೩೩. ಉಮಾಪುಪ್ಫಿಯವಗ್ಗೋ

೧. ಉಮಾಪುಪ್ಫಿಯತ್ಥೇರಅಪದಾನಂ

೧. ‘‘ಸಮಾಹಿತಂ ಸಮಾಪನ್ನಂ, ಸಿದ್ಧತ್ಥಮಪರಾಜಿತಂ;

ಸಮಾಧಿನಾ ಉಪವಿಟ್ಠಂ, ಅದ್ದಸಾಹಂ ನರುತ್ತಮಂ.

೨. ‘‘ಉಮಾಪುಪ್ಫಂ ಗಹೇತ್ವಾನ, ಬುದ್ಧಸ್ಸ ಅಭಿರೋಪಯಿಂ;

ಸಬ್ಬಪುಪ್ಫಾ ಏಕಸೀಸಾ, ಉದ್ಧಂವಣ್ಟಾ ಅಧೋಮುಖಾ.

೩. ‘‘ಸುಚಿತ್ತಾ ವಿಯ ತಿಟ್ಠನ್ತೇ, ಆಕಾಸೇ ಪುಪ್ಫಸನ್ಥರಾ;

ತೇನ ಚಿತ್ತಪ್ಪಸಾದೇನ, ತುಸಿತಂ ಉಪಪಜ್ಜಹಂ.

೪. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೫. ‘‘ಪಞ್ಚಪಞ್ಞಾಸಿತೋ ಕಪ್ಪೇ, ಏಕೋ ಆಸಿಂ ಮಹೀಪತಿ;

ಸಮನ್ತಛದನೋ ನಾಮ, ಚಕ್ಕವತ್ತೀ ಮಹಬ್ಬಲೋ.

೬. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ.

ಇತ್ಥಂ ಸುದಂ ಆಯಸ್ಮಾ ಉಮಾಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉಮಾಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.

೨. ಪುಲಿನಪೂಜಕತ್ಥೇರಅಪದಾನಂ

೭. ‘‘ಕಕುಧಂ ವಿಲಸನ್ತಂವ, ನಿಸಭಾಜಾನಿಯಂ ಯಥಾ;

ಓಸಧಿಂವ ವಿರೋಚನ್ತಂ, ಓಭಾಸನ್ತಂ ನರಾಸಭಂ.

೮. ‘‘ಅಞ್ಜಲಿಂ ಪಗ್ಗಹೇತ್ವಾನ, ಅವನ್ದಿಂ ಸತ್ಥುನೋ ಅಹಂ;

ಸತ್ಥಾರಂ ಪರಿವಣ್ಣೇಸಿಂ, ಸಕಕಮ್ಮೇನ ತೋಸಯಿಂ [ತೋಸಿತೋ (ಸೀ.)].

೯. ‘‘ಸುಸುದ್ಧಂ ಪುಲಿನಂ ಗಯ್ಹ, ಗತಮಗ್ಗೇ ಸಮೋಕಿರಿಂ;

ಉಚ್ಛಙ್ಗೇನ ಗಹೇತ್ವಾನ, ವಿಪಸ್ಸಿಸ್ಸ ಮಹೇಸಿನೋ.

೧೦. ‘‘ತತೋ ಉಪಡ್ಢಪುಲಿನಂ, ವಿಪ್ಪಸನ್ನೇನ ಚೇತಸಾ;

ದಿವಾವಿಹಾರೇ ಓಸಿಞ್ಚಿಂ, ದ್ವಿಪದಿನ್ದಸ್ಸ ತಾದಿನೋ.

೧೧. ‘‘ಏಕನವುತಿತೋ ಕಪ್ಪೇ, ಪುಲಿನಂ ಯಮಸಿಞ್ಚಹಂ;

ದುಗ್ಗತಿಂ ನಾಭಿಜಾನಾಮಿ, ಪುಲಿನಸ್ಸ ಇದಂ ಫಲಂ.

೧೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪುಲಿನಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪುಲಿನಪೂಜಕತ್ಥೇರಸ್ಸಾಪದಾನಂ ದುತಿಯಂ.

