೧೦. ಉಕ್ಖಿತ್ತಪದುಮಿಯತ್ಥೇರಅಪದಾನಂ

೧೨೯. ‘‘ನಗರೇ ಹಂಸವತಿಯಾ, ಅಹೋಸಿಂ ಮಾಲಿಕೋ ತದಾ;

ಓಗಾಹೇತ್ವಾ ಪದುಮಸರಂ, ಸತಪತ್ತಂ ಓಚಿನಾಮಹಂ.

೧೩೦. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಸಹ ಸತಸಹಸ್ಸೇಹಿ [ಸತಸಹಸ್ಸಸಿಸ್ಸೇಹಿ (ಕ.)], ಸನ್ತಚಿತ್ತೇಹಿ ತಾದಿಭಿ.

೧೩೧. ‘‘ಖೀಣಾಸವೇಹಿ ಸುದ್ಧೇಹಿ, ಛಳಭಿಞ್ಞೇಹಿ ಝಾಯಿಭಿ [ಸೋ ತದಾ (ಸೀ.), ಸೋ ಸಹ (ಕ.)];

ಮಮ ವುದ್ಧಿಂ ಸಮನ್ವೇಸಂ, ಆಗಚ್ಛಿ ಮಮ ಸನ್ತಿಕಂ [ಮಮ ಸನ್ತಿಕೇ (ಸೀ.), ಪುರಿಸುತ್ತಮೋ (ಸ್ಯಾ. ಕ.)].

೧೩೨. ‘‘ದಿಸ್ವಾನಹಂ ದೇವದೇವಂ, ಸಯಮ್ಭುಂ ಲೋಕನಾಯಕಂ;

ವಣ್ಟೇ ಛೇತ್ವಾ ಸತಪತ್ತಂ, ಉಕ್ಖಿಪಿಮಮ್ಬರೇ ತದಾ.

೧೩೩. ‘‘ಯದಿ ಬುದ್ಧೋ ತುವಂ ವೀರ, ಲೋಕಜೇಟ್ಠೋ ನರಾಸಭೋ;

ಸಯಂ ಗನ್ತ್ವಾ ಸತಪತ್ತಾ, ಮತ್ಥಕೇ ಧಾರಯನ್ತು ತೇ.

೧೩೪. ‘‘ಅಧಿಟ್ಠಹಿ ಮಹಾವೀರೋ, ಲೋಕಜೇಟ್ಠೋ ನರಾಸಭೋ;

ಬುದ್ಧಸ್ಸ ಆನುಭಾವೇನ, ಮತ್ಥಕೇ ಧಾರಯಿಂಸು ತೇ.

೧೩೫. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೧೩೬. ‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಸತಪತ್ತನ್ತಿ ವುಚ್ಚತಿ;

ಸಟ್ಠಿಯೋಜನಮುಬ್ಬಿದ್ಧಂ, ತಿಂಸಯೋಜನವಿತ್ಥತಂ.

೧೩೭. ‘‘ಸಹಸ್ಸಕ್ಖತ್ತುಂ ದೇವಿನ್ದೋ, ದೇವರಜ್ಜಮಕಾರಯಿಂ;

ಪಞ್ಚಸತ್ತತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.

೧೩೮. ‘‘ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ;

ಅನುಭೋಮಿ ಸಕಂ ಕಮ್ಮಂ, ಪುಬ್ಬೇ ಸುಕತಮತ್ತನೋ.

೧೩೯. ‘‘ತೇನೇವೇಕಪದುಮೇನ, ಅನುಭೋತ್ವಾನ ಸಮ್ಪದಾ;

ಗೋತಮಸ್ಸ ಭಗವತೋ, ಧಮ್ಮಂ ಸಚ್ಛಿಕರಿಂ ಅಹಂ.

೧೪೦. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೧೪೧. ‘‘ಸತಸಹಸ್ಸಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಏಕಪದುಮಸ್ಸಿದಂ ಫಲಂ.

೧೪೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಉಕ್ಖಿತ್ತಪದುಮಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉಕ್ಖಿತ್ತಪದುಮಿಯತ್ಥೇರಸ್ಸಾಪದಾನಂ ದಸಮಂ.

ಗನ್ಧೋದಕವಗ್ಗೋ ಚತುತಿಂಸತಿಮೋ.