೧೦. ಸಪರಿವಾರಛತ್ತದಾಯಕತ್ಥೇರಅಪದಾನಂ

೮೨. ‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಆಕಾಸೇ ಜಲವುಟ್ಠೀವ ವಸ್ಸತೇ [ವಸ್ಸತಿ (ಸೀ. ಸ್ಯಾ.), ವಸ್ಸೇತಿ (?)] ಧಮ್ಮವುಟ್ಠಿಯಾ.

೮೩. ‘‘ತಮದ್ದಸಾಸಿಂ ಸಮ್ಬುದ್ಧಂ, ದೇಸೇನ್ತಂ ಅಮತಂ ಪದಂ;

ಸಕಂ ಚಿತ್ತಂ ಪಸಾದೇತ್ವಾ, ಅಗಮಾಸಿಂ ಸಕಂ ಘರಂ.

೮೪. ‘‘ಛತ್ತಂ ಅಲಙ್ಕತಂ ಗಯ್ಹ, ಉಪಗಚ್ಛಿಂ ನರುತ್ತಮಂ;

ಹಟ್ಠೋ ಹಟ್ಠೇನ ಚಿತ್ತೇನ, ಆಕಾಸೇ ಉಕ್ಖಿಪಿಂ ಅಹಂ.

೮೫. ‘‘ಸುಸಙ್ಗಹಿತಯಾನಂವ, ದನ್ತೋವ ಸಾವಕುತ್ತಮೋ;

ಉಪಗನ್ತ್ವಾನ ಸಮ್ಬುದ್ಧಂ, ಮತ್ಥಕೇ ಸಮ್ಪತಿಟ್ಠಹಿ.

೮೬. ‘‘ಅನುಕಮ್ಪಕೋ ಕಾರುಣಿಕೋ, ಬುದ್ಧೋ ಲೋಕಗ್ಗನಾಯಕೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ.

೮೭. ‘‘‘ಯೇನ ಛತ್ತಮಿದಂ ದಿನ್ನಂ, ಅಲಙ್ಕತಂ ಮನೋರಮಂ;

ತೇನ ಚಿತ್ತಪ್ಪಸಾದೇನ, ದುಗ್ಗತಿಂ ಸೋ ನ ಗಚ್ಛತಿ.

೮೮. ‘‘‘ಸತ್ತಕ್ಖತ್ತುಞ್ಚ ದೇವೇಸು, ದೇವರಜ್ಜಂ ಕರಿಸ್ಸತಿ;

ಬಾತ್ತಿಂಸಕ್ಖತ್ತುಞ್ಚ ರಾಜಾ, ಚಕ್ಕವತ್ತೀ ಭವಿಸ್ಸತಿ.

೮೯. ‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೯೦. ‘‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ’.

೯೧. ‘‘ಬುದ್ಧಸ್ಸ ಗಿರಮಞ್ಞಾಯ, ವಾಚಾಸಭಿಮುದೀರಿತಂ;

ಪಸನ್ನಚಿತ್ತೋ ಸುಮನೋ, ಭಿಯ್ಯೋ ಹಾಸಂ ಜನೇಸಹಂ.

೯೨. ‘‘ಜಹಿತ್ವಾ ಮಾನುಸಂ ಯೋನಿಂ, ದಿಬ್ಬಂ ಯೋನಿಂ [ದೇವಯೋನಿಂ (ಸೀ.), ದಿಬ್ಬಯೋನಿಂ (ಸ್ಯಾ.)] ಮಜ್ಝಗಂ;

ವಿಮಾನಮುತ್ತಮಂ ಮಯ್ಹಂ, ಅಬ್ಭುಗ್ಗತಂ ಮನೋರಮಂ.

೯೩. ‘‘ವಿಮಾನಾ ನಿಕ್ಖಮನ್ತಸ್ಸ, ಸೇತಚ್ಛತ್ತಂ ಧರೀಯತಿ;

ತದಾ ಸಞ್ಞಂ ಪಟಿಲಭಿಂ, ಪುಬ್ಬಕಮ್ಮಸ್ಸಿದಂ ಫಲಂ.