೩. ಹಾಸಜನಕತ್ಥೇರಅಪದಾನಂ

೧೩. ‘‘ದುಮಗ್ಗೇ ಪಂಸುಕೂಲಕಂ [ಪಂಸುಕೂಲಿಕಂ (ಸ್ಯಾ. ಕ.)], ಲಗ್ಗಂ ದಿಸ್ವಾನ ಸತ್ಥುನೋ;

ಅಞ್ಜಲಿಂ ಪಗ್ಗಹೇತ್ವಾನ, ಭಿಯ್ಯೋ ಉಚ್ಚಾರಿತಂ ಮಯಾ.

೧೪. ‘‘ದೂರತೋ ಪನ ದಿಸ್ವಾನ [ಪತಿದಿಸ್ವಾನ (ಸೀ. ಸ್ಯಾ.)], ಹಾಸೋ ಮೇ ಉದಪಜ್ಜಥ;

ಅಞ್ಜಲಿಂ ಪಗ್ಗಹೇತ್ವಾನ, ಭಿಯ್ಯೋ ಚಿತ್ತಂ ಪಸಾದಯಿಂ.

೧೫. ‘‘ಏಕನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.

೧೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಹಾಸಜನಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಹಾಸಜನಕತ್ಥೇರಸ್ಸಾಪದಾನಂ ತತಿಯಂ.

೪. ಯಞ್ಞಸಾಮಿಕತ್ಥೇರಅಪದಾನಂ

೧೭. ‘‘ಜಾತಿಯಾ ಸತ್ತವಸ್ಸೋಹಂ, ಅಹೋಸಿಂ ಮನ್ತಪಾರಗೂ;

ಕುಲವತ್ತಂ [ಕುಲವಂಸಂ (ಸೀ. ಸ್ಯಾ.)] ಅಧಾರೇಸಿಂ, ಯಞ್ಞೋ ಉಸ್ಸಾಹಿತೋ ಮಯಾ.

೧೮. ‘‘ಚುಲ್ಲಾಸೀತಿಸಹಸ್ಸಾನಿ, ಪಸೂ ಹಞ್ಞನ್ತಿ ಮೇ ತದಾ;

ಸಾರಥಮ್ಭುಪನೀತಾನಿ [ತಾರಸ್ಮೀಹಿ ಉಪನೀತಾನಿ (ಕ.), ಸಾರಸ್ಮಿಂಹಿ ಉಪನೀತಾನಿ (ಸ್ಯಾ.)], ಯಞ್ಞತ್ಥಾಯ ಉಪಟ್ಠಿತಾ.

೧೯. ‘‘ಉಕ್ಕಾಮುಖಪಹಟ್ಠೋವ, ಖದಿರಙ್ಗಾರಸನ್ನಿಭೋ;

ಉದಯನ್ತೋವ ಸೂರಿಯೋ, ಪುಣ್ಣಮಾಯೇವ [ಪುಣ್ಣಮಾಸೇವ (ಸೀ.)] ಚನ್ದಿಮಾ.

೨೦. ‘‘ಸಿದ್ಧತ್ಥೋ ಸಬ್ಬಸಿದ್ಧತ್ಥೋ, ತಿಲೋಕಮಹಿತೋ ಹಿತೋ;

ಉಪಗನ್ತ್ವಾನ ಸಮ್ಬುದ್ಧೋ, ಇದಂ ವಚನಮಬ್ರವಿ.

೨೧. ‘‘‘ಅಹಿಂಸಾ ಸಬ್ಬಪಾಣೀನಂ, ಕುಮಾರ ಮಮ ರುಚ್ಚತಿ;

ಥೇಯ್ಯಾ ಚ ಅತಿಚಾರಾ ಚ, ಮಜ್ಜಪಾನಾ ಚ ಆರತಿ.

೨೨. ‘‘‘ರತಿ ಚ ಸಮಚರಿಯಾಯ, ಬಾಹುಸಚ್ಚಂ ಕತಞ್ಞುತಾ;

ದಿಟ್ಠೇ ಧಮ್ಮೇ ಪರತ್ಥ ಚ, ಧಮ್ಮಾ ಏತೇ ಪಸಂಸಿಯಾ.

