೮. ಮಞ್ಚದಾಯಕತ್ಥೇರಅಪದಾನಂ

೩೦. ‘‘ವಿಪಸ್ಸಿನೋ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;

ಏಕಂ ಮಞ್ಚಂ ಮಯಾ ದಿನ್ನಂ, ಪಸನ್ನೇನ ಸಪಾಣಿನಾ.

೩೧. ‘‘ಹತ್ಥಿಯಾನಂ ಅಸ್ಸಯಾನಂ, ದಿಬ್ಬಯಾನಂ ಸಮಜ್ಝಗಂ;

ತೇನ ಮಞ್ಚಕದಾನೇನ, ಪತ್ತೋಮ್ಹಿ ಆಸವಕ್ಖಯಂ.

೩೨. ‘‘ಏಕನವುತಿತೋ ಕಪ್ಪೇ, ಯಂ ಮಞ್ಚಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಮಞ್ಚದಾನಸ್ಸಿದಂ ಫಲಂ.

೩೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮಞ್ಚದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಮಞ್ಚದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.

೯. ಸರಣಗಮನಿಯತ್ಥೇರಅಪದಾನಂ

೩೪. ‘‘ಆರುಹಿಮ್ಹ ತದಾ ನಾವಂ, ಭಿಕ್ಖು ಚಾಜೀವಕೋ ಚಹಂ;

ನಾವಾಯ ಭಿಜ್ಜಮಾನಾಯ, ಭಿಕ್ಖು ಮೇ ಸರಣಂ ಅದಾ.

೩೫. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಞ್ಚ ಮೇ ಸರಣಂ ಅದಾ;

ದುಗ್ಗತಿಂ ನಾಭಿಜಾನಾಮಿ, ಸರಣಾಗಮನೇ ಫಲಂ.

೩೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸರಣಗಮನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸರಣಗಮನಿಯತ್ಥೇರಸ್ಸಾಪದಾನಂ ನವಮಂ.

೧೦. ಪಿಣ್ಡಪಾತಿಕತ್ಥೇರಅಪದಾನಂ

೩೭. ‘‘ತಿಸ್ಸೋ ನಾಮಾಸಿ ಸಮ್ಬುದ್ಧೋ, ವಿಹಾಸಿ ವಿಪಿನೇ ತದಾ;

ತುಸಿತಾ ಹಿ ಇಧಾಗನ್ತ್ವಾ, ಪಿಣ್ಡಪಾತಂ ಅದಾಸಹಂ.

೩೮. ‘‘ಸಮ್ಬುದ್ಧಮಭಿವಾದೇತ್ವಾ, ತಿಸ್ಸಂ ನಾಮ ಮಹಾಯಸಂ;

ಸಕಂ ಚಿತ್ತಂ ಪಸಾದೇತ್ವಾ, ತುಸಿತಂ ಅಗಮಾಸಹಂ.

೩೯. ‘‘ದ್ವೇನವುತೇ ಇತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಿಣ್ಡಪಾತಸ್ಸಿದಂ ಫಲಂ.

೪೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಿಣ್ಡಪಾತಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಿಣ್ಡಪಾತಿಕತ್ಥೇರಸ್ಸಾಪದಾನಂ ದಸಮಂ.

ಸದ್ದಸಞ್ಞಕವಗ್ಗೋ ಛತ್ತಿಂಸತಿಮೋ.