೯. ಪುಪ್ಫಚ್ಛತ್ತಿಯತ್ಥೇರಅಪದಾನಂ

೭೩. ‘‘ಸಿದ್ಧತ್ಥಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;

ಸಚ್ಚಂ ಪಕಾಸಯನ್ತಸ್ಸ, ನಿಬ್ಬಾಪೇನ್ತಸ್ಸ ಪಾಣಿನೋ.

೭೪. ‘‘ಜಲಜಂ ಆಹರಿತ್ವಾನ, ಸತಪತ್ತಂ ಮನೋರಮಂ;

ಪುಪ್ಫಸ್ಸ ಛತ್ತಂ ಕತ್ವಾನ, ಬುದ್ಧಸ್ಸ ಅಭಿರೋಪಯಿಂ.

೭೫. ‘‘ಸಿದ್ಧತ್ಥೋ ಚ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಂ ಗಾಥಂ ಅಭಾಸಥ.

೭೬. ‘‘‘ಯೋ ಮೇ ಚಿತ್ತಂ ಪಸಾದೇತ್ವಾ, ಪುಪ್ಫಚ್ಛತ್ತಂ ಅಧಾರಯಿಂ;

ತೇನ ಚಿತ್ತಪ್ಪಸಾದೇನ, ದುಗ್ಗತಿಂ ಸೋ ನ ಗಚ್ಛತಿ’.

೭೭. ‘‘ಇದಂ ವತ್ವಾನ ಸಮ್ಬುದ್ಧೋ, ಸಿದ್ಧತ್ಥೋ ಲೋಕನಾಯಕೋ;

ಉಯ್ಯೋಜೇತ್ವಾನ ಪರಿಸಂ, ವೇಹಾಸಂ ನಭಮುಗ್ಗಮಿ.

೭೮. ‘‘ವುಟ್ಠಿತೇ ನರದೇವಮ್ಹಿ, ಸೇತಚ್ಛತ್ತಮ್ಪಿ ವುಟ್ಠಹಿ;

ಪುರತೋ ಬುದ್ಧಸೇಟ್ಠಸ್ಸ, ಗಚ್ಛತಿ ಛತ್ತಮುತ್ತಮಂ.

೭೯. ‘‘ಚತುನ್ನವುತಿತೋ ಕಪ್ಪೇ, ಯಂ ಛತ್ತಂ ಅಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಪುಪ್ಫಚ್ಛತ್ತಸ್ಸಿದಂ ಫಲಂ.

೮೦. ‘‘ಚತುಸತ್ತತಿಕಪ್ಪಮ್ಹಿ, ಅಟ್ಠ ಜಲಸಿಖಾ ಅಹೂ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೮೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪುಪ್ಫಚ್ಛತ್ತಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪುಪ್ಫಚ್ಛತ್ತಿಯತ್ಥೇರಸ್ಸಾಪದಾನಂ ನವಮಂ.