೨೩. ‘‘‘ಏತೇ ಧಮ್ಮೇ ಭಾವಯಿತ್ವಾ, ಸಬ್ಬಸತ್ತಹಿತೇ ರತೋ [ಹಿತೇಸಿತೋ (ಕ.)];

ಬುದ್ಧೇ ಚಿತ್ತಂ ಪಸಾದೇತ್ವಾ, ಭಾವೇಹಿ ಮಗ್ಗಮುತ್ತಮಂ’.

೨೪. ‘‘ಇದಂ ವತ್ವಾನ ಸಬ್ಬಞ್ಞೂ, ಲೋಕಜೇಟ್ಠೋ ನರಾಸಭೋ;

ಮಮೇವಂ ಅನುಸಾಸಿತ್ವಾ, ವೇಹಾಸಂ ಉಗ್ಗತೋ ಗತೋ.

೨೫. ‘‘ಪುಬ್ಬೇ ಚಿತ್ತಂ ವಿಸೋಧೇತ್ವಾ, ಪಚ್ಛಾ ಚಿತ್ತಂ ಪಸಾದಯಿಂ;

ತೇನ ಚಿತ್ತಪ್ಪಸಾದೇನ, ತುಸಿತಂ ಉಪಪಜ್ಜಹಂ.

೨೬. ‘‘ಚತುನ್ನವುತಿತೋ ಕಪ್ಪೇ, ಯದಾ ಚಿತ್ತಂ ಪಸಾದಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.

೨೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಯಞ್ಞಸಾಮಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಯಞ್ಞಸಾಮಿಕತ್ಥೇರಸ್ಸಾಪದಾನಂ ಚತುತ್ಥಂ.

೫. ನಿಮಿತ್ತಸಞ್ಞಕತ್ಥೇರಅಪದಾನಂ

೨೮. ‘‘ಚನ್ದಭಾಗಾನದೀತೀರೇ, ವಸಾಮಿ ಅಸ್ಸಮೇ ಅಹಂ;

ಸುವಣ್ಣಮಿಗಮದ್ದಕ್ಖಿಂ, ಚರನ್ತಂ ವಿಪಿನೇ ಅಹಂ.

೨೯. ‘‘ಮಿಗೇ ಚಿತ್ತಂ ಪಸಾದೇತ್ವಾ, ಲೋಕಜೇಟ್ಠಂ ಅನುಸ್ಸರಿಂ;

ತೇನ ಚಿತ್ತಪ್ಪಸಾದೇನ, ಅಞ್ಞೇ ಬುದ್ಧೇ ಅನುಸ್ಸರಿಂ.

೩೦. ‘‘ಅಬ್ಭತೀತಾ ಚ ಯೇ ಬುದ್ಧಾ, ವತ್ತಮಾನಾ ಅನಾಗತಾ;

ಏವಮೇವಂ ವಿರೋಚನ್ತಿ, ಮಿಗರಾಜಾವ ತೇ ತಯೋ.

೩೧. ‘‘ಚತುನ್ನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.

೩೨. ‘‘ಸತ್ತವೀಸೇ ಇತೋ ಕಪ್ಪೇ, ಏಕೋ ಆಸಿಂ ಮಹೀಪತಿ;

ಅರಞ್ಞಸತ್ಥೋ ನಾಮೇನ, ಚಕ್ಕವತ್ತೀ ಮಹಬ್ಬಲೋ.

೩೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನಿಮಿತ್ತಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ನಿಮಿತ್ತಸಞ್ಞಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಅನ್ನಸಂಸಾವಕತ್ಥೇರಅಪದಾನಂ

೩೪. ‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಗಚ್ಛನ್ತಂ ಅನ್ತರಾಪಣೇ;

ಕಞ್ಚನಗ್ಘಿಯಸಙ್ಕಾಸಂ, ಬಾತ್ತಿಂಸವರಲಕ್ಖಣಂ.

