೬. ಪಭಙ್ಕರತ್ಥೇರಅಪದಾನಂ

೫೩. ‘‘ಪದುಮುತ್ತರಭಗವತೋ, ಲೋಕಜೇಟ್ಠಸ್ಸ ತಾದಿನೋ;

ವಿಪಿನೇ ಚೇತಿಯಂ ಆಸಿ, ವಾಳಮಿಗಸಮಾಕುಲೇ.

೫೪. ‘‘ನ ಕೋಚಿ ವಿಸಹಿ ಗನ್ತುಂ, ಚೇತಿಯಂ ಅಭಿವನ್ದಿತುಂ;

ತಿಣಕಟ್ಠಲತೋನದ್ಧಂ, ಪಲುಗ್ಗಂ ಆಸಿ ಚೇತಿಯಂ.

೫೫. ‘‘ವನಕಮ್ಮಿಕೋ ತದಾ ಆಸಿಂ, ಪಿತುಮಾತುಮತೇನಹಂ [ಪಿತುಪೇತಾಮಹೇನಹಂ (ಸೀ.), ಪಿತಾಪೇತಾಮಹೇನಹಂ (ಸ್ಯಾ.)];

ಅದ್ದಸಂ ವಿಪಿನೇ ಥೂಪಂ, ಲುಗ್ಗಂ ತಿಣಲತಾಕುಲಂ.

೫೬. ‘‘ದಿಸ್ವಾನಾಹಂ ಬುದ್ಧಥೂಪಂ, ಗರುಚಿತ್ತಂ ಉಪಟ್ಠಹಿಂ;

ಬುದ್ಧಸೇಟ್ಠಸ್ಸ ಥೂಪೋಯಂ, ಪಲುಗ್ಗೋ ಅಚ್ಛತೀ ವನೇ.

೫೭. ‘‘ನಚ್ಛನ್ನಂ ನಪ್ಪತಿರೂಪಂ, ಜಾನನ್ತಸ್ಸ ಗುಣಾಗುಣಂ;

ಬುದ್ಧಥೂಪಂ ಅಸೋಧೇತ್ವಾ, ಅಞ್ಞಂ ಕಮ್ಮಂ ಪಯೋಜಯೇ.

೫೮. ‘‘ತಿಣಕಟ್ಠಞ್ಚ ವಲ್ಲಿಞ್ಚ, ಸೋಧಯಿತ್ವಾನ ಚೇತಿಯೇ;

ವನ್ದಿತ್ವಾ ಅಟ್ಠ ವಾರಾನಿ [ಅಟ್ಠ ಠಾನಾನಿ (ಕ.)], ಪಟಿಕುಟಿಕೋ ಅಗಚ್ಛಹಂ.

೫೯. ‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

೬೦. ‘‘ತತ್ಥ ಮೇ ಸುಕತಂ ಬ್ಯಮ್ಹಂ, ಸೋವಣ್ಣಂ ಸಪಭಸ್ಸರಂ;

ಸಟ್ಠಿಯೋಜನಮುಬ್ಬಿದ್ಧಂ, ತಿಂಸಯೋಜನವಿತ್ಥತಂ.

೬೧. ‘‘ತಿಸತಾನಿ ಚ ವಾರಾನಿ, ದೇವರಜ್ಜಮಕಾರಯಿಂ;

ಪಞ್ಚವೀಸತಿಕ್ಖತ್ತುಞ್ಚ, ಚಕ್ಕವತ್ತೀ ಅಹೋಸಹಂ.

೬೨. ‘‘ಭವಾಭವೇ ಸಂಸರನ್ತೋ, ಮಹಾಭೋಗಂ ಲಭಾಮಹಂ;

ಭೋಗೇ ಮೇ ಊನತಾ ನತ್ಥಿ, ಸೋಧನಾಯ ಇದಂ ಫಲಂ.

೬೩. ‘‘ಸಿವಿಕಾ ಹತ್ಥಿಖನ್ಧೇನ, ವಿಪಿನೇ ಗಚ್ಛತೋ ಮಮ;

ಯಂ ಯಂ ದಿಸಾಹಂ ಗಚ್ಛಾಮಿ, ಸರಣಂ ಸಮ್ಪತೇ [ಸಿಜ್ಝತೇ (ಕ.)] ವನಂ.

೬೪. ‘‘ಖಾಣುಂ ವಾ ಕಣ್ಟಕಂ ವಾಪಿ, ನಾಹಂ ಪಸ್ಸಾಮಿ ಚಕ್ಖುನಾ;

ಪುಞ್ಞಕಮ್ಮೇನ ಸಂಯುತ್ತೋ, ಸಯಮೇವಾಪನೀಯರೇ.

೬೫. ‘‘ಕುಟ್ಠಂ ಗಣ್ಡೋ ಕಿಲಾಸೋ ಚ, ಅಪಮಾರೋ ವಿತಚ್ಛಿಕಾ;

ದದ್ದು ಕಚ್ಛು [ಕಣ್ಡು (ಸ್ಯಾ.)] ಚ ಮೇ ನತ್ಥಿ, ಸೋಧನಾಯ ಇದಂ ಫಲಂ.

೬೬. ‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಸ್ಸ ಸೋಧನೇ [ಬುದ್ಧಥೂಪಮ್ಹಿ ಸೋಧಿತೇ (ಸ್ಯಾ.)];

ನಾಭಿಜಾನಾಮಿ ಮೇ ಕಾಯೇ, ಜಾತಂ ಪಿಳಕಬಿನ್ದುಕಂ.

೬೭. ‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಮ್ಹಿ ಸೋಧಿತೇ [ಸಬ್ಬತ್ಥಪಿ ಏವಮೇವ ದಿಸ್ಸತಿ, ತಥಾ ಉಪರಿಪಿ];

ದುವೇ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ.

೬೮. ‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಮ್ಹಿ ಸೋಧಿತೇ;

ಸುವಣ್ಣವಣ್ಣೋ ಸಬ್ಬತ್ಥ, ಸಪ್ಪಭಾಸೋ ಭವಾಮಹಂ.

೬೯. ‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಮ್ಹಿ ಸೋಧಿತೇ;

ಅಮನಾಪಂ ವಿವಜ್ಜತಿ, ಮನಾಪಂ ಉಪತಿಟ್ಠತಿ.

೭೦. ‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಮ್ಹಿ ಸೋಧಿತೇ;

ವಿಸುದ್ಧಂ ಹೋತಿ ಮೇ ಚಿತ್ತಂ, ಏಕಗ್ಗಂ ಸುಸಮಾಹಿತಂ.

೭೧. ‘‘ಅಞ್ಞಮ್ಪಿ ಮೇ ಅಚ್ಛರಿಯಂ, ಬುದ್ಧಥೂಪಮ್ಹಿ ಸೋಧಿತೇ;

ಏಕಾಸನೇ ನಿಸೀದಿತ್ವಾ, ಅರಹತ್ತಮಪಾಪುಣಿಂ.

೭೨. ‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಸೋಧನಾಯ ಇದಂ ಫಲಂ.

೭೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಭಙ್ಕರೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಭಙ್ಕರತ್ಥೇರಸ್ಸಾಪದಾನಂ ಛಟ್ಠಂ.