೮. ಉತ್ತರೇಯ್ಯದಾಯಕತ್ಥೇರಅಪದಾನಂ

೯೦. ‘‘ನಗರೇ ಹಂಸವತಿಯಾ, ಅಹೋಸಿಂ ಬ್ರಾಹ್ಮಣೋ ತದಾ;

ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ.

೯೧. ‘‘ಪುರಕ್ಖತೋ ಸಸಿಸ್ಸೇಹಿ, ಜಾತಿಮಾ ಚ ಸುಸಿಕ್ಖಿತೋ;

ತೋಯಾಭಿಸೇಚನತ್ಥಾಯ, ನಗರಾ ನಿಕ್ಖಮಿಂ ತದಾ.

೯೨. ‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಖೀಣಾಸವಸಹಸ್ಸೇಹಿ, ಪಾವಿಸೀ ನಗರಂ ಜಿನೋ.

೯೩. ‘‘ಸುಚಾರುರೂಪಂ ದಿಸ್ವಾನ, ಆನೇಞ್ಜಕಾರಿತಂ ವಿಯ;

ಪರಿವುತಂ ಅರಹನ್ತೇಹಿ, ದಿಸ್ವಾ ಚಿತ್ತಂ ಪಸಾದಯಿಂ.

೯೪. ‘‘ಸಿರಸ್ಮಿಂ ಅಞ್ಜಲಿಂ ಕತ್ವಾ, ನಮಸ್ಸಿತ್ವಾನ ಸುಬ್ಬತಂ;

ಪಸನ್ನಚಿತ್ತೋ ಸುಮನೋ, ಉತ್ತರೀಯಮದಾಸಹಂ.

೯೫. ‘‘ಉಭೋ ಹತ್ಥೇಹಿ ಪಗ್ಗಯ್ಹ, ಸಾಟಕಂ ಉಕ್ಖಿಪಿಂ ಅಹಂ;

ಯಾವತಾ ಬುದ್ಧಪರಿಸಾ, ತಾವ ಛಾದೇಸಿ ಸಾಟಕೋ.

೯೬. ‘‘ಪಿಣ್ಡಚಾರಂ ಚರನ್ತಸ್ಸ, ಮಹಾಭಿಕ್ಖುಗಣಾದಿನೋ;

ಛದಂ ಕರೋನ್ತೋ ಅಟ್ಠಾಸಿ, ಹಾಸಯನ್ತೋ ಮಮಂ ತದಾ.

೯೭. ‘‘ಘರತೋ ನಿಕ್ಖಮನ್ತಸ್ಸ, ಸಯಮ್ಭೂ ಅಗ್ಗಪುಗ್ಗಲೋ;

ವೀಥಿಯಂವ ಠಿತೋ ಸತ್ಥಾ, ಅಕಾ ಮೇ [ಅಕಾಸಿ (ಸ್ಯಾ.)] ಅನುಮೋದನಂ.

೯೮. ‘‘ಪಸನ್ನಚಿತ್ತೋ ಸುಮನೋ, ಯೋ ಮೇ ಅದಾಸಿ ಸಾಟಕಂ;

ತಮಹಂ ಕಿತ್ತಯಿಸ್ಸಾಮಿ, ಸುಣೋಥ ಮಮ ಭಾಸತೋ.

೯೯. ‘‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;

ಪಞ್ಞಾಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.

೧೦೦. ‘‘‘ದೇವಲೋಕೇ ವಸನ್ತಸ್ಸ, ಪುಞ್ಞಕಮ್ಮಸಮಙ್ಗಿನೋ;

ಸಮನ್ತಾ ಯೋಜನಸತಂ, ದುಸ್ಸಚ್ಛನ್ನಂ ಭವಿಸ್ಸತಿ.

೧೦೧. ‘‘‘ಛತ್ತಿಂಸಕ್ಖತ್ತುಂ ರಾಜಾ ಚ, ಚಕ್ಕವತ್ತೀ ಭವಿಸ್ಸತಿ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

೧೦೨. ‘‘‘ಭವೇ ಸಂಸರಮಾನಸ್ಸ, ಪುಞ್ಞಕಮ್ಮಸಮಙ್ಗಿನೋ;

ಮನಸಾ ಪತ್ಥಿತಂ ಸಬ್ಬಂ, ನಿಬ್ಬತ್ತಿಸ್ಸತಿ ತಾವದೇ.

೧೦೩. ‘‘‘ಕೋಸೇಯ್ಯಕಮ್ಬಲಿಯಾನಿ [ಕೋಸೇಯ್ಯಕಮ್ಬಲೀಯಾನಿ (ಸೀ.)], ಖೋಮಕಪ್ಪಾಸಿಕಾನಿ ಚ;

ಮಹಗ್ಘಾನಿ ಚ ದುಸ್ಸಾನಿ, ಪಟಿಲಚ್ಛತಿಯಂ ನರೋ.

೧೦೪. ‘‘‘ಮನಸಾ ಪತ್ಥಿತಂ ಸಬ್ಬಂ, ಪಟಿಲಚ್ಛತಿಯಂ ನರೋ;

ಏಕದುಸ್ಸಸ್ಸ ವಿಪಾಕಂ, ಅನುಭೋಸ್ಸತಿ ಸಬ್ಬದಾ.

೧೦೫. ‘‘‘ಸೋ ಪಚ್ಛಾ ಪಬ್ಬಜಿತ್ವಾನ, ಸುಕ್ಕಮೂಲೇನ ಚೋದಿತೋ;

ಗೋತಮಸ್ಸ ಭಗವತೋ, ಧಮ್ಮಂ ಸಚ್ಛಿಕರಿಸ್ಸತಿ’.

೧೦೬. ‘‘ಅಹೋ ಮೇ ಸುಕತಂ ಕಮ್ಮಂ, ಸಬ್ಬಞ್ಞುಸ್ಸ ಮಹೇಸಿನೋ;

ಏಕಾಹಂ ಸಾಟಕಂ ದತ್ವಾ, ಪತ್ತೋಮ್ಹಿ ಅಮತಂ ಪದಂ.

೧೦೭. ‘‘ಮಣ್ಡಪೇ ರುಕ್ಖಮೂಲೇ ವಾ, ವಸತೋ ಸುಞ್ಞಕೇ ಘರೇ;

ಧಾರೇತಿ ದುಸ್ಸಛದನಂ, ಸಮನ್ತಾ ಬ್ಯಾಮತೋ ಮಮ.

೧೦೮. ‘‘ಅವಿಞ್ಞತ್ತಂ ನಿವಾಸೇಮಿ [ಅವಿಞ್ಞತ್ತಾನಿ ಸೇವಾಮಿ (?)], ಚೀವರಂ ಪಚ್ಚಯಞ್ಚಹಂ;

ಲಾಭೀ [ಲಾಭಿಮ್ಹಿ (ಸ್ಯಾ.)] ಅನ್ನಸ್ಸ ಪಾನಸ್ಸ, ಉತ್ತರೇಯ್ಯಸ್ಸಿದಂ ಫಲಂ.

೧೦೯. ‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ವತ್ಥದಾನಸ್ಸಿದಂ ಫಲಂ.

೧೧೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಉತ್ತರೇಯ್ಯದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉತ್ತರೇಯ್ಯದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.