೩೫. ‘‘ಸಿದ್ಧತ್ಥಂ ಸಬ್ಬಸಿದ್ಧತ್ಥಂ, ಅನೇಜಂ ಅಪರಾಜಿತಂ;

ಸಮ್ಬುದ್ಧಂ ಅತಿನಾಮೇತ್ವಾ, ಭೋಜಯಿಂ ತಂ ಮಹಾಮುನಿಂ.

೩೬. ‘‘ಮುನಿ ಕಾರುಣಿಕೋ ಲೋಕೇ, ಓಭಾಸಯಿ ಮಮಂ ತದಾ;

ಬುದ್ಧೇ ಚಿತ್ತಂ ಪಸಾದೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.

೩೭. ‘‘ಚತುನ್ನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಭಿಕ್ಖಾದಾನಸ್ಸಿದಂ ಫಲಂ.

೩೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅನ್ನಸಂಸಾವಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಅನ್ನಸಂಸಾವಕತ್ಥೇರಸ್ಸಾಪದಾನಂ ಛಟ್ಠಂ.

೭. ನಿಗ್ಗುಣ್ಡಿಪುಪ್ಫಿಯತ್ಥೇರಅಪದಾನಂ

೩೯. ‘‘ಯದಾ ದೇವೋ ದೇವಕಾಯಾ, ಚವತೇ ಆಯುಸಙ್ಖಯಾ;

ತಯೋ ಸದ್ದಾ ನಿಚ್ಛರನ್ತಿ, ದೇವಾನಂ ಅನುಮೋದತಂ.

೪೦. ‘‘‘ಇತೋ ಭೋ ಸುಗತಿಂ ಗಚ್ಛ, ಮನುಸ್ಸಾನಂ ಸಹಬ್ಯತಂ;

ಮನುಸ್ಸಭೂತೋ ಸದ್ಧಮ್ಮೇ, ಲಭ ಸದ್ಧಂ ಅನುತ್ತರಂ.

೪೧. ‘‘‘ಸಾ ತೇ ಸದ್ಧಾ ನಿವಿಟ್ಠಾಸ್ಸ, ಮೂಲಜಾತಾ ಪತಿಟ್ಠಿತಾ;

ಯಾವಜೀವಂ ಅಸಂಹೀರಾ, ಸದ್ಧಮ್ಮೇ ಸುಪ್ಪವೇದಿತೇ.

೪೨. ‘‘‘ಕಾಯೇನ ಕುಸಲಂ ಕತ್ವಾ, ವಾಚಾಯ ಕುಸಲಂ ಬಹುಂ;

ಮನಸಾ ಕುಸಲಂ ಕತ್ವಾ, ಅಬ್ಯಾಪಜ್ಜಂ ನಿರೂಪಧಿಂ.

೪೩. ‘‘‘ತತೋ ಓಪಧಿಕಂ ಪುಞ್ಞಂ, ಕತ್ವಾ ದಾನೇನ ತಂ ಬಹುಂ;

ಅಞ್ಞೇಪಿ ಮಚ್ಚೇ ಸದ್ಧಮ್ಮೇ, ಬ್ರಹ್ಮಚರಿಯೇ ನಿವೇಸಯ’.

೪೪. ‘‘ಇಮಾಯ ಅನುಕಮ್ಪಾಯ, ದೇವಾದೇವಂ ಯದಾ ವಿದೂ;

ಚವನ್ತಂ ಅನುಮೋದನ್ತಿ, ಏಹಿ ದೇವ ಪುನಪ್ಪುನಂ [ದೇವಪುರಂ ಪುನ (ಸೀ.)].

೪೫. ‘‘ಸಂವೇಗೋ ಮೇ [ಸಂವಿಗ್ಗೋಹಂ (ಸ್ಯಾ.)] ತದಾ ಆಸಿ, ದೇವಸಙ್ಘೇ ಸಮಾಗತೇ;

ಕಂಸು ನಾಮ ಅಹಂ ಯೋನಿಂ, ಗಮಿಸ್ಸಾಮಿ ಇತೋ ಚುತೋ.