೯೪. ‘‘ದೇವಲೋಕಾ ಚವಿತ್ವಾನ, ಮನುಸ್ಸತ್ತಞ್ಚ ಆಗಮಿಂ;

ಛತ್ತಿಂಸಕ್ಖತ್ತುಂ ಚಕ್ಕವತ್ತೀ, ಸತ್ತಕಪ್ಪಸತಮ್ಹಿತೋ.

೯೫. ‘‘ತಮ್ಹಾ ಕಾಯಾ ಚವಿತ್ವಾನ, ಆಗಚ್ಛಿಂ [ಅಗಞ್ಛಿಂ (?)] ತಿದಸಂ ಪುರಂ;

ಸಂಸರಿತ್ವಾನುಪುಬ್ಬೇನ, ಮಾನುಸಂ ಪುನರಾಗಮಿಂ.

೯೬. ‘‘ಓಕ್ಕನ್ತಂ ಮಾತುಕುಚ್ಛಿಂ ಮಂ, ಸೇತ್ತಚ್ಛತ್ತಂ ಅಧಾರಯುಂ;

ಜಾತಿಯಾ ಸತ್ತವಸ್ಸೋಹಂ, ಪಬ್ಬಜಿಂ ಅನಗಾರಿಯಂ.

೯೭. ‘‘ಸುನನ್ದೋ ನಾಮ ನಾಮೇನ, ಬ್ರಾಹ್ಮಣೋ ಮನ್ತಪಾರಗೂ;

ಫಲಿಕಂ ಛತ್ತಮಾದಾಯ, ಸಾವಕಗ್ಗಸ್ಸ ಸೋ ತದಾ.

೯೮. ‘‘ಅನುಮೋದಿ ಮಹಾವೀರೋ, ಸಾರಿಪುತ್ತೋ ಮಹಾಕಥೀ;

ಸುತ್ವಾನುಮೋದನಂ ತಸ್ಸ, ಪುಬ್ಬಕಮ್ಮಮನುಸ್ಸರಿಂ.

೯೯. ‘‘ಅಞ್ಜಲಿಂ ಪಗ್ಗಹೇತ್ವಾನ, ಸಕಂ ಚಿತ್ತಂ ಪಸಾದಯಿಂ;

ಸರಿತ್ವಾ ಪುರಿಮಂ ಕಮ್ಮಂ, ಅರಹತ್ತಮಪಾಪುಣಿಂ.

೧೦೦. ‘‘ಉಟ್ಠಾಯ ಆಸನಾ ತಮ್ಹಾ, ಸಿರೇ ಕತ್ವಾನ ಅಞ್ಜಲಿಂ;

ಸಮ್ಬುದ್ಧಂ ಅಭಿವಾದೇತ್ವಾ, ಇಮಂ ವಾಚಂ ಉದೀರಿಯಿಂ.

೧೦೧. ‘‘ಸತಸಹಸ್ಸಿತೋ ಕಪ್ಪೇ, ಬುದ್ಧೋ ಲೋಕೇ ಅನುತ್ತರೋ;

ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ.

೧೦೨. ‘‘ತಸ್ಸ ಛತ್ತಂ ಮಯಾ ದಿನ್ನಂ, ವಿಚಿತ್ತಂ ಸಮಲಙ್ಕತಂ;

ಉಭೋ ಹತ್ಥೇಹಿ ಪಗ್ಗಣ್ಹಿ, ಸಯಮ್ಭೂ ಅಗ್ಗಪುಗ್ಗಲೋ.

೧೦೩. ‘‘ಅಹೋ ಬುದ್ಧೋ ಅಹೋ ಧಮ್ಮೋ, ಅಹೋ ನೋ ಸತ್ಥುಸಮ್ಪದಾ;

ಏಕಚ್ಛತ್ತಸ್ಸ ದಾನೇನ, ದುಗ್ಗತಿಂ ನುಪಪಜ್ಜಹಂ.

೧೦೪. ‘‘ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೧೦೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಪರಿವಾರಛತ್ತದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಪರಿವಾರಛತ್ತದಾಯಕತ್ಥೇರಸ್ಸಾಪದಾನಂ ದಸಮಂ.

ಉಮಾಪುಪ್ಫಿಯವಗ್ಗೋ ತೇತ್ತಿಂಸತಿಮೋ.