೭. ತಿಣಕುಟಿದಾಯಕತ್ಥೇರಅಪದಾನಂ

೭೪. ‘‘ನಗರೇ ಬನ್ಧುಮತಿಯಾ, ಅಹೋಸಿಂ ಪರಕಮ್ಮಿಕೋ;

ಪರಕಮ್ಮಾಯನೇ ಯುತ್ತೋ, ಪರಭತ್ತಂ ಅಪಸ್ಸಿತೋ.

೭೫. ‘‘ರಹೋಗತೋ ನಿಸೀದಿತ್ವಾ, ಏವಂ ಚಿನ್ತೇಸಹಂ ತದಾ;

ಬುದ್ಧೋ ಲೋಕೇ ಸಮುಪ್ಪನ್ನೋ, ಅಧಿಕಾರೋ ಚ ನತ್ಥಿ ಮೇ.

೭೬. ‘‘ಕಾಲೋ ಮೇ ಗತಿಂ [ಕಾಲೋ ಗತಿಂ ಮೇ (ಸೀ. ಸ್ಯಾ.)] ಸೋಧೇತುಂ, ಖಣೋ ಮೇ ಪಟಿಪಾದಿತೋ;

ದುಕ್ಖೋ ನಿರಯಸಮ್ಫಸ್ಸೋ, ಅಪುಞ್ಞಾನಞ್ಹಿ ಪಾಣಿನಂ.

೭೭. ‘‘ಏವಾಹಂ ಚಿನ್ತಯಿತ್ವಾನ, ಕಮ್ಮಸಾಮಿಂ ಉಪಾಗಮಿಂ;

ಏಕಾಹಂ ಕಮ್ಮಂ ಯಾಚಿತ್ವಾ, ವಿಪಿನಂ ಪಾವಿಸಿಂ ಅಹಂ.

೭೮. ‘‘ತಿಣಕಟ್ಠಞ್ಚ ವಲ್ಲಿಞ್ಚ, ಆಹರಿತ್ವಾನಹಂ ತದಾ;

ತಿದಣ್ಡಕೇ ಠಪೇತ್ವಾನ, ಅಕಂ ತಿಣಕುಟಿಂ ಅಹಂ.

೭೯. ‘‘ಸಙ್ಘಸ್ಸತ್ಥಾಯ ಕುಟಿಕಂ, ನಿಯ್ಯಾದೇತ್ವಾನ [ನಿಯ್ಯಾತೇತ್ವಾನ (ಸೀ.)] ತಂ ಅಹಂ;

ತದಹೇಯೇವ ಆಗನ್ತ್ವಾ, ಕಮ್ಮಸಾಮಿಂ ಉಪಾಗಮಿಂ.

೮೦. ‘‘ತೇನ ಕಮ್ಮೇನ ಸುಕತೇನ, ತಾವತಿಂಸಮಗಚ್ಛಹಂ;

ತತ್ಥ ಮೇ ಸುಕತಂ ಬ್ಯಮ್ಹಂ, ಕುಟಿಕಾಯ ಸುನಿಮ್ಮಿತಂ [ತಿಣಕುಟಿಕಾಯ ನಿಮ್ಮಿತಂ (ಸೀ.)].

೮೧. ‘‘ಸಹಸ್ಸಕಣ್ಡಂ ಸತಭೇಣ್ಡು, ಧಜಾಲು ಹರಿತಾಮಯಂ;

ಸತಸಹಸ್ಸನಿಯ್ಯೂಹಾ, ಬ್ಯಮ್ಹೇ ಪಾತುಭವಿಂಸು ಮೇ.

೮೨. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;

ಮಮ ಸಙ್ಕಪ್ಪಮಞ್ಞಾಯ, ಪಾಸಾದೋ ಉಪತಿಟ್ಠತಿ.

೮೩. ‘‘ಭಯಂ ವಾ ಛಮ್ಭಿತತ್ತಂ ವಾ, ಲೋಮಹಂಸೋ ನ ವಿಜ್ಜತಿ;

ತಾಸಂ ಮಮ ನ ಜಾನಾಮಿ, ತಿಣಕುಟಿಕಾಯಿದಂ [ತಿಣಕುಟಿಯಿದಂ (ಕ.)] ಫಲಂ.

೮೪. ‘‘ಸೀಹಬ್ಯಗ್ಘಾ ಚ ದೀಪೀ ಚ, ಅಚ್ಛಕೋಕತರಚ್ಛಕಾ [ತರಚ್ಛಯೋ (ಸ್ಯಾ. ಕ.)];

ಸಬ್ಬೇ ಮಂ ಪರಿವಜ್ಜೇನ್ತಿ, ತಿಣಕುಟಿಕಾಯಿದಂ ಫಲಂ.

೮೫. ‘‘ಸರೀಸಪಾ [ಸಿರಿಂಸಪಾ (ಸೀ. ಸ್ಯಾ.), ಸರಿಂಸಪಾ (ಕ.)] ಚ ಭೂತಾ ಚ, ಅಹೀ ಕುಮ್ಭಣ್ಡರಕ್ಖಸಾ;

ತೇಪಿ ಮಂ ಪರಿವಜ್ಜೇನ್ತಿ, ತಿಣಕುಟಿಕಾಯಿದಂ ಫಲಂ.

೮೬. ‘‘ನ ಪಾಪಸುಪಿನಸ್ಸಾಪಿ, ಸರಾಮಿ ದಸ್ಸನಂ ಮಮ;

ಉಪಟ್ಠಿತಾ ಸತಿ ಮಯ್ಹಂ, ತಿಣಕುಟಿಕಾಯಿದಂ ಫಲಂ.

೮೭. ‘‘ತಾಯೇವ ತಿಣಕುಟಿಕಾಯ, ಅನುಭೋತ್ವಾನ ಸಮ್ಪದಾ;

ಗೋತಮಸ್ಸ ಭಗವತೋ, ಧಮ್ಮಂ ಸಚ್ಛಿಕರಿಂ ಅಹಂ.

೮೮. ‘‘ಏಕನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ತಿಣಕುಟಿಕಾಯಿದಂ ಫಲಂ.

೮೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಣಕುಟಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಣಕುಟಿದಾಯಕತ್ಥೇರಸ್ಸಾಪದಾನಂ ಸತ್ತಮಂ.