೪೬. ‘‘ಮಮ ಸಂವೇಗಮಞ್ಞಾಯ, ಸಮಣೋ ಭಾವಿತಿನ್ದ್ರಿಯೋ;

ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಮಮ ಸನ್ತಿಕಂ.

೪೭. ‘‘ಸುಮನೋ ನಾಮ ನಾಮೇನ, ಪದುಮುತ್ತರಸಾವಕೋ;

ಅತ್ಥಧಮ್ಮಾನುಸಾಸಿತ್ವಾ, ಸಂವೇಜೇಸಿ ಮಮಂ ತದಾ.

ದ್ವಾದಸಮಂ ಭಾಣವಾರಂ.

೪೮. ‘‘ತಸ್ಸಾಹಂ ವಚನಂ ಸುತ್ವಾ, ಬುದ್ಧೇ ಚಿತ್ತಂ ಪಸಾದಯಿಂ;

ತಂ ಧೀರಂ ಅಭಿವಾದೇತ್ವಾ, ತತ್ಥ ಕಾಲಂಕತೋ ಅಹಂ.

೪೯. ‘‘ಉಪಪಜ್ಜಿಂ ಸ [ಉಪಪಜ್ಜಿಸ್ಸಂ (ಸೀ.)] ತತ್ಥೇವ, ಸುಕ್ಕಮೂಲೇನ ಚೋದಿತೋ;

ವಸನ್ತೋ ಮಾತುಕುಚ್ಛಿಮ್ಹಿ, ಪುನ ಧಾರೇತಿ ಮಾತುಯಾ.

೫೦. ‘‘ತಮ್ಹಾ ಕಾಯಾ ಚವಿತ್ವಾನ, ತಿದಸೇ ಉಪಪಜ್ಜಹಂ;

ಏತ್ಥನ್ತರೇ ನ ಪಸ್ಸಾಮಿ, ದೋಮನಸ್ಸಮಹಂ ತದಾ.

೫೧. ‘‘ತಾವತಿಂಸಾ ಚವಿತ್ವಾನ, ಮಾತುಕುಚ್ಛಿಂ ಸಮೋಕ್ಕಮಿಂ;

ನಿಕ್ಖಮಿತ್ವಾನ ಕುಚ್ಛಿಮ್ಹಾ, ಕಣ್ಹಸುಕ್ಕಂ ಅಜಾನಹಂ.

೫೨. ‘‘ಜಾತಿಯಾ ಸತ್ತವಸ್ಸೋವ [ಜಾತಿಯಾ ಸತ್ತವಸ್ಸೇನ (ಸ್ಯಾ.)], ಆರಾಮಂ ಪಾವಿಸಿಂ ಅಹಂ;

ಗೋತಮಸ್ಸ ಭಗವತೋ, ಸಕ್ಯಪುತ್ತಸ್ಸ ತಾದಿನೋ.

೫೩. ‘‘ವಿತ್ಥಾರಿಕೇ [ವಿತ್ಥಾರಿತೇ (ಸೀ. ಕ.)] ಪಾವಚನೇ, ಬಾಹುಜಞ್ಞಮ್ಹಿ ಸಾಸನೇ;

ಅದ್ದಸಂ ಸಾಸನಕರೇ, ಭಿಕ್ಖವೋ ತತ್ಥ ಸತ್ಥುನೋ.

೫೪. ‘‘ಸಾವತ್ಥಿ ನಾಮ ನಗರಂ, ರಾಜಾ ತತ್ಥಾಸಿ ಕೋಸಲೋ;

ರಥೇನ ನಾಗಯುತ್ತೇನ, ಉಪೇಸಿ ಬೋಧಿಮುತ್ತಮಂ.

೫೫. ‘‘ತಸ್ಸಾಹಂ ನಾಗಂ ದಿಸ್ವಾನ, ಪುಬ್ಬಕಮ್ಮಂ ಅನುಸ್ಸರಿಂ;

ಅಞ್ಜಲಿಂ ಪಗ್ಗಹೇತ್ವಾನ, ಸಮಯಂ ಅಗಮಾಸಹಂ.

೫೬. ‘‘ಜಾತಿಯಾ ಸತ್ತವಸ್ಸೋವ, ಪಬ್ಬಜಿಂ ಅನಗಾರಿಯಂ;

ಯೋ ಸೋ ಬುದ್ಧಂ ಉಪಟ್ಠಾಸಿ, ಆನನ್ದೋ ನಾಮ ಸಾವಕೋ.

೫೭. ‘‘ಗತಿಮಾ ಧಿತಿಮಾ ಚೇವ, ಸತಿಮಾ ಚ ಬಹುಸ್ಸುತೋ;

ರಞ್ಞೋ ಚಿತ್ತಂ ಪಸಾದೇನ್ತೋ, ನಿಯ್ಯಾದೇಸಿ ಮಹಾಜುತಿ.

೫೮. ‘‘ತಸ್ಸಾಹಂ ಧಮ್ಮಂ ಸುತ್ವಾನ, ಪುಬ್ಬಕಮ್ಮಂ ಅನುಸ್ಸರಿಂ;

ತತ್ಥೇವ ಠಿತಕೋ ಸನ್ತೋ, ಅರಹತ್ತಮಪಾಪುಣಿಂ.

೫೯. ‘‘ಏಕಂಸಂ ಚೀವರಂ ಕತ್ವಾ, ಸಿರೇ ಕತ್ವಾನ ಅಞ್ಜಲಿಂ;

ಸಮ್ಬುದ್ಧಂ ಅಭಿವಾದೇತ್ವಾ, ಇಮಂ ವಾಚಂ ಉದೀರಯಿಂ.

೬೦. ‘‘‘ಪದುಮುತ್ತರಬುದ್ಧಸ್ಸ, ದ್ವಿಪದಿನ್ದಸ್ಸ ಸತ್ಥುನೋ;

ನಿಗ್ಗುಣ್ಡಿಪುಪ್ಫಂ ಪಗ್ಗಯ್ಹ, ಸೀಹಾಸನೇ ಠಪೇಸಹಂ.

೬೧. ‘‘‘ತೇನ ಕಮ್ಮೇನ ದ್ವಿಪದಿನ್ದ, ಲೋಕಜೇಟ್ಠ ನರಾಸಭ;

ಪತ್ತೋಮ್ಹಿ ಅಚಲಂ ಠಾನಂ, ಹಿತ್ವಾ ಜಯಪರಾಜಯಂ’.

೬೨. ‘‘ಪಞ್ಚವೀಸಸಹಸ್ಸಮ್ಹಿ, ಕಪ್ಪಾನಂ ಮನುಜಾಧಿಪಾ;

ಅಬ್ಬುದನಿರಬ್ಬುದಾನಿ, ಅಟ್ಠಟ್ಠಾಸಿಂಸು ಖತ್ತಿಯಾ.

೬೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನಿಗ್ಗುಣ್ಡಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ನಿಗ್ಗುಣ್ಡಿಪುಪ್ಫಿಯತ್ಥೇರಸ್ಸಾಪದಾನಂ ಸತ್ತಮಂ.

೮. ಸುಮನಾವೇಳಿಯತ್ಥೇರಅಪದಾನಂ

೬೪. ‘‘ವೇಸ್ಸಭುಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;

ಸಬ್ಬೇ ಜನಾ ಸಮಾಗಮ್ಮ, ಮಹಾಪೂಜಂ ಕರೋನ್ತಿ ತೇ.

೬೫. ‘‘ಸುಧಾಯ ಪಿಣ್ಡಂ ಕತ್ವಾನ, ಆವೇಳಂ ಸುಮನಾಯಹಂ;

ಸೀಹಾಸನಸ್ಸ ಪುರತೋ, ಅಭಿರೋಪೇಸಹಂ ತದಾ.

೬೬. ‘‘ಸಬ್ಬೇ ಜನಾ ಸಮಾಗಮ್ಮ, ಪೇಕ್ಖನ್ತಿ ಪುಪ್ಫಮುತ್ತಮಂ;

ಕೇನಿದಂ ಪೂಜಿತಂ ಪುಪ್ಫಂ, ಬುದ್ಧಸೇಟ್ಠಸ್ಸ ತಾದಿನೋ.